ບັນຫາກ່ຽວຂ້ອງເຖິງການທ່ອງທ່ຽວຈະແມ່ນເນື້ອໃນຕົ້ນຕໍ່ໃນລາຍການ “ໂອ້ລົມກັບເພື່ອນລາວ” ມື້ນີ້.
ໃນອາທິດ, ເພື່ອນ ອະນຸສິດ ສີບຸນເຮືອງ, ແກ້ວມະລີ, ຢູ່ນະຄອນຫຼວງ ວຽງຈັນ ໄດ້ໂທລະສັບຫາລາຍການເພື່ອອວຍພອນປີໃໝ່. ສ່ວນເພື່ອນ ແວ່ນຕາ ສຸກັນຍາ, ແຂວງ ຫົວພັນ ໄດ້ຝາກອີແມວມາຍັງລາຍການໂດຍສະແດງຄວາມນິຍົມຕໍ່ບັນດາບົດຂຽນໃນໂອກາດບຸນປີໃໝ່ປະຈຳຊາດຂອງ ຫວຽດນາມ, ເພື່ອນຂຽນວ່າ: “ຂ້າພະເຈົ້າບໍ່ມີເວລາຕິດຕາມ, ອ່ານຂ່າວ ແລະ ບົດໃນແວບໄຊຂອງພວກເພື່ອນເປັນປະຈຳ. ແຕ່ໃນຊຸມວັນຜ່ານມາ, ມີບາງບົດຂຽນກ່ຽວກັບບຸນປີໃໝ່ປະຈຳຊາດຂອງ ຫວຽດນາມ ໄດ້ເຮັດໃຫ້ຂ້າພະເຈົ້າມີຄວາມສົນໃຈຫຼາຍ ແລະ ຂ້າພະເຈົ້ານິຍົມທີ່ສຸດແມ່ນບົດຂຽນກ່ຽວກັບຄວາມແຕກຕ່າງກັນໃນການຕ້ອນຮັບບຸນປີໃໝ່ປະຈຳຊາດຢູ່ພາກເໜືອ - ພາກກາງ - ພາກໃຕ້ ຫວຽດນາມ. ຜ່ານບົດຂຽນນີ້ຂ້າພະເຈົ້າເຫັນວ່າ: ການຕ້ອນຮັບບຸນເຕັດຂອງ ຫວຽດນາມ ມີຫຼາຍຂັ້ນຕອນ ແລະ ແຕ່ລະເຂດພາກກໍ່ມີວິທີຕ້ອນຮັບທີ່ແຕກຕ່າງກັນ. ຂ້າພະເຈົ້າເຄີຍໄດ້ຕ້ອນຮັບບຸນເຕັດໃນຄອບຄົວໝູ່ຢູ່ແຂວງ ເຊີນລາ (ທາງທິດເໜືອ ຫວຽດນາມ) ແລະ ເຫັນວ່າກໍມີບາງຈຸດທີ່ຄ້າຍຄືກັນ. ຂອບໃຈບັນດາຂໍ້ມູນເຊິ່ງຂ່າວ ແລະ ບົດໄດ້ນຳມາໃຫ້. ຂ້າພະເຈົ້າຂໍຝາກຄຳອວຍພອນປີໃໝ່ເຖິງປະຊາຊົນ ຫວຽດນາມ ເວົ້າລວມ ແລະ ບັນນາທິການພາກພາສາລາວ ເວົ້າສະເພາະ. ອວຍພອນໃຫ້ພວກເພື່ອນຈົ່ງມີສຸຂະພາບເຂັ້ມແຂງ, ປະຕິບັດສຳເລັດໜ້າທີ່ວຽກງານຂອງຕົນເປັນຢ່າງດີ.”
ພາບປະກອບ
|
ສ່ວນເພື່ອນວັນແສງ, ແຂວງ ວຽງຈັນ ໄດ້ຝາກອີແມວມາຍັງລາຍການດ້ວຍເນື້ອໃນວ່າ: “ຂ້າພະເຈົ້າໄດ້ຊົມພາບສາລະຄະດີ ແລະ ເຫັນຮູບພາບຫິມະຕົກທີ່ປົກຄຸມໄປທົ່ວຢູ່ຈອມພູ ເໝົາເຊີນ. ຂ້າພະເຈົ້າເປັນໜ້າເສຍດາຍ ແລະ ຂໍແບ່ງປັນຄວາມເສຍຫາຍໂດຍອາກາດໜາວຈັດ, ຫິມະຕົກກໍ່ຂຶ້ນໃນໄລຍະຜ່ານມາຢູ່ ຫວຽດນາມ. ແຕ່ວ່າຕາມຂ້າພະເຈົ້າແລ້ວຮູບພາບຫິມະປົກຄຸມຈອມພູ ເໝົາເຊີນນັ້ນງາມຫຼາຍ. ຂ້າພະເຈົ້າຢາກຮູ້ຂໍ້ມູນຂ່າວໃດໜຶ່ງກ່ຽວກັບຈອມພູ ເໝົາເຊີນ ໄດ້ບໍ່?”
ເພື່ອນ ວັນແສງ ທີ່ຮັກແພງ, ຈອມພູ ເໝົາເຊີນ ແມ່ນເຂດພູສູງລຽບຕາມທິດຕາເວັນອອກ - ຕາເວັນຕົກ, ເຊິ່ງຕັ້ງຢູ່ທາງທິດຕາເວັນອອກສ່ຽງເໜືອແຂວງ ລ້າງເຊີນ, ຂຶ້ນກັບ 3 ຕາແສງນັ້ນແມ່ນ: ເໝົາເຊີນ, ກົງເຊີນ ເມືອງ ກາວໂລກ ແລະ ຕາແສງ ເໝົາເຊີນ ເມືອງ ໂລກບີ່ງ, ຫ່າງຈາກນະຄອນ ລ້າງເຊີນ ໄປທາງທິດຕາເວັນອອກ 30 ກມ, ແມ່ນຕິດກັບຊາຍແດນ ຫວຽດນາມ - ຈີນ. ນີ້ແມ່ນເຂດພູສູງຂອງແຂວງ, ມີພູມສັນຖານຫຼາຍຮູບຫຼາຍແບບ, ມີຄວາມສູງສະເລ່ຍແຕ່ 800 – 1.000 ມ ເມື່ອທຽບໃສ່ໜ້ານຳ້ທະເລ, ເຊິ່ງປະກອບດ້ວຍພູໃຫຍ່ນ້ອຍ 80 ແຫ່ງ. ໃນຍາມລະດູໜາວ, ອຸນຫະພູມຢູ່ ເໝົາເຊີນ ແມ່ນຕຳ່ກວ່າ 0 ອົງສາ, ເຄີຍມີຫິມະຕົກ. ອຸນຫະພູມສະເລ່ຍຢູ່ທ່ີນີ້ແມ່ນປະມານ 15,5 ອົງສາ, ມີເມກປົກຄຸມໄປທົ່ວຕະຫຼອດປີ. ເໝົ້າເຊີນແມ່ນບ່ອນຢູ່ອາໄສຂອງຊົນເຜົ່າ ຢາວ, ນູ່ງ, ໄຕ່. ແຕ່ປີ 1925 – 1926, ຢູ່ທີ່ນີ້ມີທາງຄົມມະນາຄົມຍາວ 16 ກມ ທີ່ເຊື່ອມຕໍ່ແຕ່ທາງຫຼວງ 4A ເຖິງຈອມພູ. ຄະນະກຳມະການປະຊາຊົນແຂວງ ລ້າງເຊີນ ວາງແຜນຜັງ ກໍ່ສ້າງພູເໝົາເຊີນໃຫ້ເປັນເຂດທ່ອງທ່ຽວບຳລຸງສຸຂະພາບ, ຊີວິພາບ, ປິນພູພະຈົນໄພ ແລະ ທ່ອງທ່ຽວວັດທະນະທຳ. ເຂດທ່ອງທ່ຽວມີເນື້ອທີ່ກ່ວາ 20 ເຮັກຕາ, ຢູ່ໃນລະດັບຄວາມສູງ ແຕ່ 800 – 1.000 ມ ເມື່ອທຽບໃສ່ໜ້ານຳ້ທະເລ, ມີລະບົບເຮືອນພັກ, ພັດຕະຄານ, ໂຮງແຮມ, ບ່ອນຕັ້ງຄ້າຍ… ບັນລຸມາດຖານຮັບໃຊ້ແຂກທ່ອງທ່ຽວ.
ລະບົບກະເຊົ້າລອຍຟ້າ Fanxipan
|
ໃນອີແມວຝາກເຖິງລາຍການ, ເພື່ອນ ອຳພາວັນ ໄດ້ຂຽນວ່າ: “ເວລາຜ່ານມາ, ມີເພື່ອນຄົນໜື່ງຂອງຂ້າພະເຈົ້າໄດ້ເລົ່າໃຫ້ຟັງວ່າ: ລາວໄດ້ຂຶ້ນຈອມພູ Fanxipan ດ້ວຍກະເຊົ້າລອຍຟ້າ, ຂ້າພະເຈົ້າຫວັງວ່າຈະມີໂອກາດມາຫວຽດນາມເພື່ອພ້ອມກັບໝູ່ເພື່ອນປິນພູ Fanxipang, ເຊິ່ງໄດ້ຮັບການຂະໜານນາມວ່າເປັນ “ຊາຍຄາຂອງເຂດອິນດູຈີນ”. ເຖິງວ່າຍັງຮັກສາແນວຄວາມຄິດຈະປິນຂຶ້ນຈອມພູ Fanxipang ເອງກໍຕາມ ແຕ່ຂ້າພະເຈົ້າກໍ່ຢາກຮູ້ຂໍ້ມູນຂ່າວຕ່າງໆກ່ຽວກັບລະບົບກະເຊົ້າລອຍຟ້ານີ້”
ລະບົບກະເຊົ້າລອຍຟ້າ Fanxipan ຢູ່ຊາປາ ຫາກໍໄດ້ຮັບການເປີດສະຫຼອງໃນວັນທີ 2/2/2016 ອັນໄດ້ເຮັດໃຫ້ໄລຍະເວລາຂຶ້ນຈອມພູທີ່ເປັນ “ຊາຍຄາຂອງເຂດອິນດູຈີນ” ຫຼຸດແຕ່ 2 ວັນລົງເຫຼືອພຽງ 15 ນາທີເທົ່ານັ້ນ. ນອກຈາກນັ້ນ, ຍັງໄດ້ຈົດຊື່ເຂົ້າສະຖິຕິ Giunness ໂລກດ້ວຍ 2 ສະຖິຕິໃໝ່, ນັ້ນແມ່ນ ກະເຊົ້າລອຍຟ້າ 3 ເສັ້ນມີລະດັບຜິດດ່ຽງລະຫວ່າງສະຖານີບ່ອນເລີ່ມໄປ ແລະ ສະຖານີບ່ອນສຸດທ້າຍສູງສຸດຢູ່ໃນໂລກແມ່ນ: 1.410 ມ ແລະ ກະເຊົ້າລອຍຟ້າທີ່ປະກອບດ້ວຍ 3 ເສັ້ນຍາວທ່ີສຸດໃນໂລກ, ດ້ວຍຄວາມຍາວ: 6292.5 ມ. ກະເຊົ້າລອຍຟ້າ ມີຄວາມສູງ 3.143 ມ ເມື່ອທຽບໃສ່ໜ້ານຳ້ທະເລ, ຈຸດເລີ່ມຕົ້ນແມ່ນຈາກ ຮ່ອມພູ ເມື່ອງຮວາ ແລະ ບ່ອນສຸດທ້າຍແມ່ນຈອມພູ Fanxipan “ຊາຍຄາຂອງເຂດອິນດູຈີນ” ຢູ່ ຫວຽດນາມ. ແຕ່ລະຕູ້ໃນລະບົບກະເຊົ້າລອຍຟ້າ Fanxipan ຢູ່ຊາປາ ສາມາດບັນຈຸແຂກໄດ້ແຕ່ 30 – 35 ຄົນ, ສາມາດຂົນສົ່ງແຂກໄດ້ 2.000/ ຊົ່ວໂມງ. ລະບົບກະເຊົ້າລອຍຟ້າ ຫາກໍ່ໄດ້ຮັບການເປີດສະຫຼອງ ດັ່ງນັ້ນຍັງມີຫຼາຍແຂກຢູ່, ເພື່ອນຄວນເລືອກເຟັ້ນເວລາເໝາະສົມເພື່ອໄປທ່ຽວ ຊາປາແດ່ເດີ.
ດັ່ງທີ່ກ່າວມາຂ້າງເຖິງແມ່ນເນື້ອໃນຄຳເຫັນຂອງທ່ານຜູ້ຟັງບາງທ່ານ ທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຍັງລາຍການເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບມື້ມັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າລະຊ່ອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov5@gmail.com.