(vovworld)- ບົດລາຍງານໂດຍກະຊວງແຮງງານ ສິງກະໂປ ທີ່ຫາກໍ່ປະກາດໄດ້ສະແດງໃຫ້ເຫັນວ່າ: ຈຳນວນວຽກງານ ແລະ ລາຍຮັບໃນປີຜ່ານມາແມ່ນເພີ່ມຂຶ້ນຢ່າງແຮງ. ເຖິງຢ່າງໃດກໍຕາມ, ບັນດາຜູ້ຊ່ຽວຊານກໍກ່າວເຕືອນກ່ຽວກັບສິ່ງທ້າທາຍໃຫມ່ສຳລັບຄົນງານຢູ່ ສິງກະໂປ ເມື່ອມີບໍລິສັດຫລາຍແຫ່ງປະຕິບັດການສ້າງໂຄງປະກອບການຜະລິດດຳເນີນທຸລະກິດຄືນໃຫມ່ໃນປີນີ້.
ໃນປີ ຜ່ານມາ, ສິງກະໂປ ໄດ້ສ້າງວຽກງານໃຫມ່ຕື່ມອີກເກືອບ 135.000 ວຽກ ງານ
ພາບປະກອບ:dantri.com.vn
|
ໃນປີ ຜ່ານມາ, ສິງກະໂປ ໄດ້ສ້າງວຽກງານໃຫມ່ຕື່ມອີກເກືອບ 135.000 ວຽກ ງານ. ຍ້ອນນະໂຍບາຍຮັດກຸ່ມສຳລັບຄົນງານຕ່າງປະເທດ, ຈຳນວນວຽກເຮັດງານທຳໃຫ້ແກ່ຄົນງານສິງກະໂປ ເພີ່ມຂຶ້ນກວ່າ 39%. ຕາມການສະຖິຕິກໍແລ້ວ: ຈຳນວນວຽກງານໃຫມ່ໃນໄຕມາດທີ 4 ແມ່ນຫລາຍກວ່າເມື່ອທຽບໃສ່ໄຕມາດ 3. ເຖິງຢ່າງໃດກໍຕາມ, ຮອງສາສະດາຈານ Shandre M Thangavelu, ສັງກັດມະຫາວິທະຍາໄລແຫ່ງຊາດ ສິງກະໂປ ກ່າວເຕືອນວ່າ:
“ໄຕມາດທີ 4 ຜ່ານມາ, ມີ 39.000 ວຽກງານໃຫມ່. ແຕ່ຍອດຜະລິດຕະພັນພາຍໃນຂອງໄຕມາດນີ້ພັດຫລຸດລົງ. ສິ່ງດັ່ງກ່າວສະແດງໃຫ້ເຫັນວ່າ ສະມັດຕະພາບການອອກແຮງງານຂອງໄຕມາດ 4 ໄດ້ຫລຸດລົງຫລາຍເມື່ອທຽບໃສ່ໄຕມາດ 3 .ດັ່ງນັ້ນ ໃນໄລຍະຈະມາເຖິງ ຕ້ອງເອົາໃຈໃສ່ເຖິງການເພີ່ມສະມັດຕະພາບແຮງງານ”
ຕາມບັນດາຜູ້ຊ່ຽວຊານເສດຖະກິດແລ້ວ, ເພື່ອໃຫ້ສະມັດຕະພາບການອອກແຮງງານເພີ່ມຂຶ້ນ, ລັດຖະບານ ສິງກະໂປ ຄວນເອົາໃຈໃສ່ພັດທະນາບັນດາວິສາຫະກິດຂະຫນາດກາງ ແລະ ນ້ອຍ ກໍຄືປ່ຽນແປງໂຄງປະກອບການຜະລິດດຳເນີນທຸລະກິດ. ມີ 60% ວຽກເຮັດງານທຳໃຫມ່ໄດ້ຮັບການສ້າງຂຶ້ນຈາກບັນດາວິສາຫະກິດຂະຫນາດກາງ ແລະ ນ້ອຍ. ສະນັ້ນ ການເພີ່ມສະມັດຕະພາບຢູ່ ບັນດາວິສາຫະກິດນີ້ ຈະປະກອບສ່ວນສຳຄັນເຂົ້າໃນການເພີ່ມສະມັດຕະພາບຂອງທັງພື້ນຖານເສດຖະກິດ. ດ້ານອື່ນ, ບັນດາວຽກເຮັດງານທຳໃຫມ່ ແມ່ນສຸມໃສ່ເຂົ້າໃນຂະແຫນງບໍລິການ, ໃນຂະນະນັ້ນ ຄົນງານເຮັດວຽກໃນຂະແຫນງການຜະລິດພັດຖືກຄັດເຂ່ຍອອກຫລາຍສຸດໃນໄຕມາດທີ 4 ຜ່ານມາ. ນີ້ແມ່ນສັນຍານຂອງການຫັນປ່ຽນໂຄງປະກອບພື້ນຖານເສດຖະກິດ. ບັນດາບໍລິສັດມຸ່ງໄປເຖິງການລົງທຶນເຂົ້າໃນຂະແຫນງອຸດສາຫະກຳທີ່ມີລັກສະນະປະດິດສ້າງ. ທ່ານ David Ang, ຜູ້ອຳນວຍການຮັບຜິດຊອບວຽກງານພັດທະນາການດຳເນີນທຸລະກິດ ແລະ ຈັດຕັ້ງແຫລ່ງຊັບພະຍາກອນມະນຸດ ສິງກະໂປ ຖືວ່າ, ນັບທັງເວລາບັນດາບໍລິສັດຜະລິດຕ້ອງຍົກຍ້າຍໄປເຖິງເຂດ ລາຍຈ່າຍການຜະລິດອາດຈະຫລຸດລົງ, ແຕ່ຄວາມຕ້ອງການກ່ຽວກັບຄົນງານທີ່ມີປະສົບການຄື ນັກວິສາວະກອນ ຍັງສູງຢູ່:
“ບັນດາຂະແຫນງ ມີຄວາມຕ້ອງການຮັບສະຫມັກຄົນງານຫລາຍຄືການເງິນ, ບັນຊີ, ທະນາຄານ, ສຶກສາ, ບໍລິການວິຊາສະເພາະ. ນອກນັ້ນຂະແຫນງໂຮງແຮມ, ຊື່ງແມ່ຂະແຫນງບໍ່ສົ່ງເສີມຄົນງານຕ່າງປະເທດກໍຕ້ອງການຄົນງານຫລາຍ.”
ຫນຶ່ງໃນບັນດາບໍລິການພວມພັດທະນາຢ່າງແຮງຢູ່ ສິງກະໂປ ໃນ 2 ປີມໍ່ໆມານີ້ ແມ່ນບໍລິການເບິ່ງແຍງສຸຂະພາບຢູ່ບ້ານ ດ້ວຍລະດັບເຕີບໂຕສູງກັບ 3 ເທົ່າ. ຕາມກະຊວງສາທາລະນະສຸກ ສິງກະໂປ ແລ້ວ, ບໍລິການເບິ່ງແຍງສຸຂະພາບຢູ່ບ້ານ ຈະສວມບົດບາດສຳຄັນ ເພື່ອຮັບໃຊ້ຜູ້ອາຍຸສູງປະມານ 10.000 ຄົນ ໃນປີ 2020. ທ່ານນາງ Pang Sze Yunn, ຜູ້ຊ່ວຍວຽກຜູ້ອຳນວາຍການໃຫຍ່ອົງການເບິ່ງແຍງສຸຂະພາບຜູ້ອາຍຸສູງ NTUC ໃຫ້ຮູ້ວ່າ:
“ພວກຂ້າພະເຈົ້າເຫັນວ່າ ຄວາມຕ້ອງການກ່ຽວກັບບໍລິການສັງຄົມນັບມື້ນັບສູງ. ນັບແຕ່ເດືອນ 6 ປີກາຍນີ້, ພວກຂ້າພະເຈົ້າໄດ້ເປີດບໍລິການປິ່ນປົວບຳລຸງສຸຂະພາບ, ເບິ່ງແຍງສຸຂະພາບຢູ່ບ້ານ ແລະ ມຸ່ງໄປເຖິງບໍລິການຄົບວົງຈອນ. ບັນດາຜູ້ອາຍຸສູງຈະໄດ້ຮັບການເບິ່ງແຍງຢ່າງຮອບດ້ານ ແລະ ຄົບຖ້ວນ.”
ບັນດາການປ່ຽນແປງໃນໂຄງປະກອບກຳລັງແຮງງານຂອງສິງກະໂປສະແດງໃຫ້ເຫັນວ່າ ພື້ນຖານເສດຖະກິດສິງກະໂປມີການຫັນປ່ຽນ. ຂະແຫນງບໍລິການໄດ້ຮັບການເປີດກວ້າງຢ່າງບໍ່ຢຸດຢັ້ງ ເພື່ອຕອບສະຫນອງຄວາມຕ້ອງການນັບມື້ນັບສູງຂອງປະຊາຊົນພາຍໃນປະເທດ ກໍຄືບັນດານັກທ່ອງທ່ຽວຕ່າງປະເທດເມື່ອມາຢ້ຽມຢາມສິງກະໂປ.