(vovworld) - ໃນເກືອບ 7 ທົດສະວັດ, ນັບແຕ່ມື້ອອກອາກາດລາຍການກະຈາຍສຽງພາກພາສາຕ່າງປະເທດລາຍການທຳອິດເມື່ອວັນທີ 7/9/1945, ລະບົບກະຈາຍສຽງພາກພາສາຕ່າງປະເທດໄດ້ພັດທະນາຢ່າງບໍ່ຢຸດຢັ້ງ ແລະ ນັບມື້ນັບດຶງດູດຜູ້ຟັງເປັນຈຳນວນຫລວງຫລາຍ. ພ້ອມກັບການພັດທະນາດ້ານກະຈາຍສຽງ ດີຈີຕອນ, ວັນທີ 16/1/2012 ຜ່ານມາ, ລະບົບກະຈາຍສຽງພາກພາສາຕ່າງປະເທດໄດ້ເປີດພິທີສະເຫນີຕົວ ເວັບໄຊ ດ້ວຍຫລາຍພາສາຕ່າງປະເທດເພື່ອຮັບໃຊ້ຄວາມຕ້ອງການກ່ຽວກັບຂໍ້ມູນຂ່າວສານຂອງຜູ້ຟັງເປັນຢ່າງດີກວ່າ.
ພາຍຫລັງສະເຫນີຕົວມາເປັນເວລາ ຫນຶ່ງເດືອນ, ຫນ້າເວັບຂອງລະບົບກະຈາຍສຽງພາກພາສາຕ່າງປະເທດຂອງວິທະຍຸກະຈາຍສຽງຫວຽດນາມຜ່ານລະຫັດ vovworld.vn ແລະ vov5.vn ພວມຄ່ອຍໆຢືນຢັນບົດບາດການຖະແຫລງຂ່າວຂອງຕົນ. ຫນ້າເວັບ vov 5 ໄດ້ສົ່ງ ບັນດາຂໍ້ມູນຂ່າວສານກ່ຽວກັບປະເທດຊາດ ແລະ ຊາວຫວຽດນາມເຖິງຜູ້ຊົມ ແລະ ຜູ້ຟັງໃນທົ່ວໂລກ ຜ່ານ 12 ພາສາຊຶ່ງລວມມີ: ອັງກິດ, ຝລັ່ງ, ເຢຍລະມັນ, ຍີ່ປຸ່ນ, ລັດເຊຍ, ປັກກີງ, ໄທ, ລາວ ແລະ ກຳປູເຈຍ, ອິນໂດເນເຊຍ, ແອດສະປາຍ ແລະ ພາສາຫວຽດນາມສະຫງວນໃຫ້ແກ່ຊາວຫວຽດນາມອາໄສຢູ່ຕ່າງປະເທດ. ກ່າວຄຳເຫັນນະພິທີສະເຫນີຕົວຫນ້າເວັບ vovworld.vn, ທ່ານ ຫງວຽນດັງຕຽນ, ຜູ້ອຳນວຍການໃຫຍ່ວິທະຍຸກະຈາຍສຽງຫວຽດນາມ ເວົ້າວ່າ:
“ການສ້າງຕັ້ງ ຫນ້າເວັບ vov5 ຂຶ້ນ ຈະປະກອບສ່ວນໃຫ້ແກ່ວຽກງານ ຖະແຫລງຂ່າວຂອງບັນດາອົງການສື່ມວນຊົນຫວຽດນາມ, ເພື່ອສະແດງໃຫ້ເຫັນການພັດທະນາ ແລະ ໂຄສະນາປະເທດຊາດ ແລະ ຊາວຫວຽດນາມໃຫ້ແກ່ເພື່ອນມິດສາກົນ. ພວກຂ້າພະເຈົ້າປາດຖະຫນາວ່າ ໃນໄລຍະຈະມາເຖິງ ພວກຂ້າພະເຈົ້າຈະເຊື່ອມໂຍງກັບໂລກຢ່າງເລິກເຊິ່ງ ແລະ ກວ້າງຂວາງກວ່າ ແລະ ຊາວໂລກ ຈະເຂົ້າໃຈກ່ຽວກັບພວກເຮົາກວ່າ ແລະກົງກັນຂ້າມພວກເຮົາກໍຈະເຂົ້າໃຈກ່ຽວກັບໂລກກວ່າ.”
ຕາມທ່ານ I Nyoman ທີ່ປຶກສາດ້ານຖະແຫລງຂ່າວ ແລະ ວັດທະນະທຳ ສະຖານທູດອິນໂດເນເຊຍປະຈຳ ຫວຽດນາມ ແລ້ວ, ເລື່ອງ VOV ສະເຫນີຫນ້າເວັບ ແມ່ນມີປະສິດທິຜົນຢ່າງຕັ້ງຫນ້າ, ຊ່ວຍໃຫ້ປະຊາຊົນອີນໂດເນເຊຍເວົ້າສະເພາະ ແລະ ບັນດາທ່ານຜູ້ຟັງເວົ້າລວມສາມາດເຂົ້າເຖິງຂໍ້ມູນຂ່າວສານຕ່າງໆກ່ຽວກັບຫວຽດນາມຢ່າງງ່າຍດາຍໄດ້.
“ຕາມຂ້າພະເຈົ້າແລ້ວ, ຫນ້າເວັບຂອງ vov 5 ແມ່ນສະແດງໃຫ້ເຫັນຄວາມຕັດສິນໃຈຂອງວິທະຍຸກະຈາຍສຽງຫວຽດນາມ ເພື່ອໂຄສະນາ ບັນດາຂໍ້ມູນຂ່າວສານກ່ຽວກັບການພັດທະນາຂອງຫວຽດນາມ ພິເສດແມ່ນວັດທະນະທຳ ຫວຽດນາມ ອອກສູ່ໂລກຢ່າງກວ້າງຂວາງ. ນີ້ແມ່ນບາດກ້າວອັນໃຫຍ່ຫລວງເພາະວ່າຫນ້າເວັບນີ້ບໍ່ພຽງແຕ່ສະເໜີເປັນພາສາຫວຽດເທົ່ານັ້ນ ຫາກຍັງຈັດເປັນຫລາຍພາສາຕ່າງປະເທດອີກດ້ວຍ.”
ພາຍຫລັງນຳເຂົ້າເຄື່ອນໄຫວຢ່າງເປັນທາງການມາເປັນເວລາ 1 ເດືອນ, ຫນ້າເວັບ vov5 ໄດ້ຮັບການຕີລາຄາຢ່າງຕັ້ງຫນ້າ ແລະ ໄດ້ຮັບການສະຫນັບສະຫນູນຈາກຜູ້ຊົມຜູ້ຟັງທັງຢູ່ພາຍໃນ ແລະ ຕ່າງປະເທດເປັນຈຳນວນຫລວງຫລາຍ. ທ່ານນາງ ດ່ວານທິຈຸງ ຜູ້ອຳນວຍການລະບົບກະຈາຍສຽງພາກພາສາຕ່າງປະເທດໃຫ້ຮູ້ວ່າ: ໃນໄລຍະພຽງຫນຶ່ງເດືອນ ໄດ້ມີຜູ້ເຂົ້າເບິ່ງເວັບໄຊ vov 5 ນັບສິບພັນເທື່ອຄົນແລ້ວ.
“ຫນ້າເວັບ vov 5 ມີປະໂຫຍດຫລາຍຢ່າງ, ໃນນັ້ນ ຜູ້ຊົມຜູ້ຟັງສາມາດອ່ານຂ່າວ ແລະ ບົດຕ່າງໆ, ນອກນັ້ນ ຍັງສາມາດຮັບຟັງບັນດາລາຍການກະຈາຍສຽງໂດຍກົງໄດ້. ແຕ່ລະມື້ ພວກຂ້າພະເຈົ້າໄດ້ຮັບຄຳເຫັນຈາກທ່ານຜູ້ຟັງເປັນຈຳນວນຫລວງຫລາຍ.”
ທ່ານ Hazairin Rjunep ຢູ່ ນະຄອນ Yogyakarta ຊຶ່ງແມ່ນຜູ້ຟັງທີ່ເຄີຍຕິດຕາມລາຍການກະຈາຍສຽງພາກພາສາ ອິນໂດເນເຊຍ ເປັນປະຈຳໃຫ້ຮູ້ວ່າ: ກ່ອນນີ້ຂ້າພະເຈົ້າເຄີຍຕິດຕາມບັນດາລາຍການກະຈາຍສຽງທາງຄື້ນສັ້ນ ແລະ ຄຸນນະພາບກະຈາຍສຽງບໍ່ດີປານໃດ ບາງເທື່ອຄື້ນຖືກລົບກວນ(ບໍ່ແຈ້ງ)ຍ້ອນອາກາດ. ເມື່ອມີຫນ້າເວັບ vov5 ທ່ານສາມາດຕິດຕາມບັນດາລາຍການຂອງວິທະຍຸກະຈາຍສຽງຫວຽດນາມຢ່າງງ່າຍດາຍ. ຜ່ານນັ້ນ ທ່ານຮູ້ຈັກເຖິງສິ່ງທີ່ສ້າງຄວາມປະທັບໃຈຫລາຍຢ່າງກ່ຽວກັບຫວຽດນາມ.
“ຂ້າພະເຈົ້າແມ່ນຜູ້ນິຍົມສະແຕມ ແລະ ກໍແມ່ນຜູ້ຕິດຕາມຮັບຟັງລາຍການຕ່າງໆທາງວິທະຍຸນັບແຕ່ອາຍຸ 10 ປີ. ຜ່ານຫນ້າເວັບຂອງວິທະຍຸກະຈາຍສຽງຫວຽດນາມ ຂ້າພະເຈົ້າຈຶ່ງຮູ້ຈັກໄດ້ວ່າ ຢູ່ ຮ່າໂນ້ຍ ມີຕະຫລາດສະແຕມແຫ່ງຫນຶ່ງດຽວຢູ່ໃນໂລກ ແລະ ຖືກຈັດຂຶ້ນໃນຕອນເຊົ້າຂອງທຸກວັນອາທິດ. ຂ້າພະເຈົ້າເຫັນວ່າ ສິ່ງດັ່ງກ່າວແມ່ນສ້າງຄວາມດູດດື່ມ ແລະ ຂ້າພະເຈົ້າຕັດສິນໃຈມາຫວຽດນາມ ເພື່ອຢ້ຽມຊົມຕະຫລາດສະແຕມຮ່າໂນ້ຍ. ”
ສ່ວນອ້າຍ ອຸດອນ ສອນສຸລິດ, ນັກຄົ້ນຄ້ວາປະລິຍາໂທສັງກັດມະຫາວິທະຍາໄລວັດທະນະທຳ ຮ່າໂນ້ຍໃຫ້ຮູ້ວ່າ, ຫນ້າເວັບ vov 5 ໄດ້ສ້າງເງື່ອນໄຂສະດວກໃຫ້ແກ່ລາວ ແລະ ເພື່ອນລາວຫລາຍຄົນ ສາມາດຕິດຕາມບັນດາຂໍ້ມູນຂ່າວສານກ່ຽວກັບຫວຽດນາມໄດ້ຢ່າງງ່າຍດາຍກວ່າ.
“ຫນ້າເວັບ vov 5 ແມ່ນງາມຫລາຍ ແລະ ເຂົ້າເບິ່ງກໍງ່າຍ, ເນື້ອໃນອຸດົມສົມບູນ, ໃນນັ້ນມີບັນດາຄໍລຳທີ່ຊ່ວຍພວກເຮົາສາມາດຊອກຮູ້ກ່ຽວກັບວັດທະນະທຳ, ຊີວິດສັງຄົມ, ດ້ານການເມືອງຕ່າງໆ. ຂ້າພະເຈົ້າເຫັນວ່າ ນັກສຶກສາລາວທີ່ພວມຮຳ່ຮຽນຢູ່ຫວຽດນາມ ນອກຈາກເວລາຂຶ້ນຫ້ອງແລ້ວ ພວກເພື່ອນສາມາດເຂົ້າເວັບໄຊນີ້ເພື່ອຕິດຕາມຂ່າວຄາວກໍຄືເຂົ້າໃຈກ່ຽວກັບປະເທດ ແລະ ຊາວຫວຽດນາມກວ່າ.”
ຫນ້າເວັບຂອງລະບົບກະຈາຍສຽງພາກພາສາຕ່າງປະເທດ ແມ່ນຊ່ອງຂໍ້ມູນຂ່າວສານມີປະໂຫຍດ ປະກອບສ່ວນຮັດແຄບຊ່ອງຫວ່າງທາງພູມີປະເທດລະຫວ່າງ ຫວຽດນາມ ກັບບັນດາປະເທດໃນໂລກ, ດຶງດູດເພື່ອນມິດສາກົນມາຫວຽດນາມນັບມື້ນັບຫລາຍຂຶ້ນ. ຫນ້າເວັບ ນ້ີໄດ້ກາຍເປັນຂົວເຊື່ອມຕໍ່ລະຫວ່າງຫວຽດນາມ ກັບເພື່ອນມິດສາກົນຢ່າງແທ້ຈິງ.
ຈູງເກື່ອງ