(vovworld) - ແຂວງກວາງນິງບໍ່ພຽງແຕ່ມີຊື່ສຽງດ້ວຍບັນດາທິວທັດທຳມະຊາດທີ່ສວຍງາມເຊັ່ນ: ອ່າວຫ້າລອງ-ມໍລະດົກທຳມະຊາດໂລກ, ເຂດປູຊະນີຍະສະຖານ ວັດອຽນຕືເທົ່ານັ້ນ, ຫາກຍັງມີບໍຖ່ານຫີນໃຫຍ່ນ້ອຍນັບສິບແຫ່ງທີ່ມີມາແຕ່ທ້າຍສະຕະວັດທີ 19 ອີກດ້ວຍ. ນີ້ແມ່ນທ່າແຮງບົ່ມຊ້ອນຢ່າງໃຫຍ່ຫຼວງຂອງຂະແໜງທ່ອງທ່ຽວແຂວງກວາງນິງໃນປະຈຸບັນອີກດ້ວຍ. ປະຈຸບັນ, ຂະແໜງທ່ອງທ່ຽວແຂວງກວາງນິງພວມຜັນຂະຫຍາຍການສ້າງ ແລະ ແນະນຳໃຫ້ແຂກທ່ອງທ່ຽວກ່ຽວກັບລາຍການທ່ອງທ່ຽວຜ່ານການລົງຕົວຈິງສຳພັດກັບອາຊີບຂຸດຄົ້ນບໍ່ແຮ່. ໃນລາຍການຊີວິດສັງຄົມພາກນີ້, ພວກເຮົາຂໍແນະນຳບົດຂອງນັກຂ່າວ ລານແອງ ທີ່ພາດຫົວຂໍ້ວ່າ : “ລາຍການທ່ອງທ່ຽວຜ່ານການລົງຕົວຈິງຄົ້ນຫາອາຊີບຂຸດຄົ້ນບໍ່ແຮ່”.
ບໍ່ແຮ່ຢູ່ກວາງນີງ
|
ລາຍການທ່ອງທ່ຽວຜ່ານການລົງຕົວຈິງຄົ້ນຫາອາຊີບຂຸດຄົ້ນບໍ່ແຮ່ແມ່ນບໍ່ສະຫງວນໃຫ້ແກ່ບັນດາຜູ້ຢ້ານຂີ້ຝຸ່ນເປື້ອນເປີ້, ຢ້ານຄວາມສູງ. ບັນດາຜູ້ຄົນໄປທ່ອງທ່ຽວເປັນຄັ້ງທຳອິດ ກໍລ້ວນແຕ່ຕົກສະເງີ້ເມື່ອເຫັນບໍ່ຖ່ານຫີນທີ່ໃຫຍ່ໂຕ. ເຂົ້າຮ່ວມໃນ ລາຍການທ່ອງທ່ຽວຜ່ານການລົງຕົວຈິງຄົ້ນຫາບໍ່ຖ່ານຫີນ, ທຸກຄົນຕ້ອງປະຕິບັດຕາມຫຼັກການຮັບປະກັນຄວາມປອດໄພຂອງ ອາຊີບຂຸດຄົ້ນບໍ່ແຮ່ຢ່າງເຄັ່ງຄັດຄື ຕ້ອງນຸ່ງຊຸດນິລະໄພ, ໃສ່ຜ້າອັດປາກ, ຂີ່ລົດສະເພາະຂອງຂະແໜງຂຸດຄົ້ນບໍ່ແຮ່, ແຕ່ເຂົາເຈົ້າຈະມີຄວາມປະທັບ ຍາກທີ່ຈະລືມໄດ້. ທ່ານ ຫງວຽນແອງຕ້ວນ ຜູ້ອຳນວຍການບໍລິສັດທ່ອງທ່ຽວເດິດໝໍ ແຂວງກວາງນິງ ໃຫ້ຮູ້ວ່າ :
“ ເມື່ອ ແຂກທ່ອງທ່ຽວໄປທັດສະນະສຶກສາຢູ່ບໍ່ຖ່ານຫີນ ກໍຈະໄດ້ຮັບຊົມຄວາມງາມຂອງອ່າວ ບ້າຍຕືລອງ ຈາກບ່ອນສູງ. ແຂກທ່ອງທ່ຽວທັງຫຼາຍກໍໄດ້ເຫັນບໍ່ຖ່ານຫີນ, ລົດຂົນສົ່ງຖ່ານຫີນໃຫຍ່ຜ່ານບັນດາພາຫະນະສື່ມວນຊົນຫຼາຍຄັ້ງ. ແຕ່ນີ້ເປັນຄັ້ງທຳອິດທີ່ເຂົາເຈົ້າມີໂອກາດໄດ້ຢືນຢູ່ເທິ່ງບໍ່ຖ່ານຫີນເພື່ອຮັບຊົມທັດສະນີຍະພາບ ”
ເມື່ອໄດ້ເຫັນປະຈັກຕາຮູບພາບສະຖານທີ່ຂຸດຄົ້ນຖ່ານຫີນຢູ່ບໍ່ຖ່ານຫີນ ແດວນາຍ, ນະຄອນເກີມຝາ, ຜູ້ຄົນທັງຫຼາຍກໍຮູ້ສຶກປຽບເໝືອນພາບແຕ້ທີ່ສວຍງາມ, ໃຫຍ່ໂຕມະໂຫຖານດ້ວຍສີຫຼາກຫຼາຍປະສານເຂົ້າກັນ. ທ່ານ ຫງວຽນຕ້ວນແອງ ຜູ້ອຳນວຍການບໍລິສັດທ່ອງທ່ຽວເດິດໝໍແຂວງກວາງນິງໃຫ້ຮູ້ວ່າຕື່ມອີກວ່າ:
“ ນະຄອນເກີມຝາມີ 2 ຮູບແບບຂຸດຄົ້ນຖ່ານຫີນ. ທີ 1 ແມ່ນການຂຸດຄົ້ນຢູ່ສະຖານທີ່ກາງແຈ້ງ, ທີ 2 ແມ່ນການຂຸດຄົ້ນຢູ່ໃຕ້ດິນ. ສຳລັບການຂຸດຄົ້ນຖ່ານຫີນຢູ່ໃຕ້ດິນນັ້ນ, ເຕັກໂນໂລຢີການຂຸດຄົ້ນໃນປະຈຸບັນຢູ່ເກີມຝາ ແມ່ນໄດ້ສາມາດໃຫ້ກຳມະກອນລົງໃຕ້ດິນເລິກປະມານ 300 ແມດເມື່ອທຽບໃສ່ໜ້ານ້ຳທະເລ ”
ແຂກທ່ອງທ່ຽວໄດ້ນຸ່ງເຄື່ອງປ້ອງກັນຄືຄົນງານເຮັດວຽກຢູ່ບໍ່ແຮ່
|
ຮູບພາບສະຖານທີ່ຂຸດຄົ້ນຖ່ານຫີນຢູ່ບໍ່ຖ່ານຫີນຖືກເພີ່ມຄວາມງາມດ້ວຍສີເຫຼືອງຂອງຂະບວນລົດຂົນສົ່ງຖ່ານຫີນ ແລ່ນຕິດຕໍ່ກັນ. ທ່ານ ເຈີນວັນຕວຽນ ມີຄວາມຜູກພັນກັບອາຊີບຂັບລົດຢູ່ບໍ່ຖ່ານຫີນ ແດວນາຍ ມາເປັນເວລາ 10 ປີແລ້ວໃຫ້ຮູ້ວ່າ :
“ ສຳລັບອາຊີບຂຸດຄົ້ນບໍ່ແຮ່, ສິ່ງທີ່ສຳຄັນທີ່ສຸດ ແມ່ນຕ້ອງມີຄວາມຮັກອາຊີບ ຈຶ່ງຈະສາມາດເຮັດວຽກຍາວນານໄດ້. ຢູ່ບໍ່ຖ່ານຫີນ, ມີລົດຂົນສົ່ງຫຼາຍປະເພດ, ແຕ່ເມື່ອຂັບລົດຂົນສົ່ງປະເພດນີ້, ຖ້າຫາກບໍ່ມີຄວາມກະຕືລືລົ້ນ, ກໍບໍ່ອາດຮັກສາຄວາມທົນທານໃຫ້ລົດໄດ້. ເມື່ອເຫັນວ່າແຂກທ່ອງທ່ຽວນິຍົມມາທ່ຽວຢູ່ສະຖານທີ່ຂຸດຄົ້ນຖ່ານຫີນນັ້ນ, ພວກຂ້າພະເຈົ້າຕ່າງກໍເຫັນດີເພື່ອຮ່ວມມືກັບບັນດາຫົວໜ່ວຍທ່ອງທ່ຽວ ເພຶ່ອຈັດຕັ້ງໃຫ້ແຂກທ່ອງທ່ຽວມາຢ້ຽມຊົມ: ເພີ່ມຄວາມເຂົ້າໃຈກ່ຽວກັບອາຊີບຂຸດຄົ້ນບໍ່ແຮ່ ”
ບັນດາບໍລິສັດຂຸດຄົ້ນບໍ່ແຮ່ເກືອບທັງໝົດສັງກັດກຸ່ມບໍລິສັດຂຸດຄົ້ນຖ່ານຫີນ-ແຮ່ທາດຫວຽດນາມ ລ້ວນແຕ່ມີເຮືອນມູນເຊື້ອເພື່ອໃຊ້ເປັນບ່ອນເກັບຮັກສາບັນດາວັດຖຸພັນ, ຮູບຖ່າຍທີ່ຕິດພັນກັບແຕ່ລະໄລຍະກໍ່ສ້າງ ແລະ ພັດທະນາຂອງບໍລິສັດຕົນເອງ. ທ່ານນາງ ຕືທິມີ້ແຫ້ງ ຜູ້ອຳນວຍການບໍລິສັດທ່ອງທ່ຽວ ແລະ ພັດທະນາການຄ້າອາຊີຈຳກັດ ເວົ້າວ່າ :
“ ນີ້ເປັນຄັ້ງທຳອິດ ທີ່ຂ້າພະເຈົ້າໄດ້ມີໂອກາດໄປຢ້ຽມຊົມຢູ່ບໍ່ຖ່ານຫີນ ແດວນາຍທີ່ເກີມຝາ. ຄວາມປະທັບໃຈທຳອິດເມື່ອໄດ້ເຫັນຄວາມງາມແບບໃຫຍ່ໂຕມະໂຫຖານ. ມາຢ້ຽມຊົມຢູ່ ບໍ່ຖ່ານຫີນ, ແຂກທ່ອງທ່ຽວໄດ້ເຫັນບໍ່ຖ່ານຫີນ, ເຫັນຂຸມຂຸດຄົ້ນຖ່ານຫີນຢູ່ໃຕ້ດິນເລິກປະມານ 150 ແມັດເມື່ອທຽບໃສ່ໜ້ານ້ຳທະເລ, ໄດ້ເຫັນລົດຂົນສົ່ງຖ່ານຫີນໃຫຍ່ທີ່ສຸດຢ່າງບໍ່ເຄີຍໄດ້ເຫັນ, ສະເພາະກົງລົດ ກໍສູງເຖິງ 2,7 ແມັດແລ້ວ. ”
ລາຍການທ່ອງທ່ຽວຜ່ານການລົງຕົວຈິງຄົ້ນຫາອາຊີບຂຸດຄົ້ນບໍ່ແຮ່ແມ່ນລາຍການທ່ອງທ່ຽວທີ່ເປັນເອກະລັກສະເພາະ ມີພຽງແຕ່ຢູ່ແຂວງກວາງນິງເທົ່ານັ້ນ ແລະ ກໍເປັນແຫຼ່ງດຶງດູດແຂກທ່ອງທ່ຽວທັງຫຼາຍ.