ເລີ່ມແຕ່ເດືອນ 3 ປີນີ້, ກອງທຶນກຸສົນ “ປຶ້ມສຽງ” ທີ່ສະຫງວນໃຫ້ຄົນພິການຕານະຄອນໂຮ່ຈິມິນໄດ້ສົມທົບກັບບໍລິສັດ Microsoft ຫວຽດນາມປະຕິບັດໂຄງການ “ ສອນຄອມພິວເຕີໂດຍບໍ່ເສຍຄ່າໃຫ້ຄົນພິການຕາທີ່ທຸກຍາກ ” ໃນບໍລິເວນນະຄອນ. ນີ້ແມ່ນຊຸດຮຽນຄອມພິວເຕີທຳອິດໃຫ້ແກ່ຄົນພິການຕາຖືກຈັດຂຶ້ນໂດຍມີການໜູນຊ່ວຍຊອບແວຈາກບັນດາຜູ້ຊ່ຽວຊານເຕັກໂນໂລຢີຂໍ້ມູນຂ່າວສານ. ເຂົ້າຮ່ວມຊຸດຮຽນ, ບັນດາຄົນພິການຕາທີ່ມີສະພາບຫຍຸ້ງຍາກ ໄດ້ຮຽນວິທີນຳໃຊ້ເຄື່ອງຄອມພິວເຕີ ແລະ ຊົມໃຊ້ບັນດາຜົນປະໂຫຍດຈາກເຄື່ອງຄອມພິວເຕີ.
ຄົນພິການໄດ້ຮັບການແນະນຳວິທີໃຊ້ເຄື່ອງຄອມພິວເຕີ |
ຊຸດຮຽນຕ່າງໆທີ່ຂຶ້ນກັບໂຄງການ “ສອນຄອມພິວເຕີໂດຍບໍ່ເສຍຄ່າໃຫ້ຄົນພິການຕາທີ່ທຸກຍາກ ” ໄດ້ຖືກຈັດຂຶ້ນຢູ່ຫໍສະໝຸດ “ປຶ້ມສຽງ” ຢູ່ຖະໜົນດິງຕຽນຮ່ວາງ, ເມືອງ 1 ນະຄອນໂຮ່ຈິມິນ ໃນທຸກໆວັນໃນອາທິດຄືແຕ່ວັນຈັນຫາວັນສຸກ. ໃນຊຸດຮຽນ, ຄົນພິການຕາທຸກໆຄົນໄດ້ຮຽນທັກສະການນຳໃຊ້ເຄື່ອງຄອມພິວເຕີເພື່ອເຊື່ອມຕໍ່ກັບເຄືອຂ່າຍອິນເຕີເນັດ, ໄດ້ເຂົ້າເຖິງແຫຼ່ງຂໍ້ມູນຂ່າວສານທີ່ນຳມາເຊິ່ງຜົນປະໂຫຍດ. ນອກຈາກການບຳລຸງສ້າງດ້ານທັກສະແລ້ວ, ໂຄງການຍັງເພີ່ມຄວາມສາມາດຊອກຫາວຽກເຮັດງານທຳ, ຄວາມເປັນເຈົ້າການໃນການດຳລົງຊີວິດຂອງ ຄົນພິການຕາໂດຍຜ່ານການແນະນຳວິຊາຊີບ ແລະ ໜູນຊ່ວຍການຊອກຫາວຽກເຮັດງານທຳ. ຮ່ວມອຸປະຖຳພ້ອມກັບບໍລິສັດ Microsoft ຫວຽດນາມ, ບໍລິສັດການຄ້າ-ການບໍລິການເຕີນນາມໂດຈຳກັດ ແລະ ອົງການ ຫວຽດນາມ Foundation ກໍຍັງໜູນຊ່ວຍໂຄງການເປັນເຄື່ອງຄອມພິວເຕີ 30 ເຄື່ອງໃຫ້ແກ່ ຫໍສະໝຸດ “ປຶ້ມສຽງ” ແລະ 77 ເຄື່ອງຄອມພິວເຕີ ບໍ່ມີໜ້າຈໍສະຫງວນສະເພາະໃຫ້ແກ່ຄົນພິການຕາ. ຍ້ອນມີບັນດາພາຫະນະທີ່ທັນສະໄໝ, ຄົນພິການຕາສາມາດສຳພັດກັບສາງຄວາມຮູ້ຢ່າງສະດວກສະບາຍ. ທ່ານ ຫງວຽນດິງກຽນ ປະທານສະມາຄົມ ຄົນພິການຕານະຄອນໂຮ່ຈິມິນ ຖືວ່າ :
“ ການເປີດຊຸດຮຽນນີ້ ແມ່ນມີຄວາມໝາຍທີ່ສຸດ ແລະ ຈະປະສົບຜົນສຳເລັດ. ຄົນພິການຕາຈະໄດ້ຮັບຂໍ້ມູນຂ່າວສານ, ນຳແສງສະຫວ່າງພູມປັນຍາມາໃຫ້ເຂົາເຈົ້າເພື່ອມູນໃຊ້ໃນການດຳລົງຊີວິດ, ໃນການຮ່ຳຮຽນ ແລະ ເຮັດວຽກ, ຈາກນັ້ນສືບຕໍ່ປະກອບສ່ວນໃຫ້ແກ່ການເຄື່ອນໄຫວລວມ”
ຈຸດທີ່ພົ້ນເດັ່ນຂອງໂຄງການນີ້ ແມ່ນຫຼັກສູດການສອນໂດຍແມ່ນຄົນພິການຕາຮຽບຮຽງເອງ ໂດຍພາຍໃຕ້ການໜູນຊ່ວຍຈາກບໍລິສັດ Microsoft ຫວຽດນາມ. ຖັນແຖວຄູສອນລວມມີ 10 ຄົນ ຕ່າງກໍແມ່ນຄົນພິການຕາມີລະດັບວຸດທິການສຶກສາປະລິນຍາຕີ ແລະ ໄດ້ເຂົ້າຮ່ວມຊຸດຝຶກອົບຮົມວິຊາຊີບຢູ່ຫໍສະໝຸດ “ປຶ້ມສຽງ”. ພາຍຫຼັງເຂົ້າຮ່ວມຊຸດຮຽນເປັນເວລາ 3 ເດືອນ, ບັນດານັກຮຽນຕ້ອງຜ່ານການສອບເສັງຕີລາຄາຄຸນນະພາບ ແລະ ໄດ້ຮັບໃບຢັ້ງຢືນການສຶກສາ. ຍອດຄ່າໃຊ້ຈ່າຍຂອງໂຄງການດັ່ງກ່າວແມ່ນຂຶ້ນເຖິງກວ່າ 68.000 USD. ອ້າຍຄູ່ ໂຕງວຽນເຈົາ ຜູ້ຮັບຜິດຊອບຊຸດຮຽນຄອມພິວເຕີໂດຍບໍ່ເສຍຄ່າໃຫ້ຄົນພິການຕາ ທີ່ທຸກຍາກໃຫ້ຮູ້ວ່າ :
“ ປະຈຸບັນ, ພວກຂ້າພະເຈົ້າສອນດ້ວຍຫຼັກສູດໂດຍພື້ນຖານ. ແຕ່ພວກຂ້າພະເຈົ້າຫວັງວ່າ ນັກຮຽນຈະໄດ້ຮັບການໜູນຊ່ວຍໃນລະດັບດີທີ່ສຸດ. ເພື່ອຈາກນັ້ນ, ເຂົາເຈົ້າຈະເຂົ້າຮ່ວມຊຸດຮຽນຍົກສູງລະດັບອີກດ້ວຍ ”
ໃນຊຸດຮຽນນີ້ ກໍມີຫຼາຍສິ່ງພິເສດ, ມີນັກຮຽນພຽງແຕ່ 7 ຫາ 10 ຄົນເທົ່ານັ້ນເພື່ອຮັບປະກັນກ່ຽວກັບວັນເວລາ ແລະ ການສະໜອງລະດັບຄວາມຮູ້ຢ່າງດີທີ່ສຸດ. ເຄື່ອງຄອມພິວເຕີ ກໍບໍ່ມີ Mouse , ຕ້ອງໃຊ້ Tab ແລະ ສຳນຽງເວົ້າຕ່າງຫາກທີ່ສະຫງວນສະເພາະໃຫ້ຄົນພິການຕາ. ການສອນຄອມພິວເຕີໃຫ້ແກ່ຄົນພິການຕາກໍມີຄວາມຫຍຸ້ງຍາກ, ນັກຮຽນຈຳເປັນຕ້ອງດີດຄອມພິວເຕີໄດ້ທັງ 10 ນິ້ວມື ແລະ ຕ້ອງຈື່ແຕ່ລະທີ່ຕັ້ງຂອງຕົວໜັງສື ແລະ ວັນນະຍຸດໃນ Keyboard. ທ່ານນາງ ຫງວຽນເຮື້ອງເຢືອງ ຜູ້ອຳນວຍການຫໍສະໝຸດ “ປຶ້ມສຽງ” ສະຫງວນໃຫ້ຄົນພິການຕາຢູ່ນະຄອນໂຮ່ຈິມິນ ໃຫ້ຮູ້ວ່າ :
“ ຄວາມໝາຍສຳຄັນທີ່ສຸດຂອງໂຄງການນີ້, ແມ່ນຊ່ວຍຄົນພິການຕາສຳພັດກັບສາງຄວາມຮູ້ພູມປັນຍາ, ວັດທະນະທຳຂອງໂລກ. ຄົນພິການຕາກໍເຊັ່ນດຽວກັນກັບຄົນທຳມະດາ, ເມື່ອດຳລົງຊີວິດໃນຍຸກເຕັກໂນໂລຢີຂໍ້ມູນຂ່າວສານ, ແຕ່ບໍ່ຮູ້ຈັກນຳໃຊ້ເຄື່ອງຄອມພິວເຕີ ກໍຈະກາຍເປັນຫຼ້າຫຼັງ. ດັ່ງນັ້ນ ພວກຂ້າພະເຈົ້າຢາກສ້າງຄວາມສະເໝີພາບໃນການດຳລົງຊີວິດ, ລົບລ້າງຮົ້ວກີດຂວາງນັ້ນໄປ ”
ເມື່ອໄດ້ເຂົ້າຮ່ວມໂຄງການນີ້, ຄົນພິການຕາຢູ່ນະຄອນໂຮ່ຈິມິນມີໂອກາດຕື່ມອີກເພື່ອນຳຄວາມຮູ້, ຄວາມເຂົ້າໃຈມາໃຫ້ ຄົນພິການຕາ, ຊ່ວຍເຂົາເຈົ້າສືບຕໍ່ສູ້ຊົນໃນຊີວິດເພື່ອມຸ່ງໄປສູ່ອະນາຄົດທີ່ສະຫວ່າງສະໄຫວ.