(vovworld)- ພວກເຮົາແມ່ນບັນດາເພື່ອນມິດທີ່ສະຫນິດສະຫນົມຂອງກັນ”. ນັ້ນແມ່ນຄຳເວົ້າທີ່ໄດ້ເຕື້ອງເຖິງຫລາຍສຸດພາຍຫລັງງານລາຕີວັດທະນະທຳຫວຽດນາມ - ອິນໂດເນເຊຍ ທີ່ຫາກໍ່ດຳເນີນໄປຢູ່ ຮ່າໂນ້ຍ ໃນຕົ້ນເດືອນ 12/2013. ໃນລາຍການອາຊຽນພາກນີ້, ພວກເຮົາແນະນຳບົດທີ່ພາດຫົວເລື່ອງວ່າ: ການພົວພັນແລກປ່ຽນວັດທະນະທຳ-ຂົວເຊື່ອມຕໍ່ນຳ້ໃຈມິດຕະພາບລະຫວ່າງ ຫວຽດນາມ - ອິນໂດເນເຊຍ
ໃນການສະແດງຕະຫຼອດເວລາ 90 ນາທີ, ນັກສິລະປິນ 11 ຄົນຂອງຄະນະ ສິລະປະກອນ Padang ທີ່ມາຈາກທາງທິດຕາເວັນຕົກຂອງແຂວງ Sumatra ໄດ້ແນະນຳບັນດາວາດຟ້ອນພື້ນເມືອງທີ່ຟົດຟື້ນງາມຕາ, ພ້ອມກັບບັນດາບົດເພງ ສຽງດົນຕີພື້ນເມືອງທີ່ເປັນເອກະລັກສະເພາະຂອງຫວຽດນາມ. ທ່ານນາງ Ade ຫົວຫນ້າຄະນະສິລະປະກອນ Padang ໃຫ້ຮູ້ວ່າ:
“ພວກຂ້າພະເຈົ້າໄດ້ສະແດງບັນດາວາດຟ້ອນຄື: ວາດຟ້ອນ Manggaro,ເສບຫລາຍບົດດົນຕີດ້ວຍເຄື່ອງດົນຕີພື້ນເມືອງ Sampelo ທີ່ມີທຳນອງຄ້າຍຄືກັນກັບດົນຕີຂອງຫວຽດນາມ ພ້ອມກັບບັນດາວາດຟ້ອນອື່ນຄື: Selendang, Indang, ແລະ ຂັບຮ້ອງເພງ Bacukudo ແລະ ສຸດທ້າຍແມ່ນວາດຟ້ອນ piring.”
ວາດຟ້ອນ Piring ແມ່ນວາດຟ້ອນພື້ນເມືອງຂອງທາງທິດຕາເວັນຕົກ ແຂວງ Sumatra. ກ່ອນນີ້ ວາດຟ້ອນ Piring ເຄີຍສະແດງໃນບັນດາງານບຸນບູຊາຟ້າແຖນ ທີ່ໄດ້ດົນບັນດານໃຫ້ຊາວທ້ອງຖິ່ນມີລະດູການເກັບກ່ຽວໄດ້ຮັບຜົນດີ. ໃນວາດຟ້ອນນີ້, ບັນດານັກສິລະປິນໃນຊຸດອາພອນພື້ນເມືອງ ດ້ວຍເສື້ອ Melayu ສີແດງ, ສີເຫຼືອງ, ມືຖືຈານອາຫານຫຼາຍເຍື່ອງ ສະແດງວາດຟ້ອນດ້ວຍກິລິຍາທ່າທາງທັງອ່ອນນ້ອມ, ທັງແຂງແຮງ.. ແຕ່ບໍ່ໄດ້ໃຫ້ຈານຕົກ. ຍ້ອນເຫດນັ້ນ, ວາດຟ້ອນນີ້ຍັງເອີ້ນວ່າຟ້ອນຈານ
ງານລາຕີວັດທະນະທຳ ຫວຽດນາມ-ອິນໂດເນເຊຍ
ພາບ:internet
|
ອ້າຍ Osep, ນັກສິລະປິນຄະນະສິລະປະກອນ Padang ໃຫ້ຮູ້ວ່າ: Piring ແມ່ນວາດຟ້ອນທີ່ສະແດງຍາກທີ່ສຸດ ເພາະນັກສິລະປິນບໍ່ໄດ້ໃຫ້ຈານຕົກ ໃນຂະນະທັງຟ້ອນດ້ວຍມື ແລະ ຕີນ ທັງສົມທົບກັບການສະແດງມວຍສິລະປະ Pencasilat. ສຳລັບນັກສິລະປິນທີ່ເຄີຍສະແດງວາດຟ້ອນນີ້ມາເປັນເວລາໃນ 8 ປີ ແລ້ວ, ການສະຫນັບສະຫນູນຂອງຜູ້ຊົມແມ່ນການສົ່ງເສີມ, ລະດົມກຳລັງໃຈອັນໃຫຍ່ຫລວງເພື່ອໃຫ້ເຂົາເຈົ້າສາມາດສະແດງ ສິລະປະພື້ນເມືອງຂອງຊາດຕົນໄດ້ດີ.
“ສຳລັບພວກຂ້າພະເຈົ້າແລ້ວ, ຮອຍຍ້ີມ ແລະ ສຽງຕົບມືຂອງຜູ້ຊົມແມ່ນແຫລ່ງປຸກລະດົມກຳລັງໃຈພວກຂ້າພະເຈົ້າ. ຫວັງວ່າ ຈະມີຫລາຍຄົນຮູ້ຈັກເຖິງດ້ານວັດທະນະທຳອິນໂດເນເຊຍ ກວ່າ ແລະ ຈະສືບຕໍ່ໄດ້ສະແດງຢູ່ຫວຽດນາມຫລາຍຄັ້ງກວ່າອີກ. ພວກຂ້າພະເຈົ້າຫວັງວ່າ ເມື່ອຮັບຊົມບັນດາວາດຟ້ອນດັ່ງກ່າວ, ທຸກຄົນລ້ວນແຕ່ຮູ້ຈັກໄດ້ວ່າ ນັ້ນແມ່ນວາດຟ້ອນຂອງອິນໂດເນເຊຍ”
ສຽງຕົບມື
“ງານລາຕີວັດທະນະທຳ ຫວຽດນາມ-ອິນໂດເນເຊຍ” ໄດ້ຮັບຜົນສຳເລັດ ແລະ ສ້າງຄວາມປະທັບໃຈຢ່າງເລິກເຊ່ິງໃຫ້ແກ່ຜູ້ຊົມຫວຽດນາມ. ເອື້ອຍ ຫງວຽນທິງອກບີກ, ຜູ້ຊົມນະຄອນຫລວງ ຮ່າໂນ້ຍ ແບ່ງປັນວ່າ:
“ລາຍການສະແດງຂອງຄະນະສິລະປະກອນ ອິນໂດເນເຊຍ ມ່ວນຫລາຍ, ເປັນເອກະລັກສະເພາະ, ເຕັມໄປດ້ວຍສີສັນຂອງອິນໂດເນເຊຍ. ບັນດາກິລິຍາທ່າທາງຂອງເຂົາເຂົ້າອ່ອນນ້ອມສວຍລວຍ ເຮັດໃຫ້ຜູ້ຊົມຮູ້ສຶກສະຫວາດສະເຫວີຍ. ຂ້າພະເຈົ້າມັກລາຍການສິລະປະນີ້ຫລາຍ ແລະ ຫວັງວ່າຈະໄດ້ຮັບຊົມລາຍການຄືດັ່ງກ່າວອີກຄັ້ງຫນຶ່ງ.”
ການສະໜັບສະໜູນຈາກຜູ້ຊົມ ແມ່ນແຫລ່ງລະດົມກຳລັງໃຈອັນໃຫຍ່ຫລວງໃຫ້ແກ່ຄະນະຈັດຕັ້ງເຫດການນີ້. ທ່ານ ຫວໍທິຫາຍ, ຮອງປະທານປະຈຳສະຫະພັນບັນດາອົງການຈັດຕັ້ງມິດຕະພາບນະຄອນ ຮ່າໂນ້ຍ, ເຊື່ອໝັ້ນວ່າ: ການເຄື່ອນໄຫວນີ້ຈະປະກອບສ່ວນຮັດແຫນ້ນອາລົມຈິດທີ່ເປັນມູນເຊື້ອຂອງປະຊາຊົນສອງປະເທດຫວຽດນາມ- ອິນໂດເນເຊຍ.
“ລາຍການສິລະປະແມ່ນກາລະໂອກາດດີທີ່ສຸດເພື່ອໃຫ້ພວກເຮົາຫຍັບມໍ່ໃກ້ກັນກວ່າ, ເພື່ອປະກອບສ່ວນເພີ່ມທະວີຄວາມສາມັກຄີມິດຕະພາບ ແລະ ການແລກປ່ຽນວັດທະນະທຳລະຫວ່າງສອງປະເທດ, ພິເສດແມ່ນສ້າງຄວາມເຂົ້າອົກເຂົ້າໃຈເຊິ່ງກັນ ແລະກັນລະຫວ່າງປະຊາຊົນນະຄອນຫລວງຮ່າໂນ້ຍ, ຫວຽດນາມ ກັບປະຊາຊົນອິນໂດເນເຊຍ ແລະ ເພື່ອນມິດສາກົນ.”
ໂດຍມີທັດສະນະ ດຽວກັນ, ທ່ານນາງ Ingan Malam, ທູດວັດທະນະທຳ ແລະ ຖະແຫລງຂ່າວ ສະຖານທູດອິນໂດເນເຊຍ ປະຈຳຫວຽດນາມ ມີຄວາມເຊື່ອໝັ້ນວ່າ: ງານລາຕີວັດທະນະທຳຫວຽດນາມ-ອິນໂດເນເຊຍ ຈະນັບມື້ນັບຊຸກຍູ້ສາຍພົວພັນມິດຕະພາບ ຊື່ງມີມາແຕ່ດົນນານລະຫວ່າງປະຊາຊົນສອງປະເທດ.
“ພວກຂ້າພະເຈົ້າປາດຖະຫນາວ່າ ປະຊາຊົນຫວຽດນາມ ສາມາດເຂົ້າໃຈກ່ຽວກັບອິນໂດເນເຊຍກວ່າ, ເພາະວ່າ ຊາວຫວຽດນາມ ຫລາຍຄົນພຽງແຕ່ຮູ້ຈັກຊື່ຂອງປະເທດອິນໂດເນເຊຍເທົ່ານັ້ນ ຫາກບໍ່ທັນເຂົ້າໃຈກ່ຽວກັບວັດທະນະທຳຂອງອິນໂດເນເຊຍ. ສະນັ້ນ ພວກຂ້າພະເຈົ້າຈັດຕັ້ງງານລາຕີວັດທະນະທຳນີ້ ເພື່ອແນະນຳກ່ຽວກັບຈຸຸດວັດທະນະທຳຂອງ Sumatra ເພື່ອໃຫ້ບັນດາຜູ້ຊົມ ແລະ ປະຊາຊົນຫວຽດນາມ ສາມາດເຂົ້າໃຈວັດທະນະທຳທີ່ເປັນຫລາຍຮູບຫລາຍແບບຂອງປະເທດອິນໂດເນເຊຍ.”
ອາດຈະເວົ້າໄດ້ວ່າ“ງານລາຕີວັດທະນະທຳ ຫວຽດນາມ-ອິນໂດເນເຊຍ” ພ້ອມກັບລາຍການພົບປະແລກປ່ຽນວັດທະນະທຳສິລະປະໃນປີຜ່ານມາ ໄດ້ກາຍເປັນຂົວເຊື່ອມຕໍ່ໃຫ້ແກ່ນຳ້ໃຈມິດຕະພາບ ແລະ ຄວາມເຂົ້າໃຈເຊິ່ງກັນ ແລະ ກັນລະຫວ່າງປະຊາຊົນສອງປະເທດ, ເພື່ອພ້ອມກັນຊຸກຍູ້ນຳ້ໃຈມິດຕະພາບປະຊາຊົນໃນຊາຍຄາລວມອາຊຽນ.