(vovworld)- 9 ໂມງຄ່ຳຂອງວັນເສົາ, ບັນຍາກາດຢູ່ຮ້ານບັນເທິງ Vasco ຂຶ້ນກັບ ເມືອງ 3 ນະຄອນໂຮ່ຈິມີນ ອຶກກະທຶກຄຶກໂຄມທີ່ສຸດ ດ້ວຍສຽງດົນຕີ ແລະ ວາດຟ້ອນທີ່ດຶງດູດໃຈ. ສຳລັບຫລາຍຄົນທີ່ເຄື່ອນໄຫວໃນຂົງເຂດດົນຕີແລ້ວ, ເວທີສະແດງຢູ່ຮ້ານບັນເທິງນີ້ບໍ່ຄືດັ່ງຄວາມຫວັງຂອງເຂົາເຈົ້າ ເພາະວ່າ ເວທີສະແດງມີຂະຫນາດນ້ອຍ ແລະ ບັນຈຸຜູ້ຊົມພຽງ 200 ຄົນເທົ່ານັ້ນ. ແຕ່ສຳລັບ Sami, Harol, Sarah ແລະ Catie ນັກສິລະປິນ 4 ຄົນທີ່ມາຈາກ ຟິລິບປີນ ສັງກັດວົງດົນຕີ Groove Band ທີ່ພວມສະແດງຢູ່ຮ້ານບັນເທິງນີ້, ຖ້າຫາກຍັງມີຜູ້ຊົມນິຍົມ, ເຂົາເຈົ້າຈະສະແດງດ້ວຍຄວາມສຸດຈິດສຸດໃຈ.
ເຖິງວ່າ ນ້ຳເຫື່ອໄຫລລົງທົ່ວໃບຫນ້າຍ້ອນຄວາມຮ້ອນຈາກໄຟແສງສີບົນເວທີສະແດງ ກໍຕາມ, ແຕ່ Sami ຜູ້ດີດກິຕາ ໃນວົງດົນຕີ band ຍັງຄົງເມົາມົວສະແດງດ້ວຍບັນດາເຕັກນິກໃນການດີດກີຕາຢ່າງຄ່ອງແຄ້ວສ້າງເປັນທຳນອງທີ່ຟົດຟື້ນມ່ວນຊື່ນ ທາມກາງສຽງຕົບມືຊົມເຊີຍຂອງຜູ້ຊົມ. ໃນຈຳນວນ 4 ຄົນນັ້ນ, Sami ແມ່ນຜູ້ມີອາຍຸສູງກວ່າໝູ່ ແລະ ມາຫວຽດນາມ ສ້າງອາຊີບເປັນເວລາຫລາຍປີແລ້ວ. ປີນີ້ ແມ່ນປີທີ 10 ອ້າຍ ດຳລົງຊີວິດຢູ່ນະຄອນ ໂຮ່ຈິມີນ.
“ສາຍເຫດທຳອິດທີ່ພາໃຫ້ຂ້າພະເຈົ້າ ມາຫວຽດນາມ ຍ້ອນຫວຽດນາມແມ່ນປະເທດເປີດອົກເປີດໃຈ. ກ່ອນນີ້ ມີນັກສິລະປິນຟິລີບປີນຫລາຍຄົນເຄີຍເລືອກເຟັ້ນ ສເກົາຫລີ, ຍີ່ປຸ່ນ, ສິງກະໂປ ຫລື ກຳປູເຈຍ ເພື່ອເປັນບ່ອນພັດທະນາອາຊີບ ແຕ່ປະຈຸບັນ ຫວຽດນາມ ໄດ້ສ້າງຄວາມດູດດື່ມກວ່າ. ໄລຍະທຳອິດຂ້າພະເຈົ້າມາຫວຽດນາມ, ມີ ວົງດົນຕີຟີລີບຟີນ ພຽງ 4 ວົງ ພວມເຄື່ອນໄຫວເທົ່ານັ້ນ ແຕ່ປະຈຸບັນມີຫລາຍວົງດົນຕີແລ້ວ. ຫວຽດນາມ ນັບມື້ນັບພັດທະນາ ແລະ ມີຄວາມດູດດື່ມກວ່າ. ຂ້າພະເຈົ້າຮັກແພງປະເທດນີ້. ບໍ່ມີສາຍເຫດໃດເຮັດໃຫ້ຂ້າພະເຈົ້າຫ່າງຈາກປະເທດນີ້ໄດ້.”
ສຽງອ່ອນຊອ້ນ, ອ່ອນຫວານ ທັງເພີດເພີນ ນັ້ນແມ່ນສຽງຂັບຮ້ອງຂອງ Harol, ຫົວຫນ້າ ວົງດົນຕີ Groove Band. ອ້າຍໄດ້ເຂົ້າມາຫວຽດນາມເປັນເວລາກວ່າ 7 ປີແລ້ວ, ພາຍຫລັງສອງສາມປີທຳອິດຮ້ອງເພງ solo, ບັງເອີນອ້າຍໄດ້ພົບ Sami ແລະ ເກີດແນວຄວາມຄິດຈະສ້າງວົງດົນຕີ. ທຸກສິ່ງທຸກຢ່າງຍິ່ງມີຄວາມສະດວກກວ່າ ເມື່ອ ເອື້ອຍຄີງຂອງລາວ ນາງ Sarah ແລະ ນ້ອງສາວ Catie ຕັດສິນໃຈມາຫວຽດນາມ ເພື່ອດຳເນີນອາຊີບເປັນນັກຮ້ອງ ແລະ Groove Band ໄດ້ຮັບການສ້າງຕັ້ງຂຶ້ນ.
ວົງດົນຕີ Groove Band
|
“ຂ້າພະເຈົ້າຮູ້ສຶກໄດ້ຫລາຍສິ່ງຫລາຍຢ່າງຊື່ງກ່ອນນີ້ ເມື່ອຮ້ອງເພງ solo ຂ້າພະເຈົ້າບໍ່ສາມາດຮູ້ສຶກໄດ້. ເມື່ອມີໂອກາດຮ້ອງເພງກັບເອື້ອຍ ແລະ ນ້ອງສາວ ຂອງຕົນ ນັ້ນແມ່ນສິ່ງທີ່ມີຄວາມຜາສຸກທີ່ສຸດ ເຖິງວ່າ ພວກຂ້າພະເຈົ້າຄິດຮອດຄິດເຖິງຄອບຄົວຢູ່ Sebu ທີ່ສຸດ. ແຕ່ວ່າ ນັບແຕ່ຄາວຍັງນ້ອຍ ຂາ້ພະເຈົ້າຍາມໃດກໍມີຄວາມໄຝ່ຝັນ ຈະມີໂອກາດໄປປະເທດອື່ນ ເພື່ອສ້າງຕັ້ງວົງດົນຕີ ບາງເທື່ອຈະພ້ອມກັບຊາວ ຟີລີບຟີນ ຫລືຊາວທ້ອງຖິ່ນກໍ່ດີ. ເພື່ອໄດ້ສະແດງບົນເວທີດຽວພ້ອມກັບເຂົາເຈົ້າ ແລະ ອຸທິດຈົນ ສຸດຄວາມສາມາດຂອງຕົນໃຫ້ແກ່ຜູ້ຊົມ. ປະຈຸບັນ ຂ້າພະເຈົ້າສາມາດເວົ້າກັບພວກເພື່ອນດ້ວຍຄວາມເຊື່ອໝັ້ນວ່າ ຄວາມໄຝ່ຝັນນັ້ນໄດ້ປະກົດຜົນເປັນຈິງແລ້ວ.”
ຖ້າຫາກສຽງເພງຂອງ Harol ດຶງດູດຜູ້ຊົມຜ່ານບົດດົນຕີ pop-ballad, ສ່ວນເອື້ອຍຂອງລາວ ນາງ Sarah ພັດເຮັດໃຫ້ຜູ້ຊົມຮູ້ສຶກມີພະລັງຊີວິດຢ່າງແຮງກ້າຜ່ານ ບົດເພງດ້ວຍພາສາ ແອດສະປາຍ ດ້ວຍທຳນອງເພງ Fkamenco ຟົດຟື້ນມ່ວນຊື່ນທີ່ສຸດ. ບັນດາສະມາຊິກຂອງ Groove Band ອາດຈະຮ້ອງເພງທຸກປະເພດດ້ວຍພາສາ ອັງກິດ, ແອດສະປາຍ ແລະ ພາສາຫວຽດໄດ້. ຢູ່ນະຄອນທີ່ຟົດຟື້ນ, ທັນສະໄຫມ ແລະ ເຊື່ອມໂຍງຄື ນະຄອນ ໂຮ່ຈິມີນ, ນັ້ນກໍເປັນທ່າໄດ້ປຽບເພື່ອໃຫ້ເຂົາເຈົ້າສາມາດດຳເນີນອາຊີບເປັນນັກຮ້ອງຢູ່ນະຄອນນີ້ໄດ້.
“ພວກຂ້າພະເຈົ້າເຄີຍເຊັນສັນຍາເຄື່ອນໄຫວໄລຍະ 1,2 ປີ ກັບອົງການໃດຫນຶ່ງ. ພາຍຫລັງສິ້ນສຸດສັນຍາ, ພວກຂ້າພະເຈົ້າອາດຈະຊອກບ່ອນອື່ນ. ສິ່ງນີ້ກໍງ່າຍດາຍ ເພາະວ່າ ຢູ່ ຫວຽດນາມ ພິເສດ ແມ່ນຢູ່ນະຄອນ ໂຮ່ຈິມີນ ຍາມໃດກໍແມ່ນສະຖານທີ່ມີກາລະໂອກາດຫລາຍຢ່າງ. ຂ້າພະເຈົ້າຍັງມີໝູ່ເພື່ອນຫວຽດນາມ ຫລາຍຄົນທີ່ມີຄວາມໄວ້ເນື້ອເຊື່ອໃຈ ແລະ ຍາມໃດກໍຊ່ວຍເຫລືອຂ້າພະເຈົ້າອີກ. ຂ້າພະເຈົ້າມີຄວາມຜາສຸກເມື່ອໄດ້ດຳລົງຊີວິດ ແລະ ເຮັດວຽກຢູ່ທີ່ນີ້.”
Harol ໄດ້ເລືອກເຟັ້ນບົດເພງ ຫວຽດນາມ ເພື່ອເປັນການປິດທ້າຍລາຍການສະແດງຂອງຕົນ. ດົນຕີ ຫວຽດນາມ ໄດ້ເຮັດໃຫ້ອ້າຍມີຄວາມໃກ້ຊິດກັບວັດທະນະທຳຫວຽດນາມ, ຜູ້ຊົມຫວຽດນາມກວ່າ. ເພື່ອນ ມີງເຟືອງ ຜູ້ມາຊົມລາຍການເວົ້າດ້ວຍຄວາມຕືນຕັ້ນໃຈວ່າ:
“ເຂົາເຈົ້າແມ່ນຊາວ ຟີລີບປີນ ແຕ່ຮ້ອງບົດເພງດ້ວຍພາສາຫວຽດ ມ່ວນຫລາຍ ເຮັດໃຫ້ຂ້າພະເຈົ້າຮູ້ສຶກວ່າມີຄວາມໃກ້ຊິດສະຫນິດສະຫນົມລະຫວ່າງສອງປະເທດທີ່ສຸດ. ເມື່ອຄິດເຖິງຄວາມມານະພະຍາຍາມຂອງເຂົາເຈົ້າໃນການແອບຜັນສຽງເປັນພາສາຫວຽດ ເພື່ອຮ້ອງເພງຫວຽດນາມ ຮັບໃຊ້ຜູ້ຟັງດ້ວຍນ້ຳໃຈອັນດູດດື່ມຄືແນວນັ້ນ ຂ້າພະເຈົ້າມີຄວາມຕື້ນຕັນໃຈຫລາຍ.”
ຮອດ 10 ໂມງກາງຄືນ ຖະຫນົນຫົນທາງຢູ່ ໄຊງ່ອນ ຍິ່ງອຶກກະທຶກຄຶກໂຄມ. Harol ພ້ອມກັບວົງດົນຕີ ຟ້າວຟັ່ງຂຶ້ນລົດ taxi ໄປຍັງເຂດໃຈກາງນະຄອນ. ຍັງມີລາຍການ ອື່ນພວມລໍຖ້າເຂົາເຈົ້າ.