(vovworld)- ຫວຽດນາມ ແລະ ອິນໂດເນເຊຍ ແມ່ນສອງປະເທດມີການພົວພັນສະຫນິດແຫນ້ນ, ມີຫລາຍຈຸດທີ່ຄ້າຍຄືກັນ ແລະ ແບ່ງປັນບັນດາຜົນປະໂຫຍດລວມໃນພາກພື້ນ. ການພົວພັນນີ້ພວມໃນໄລຍະພັດທະນາອັນດີງາມ ພາຍຫລັງຍົກ ການພົວພັນຂຶ້ນສູ່ລະດັບຄູ່ຮ່ວມມືຍຸດທະສາດເມື່ອ ປີ 2013. ການຮ່ວມມືໃນບັນດາຂົງເຂດ: ການເມືອງ, ການປ້ອງກັນຊາດປ້ອງກັນຄວາມສະຫງົບ, ເສດຖະກິດ, ວັດທະນະທຳ ສັງຄົມປີນີ້ບັນລຸໄດ້ບັນດາໝາກຜົນເປັນຫນ້າຊື່ນຊົມ. ບັນລຸໄດ້ໝາກຜົນດັ່ງກ່າວສ່ວນຫນຶ່ງແມ່ນຍ້ອນປະຊາຄົມອາຊຽນໄດ້ຮັບການສ້າງຕັ້ງ (31/12/2015) ແລະ ເຈດຕະນາດີຂອງການນຳສອງປະເທດໃນການຊຸກຍູ້ການຮ່ວມມືສອງຝ່າຍກວ່າອີກ.
ທ່ານ Ibnu Hadi, ເອກອັກຄະລັດຖະທູດ ອິນໂດເນເຊຍ
ປະຈຳຫວຽດນາມ
|
ເດືອນ 11 ຜ່ານມາ, ຢູ່ນອກ ສັບປະດາຂັ້ນສູງຄັ້ງທີ 24 ເວທີປາໄສການຮ່ວມມື ອາຊີ ປາຊີຟີກ (APEC) ຢູ່ Lima ປະເທດ ເປຣູ, ທ່ານປະທານປະເທດຫວຽດນາມ ເຈີນດ້າຍກວາງ ໄດ້ມີການພົບປະກັບທ່ານ Jusuf Kalla, ປະທານາທິບໍດີ ອິນໂດເນເຊຍ. ນະທີ່ນີ້, ການນຳສອງທ່ານໄດ້ເຫັນດີເພີ່ມທະວີການສົມທົບຢູ່ບັນດາເວທີປາໄສຫລາຍຝ່າຍ, ພິເສດ ໃນການຮັກສາສະພາບແວດລ້ອມສັນຕິພາບ, ສະຖຽນລະພາບຢູ່ພາກພື້ນ, ຊຸກຍູ້ການແກ້ໄຂຄວາມຂັດແຍ້ງກັນຢູ່ທະເລຕາເວັນອອກ ໂດຍສັນຕິວິທີ ບົນພື້ນຖານກົດໝາຍສາກົນ, ສ້າງປະຊາຄົມ ອາຊຽນ ຢ່າງໝັ້ນຄົງ.
ຄຽງຄູ່ກັບດ້ານການເມືອງ, ການປ້ອງກັນຊາດປ້ອງກັນຄວາມສະຫງົບ ແມ່ນຈຸດເດັ່ນໃນການພົວພັນລະຫວ່າງສອງປະເທດໃນປີ 2016 ສະແດງໃຫ້ເຫັນຜ່ານການຢ້ຽມຢາມ ແລະ ເຮັດວຽກຂອງການນຳຂັ້ນສູງສຸດຂອງກະຊວງປ້ອງກັນປະເທດສອງປະເທດເປັນຫລາຍຄັ້ງ ກໍຄືການພົບປະແລກປ່ຽນບົດຮຽນ ວຽກງານລະຫວ່າງກອງທັບ ແລະ ຕຳຫລວດສອງປະເທດ ເປັນປະຈຳ.
ລະອຽດ, ຕົ້ນເດືອນ 6/2016, ພົນໂທ ໂຕເລີມ ກຳມະການກົມການເມືອງ, ລັດຖະມົນຕີກະຊວງຕຳຫລວດ ຫວຽດນາມ ແລະ ຄະນະຜູ້ແທນກະຊວງຕຳຫລວດ ຫວຽດນາມ ໄດ້ໄປຢ້ຽມຢາມ ແລະ ເຮັດວຽກກັບອົງການກ່ຽວຂ້ອງຂອງ ອິນໂດເນເຊຍ. ເດືອນ 8/2016, ທ່ານ Ryamizard Ryacudu ລັດຖະມົນຕີກະຊວງປ້ອງກັນປະເທດ ອິນໂດເນເຊຍ ແລະ ຮອງຜູ້ບັນຊາການຕຳຫລວດແຫ່ງຊາດ ອິນໂດເນເຊຍ, ພົນເອກ Syafruddin ມາຢ້ຽມຢາມ ແລະ ເຮັດວຽກກັບບັນດາກະຊວງ, ຂະແຫນງການກ່ຽວຂ້ອງຂອງຫວຽດນາມ. ໃນການຢ້ຽມຢາມ ແລະ ເຮັດວຽກຄັ້ງນີ້, ພົນເອກ Syafruddin ຢືນຢັນວ່າ:
“ການພົວພັນສອງຝ່າຍຫວຽດນາມ ແລະ ອິນໂດເນເຊຍ ນັບມື້ນັບແຫນ້ນແຟ້ນ. ຫນ້າທີ່ຂອງ ກະຊວງຕຳຫລວດ ຫວຽດນາມ ແລະ ກະຊວງຕຳຫລວດ ອິນໂດເນເຊຍ ໃນໄລຍະຈະມາເຖິງແມ່ນຮັບໃຊ້, ປົກປ້ອງຜົນປະໂຫຍດຂອງປະຊາຊົນ ແລະ ປະເທດຫວຽດນາມ, ອິນໂດເນເຊຍ ເວົ້າສະເພາະ ແລະ ອາຊຽນ ເວົ້າລວມ, ຕັດສິນໃຈນຳການພົວພັນສອງຝ່າຍຂຶ້ນສູ່ລະດັບູສູງໃຫມ່, ປະກອບສ່ວນເພີ່ມທະວີຄວາມສາມັກຄີ, ເປັນເອກະພາບໃນອາຊຽນ.”
 |
ຄຽງຄູ່ກັນນັ້ນ, ການພົວພັນດ້ານເສດຖະກິດລະຫວ່າງຫວຽດນາມ ແລະ ອິນໂດເນເຊຍ ໃນປີຜ່ານມາບັນລຸໝາກຜົນດີສົມຄວນ. ອິນໂດເນເຊຍ ແມ່ນຫນຶ່ງໃນບັນດາປະເທດລົງທຶນໃຫຍ່ຢູ່ຫວຽດນາມ. ໄລ່ຮອດເດືອນ 10/2016, ຍອດຈຳນວນເງິນລົງທຶນຂອງ ອິນໂດເນເຊຍ ຢູ່ ຫວຽດນາມ ແມ່ນກວ່າ 400 ລ້ານ USD ດ້ວຍ 54 ໂຄງການ, ສຸມໃສ່ເຂົ້າໃນບັນດາຂະແຫນງຄື: ອຸດສາຫະກຳປຸງແຕ່ງ, ເຮືອນຢູ່, ອາຫານ ແລະ ເຄື່ອງດືມ, ຂຸດຄົ້ນຖ່ານຫີນ, ກະສິກຳປ່າໄມ້ ສິນໃນນ້ຳ… ທີ່ງານວາງສະແດງ VietNam Expor ນະຄອນໂຮ່ຈິມີນ ປີ 2016 ດຳເນີນແຕ່ວັນທີ 30/11-3/12, ອິນໂດເນເຊຍແມ່ນປະເທດກິຕິມະສັກ ໂດຍມີການເຂົ້າຮ່ວມຂອງຮ້ານວາງສະແດງສິນຄ້າ 66 ຮ້ານ. ຈຳນວນຮ້ານສິນຄ້າຫລາຍສຸດນັບແຕ່ກ່ອນມາຮອດປະຈຸບັນທີ່ງານວາງສະແດງນັ້ນໄດ້ພິສູດໃຫ້ເຫັນການຮ່ວມມືດ້ານການຄ້າລະຫວ່າງສອງປະເທດ. ເມື່ອເວົ້າເຖິງໝາກຜົນດ້ານການຄ້າລະຫວ່າງສອງປະເທດໃນປີຜ່ານມາ, ທ່ານ ຫງວຽນຕວນ, ຮອງຜູ້ອຳນວຍການສູນສົ່ງເສີມການຄ້າ ແລະ ການລົງທຶນ, ຄະນະກຳມະການປະຊາຊົນນະຄອນ ໂຮ່ຈິມີນ ໃຫ້ຮູ້ວ່າ:
“ໃນປີ 2015, ວົງເງິນການຄ້າລະຫວ່າງສອງປະເທດບັນລຸ 5,6 ຕື້ USD, ໃນນັ້ນໄລ່ສະເພາະວົງເງິນການຄ້າກັບນະຄອນ ໂຮ່ຈິມີນ ແມ່ນ 1,09 ຕື້ USD. ໃນ 10 ເດືອນຕົ້ນປີ 2016, ການຄ້າສອງຝ່າຍ ອິນໂດເນເຊຍ ແລະ ຫວຽດນາມ ບັນລຸ 4,4 ຕື້ USD(ນະຄອນໂຮ່ຈິມີນກວມກວ່າ 21%), ໃນນັ້ນ ການສົ່ງອອກຂອງ ອິນໂດເນເຊຍ ເຂົ້າຫວຽດນາມ ຢູ່ໃນລະດັບ 2,27 ຕື້ USD, ວົງເງິນນຳເຂົ້າສິນຄ້າຈາກຫວຽດນາມຂອງອິນໂດເນເຊຍບັນລຸ 2,21 ຕື້ USD. ສູ້ຊົນໝົດປີ 2016, ວົງເງິນການຄ້າລະຫວ່າງສອງປະເທດບັນລຸ 6 ຕື້ USD.”
ກ່ຽວກັບຂົງເຂດການທ່ອງທ່ຽວ, ແຕ່ລະປີ ມີນັກທ່ອງທ່ຽວຫວຽດນາມໄປຢ້ຽມຢາມ ອິນໂດເນເຊຍປະມານ 50.000 ເທື່ອຄົນ ແລະ ນັກທ່ອງທ່ຽວອິນໂດເນເຊຍ ມາຢ້ຽມຢາມ ຫວຽດນາມ ປະມານ 80.000 ເທື່ອຄົນ. ທ່ານ Ibnu Hadi, ເອກອັກຄະລັດຖະທູດ ອິນໂດເນເຊຍ ປະຈຳຫວຽດນາມ ແບ່ງປັນວ່າ:
“ປະຈຸບັນ ມີສາຍການບິນໂດຍກົງ ຈາກ ນະຄອນໂຮ່ຈິມີນ ໄປຍັງ ຈາກາຕາ. ຂ້າພະເຈົ້າປາດຖະຫນາວ່າ ກ້າວເຂົ້າສູ່ປີໃຫມ່ Vietnam Airlines ຈະເປີດສາຍການບິນໂດຍກົງຈາກ ຮ່າໂນ້ຍ ໄປຍັງ ຈາກາຕາ ແລະ ເຊື່ອມຕໍ່ຮ່າໂນ້ຍ ກັບນະຄອນທ່ອງທ່ຽວອື່ນຄື: Bali ຫລື Yogyakarta. ຫວຽດນາມ ແມ່ນປະເທດມີຄວາມປອດໄພ ແລະ ສະຫງົບສຸກ. ສິ່ງດັ່ງກ່າວໄດ້ເຮັດໃຫ້ບັນດານັກທ່ອງທ່ຽວ ອິນໂດເນເຊຍ ນິຍົມມາຢ້ຽມຢາມຫວຽດນາມ. ຂ້າພະເຈົ້າຫວັງວ່າ ນັບມື້ນັບມີນັກທ່ອງທ່ຽວສອງປະເທດໄປມາຢ້ຽມຢາມ ແລະ ຊອກຮູ້ເຊິ່ງກັນ ແລະກັນຫລາຍກວ່າ.”
ການເຄື່ອນໄຫວການທູດປະຊາຊົນລະຫວ່າງສອງປະເທດໃນປີຜ່ານມາ ກໍດຳເນີນໄປຢ່າງຟົດຟື້ນທີ່ສຸດ. ສະຖານທູດ ອິນໂດເນເຊຍ ໄດ້ສົມທົບກັບສະມາຄົມມິດຕະພາບ ຫວຽດນາມ - ອິນໂດເນເຊຍ ແລະ ສະມາຄົມມິດຕະພາບ ອິນໂດເນເຊຍ ຫວຽດນາມ ຈັດຕັ້ງລາຍການສະເຫລີມສະຫລອງ ວັນຊາດຂອງສອງປະເທດ ແລະ ບັນດາລາຍການພົວພັນແລກປ່ຽນວັດທະນະທຳສິລະປະຢ່າງຟົດຟື້ນ. ໃນການຢ້ຽມຢາມ ແລະ ເຮັດວຽກຢູ່ ອິນໂດເນເຊຍ ຕົ້ນປີ 2016, ທ່ານ ຫງວຽນດັງຕຽນ, ອະດີດຜູ້ອຳນວຍການໃຫຍ່ ວິທະຍຸກະຈາຍສຽງຫວຽດນາມ, ປະທານສະມາຄົມມິດຕະພາບອິນໂດເນເຊຍ - ຫວຽດນາມ ເວົ້າວ່າ:
“ສະມາຄົມມິດຕະພາບ ຫວຽດນາມ - ອິນໂດເນເຊຍ ໃນອາຍຸການຜ່ານມາ ໄດ້ມີຄວາມມານະພະຍາຍາມຫລາຍຢ່າງໃນການເພີ່ມພູນຄູນສ້າງໄມຕິຈິດ, ການພົບປະແລກປ່ຽນປະຊາຊົນລະຫວ່າງສອງປະເທດ. ໃນອາຍຸການນີ້ ຈຸດສຸມແມ່ນຊຸກຍູ້ການພົວພັນນັບມື້ນັບແທດຈິງ ແລະ ມີປະສິດທິຜົນ. ໃນສະພາບປະຊາຄົມ ອາຊຽນ ຫາກໍ່ໄດ້ຮັບການສ້າງຕັ້ງໃຫມ່, ຫນ້າທີ່ໂຄສະນາພາບພົດສອງປະເທດເຖິງປະຊາຄົມ ອາຊຽນ ເວົ້າສະເພາະ ແລະ ປະຊາຄົມສາກົນ ເວົ້າລວມ ຂອງວິທະຍຸກະຈາຍສຽງແຫ່ງຊາດຂອງທັງສອງປະເທດຍິ່ງມີຄວາມຈຳເປັນກວ່າ.”
ປີ 2017, ຫວຽດນາມ ຈະເປັນເຈົ້າພາບຈັດຕັ້ງກອງປະຊຸມສຸດຍອດ APEC ແລະ ບັນດາກອງປະຊຸມກ່ຽວຂ້ອງ ດ້ວຍຫົວຂໍ້ “ສ້າງກຳລັງຫນູນໃຫມ່ ພ້ອມກັນເພີ່ມພູນຄູນສ້າງໃຫ້ອະນາຄົດລວມ”. ຂໍ້ຕົກລົງນີ້ໄດ້ຮັບການສະຫນັບສະຫນູນຢ່າງແຮງຈາກບັນດາປະເທດສະມາຊິກ ອາຊຽນ. ໃນນັ້ນ ອິນໂດເນຊຍ ຕີລາຄາສູງບົດບາດ ແລະ ອິດທິພົນຊື່ສຽງຂອງຫວຽດນາມ ແລະ ການນຳສອງຝ່າຍໄດ້ເປັນເອກະພາບສົມທົບກັນຈັດຕັ້ງປີ APEC VietNam 2017 ເປັນຢ່າງດີ.