(vovworld)- ບັນດາການປ່ຽນແປງໃນໂລກປະຈຸບັນ ພວມເຮັດໃຫ້ ເອີລົບ ແລະ ອາຊີ ປະສົບກັບບາດລ້ຽວໃຫຍ່, ກາຍເປັນປັດໄຈຊັງຈູງການພັດທະນາທົ່ວໂລກ. ດ້ວຍຄວາມແຕກຕ່າງກ່ຽວກັບລະດັບການພັດທະນາເສດຖະກິດ, ເຕັກໂນໂລຊີ, ສະຫະພາບເອີລົບ ແລະ ອາຊຽນ, ຕາງຫນ້າໃຫ້ 2 ພາກພື້ນ ລວມມີ 37 ປະເທດ ດ້ວຍພົນລະເມືອງກວ່າ 1 ຕື້ຄົນ, ຈະມີກາລະໂອກາດຫລາຍຢ່າງເພື່ອຮ່ວມມື ແລະ ເພີ່ມເຕີມໃຫ້ກັນບົນໄລຍະທາງໃຫມ່ນີ້.
ທ່ານນາຍົກລັດຖະມົນຕີ ຫງວຽນເຕີນຢູງ ແລະ
ທ່ານ José Manuel Barroso, ປະທານຄະນະກຳມະການເອີລົບ
ພາບ:baocongthuong.vn
|
ອີຢູ ແມ່ນຄູ່ເຈລະຈາທຳອິດ ແລະ ຍາວນານທີ່ສຸດຂອງ ອາຊຽນ. ປີ 1977, ເມື່ອກົນໄກເຈລະຈາຂອງອາຊຽນກັບບັນດາຄູ່ຮ່ວມມືໃຫຍ່ໃນໂລກໄດ້ຮັບການສ້າງຂຶ້ນ, ໃນຄວາມຈິງ ອີຢູ(ເວລານັ້ນເອີ້ນວ່າ EC) ແມ່ນຄູ່ເຈລະຈາຂອງອາຊຽນ ແຕ່ປີ 1972, ເມື່ອຄະນະກຳມະການສົມທົບພິເສດ ອາຊຽນ ໄດ້ຮັບການສ້າງຕັ້ງຂຶ້ນເພື່ອເຈລະຈາກັບ ອີຢູ ກ່ຽວກັບບັນດາບັນຫາການຄ້າ. ນັບແຕ່ນັ້ນມາຮອດປະຈຸບັນ, ການພົວພັນລະຫວ່າງ ອາຊຽນ ແລະ ອີຢູ ໄດ້ພັດທະນາໃນຫລາຍຂົງເຂດຄື: ການເມືອງ, ເສດຖະກິດ, ວັດທະນະທຳ, ຄວາມໝັ້ນຄົງ, ການປ່ຽນແປງຂອງດິນຟ້າອາກາດ. ສາດສະດາຈານ Josi Damuri, ສູນຄົ້ນຄ້ວາສາກົນ ແລະ ຍຸດທະສາດ ອິນໂດເນເຊຍ ໄດ້ຢືນຢັນວ່າ: ຫລາຍປະເທດໃນກຸ່ມອາຊຽນ ຖືສະຫະພາບເອີລົບແມ່ນຄູ່ຮ່ວມມືຍຸດທະສາດ.
“ສະຫະພາບເອີລົບ ເຄີຍຢືນອັນດັບ 1 ຫລື ອັນດັບ 2 ໃນບັນຊີລາຍຊື່ບັນດາປະເທດ ແລະ ພາກພື້ນ ນຳເຂົ້າສິນຄ້າຈາກຫລາຍປະເທດອາຊຽນຄື: ຫວຽດນາມ, ໄທ, ອິນໂດເນເຊຍ. ນັ້ນແມ່ນດ້ານການຄ້າ, ສຳລັບການລົງທຶນ, ສະຫະພາບ ເອີລົບ ກໍສະຫນອງທຶນຮອນຫລາຍຢ່າງ ແລະ ກາລະໂອກາດດຳເນີນທຸລະກິດຢູ່ ອາຊຽນ. ມີບໍລິສັດຫລາຍແຫ່ງຂອງກຸ່ມນີ້ ໄດ້ຕັ້ງຮາກຖານການຜະລິດຢູ່ທີ່ນີ້.”
ຊຸກຍູ້ດ້ານການຄ້າການລົງທຶນ ຍາມໃດກໍແມ່ນຂົງເຂດ ຊື່ງອາຊຽນ ແລະ ອີຢູ ໄດ້ສຸມໃສ່ໃນໄລຍະຜ່ານມາ. ການພົວພັນກ່ຽວກັບດ້ານເສດຖະກິດລະຫວ່າງ ອາຊຽນ ແລະ ອີຢູ ພວມກ້າວເຂົ້າສູ່ໄລຍະໃຫມ່ພາຍຫລັງວິກິດການເສດຖະກິດທົ່ວໂລກເກີດຂຶ້ນເມື່ອປີ 2008. ວິກິດການເສດຖະກິດທົ່ວໂລກໄດ້ສະແດງໃຫ້ເຫັນວ່າ ການກະທົບ ແລະ ອາໄສເຊິ່ງກັນ ແລະກັນ ລະຫວ່າງບັນດາປະເທດ ແລະ ພາກພື້ນ. ພິເສດ ເມື່ອອາຊຽນ ສ້າງປະຊາຄົມເສດຖະກິດໃນປີ 2015 ຈະເປີດຕະຫລາດໃຫຍ່ໃຫ້ແກ່ ອີຢູ. ຄຽງຄູ່ກັນນັ້ນ, ປະຈຸບັນ ທັງອີຢູ ແລະ ອາຊຽນ ລ້ວນແຕ່ພວມຊອກຫາຮູບແບບການພັດທະນາເສດຖະກິດໃຫມ່, ບົດຮຽນກ່ຽວກັບການປະເຊີນຫນ້າກັບວິກິດການຫນີ້ສາທາລະນະຢູ່ ອີຢູ ຈະແມ່ນບົດຮຽນອັນລ້ຳຄ່າສຳລັບ ອາຊຽນ ກໍຄືໂລກ. ທ່ານ David Osullivan, ຜູ້ອຳນວຍການບໍລິຫານ ອົງການພົວພັນຕ່າງປະເທດ ສະຫະພາບເອີລົບ ຢືນຢັນວ່າ: ອີຢູ ເພີ່ມທະວີການຮ່ວມມືກັບຫວຽດນາມ ເພາະວ່າ ຫວຽດນາມ ແມ່ນຂົວຕໍ່ລະຫວ່າງ 2 ກຸ່ມ.
“ໃນປີ 2012, ອີຢູ ແລະ ຫວຽດນາມ ໄດ້ລົງນາມໃນສັນຍາຮ່ວມມື ແລະ ຄູ່ຮ່ວມມືຮອບດ້ານ. ນີ້ແມ່ນເຄື່ອງມືທີ່ມີຜົນປະໂຫຍດເພື່ອຍົກລະດັບ ແລະ ເປີດກວ້າງການພົວພັນຂອງພວກເຮົາ. ສອງຝ່າຍພະຍາຍາມ ສິ້ນສຸດຮອບເຈລະຈາກ່ຽວກັບສັນຍາການຄ້າເສລີໃນປີນີ້. ນີ້ແມ່ນຈຸດປະສົງທີ່ວາງອອກ ແລະ ມີຄວາມເປັນໄປໄດ້ ”
ຕາມບັນດານັກໄຈ້ແຍກແລ້ວ, ສັນຍາການຄ້າເສລີ ຫວຽດນາມ - ອີຢູ ຈະນຳມາເຊິ່ງບັນດາຜົນປະໂຫຍດແບບຍືນຍົງໃຫ້ແກ່ທັງສອງຝ່າຍ, ໃນນັ້ນ ສະເພາະການຫລຸດຜ່ອນອັດຕາພາສີຈະເຮັດໃຫ້ສິນຄ້າຂອງຫວຽດນາມ ສົ່ງອອກໄປຍັງອີຢູ ເພີ່ມຂຶ້ນແຕ່ 30-40%. ປີ 2013, ຫວຽດນາມ ແມ່ນຄູ່ຮ່ວມມືດ້ານການຄ້າຢືນອັນດັບທີ 4 ຂອງອີຢູ ໃນກຸ່ມ ອາຊຽນ. ອີຢູ ແມ່ນຫນຶ່ງໃນບັນດານັກລົງທຶນໂດຍກົງຕ່າງປະເທດຕົ້ນຕໍຂອງຫວຽດນາມ ດ້ວຍລະດັບຄຳໝັ້ນໝາຍກວ່າ 1 ຕື້ ເອີໂຣ.
ເປັນທີ່ຈະແຈ້ງແລ້ວວ່າ, ສຳລັບ ອີຢູ, ອາຊຽນ, ໃນນັ້ນ ມີຫວຽດນາມ ແມ່ນຄູ່ຮ່ວມມືດ້ານການຄ້າໃຫຍ່ ແລະ ມີມູນຄ່າ. ສ່ວນ ອີຢູ ແມ່ນຕະຫລາດນຳເຂົ້າບັນດາຜະລິດຕະພັນຕົ້ນຕໍຈາກບັນດາປະເທດ ອາຊຽນ. ເພາະສະນັ້ນ, ຊຸກຍູ້ການຮ່ວມມື ລະຫວ່າງ ອີຢູ ແລະ ອາຊຽນ ຊ່ວຍໃຫ້ສອງຝ່າຍ ຜ່ານຜ່າວິກິດການເສດຖະກິດ ແລະ ກ້າວໄປເຖິງໄລຍະເຕີບໂຕໃຫມ່.