(vovworld)- ກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດ ອາຊຽນ ຄັ້ງທີ 7 (ADMM7)ຫາກໍ່ອັດລົງຢູ່ ບຣູໄນ ໄດ້ບັນລຸໝາກຜົນອັນດີງາມຫລາຍຢ່າງ. ດ້ວຍຂໍ້ສະເຫນີຮ່ວມມືຢ່າງລະອຽດ, ອີກຄັ້ງຫນຶ່ງ ADMM7 ໄດ້ຢືນຢັນຄວາມຕັດສິນໃຈຢ່າງແຂງແຮງຂອງກຸ່ມໃນການຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບເພືອ່ການພັດທະນາ, ຄວາມວັດທະນາຖາວອນລວມຂອງພາກພື້ນ ກໍຄືແຕ່ລະປະເທດສະມາຊິກ.
ກອງປະຊຸມ ADMM7 ດຳເນີນໄປໃນວັນທີ 6 ແລະ 7/5 ຢູ່ນະຄອນຫລວງ Bandar Seri Begawan ຂອງບຣູໄນ, ບັນດາລັດຖະມົນຕີປ້ອງກັນປະເທດມາຈາກ 10 ປະເທດ ອາຊຽນ ໄດ້ເຫັນດີຮັບຮອງເອົາເອກະສານສຳຄັນທີ່ກ່ຽວຂ້ອງເຖິງການສ້າງລາຍການພົບປະແລກປ່ຽນປ້ອງກັນຊາດບັນດາປະເທດ ອາຊຽນ; ສ້າງຂອບເຂດຫນູນຊ່ວຍພະລາທິການບັນດາປະເທດ ອາຊຽນ; ສ້າງຫນ່ວຍຊ່ຽວຊານ ADMM+ ເຄື່ອນໄຫວມະນຸດສະທຳໃນການເກັບກູ້ລູກລະເບີດ. ກອງປະຊຸມ ADMM7 ກໍໄດ້ຮັບຮອງເອົາຖະແຫລງການຮ່ວມ“ພ້ອມກັນປົກປ້ອງປະຊາຊົນ ແລະ ອະນາຄົດຂອງພວກເຮົາ”.
ທ່ານລັດຖະມົນຕີກະຊວງປ້ອງກັນປະເທດຫວຽດນາມ ຟຸ່ງກວາງແທງ
ພາບ:internet
|
ຕໍ່ຫນ້າການປ່ຽນແປງຢ່າງວ່ອງໄວຂອງສະພາບໃນພາກພື້ນ ແລະ ສາກົນ, ການແກ້ງແຍ້ງຍຸດທະສາດລະຫວ່າງບັນດາປະເທດໃຫຍ່ ພວມວາງອອກຫລາຍກາລະໂອກາດກໍຄືສິ່ງທ້າທາຍສຳລັບບັນດາປະເທດໃນພາກພື້ນ, ໃນນັ້ນມີອາຊຽນ. ເພາະສະນັ້ນ ເພີ່ມທະວີຄວາມສາມັກຄີ, ການຮ່ວມມືເພື່ອຄວາມຈະເລີນຮຸ່ງເຮືອງ ລວມ, ໃນນັ້ນເອົາໃຈໃສ່ເຖິງການຮ່ວມມືກັບບັນດາປະເທດໃຫຍ່ຄື: ຈີນ ແລະ ອາເມລິກາ, ຊື່ງແມ່ນສອງປະເທດມີພື້ນຖານເສດຖະກິດໃຫຍ່ກວ່າໝູ່ຢູ່ໃນໂລກ, ມີຜົນສະທ້ອນເຖິງສະພາບຄວາມໝັ້ນຄົງຂອງພາກພື້ນ, ນັ້ນແມ່ນການຮັບຮູ້ລວມຂອງທຸກປະເທດສະມາຊິກອາຊຽນທີ່ກອງປະຊຸມ ADMM7. ຄຽງຄູ່ກັບການຍູ້ແຮງການຮ່ວມມືໃນຂົງເຂດອາດຊະຍາກຳຂ້າມຊາດ, ກອງປະຊຸມຄັ້ງນີ້ກໍສະເຫນີຫລາຍມາດຕະການຮ່ວມມືຢ່າງລະອຽດຄື: ເພີ່ມທະວີການຮ່ວມມືໃນຂົງເຂດທະຫານເຮືອ, ສ້າງໂທລະສັບສາຍດ່ວນລະຫວ່າງທະຫານເຮືອຂອງບັນດາປະເທດອາຊຽນ, ຈັດຕັ້ງການລາດຕະເວນຮ່ວມບົນທະເລ, ການພົບປະແລກປ່ຽນລະຫວ່າງກຳລັງທະຫານເຮືອບັນດາປະເທດອາຊຽນ. ດ້ວຍຖານະເປັນປະເທດຍົກອອກຂໍ້ລິເລີ່ມ ແລະ ຈັດຕັ້ງປະຕິບັດການເຄື່ອນໄຫວພົບປະແລກປ່ຽນທະຫານເຮືອ ອາຊຽນ ຄັ້ງປະຖົມມະເລີກເມື່ອ ປີ 2012 ສຳເລັດຜົນ, ພັນເອກ ໂດ໋ມີນທາຍ, ຮອງຫົວຫນ້າເສນາທິການເຫຼົ່າທັບເຮືອ ຫວຽດນາມ ຖືວ່າ:
“ການເຄື່ອນໄຫວນີ້ ດ້ານຫນຶ່ງແມ່ນເພີ່ມທະວີນ້ຳໃຈມິດຕະພາບ, ສັນຕິພາບ, ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ລະຫວ່າງທະຫານເຮືອບັນດາປະເທດ ພ້ອມທັງສ້າງປະຖົມປັດໃຈເພື່ອໃຫ້ທະຫານເຮືອສາມາດຮ່ວມມືຢ່າງແຫນ້ນແຟ້ນກວ່າໃນບັນດາການເຄື່ອນໄຫວຄື: ຕ້ານຈົນສະຫລັດ, ການຄ້າເຖື່ອນ, ການຄ້າມະນຸດ, ຊອກຫາກູ້ໄພກູ້ຊີບ… ນອກນັ້ນ ຍັງຊອກຫາມາດຕະການແກ້ໄຂເຫດການດ່ວນທີ່ເກີດຂຶ້ນບົນທະເລໃຫ້ສົມເຫດສົມຜົນ.”
ໃນສະພາບການທະເລຕາເວັນອອກພວມຊ້ອນແຝງບັນດາບັນຫາສັບສົນ, ກອງປະຊຸມ ADMM7 ໄດ້ສະເຫນີຂໍ້ຕົກລົງບໍ່ນຳໃຊ້ກຳລັງອາວຸດກ່ອນໃນການພິພາດອະທິປະໄຕບົນທະເລ, ເປັນຕົ້ນລະຫວ່າງບັນດາປະເທດໃນກຸ່ມມີກຳລັງທະຫານຕັ້ງທັບຢູ່ໝູ່ເກາະເຈື່ອງຊາ. ນີ້ຈະແມ່ນປະຖົມປັດໃຈເພື່ອມຸ່ງໄປເຖິງການປະຕິບັດບັນດາຂໍ້ຕົກລົງຂັ້ນສູງ ເພື່ອເພີ່ມທະວີສັນຕິພາບ, ສະຖຽນລະພາບ, ຫລຸດຜ່ອນຄວາມເຄັ່ງຕຶງ, ການສູ້ຢັນໃນພາກພື້ນ. ທ່ານລັດຖະມົນຕີກະຊວງປ້ອງກັນປະເທດຫວຽດນາມ ຟຸ່ງກວາງແທງ ໃຫ້ຮູ້ວ່າ:
“ພວກເຮົາຕ້ອງພ້ອມກັນມານະພະຍາຍາມປະຕິບັດຄຳໝັ້ນສັນຍາຮັກສາສັນຕິພາບ, ສະຖຽນລະພາບບົນທະເລຕາເວັນອອກ ດ້ວຍວີທີ ບັນດາປະເທດສະມາຊິກອາຊຽນມີການພິພາດອະທິປະໄຕຢູ່ທະເລຕາເວັນອອກ ຄວນຄົ້ນຄ້ວາເພື່ອລົງນາມໃນຄຳໝັ້ນສັນຍາບໍ່ນຳໃຊ້ກຳລັງອາວຸດກ່ອນ ໃນການພິພາດອະທິປະໄຕ, ໃນການແກ້ໄຂກໍລະນີທີ່ເກີດຂຶ້ນບົນທະເລຕາເວັນອອກໂດຍໄວ, ເພື່ອຫລີກລ້ຽງຄວາມເຄັ່ງຕຶງ, ຫລີກລ້ຽງການປະທະກັນ ແລະ ຮັກສາສັນຕິພາບ, ສະຖຽນລະພາບ. ນັ້ນແມ່ນສິ່ງສຳຄັນທີ່ສຸດ.”
ດ້ວຍທັດສະນະສະເໝີຕົ້ນສະເຫມີປາຍຂອງຕົນ ແມ່ນຢືດໝັ້ນແກ້ໄຂການພິພາດໂດຍສັນຕິວິທີ, ເຄົາລົບກົດໝາຍສາກົນ, ໃນນັ້ນ ມີສົນທິສັນຍາກົດໝາຍວ່າດ້ວຍທະເລປີ 1982, ທັດສະນະຂອງຫວຽດນາມໄດ້ຮັບຄວາມເຫັນດີເຫັນພ້ອມຈາກກອງທັບບັນດາປະເທດສະມາຊິກ. ADMM7 ເຫັນດີນຳກັນໂດຍຖືວ່າ: ບັນດາຝ່າຍຄວນພ້ອມກັນມານະພະຍາຍາມປະຕິບັດຖະແຫລງການ DOC, ຖະແຫລງຫລັກການ 6 ຂໍ້ ຂອງອາຊຽນກ່ຽວກັບທະເລຕາເວັນອອກ, ມານະພະຍາຍາມຊຸກຍູ້ການເຈລະຈາສ້າງປະມວນຂໍ້ກຳນົດການປະພຶດບົນທະເລຕາເວັນອອກ (COC) ລະຫວ່າງ ອາຊຽນ ແລະ ຈີນ.
ກອງປະຊຸມໄດ້ເຫັນດີຕໍ່ວິວັດການພັດທະນາຂອງ ADMM ບໍ່ພຽງແຕ່ໃນຂອບເຂດພາຍໃນກຸ່ມເທົ່ານັ້ນ ຫາກພັດທະນາອອກສູ່ພາຍນອກອີກດ້ວຍ ເພື່ອເຊື່ອມຈອດແຫລ່ງກຳລັງແນໃສ່ແກ້ໄຂບັນດາບັນຫາອາດຊະຍາກຳຂ້າມຊາດ. ສະນັ້ນ ເປັນຄັ້ງທຳອິດໃນປະຫວັດສາດແຫ່ງການຮ່ວມມືຂອງອາຊຽນ, ເວທີປາໄສຫນູນຊ່ວຍມະນຸດສະທຳ ແລະ ກູ້ໄພກູ້ຊີບ ສົມທົບກັບເສນາຮັກຈະຖືດຈັດຕັ້ງຂຶ້ນຢູ່ ບຮູໄນ ໃນທ້າຍເດືອນ 6 ຈະມາເຖິງ. ນີ້ແມ່ນການຊ້ອມຮົບມີຂອບຂະຫນາດໃຫຍ່ ໂດຍມີການເຂົ້າຮ່ວມຂອງບັນດາປະເທດ ADMM +, ເປັນຂີດໝາຍແຫ່ງບາດກ້າວພັດທະນາສຳຄັນ ແມ່ນສັນຍາລັກຂອງການເຊື່ອມຈອດອາຊຽນ ກັບບັນດາຄູ່ຮ່ວມມືໃນພາກພື້ນ.
ປາດຖະຫນາຢາກມີສະພາບແວດລ້ອມແຫ່ງສັນຕິພາບ ບໍ່ພຽງແຕ່ແມ່ນຄວາມມຸ້ງມາດປາດຖະຫນາສະເພາະຂອງປະເທດໃດຫນຶ່ງເທົ່ານັ້ນ ຫາກຂອງປະເທດທັງໝົດໃນພາກພື້ນອາຊຽນ ອີກດ້ວຍ. ດ້ວຍບັນດາໝາກຜົນບັນລຸໄດ້ທີ່ກອງປະຊຸມ ADMM7 ຄັ້ງນີ້, ອາຊຽນ ພວມມານະພະຍາຍາມຊອກຫາສຽງເວົ້າລວມດ້ວຍຖານະແມ່ນກຸ່ມທີ່ເປັນເອກະພາບ, ມຸ່ງໄປເຖິງຈຸດໝາຍສ້າງປະຊາຄົມຄວາມໝັ້ນຄົງລວມໃນປີ 2015, ອາຊຽນ ເຂັ້ມແຂງ, ເປັນເອກະພາບ ແລະ ສາມັກຄີ.