(vovworld) – ໃນປີ 2014 ຜ່ານມາ, ພາກພາສາລາວ ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວ,ໂທລະສັບຈາກທ່ານຜູ້ຟັງລາວ ຫຼາຍທ່ານ. ໃນລາຍການໂອ້ລົມກັບເພື່ອນລາວພາກນີ້, ພວກຂ້າພະເຈົ້າຂໍທົບທ້ວນຄືນບາງຄຳເຫັນ ກໍ່ຄືຈົດໝາຍ, ອີແມວເຊິ່ງທ່ານຜູ້ຟັງໄດ້ຝາກມາລາຍການໃນຕະຫຼອດ 1 ປີຜ່ານມາ.
ໃນປີ 2014, ພາກພາສາລາວ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ 329 ສະບັບ, (ລວມທັງ: ຈົດໝາຍ, ອີແມວ, ໂທລະສັບ) ຈາກທ່ານຜູ້ຟັງຢູ່ລາວ, ໄທ ແລະ ຫວຽດນາມ, ເພີ່ມຂຶ້ນ 11,6% ເມື່ອທຽບໃສ່ກັບປີ 2013. ໃນນັ້ນທ່ານຜູ້ຟັງໃຫ້ຂໍ້ສັງເກດວ່າ, ຄື້ນ 1242 KHz ຟັງແຈ້ງດີ, ສຽງຂອງໂຄສົກກໍ່ມ່ວນ ແລະ ສ້າງຄວາມດູດດື່ມໃຫ້ແກ່ຜູ້ຟັງ.
ນອກຈາກບັນດາລາຍການຄື: ຊາຍຄາອາຊຽນ, ຊົນນະບົດໃໝ່, ຊີວິດສັງຄົມ… ບັນດາພາບສາລະຄະດີ, ຂ່າວພາບ, ຂ່າວ ວີດີໂອ ກ່ຽວກັບບັນດາເຫດການກ່ຽວຂ້ອງເຖິງທຸກຂົງເຂດຢູ່ຫວຽດນາມໃນເວັບໄຊ vovworld.vn ໄດ້ຮັບຄວາມນິຍົມ ແລະ ຕີລາຄາສູງຈາກຜູ້ຟັງ, ຜູ້ຊົມ. ໃນນັ້ນເພື່ອນ ດາລາວັນ ສິຫະລາດ ຢູ່ແຂວງຫົວພັນໃຫ້ຮູ້ວ່າ: ຂ້າພະເຈົ້າໄດ້ຕິດຕາມລາຍການພາກພາສາລາວ ວິທະຍຸກະຈາຍສຽງຫວຽດນາມ (VOV) ຜ່ານວິທະຍຸ ແລະ ອີນເຕີແນັດເປັນປະຈຳ. ຫວ່າງແລ້ວນີ້, ໃນລາຍການພາບສາລະຄະດີ, ຂ້າພະເຈົ້າເຫັນວ່າໄດ້ອັບເດັດເຫດການຕ່າງໆ ກໍ່ຄືງານວາງສະແດງຂອງບັນດາປະເທດອາຊຽນ ແລະ ໂລກ. ຜ່ານນັ້ນ, ໄດ້ຊ່ວຍໃຫ້ພວກຂ້າພະເຈົ້າເຂົ້າໃຈບັນດາການເຄື່ອນໄຫວເຫຼົ່ານັ້ນ. ສ່ວນເພື່ອນ ບາລີ ແສງຄຳ, ຢູ່ແຂວງຫົວພັນ ໃຫ້ຮູ້ວ່າ: ຂ້າພະເຈົ້າມັກຊົມລາຍການວີດີໂອ ທີ່ແປເປັນພາສາລາວ, ຜ່ານນັ້ນຂ້າພະເຈົ້າໄດ້ເຫັນປະຈັກຕາການດຳລົງຊີວິດຂອງຊາວຫວຽດນາມ. ຫວັງວ່າ, ໃນໄລຍະຈະມາເຖິງຂ້າພະເຈົ້າຈະໄດ້ຮັບຊົມວີດີໂອ ທີ່ແປເປັນພາສາລາວ ຫຼາຍກວ່າອີກ. ນອກຈາກນັ້ນ, ເພື່ອນ ເພັດສະໝອນ ແກ້ວດວງດີ, ຢູ່ແຂວງວຽງຈັນ ຍັງໃຫ້ຮູ້ວ່າ: ພາກພາສາລາວ, ວິທະຍຸກະຈາຍສຽງຫວຽດນາມ (VOV5) ໄດ້ໃຫ້ຂ່າວກ່ຽວກັບການຮ່ວມມືລະຫວ່າງຫວຽດນາມ ແລະ ລາວ ຢ່າງອຸດົມສົມບູນ ແລະ ທັນການ, ຊ່ວຍໃຫ້ຂ້າພະເຈົ້າ ແລະ ປະຊາຊົນລາວ ເຂົ້າໃຈກ່ຽວກັບນ້ຳໃຈສາມັກຄີລະຫວ່າງ 2 ປະເທດຫຼາຍກວ່າ. ສ່ວນທ່ານເພັດສະຫວັນ ສີຊານົນ ອະດີດຮອງປະທານສະຫະພັນກຳມະບານແຂວງອັດຕະປື, ອະດີດຫົວໜ້າຮັບຜິດຊອບອະນຸສອນສະຖານ ໄກສອນ ພົມວິຫານຢູ່ ແຂວງອັດຕະປື, ຜູ້ທີ່ໄດ້ຕິດຕາມລາຍການເປັນປະຈຳໃນໄລຍະ 7 – 8 ປີ ໃຫ້ຮູ້ວ່າ.
(ທ່ານເພັດສະຫວັນ ສີຊານົນ)
ໃນຂົງເຂດເສດຖະກິດ, ວັດທະນະທຳລະຫວ່າງຫວຽດນາມ - ລາວ. ເພື່ອນ ສຸກສາວັນ ຮວງສີສະຫວາດ ໄດ້ຕີລາຄາສູງບັນດາບົດຂຽນກ່ຽວກັບການປ່ຽນໃໝ່ຂອງພື້ນຖານເສດຖະກິດຫວຽດນາມ. ສ່ວນທ່ານ ວອນຄຳ, ແຂວງຫົວພັນ ກໍ່ແບ່ງປັນວ່າ: ຜ່ານລາຍການທ່ານໝໍໜຸ່ມອາສາສະໝັກ ເພື່ອນໄດ້ຮັບການກວດ ແລະ ປິ່ນປົວພະຍາດໂດຍບໍ່ເສຍຄ່າ ແລະ ປະຈຸບັນອາການສຸຂະພາບກໍ່ເປັນປົກກະຕິແລ້ວ. ເພື່ອນ ມາລີວົງ, ແຂວງວຽງຈັນ ກໍ່ສະແດງຄວາມເຫັນອົກເຫັນໃຈຕໍ່ບັນດາເດັກນ້ອຍຖືກຕິດທາດຜິດສີສົ້ມດີໂອຊິນຂອງຫວຽດນາມ.
ກ່ຽວກັບສະພາບການຢູ່ທະເລຕາເວັນອອກ, ໃນປີ 2014, ລຸງ ຫງວຽນວັນແຕ້ວ, ຊາວຫວຽດນາມ ອາໄສຢູ່ໄທ ໄດ້ສົ່ງອີແມວມາລາຍການໂດຍແບ່ງປັນວ່າ: ສະພາບການຢູ່ທະເລຕາເວັນອອກຮ້ອນເຮັ່ງຂຶ້ນ ຍ້ອນຝ່າຍຈີນຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນເຂດທະເລຂອງຫວຽດນາມ. ແຕ່ດ້ວຍທັດສະນະ, ຫຼັກໝັ້ນສະເໝີຕົ້ນສະເໝີປາຍ ແລະ ທິດທາງທີ່ຖືກຕ້ອງຂອງພັກ, ລັດຖະບານຫວຽດນາມ ພ້ອມກັບຄວາມເອົາໃຈໃສ່ສະໜັບສະໜູນຈາກເພື່ອນມິດສາກົນ ຫວັງວ່າບັນດາຝ່າຍຈະແກ້ໄຂສະພາບການດ້ວຍສັນຕິວິທີ, ຜ່ານທາງດ້ານການທູດ, ບົນພື້ນຖານເຄົາລົບກົດໝາຍສາກົນ.
ກ່ຽວກັບວຽກງານຕິດຕໍ່ພົວພັນກັບທ່ານຜູ້ຟັງ: ທ່ານເພັດສະຫວັນ ສີຊານົນ, ອະດີດຮອງປະທານສະຫະພັນກຳມະບານແຂວງອັດຕະປື, ອະດີດຫົວໜ້າຮັບຜິດຊອບອະນຸສອນສະຖານ ໄກສອນ ພົມວິຫານຢູ່ ແຂວງອັດຕະປື ໃຫ້ຮູ້ວ່າ ທ່ານມີຄວາມປິຕິຊົມຊື່ນ ແລະ ຂອບໃຈລາຍການ ຍ້ອນໄດ້ໃຫ້ການຕ້ອນຮັບໃນເວລາທ່ານມາຢ້ຽມຢາມຫວຽດນາມ. ເພື່ອນ ບູນທັນ ແຂວງຈຳປະສັກ; ເພື່ອນຈັນທະສອນ ສີຫະລາດ, ວິທະຍຸກະຈາຍສຽງແຫ່ງຊາດລາວ; ເພື່ອນສຸວັນ ທິບພະຈັນ, ແຂວງໄຊຍະບຸລີ… ໄດ້ຂອບໃຈການນຳ, ບັນນາທິການ VOV5 ໄດ້ເອົາໃຈໃສ່ມອບໃບຢັ້ງຢືນ ແລະ ຂອງຂວັນໃຫ້ຜູ້ຟັງລາຍການ.
ເພື່ອເຮັດໃຫ້ເນື້ອໃນລາຍການມີຄວາມອຸດົມສົມບູນກວ່າ, ທ້າຍປີ 2014, ລາຍການພາກພາສາລາວ, VOV5 ໄດ້ມີລາຍການອາຫານຫວຽດນາມ ຕື່ມອີກ, ໃນນັ້ນແນະນຳບັນດາເຍື່ອງອາຫານພື້ນເມືອງ, ກໍ່ຄືອາຫານພິເສດສະເພາະທີ່ຮັບຄວາມນິຍົມຈາກຊາວຫວຽດນາມ ແລະ ຕ່າງປະເທດເປັນຈຳນວນຫຼວງຫຼາຍ, ໃນແຕ່ລະບົດກໍ່ແນະນຳວິທີປຸງແຕ່ງອາຫານອີກ. ພາຍຫຼັງຮັບຟັງລາຍການ, ເພື່ອນ ບຸນທະວີ ອິນທະວົງ ໄດ້ແບ່ງປັນວ່າ: ຂ້າພະເຈົ້າໄດ້ຕິດຕາມຮັບຟັງລາຍການອາຫານຫວຽດນາມ, ຂ້າພະເຈົ້າໄດ້ທົດລອງປຸງແຕ່ງອາຫານບາງຢ່າງຕາມການແນະນຳ, ແລະ ຮູ້ສຶກວ່າອາຫານຄືວ່າແຊບ, ຖືກກັບລົດຊາດທີ່ຂ້າພະເຈົ້າເຄີຍກິນຢູ່ຫວຽດນາມ. ຂ້າພະເຈົ້າປາດຖະໜາວ່າ, ໃນໄລຍະຈະມາເຖິງ, ລາຍການພາກພາສາລາວ ຈະມີບົດແນະນຳອາຫານຫຼາຍເຍື່ອງຂອງຫວຽດນາມ ຕື່ມອີກ ເພື່ອໃຫ້ພວກຂ້າພະເຈົ້າເຂົ້າໃຈກວ່າກ່ຽວກັບອາຫານການກິນຂອງຫວຽດນາມ ກໍ່ຄືສາມາດປຸງແຕ່ງເອງ ບັນດາເຍື່ອງອາຫານທີ່ຂ້າພະເຈົ້າເຄີຍກິນຢູ່ຫວຽດນາມແລ້ວ.
ການຕີລາຄາປະກອບຄວາມເຫັນຂອງພວກເພື່ອນໄດ້ຊ່ວຍພວກຂ້າພະເຈົ້າປັບປຸງເນື້ອໃນ, ຍົກສູງຄຸນນະພາບລາຍການພາກພາສາລາວກວ່າອີກ. ຫວັງວ່າໃນປີ 2015, ລາຍການພາກພາສາລາວ ຈະສືບຕໍ່ໄດ້ຮັບຈົດໝາຍ, ອີແມວ, ໂທລະສັບຈາກທ່ານຜູ້ຟັງຫຼາຍກວ່າປີກາຍນີ້ອີກ.
ຂໍອວຍໄຊໃຫ້ພອນແດ່ທ່ານຜູ້ຟັງທຸກທ່ານ, ຂໍໃຫ້ພວກທ່ານມີພະລານາໄມສົມບຸນ, ມີຄວາມຜາສຸກ, ບັນລຸຜົນສຳເລັດໃນວຽກງານຂອງຕົນ ແລະ ສືບຕໍ່ຕິດຕາມລາຍການພາກພາສາລາວ, VOV5.