(vovworld)- ປີ 2013 ແມ່ນປີທີ່ມີຄວາມໝາຍຢ່າງແທ້ຈິງສຳລັບສອງປະເທດ ຫວຽດນາມ ແລະ ມາເລເຊຍ ເມື່ອສອງປະເທດສະເຫລີມສະຫລອງ 40 ປີແຫ່ງວັນສ້າງຕັ້ງສາຍພົວພັນທາງການທູດສອງຝ່າຍ. ການພົວພັນຮ່ວມມືລະຫວ່າງ ມາເລເຊຍ ແລະ ຫວຽດນາມ ມີບາດກ້າວກະໂດດຂັ້ນ. ຂໍ້ສັງເກດດັ່ງກ່າວຂອງທ່ານ Shazryll Zahiran ຫົວຫນ້າກົງສູນໃຫຍ່ ມາເລເຊຍ ປະຈຳນະຄອນໂຮ່ຈິມີນ ແມ່ນອີງໃສ່ໝາກຜົນແຫ່ງການຮ່ວມມື ຊື່ງຫວຽດນາມ ແລະ ມາເລເຊຍ ບັນລຸໄດ້ໃນບັນດາຂົງເຂດຄື: ການທູດ, ການທະຫານ, ການຄ້າ, ການລົງທຶນ, ການຮ່ວມມືແຮງງານ…
ນັບແຕ່ສ້າງສາຍພົວພັນທາງການທູດສອງຝາ່ຍເມື່ອວັນທີ 30/3/1973, ການພົວພັນຮ່ວມມື ຫວຽດນາມ - ມາເລເຊຍ ໄດ້ຮັບການເພີ່ມພູນຄູນສ້າງຢ່າງບໍ່ຢຸດຢັ້ງ ແລະ ຍູ້ແຮງຢ່າງຮອບດ້ານ ຜ່ານການຢ້ຽມຢາມ ແລະ ເຮັດວຽກຄັ້ງຕ່າງໆຂອງການນຳຂັ້ນສູງສອງປະເທດ. ຫວ່າງແລ້ວນີ້ ແມ່ນການຢ້ຽມຢາມຫວຽດນາມຂອງກະສັດ ມາເລເຊຍ Abdul Halim Muadzam Shah ເມື່ອຕົ້ນເດືອນ 9 ຜ່ານມາ. ທ່ານ Shazryll Zahiran ຫົວຫນ້າກົງສູນໃຫຍ່ ມາເລເຊຍ ປະຈຳນະຄອນໂຮ່ຈິມີນ ໃຫ້ຮູ້ວ່າ:
ກະສັດ ມາເລເຊຍ Abdul Halim Muadzam Shah ແລະ ທ່ານປະທານ
ປະເທດຫວຽດນາມ ເຈືອງເຕີນຊາງ
ພາບ:internet
|
“ສອງປະເທດໄດ້ລົງນາມໃນສົນທິສັນຍາຮ່ວມມືໃນທຸກຂົງເຂດຫລາຍສະບັບ, ພິເສດ ແມ່ນຖະແຫລງການຮ່ວມກ່ຽວກັບຂອບເຂດການຮ່ວມມືພັດທະນາຮອບດ້ານໃນສັດຕະວັດທີ 21. ນີ້ແມ່ນພື້ນຖານສຳຄັນເພື່ອສ້າງສາຍພົວພັນຍາວນານ ແລະ ໝັ້ນແກ່ນ ໂດຍອີງໃສ່ຄວາມໄວ້ເນື້ອເຊື່ອໃຈ ແລະ ຄວາມເຄົາລົບເຊິ່ງກັນ ແລະກັນ. ສິ່ງດັ່ງກ່າວກໍແມ່ນເງື່ອນໄຂເພື່ອຊຸກຍູ້ການຮ່ວມມືໃນຂົງເຂດຕ່າງໆລະຫວ່າງສອງຝ່າຍ.”
ຄຽງຄູ່ກັບຂົງເຂດການເມືອງ, ການທູດ, ປະຈຸບັນ ສອງປະເທດພວມເອົາໃຈໃສ່ຊຸກຍູ້ການພົວພັນຮ່ວມມືໃນຂົງເຂດປ້ອງກັນຊາດ, ປ້ອງກັນຄວາມສະຫງົບກວ່າອີກ. ພົນໂທ ເຈືອງກວາງແຄງ, ຮອງລັດຖະມົນຕີກະຊວງປ້ອງກັນປະເທດ ຫວຽດນາມ ໃຫ້ຮູ້ວ່າ: ໃນສະພາບການລວມຂອງການພົວພັນລະຫວ່າງສອງປະເທດ, ການພົວພັນປ້ອງກັນຊາດໄດ້ມີບາດກ້າວພັດທະນາຢ່າງສະດວກ, ເຂົ້າສູ່ລວງເລິກເທື່ອລະກ້າວ.
“ກະຊວງປ້ອງກັນປະເທດສອງປະເທດ ໄດ້ລົງນາມໃນຂໍ້ຕົກລົງຮ່ວມມືປ້ອງກັນຊາດສອງຝ່າຍ ຫວຽດນາມ ແລະ ມາເລເຊຍ ໃນໂອກາດທີ່ທ່ານລັດຖະມົນຕີກະຊວງປ້ອງກັນປະເທດ ຫວຽດນາມ ຟຸ່ງກວາງແທງ ໄປຢ້ຽມຢາມສັນຖະວະໄມຕີມາເລເຊຍ ຢ່າງເປັນທາງການ ເມື່ອເດືອນ 8/2008. ນັບແຕ່ນັ້ນມາຮອດປະຈຸບັນ ສອງປະເທດໄດ້ດຳເນີນການເຄື່ອນໄຫວຮ່ວມມືນຳກັນເປັນປະຈຳ ຄື ແລກປ່ຽນຄະນະຜູ້ແທນການທະຫານຂັ້ນສູງ, ຈັດຕັ້ງບັນດາຊຸດບຳລຸງສ້າງວິຊາສະເພາະ, ແລກປ່ຽນນັກຮຽນການທະຫານ, ຮ່ວມມືລະຫວ່າງກຳລັງທະຫານເຮືອສອງປະເທດ.”
ໃນໄລຍະຜ່ານມາ, ການຮ່ວມມືສອງຝ່າຍ ຫວຽດນາມ ແລະ ມາເລເຊຍ ໃນຂົງເຂດການຄ້າ, ການລົງທຶນ ກໍບັນລຸຜົນງານຫລາຍຢ່າງທີ່ຫນ້າປະທັບໃຈ. ມາເລເຊຍ ແມ່ນຄູ່ຮ່ວມມືດ້ານການຄ້າໃຫຍ່ອັນດັບ 3 ຂອງຫວຽດນາມ ແລະ ແມ່ນຕະຫລາດອຸປະໂພກບໍລິໂພກສິນຄ້າຂອງຫວຽດນາມຫລາຍສຸດໃນຈຳນວນບັນດາປະເທດສະມາຊິກ ອາຊຽນ. ໃນຂະນະນັ້ນ, ຫວຽດນາມ ແມ່ນຄູ່ຮ່ວມມືດ້ານການຄ້າໃຫຍ່ອັນດັບ 5 ຂອງປະເທດນີ້. ໃນໄລຍະ 2006-2012, ຍອດມູນຄ່າແລກປ່ຽນການຄ້າສອງສົ້ນລະຫວ່າງ ຫວຽດນາມ ແລະ ມາເລເຊຍ ເພີ່ມຂຶ້ນສະເລ່ຍແມ່ນ 19,6/ປີ. ທ່ານເອກອັກຄະລັດຖະທູດ ມາເລເຊຍ Dato Azmil Zabidi ໃຫ້ຮູ້ວ່າ:
“ການພົວພັນແລກປ່ຽນດ້ານການຄ້າສອງຝ່າຍລະຫວ່າງ ມາເລເຊຍ ແລະ ຫວຽດນາມ ໃນໄລຍະຜ່ານມາຮັກສາຢູ່ໃນລະດັບສູງ. ໃນປີ 2012, ວົງເງິນການຄ້າລະຫວ່າງສອງປະເທດບັນລຸເກືອບ 9 ຕື້ USD. ຍອດຈຳນວນເງິນລົງທຶນຂອງມາເລເຊຍເຂົ້າຫວຽດນາມໃນປີ 2012 ບັນລຸ 10 ຕື້ USD ດ້ວຍ ກວ່າ 400 ໂຄງການ.”
ນັບແຕ່ຕົ້ນປີຮອດໝົດເດືອນ 7/2013, ວົງເງິນສົ່ງອອກສິນຄ້າຂອງຫວຽດນາມ ໄປຍັງ ມາເລເຊຍ ບັນລຸ 2,87 ຕື້ USD ເພີ່ມທະວີ 21,6% ເມື່ອທຽບໃສ່ໄລຍະດຽວກັນຂອງປີກາຍ. ບັນດາປະເພດສິນຄ້າສົ່ງອອກຕົ້ນຕໍຂອງຫວຽດນາມໄປຍັງ ມາເລເຊຍມີ: ນ້ຳມັນດີບ, ຄອມພິວເຕີ, ຜະລິດຕະພັນເອເລັກໂຕນີກ ແລະ ເຄື່ອງອາໄລ່.. ກົງກັນຂ້າມ, ວົງເງິນສິນຄ້າທີ່ຫວຽດນາມ ນຳເຂົ້າຈາກ ມາເລເຊຍ ບັນລຸ 2,33 ຕື້ USD, ເພີ່ມຂຶ້ນ 21,37% ເມື່ອທຽບໃສ່ໄລຍະດຽວກັນຂອງປີກາຍ, ດ້ວຍບັນດາປະເພດສິນຄ້າຄື: ຜະລິດຕະພັນເອເລັກໂຕນີກ, ເຄື່ອງອາໄລ່, ນ້ຳມັນພືດ…
ນອກນັ້ນ ມາເລເຊຍ ຍັງແມ່ນຕະຫລາດແຮງງານທີ່ເປັນມູນເຊື້ອຂອງຫວຽດນາມ. ນັບແຕ່ເມື່ອເປີດປະຕູຕະຫລາດແຮງງານໃຫ້ແກ່ຊັບພະຍາກອນມະນຸດຫວຽດນາມ, ມາຮອດປະຈຸບັນ, ມາເລເຊຍ ຍັງຄົງແມ່ນຕະຫລາດທີ່ມີຄວາມສາມາດບົ່ມຊ້ອນ ແລະ ດູດດື່ມ. ນັ້ນແມ່ນຂໍ້ສັງເກດຂອງທ່ານຮອງລັດຖະມົນຕີການຕ່າງປະເທດຫວຽດນາມ ຟ້າມບີ່ງມີງ.
“ປະຈຸບັນ ມາເລເຊຍ ແມ່ນຫນຶ່ງໃນບັນດາຄູ່ຮ່ວມມືຕົ້ນຕໍຂອງຫວຽດນາມ. ພວກຂ້າພະເຈົ້າຕີລາຄາສູງປະສິດທິຜົນການຮ່ວມມື ຊື່ງສອງປະເທດບັນລຸໄດ້ໃນຂົງເຂດແຮງງານ. ປະຈຸບັນ ມີແຮງງານຫວຽດນາມ ກວ່າ 80.000 ຄົນພວມເຮັດວຽກຢູ່ ມາເລເຊຍ ອັນໄດ້ປະກອບສ່ວນເຂົ້າໃນການພັດທະນາເສດຖະກິດຂອງສອງປະເທດ.”
ໂດຍແມ່ນສອງປະເທດມີຄວາມສາມາດດ້ານການທ່ອງທ່ຽວ, ສະນັ້ນ ການສົ່ງເສີມໂຄສະນາການທ່ອງທ່ຽວເຊິ່ງກັນ ແລະກັນ ຍາມໃດກໍໄດ້ຮັບຄວາມເອົາໃຈໃສ່ຈາກສອງປະເທດ. ໃນຊຸມປີມໍ່ໆມານີ້, ຈຳນວນນັກທ່ອງທ່ຽວມາເລເຊຍ ມາຢ້ຽມຢາມຫວຽດນາມເພີ່ມຂຶ້ນຢ່າງບໍ່ຢຸດຢັ້ງ ແລະ ກົງກັນຂ້າມ. ສະເພາະປີ 2012, ຈຳນວນນັກທ່ອງທ່ຽວ ຫວຽດນາມ ໄປຢ້ຽມຢາມມາເລເຊຍ ບັນລຸ 200.000ເທ່ືອຄົນ, ໃນຂະນະນັ້ນ ຈຳນວນນັກທ່ອງທ່ຽວມາເລເຊຍ ມາຢ້ຽມຢາມຫວຽດນາມບັນລຸ 400.000 ເທື່ອຄົນ. ສິ່ງດັ່ງກ່າວປະກອບສ່ວນເພີ່ມຄວາມເຂົ້າອົກເຂົ້າໃຈລະຫວ່າງສອງປະເທດ.
ດ້ວຍບັນດາບາດກ້າວພັດທະນາກະໂດດຂັ້ນໃນການພົວພັນລະຫວ່າງຫວຽດນາມ ແລະ ມາເລເຊຍ ໃນຕະຫລອດ 40 ປີຜ່ານມາ, ເຊື່ອໝັ້ນວ່າສອງປະເທດ ຈະກ້າວໄປເຖິງການສ້າງການພົວພັນຄູ່ຮ່ວມມືຍຸດທະສາດໂດຍໄວ. ປະຈຸບັນ ສອງປະເທດ ພວມມານະພະຍາຍາມຜັນຂະຫຍາຍບັນດາມາດຕະການເພີ່ມທະວີການພົວພັນຮ່ວມມືຢ່າງຮອບດ້ານໃນທຸກຂົງເຂດເພື່ອບັນລຸຈຸດໝາຍດັ່ງກ່າວໃຫ້ໄດ້.