(vovworld)- ປະຈຸບັນ ທ່າອ່ຽງເລີ່ມດຳເນີນອາຊີບ (startup) ຂອງບັນດາເພື່ອນຫນຸ່ມ ທີ່ຫາກໍຮຽນຈົບມະຫາວິທະຍາໄລ ຫລື ຜູ້ທີ່ໄດ້ເຮັດວຽກຢູ່ບັນດາບໍລິສັດຫລື ອົງການຂອງລັດໃນໄລຍະສອງສາມປີ ນັບມື້ນັບພັດທະນາ ຢູ່ ໄທ. ໄລ່ມາຮອດເດືອນ 3/2016, ຢູ່ໄທ ມີບໍລິສັດເລີ່ມດຳເນີນອາຊີບ 2000 ແຫ່ງໄດ້ຮັບການກຳນົດມູນຄ່າເຄື່ອງໝາຍການຄ້າ ປະມານ 10 ຕື້ບາດ. ບັນດາ startup ສ່ວນຫລາຍແມ່ນນຳໃຊ້ເຕັກໂນໂລຊີຂໍ້ມູນຂ່າວສານ, ວາງອອກບັນດາແນວຄວາມຄິດທີ່ມີຫົວຄິດປະດິດສ້າງ ເພື່ອສ້າງບາດກ້າວບຸກທະລຸກ່ຽວກັບການພັດທະນາການດຳເນີນທຸລະກິດ ແລະ ຊອກຫາແຫລ່ງທຶນຈາກບັນດາກອງທຶນສ່ຽງໄພຫລືບັນດານັກລົງທຶນເສລີ.
ທ່ານນາຍົກລັດຖະມົນຕີ ໄທ ປະຣາຢຸດ ຈັນໂອຊາ
ເຂົ້າຮ່ວມວັນບຸນ startup
|
ນັບແຕ່ 2 ປີມານີ້, ຕະໄຣ ສັດສະຕະວັດທະນາ, ອາຍຸ 28 ປີ, ເຮັດອາຊີບທະນາຍຄວາມເສລີ ແລະ ຄຸ້ມຄອງກອງທຶນກຸສົນທີ່ສະຫງວນໃຫ້ແກ່ຜູ້ດອ້ຍໂອກາດ. ກອງທຶນນີ້ໂດຍເຈົ້າຍິງ, ຫລານສາວຂອງພະບາດສົມເດັດພະເຈົ້າມະຫາຊີວິດ ພູມີພົນ ອະດູນຍາເດດ ສ້າງຕັ້ງ ເພື່ອຫນູນຊ່ວຍວຽກເຮັດງານທຳໃຫ້ແກ່ນັກໂທດ ພາຍຫລັງໄດ້ອອກຈາກຄຸກ ແລະ ຊ່ວຍໃຫ້ເຂົາເຈົ້າເຊື່ອມຕົວເຂົ້າກັບສັງຄົມ. ໃນວິວັດແຫ່ງການເຮັດວຽກ, ຕະໄຣ ເຫັນວ່າ: ປະຊາຊົນຍັງປະສົບກັບບາງບັນຫາໃນການຊອກຮູ້ຂໍ້ມູນຂ່າວສານດ້ານກົດໝາຍ, ການບໍລິການໃຫ້ຄຳປຶກສາກ່ຽວກັບບັນດາສັນຍາການຄ້າ ຫລື ບັນດາກໍລະນີຂັດແຍ້ງ ຟ້ອງຮ້ອງ … ຈາກນັ້ນ ຕະໄຣ ຈຶ່ງເກີດແນວຄວາມຄິດເປີດບໍລິການໃຫ້ຄຳປຶກສາ ແລະ ເຊື່ອມຕໍ່ລະຫວ່າງບັນດາທະນາຍຄວາມກັບ ຜູ້ທີ່ມີຄວາມຕ້ອງການ ເພື່ອຊຸກຍູ້ເລື່ອງແກ້ໄຂບັນດາບັນຫາກ່ຽວຂ້ອງເຖິງກົດໝາຍຜ່ານທະນາຍຄວາມຢ່າງມີປະສິດທິຜົນ. ແລະ ກ່ອນນີ້ 6 ເດືອນ, ບໍລິສັດ Lawender ໂດຍຕະໄຣ ແລະ ເພື່ອນ 4 ຄົນພ້ອມກັນສ້າງຕັ້ງ ຊື່ງລວມມີພາລະກອນ 7 ຄົນ.
ສຽງ ຕະໄຣ
ໃນເດືອນ 8 ຜ່ານມາ, Lawender ໄດ້ ຊະນະຄູ່ແຂ່ງອື່ນກວ່າ 1000 ແຫ່ງ ແລະ ຍາດລາງວັນທີ 3 ທີ່ການເສັງບັນລະຍາຍ START UP THAILAND BY GSB ໂດຍ ກອງທຶນປະຢັດແຫ່ງຊາດ ຈັດຕັ້ງ ແລະ ໄດ້ຮັບລາງວັນດ້ວຍຈຳນວນເງິນ 200.000 ບາດ. ຍິ່ງກວ່ານັ້ນ, Lawender ຖືກຈັດເຂົ້າບັນຊີລາຍຊື່ວິສາຫະກິດເລີ່ມດຳເນີນອາຊີບແຖວຫນ້າຂອງໄທ 20 ແຫ່ງ ໃນປີ 2016 ໂດຍ Dtac ຊື່ງແມ່ນບໍລິສັດສະຫນອງບໍລິການໂທລະຄົມມະນາຄົມແຖວຫນ້າຂອງໄທຄັດເລືອກ.
ເພື່ອນຕະໄຣ ສັດສະຕະວັດທະນາ
|
ຕາມບົດລາຍງານຂອງບໍລິສັດ Tech Soft ແລ້ວ, ໄລ່ຮອດໄຕມາດທີ 2/2016, ໄທ ມີ ວິສາຫະກິດເລີ່ມດຳເນີນອາຊີບ ປະມານ 70 ແຫ່ງເຄື່ອນໄຫວຢ່າງມີປະສິດທິຜົນ ແລະ ໄດ້ຮັບບ້ວງເງິນລົງທຶນ 4 ຕື້ບາດ. ແຕ່ ບັນຫາຫຍຸ້ງຍາກ ຊື່ງບັນດາວິສາຫະກິດພວມປະສົບນັ້ນ ແມ່ນ ບັນຫາບຸກຄະລາກອນ, ພື້ນຖານໂຄງລ່າງ ແລະ ຂາດທຶນຮອນ. ທ່ານ ສາດໄຊ ພະຍຸນະວິໄຈ, ຜູ້ອຳນວຍການກອງທຶນປະຢັດແຫ່ງຊາດ, ກະຊວງການເງິນໄທ ຍົກວິທີການແກ້ໄຂບັນດາຂາດທຶນວ່າ:
ສຽງທ່ານ ສາດໄຊ
ບໍ່ພຽງແຕ່ໃຫ້ກູ້ຢືມທຶນດ້ວຍອັດຕາດອກເບ້ຍຕ່ຳເທົ່ານັ້ນ, ຫາກກອງທຶນດັ່ງກ່າວ ຍັງມີຫລາຍມາດຕະການຫນູນຊ່ວຍບັນດາແນວຄວາມຄິດທີ່ມີຫົວຄິດປະດິດສ້າງຈາກບັນດາວິສາຫະກິດເລີ່ມດຳເນີນອາຊີບຄື: ຈັດຕັ້ງຊຸດບຳລຸງຄວາມຮູ້ດ້ານບັນຊີ, ການຜະລິດ ແລະ ຈັດຕັ້ງການເສັງບັນລະຍາຍ ດ້ວຍລາງວັນແມ່ນ 1 ລ້ານບາດທີ່ສະຫງວນໃຫ້ແກ່ບັນດາວິສາຫະກິດເລີ່ມດຳເນີນອາຊີບ. ສ່ວນລັດຖະບານໄທ ໄດ້ຈັດຕັ້ງວັນບຸນຂອງວິສາຫະກິດເລີ່ມດຳເນີນອາຊີບ Thailand & digital Thailand 2016 ຢູ່ບາງກອກ ແລະ 3 ເຂດໃນທົ່ວປະເທດ. ຈຸດປະສົງແມ່ນແນໃສ່ຊ່ວຍໂຄສະນາບັນດາວິສາຫະກິດເລີ່ມດຳເນີນອາຊີບ, ສ້າງການເຊື່ອມຕໍ່ລະຫວ່າງ ວິສາຫະກິດເລີ່ມດຳເນີນອາຊີບ ແລະ ບັນດາກອງທຶນລົງທຶນ. ໃນນັ້ນ ວັນບຸນ ວິສາຫະກິດເລີ່ມດຳເນີນອາຊີບ ໄທເປັນຄັ້ງທຳອິດຈັດຂຶ້ນຢູ່ ບາງກອກ ແຕ່ວັນທີ 28/4 – 1/5 ໂດຍມີການເຂົ້າຮ່ວມຂອງ ວິສາຫະກິດເລີ່ມດຳເນີນອາຊີບ 180 ແຫ່ງ, ດຶງດູດຜູ້ເຂົ້າຊົມ 36.000 ຄົນ. ເຫດການນີ້ໄດ້ຮັບການຕີລາຄາວ່າແມ່ນວັນບຸນໃຫຍ່ກ່ວາໝູ່ຢູ່ ອາຊີ. ນອກນັ້ນ ວັນທີ 7/6 ລັດຖະບານໄທ ໄດ້ສ້າງຕັ້ງຄະນະກຳມະການເລີ່ມດຳເນີນອາຊີບແຫ່ງຊາດ ເພື່ອຫນູນຊ່ວຍວິສາຫະກິດເລີ່ມດຳເນີນອາຊີບ. ປອ ພິເສດ ດຸຣົງກາໂຣດ, ລັດຖະມົນຕີ ກະຊວງວິທະຍາສາດເຕັກໂນໂລຊີ ໄທໃຫ້ຮູ້ວ່າ:
ສຽງທ່ານ ພິເສດ
ກ່ຽວກັບທິດທາງພັດທະນາ ວິສາຫະກິດເລີ່ມດຳເນີນອາຊີບ, ນາຍົກລັດຖະມົນຕີໄທ ປຣາຢຸດ ຈັນໂອຊາ ໃຫ້ຄຳໝັ້ນສັນຍາວ່າ: ລັດຖະບານຈະສ້າງເຄືອຂ່າຍຮ່ວມສຳພັນລະຫວ່າງບັນດາພາກສ່ວນເສດຖະກິດຕາມທິດ “ລັດ ແລະ ປະຊາຊົນພ້ອມກັນປະຕິບັດ” ເພື່ອຍາດແຍ່ງທຸກແຫລ່ງກຳລັງໃນສັງຄົມ. ພ້ອມກັນນັ້ນ ດຳເນີນການປະຕິຮູບລະບົບກົດໝາຍ ແລະ ເປີດກວ້າງການໝູນໃຊ້ເຕັກໂນໂລຊີຂໍ້ມູນຂ່າວສານ ເພື່ອຫນູນຊ່ວຍ ວິສາຫະກິດເລີ່ມດຳເນີນອາຊີບ ພັດທະນາ ແລະ ຖືວ່າ ນີ້ແມ່ນພື້ນຖານເພື່ອຊຸກຍູ້ຮູບແບບການເຕີບໂຕເສດຖະກິດໃຫມ່. ໃນນັ້ນ ວາງອອກຍຸດທະສາດປ່ຽນແປງກຳລັງຫນູນແຫ່ງການພັດທະນາເສດຖະກິດ ຈາກເລື່ອງຖືຂະແຫນງອຸດສາຫະກຳເປັນຈຸດສຸມ, ຫັນໄປສູ່ການໝູນໃຊ້ວິທະຍາສາດເຕັກໂນໂລຊີ, ການມີຫົວຄິດປະດິດສ້າງ ແລະ ດັດແປ່ງເພື່ອສ້າງບາດກ້າວບຸກທະລຸໃຫ້ແກ່ພື້ນຖານເສດຖະກິດໃນໄລຍະໃຫມ່.