(vovworld) – ໃນອາທິດຜ່ານມາ, ພາກພາສາລາວ ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວ, ໂທລະສັບຈາກທ່ານຜູ້ຟັງລາວ ຫຼາຍທ່ານ. ໃນລາຍການໂອ້ລົມກັບເພື່ອນລາວພາກນີ້, ພວກຂ້າພະເຈົ້າຂໍຄັດສະເໜີບາງຄຳເຫັນ ແລະ ຕອບຈົດໝາຍ, ອີແມວເຊິ່ງທ່ານຜູ້ຟັງໄດ້ຝາກມາລາຍການ.
ລຸງ ຫວຽນວັນແຕ້ວ, ຊາວຫວຽດນາມ ອາໄສຢູ່ໄທ ສົ່ງອີແນວມາຍັງລາຍການ ໂດຍໃຫ້ຮູ້ວ່າ: ພັກກອມມູນິດຫວຽດນາມ ໄດ້ຮັບການສ້າງຕັ້ງຂຶ້ນໃນສະພາບທີ່ບ້ານເກີດເມືອງນອນພວມທຳການຕໍ່ຕ້ານ, ແຕ່ໃນວິວັດແຫ່ງການເຕີບໃຫຍ່, ພັກກອມມູນິດຫວຽດນາມ ໄດ້ຊີ້ນຳນຳພາປະຊາຊົນຫວຽດນາມ ຍາດໄຊຊະນະອັນຍິ່ງໃຫຍ່ຫຼາຍຢ່າງ. ເນື່ອງໃນໂອກາດສະເຫຼີມສະຫຼອງ 85 ປີແຫ່ງວັນສ້າງຕັ້ງພັກກອມມູນິດຫວຽດນາມ, ຂ້າພະເຈົ້າຂໍອວຍພອນໃຫ້ບັນດາແມ່ຫວຽດນາມ ວິລະຊົນ ແລະ ທະຫານເສຍອົງຄະໃນທົ່ວປະເທດ ຈົ່ງມີສຸຂະພາບເຂັ້ມແຂງ, ສືບຕໍ່ເປັນແບບຢ່າງໃຫ້ລຸ້ນລູກລຸ້ນຫຼານຮໍ່າຮຽນຕາມ.
ມາດຖານແຫ່ງຊາດກ່ຽວກັບການພັດທະນາຊົນນະບົດໃໝ່
(ພາບປະກອບ)
ເພື່ອນ ສຸກມະລີວົງ ແຂວງ ໄຊຍະບຸລີ ໄດ້ສົ່ງຈົດໝາຍຫາລາຍການໂດຍຖາມວ່າ: ໃນລາຍການຊົນນະບົດໃໝ່, ຂ້າພະເຈົ້າໄດ້ຮັບຟັງກ່ຽວກັບການພັດທະນາບັນດາຂະແໜງອາຊີບ, ທາງຄົມມະນາຄົມ, ວິທີປ່ຽນໃໝ່ໃນການພັດທະນາກະສິກຳ. ແຕ່ຂ້າພະເຈົ້າຍັງບໍ່ທັນເຂົ້າໃຈວ່າ ໂດຍອີງໃສ່ມາດຖານໃດເພື່ອຕີລາຄາວ່າແມ່ນຕາແສງບັນລຸໄດ້ມາດຖານ ຊົນນະບົດໃໝ່?
ເພື່ອນ ສຸກມະລີວົງ ທີ່ຮັກແພງ, ບັນດາມາດຖານແຫ່ງຊາດກ່ຽວກັບການພັດທະນາຊົນນະບົດໃໝ່, ເຊິ່ງທ່ານນາຍົກລັດຖະມົນຕີໄດ້ເຊັນຂໍ້ຕົກລົງປະກາດໃນເດືອນ 4/2009, ໄດ້ແບ່ງເປັນ 5 ໝວດຄື: ໝວດທີ 1 ແມ່ນມາດຖານກ່ຽວກັບ “ແຜນກຳນົດ ແລະ ປະຕິບັດແຜນກຳນົດ”. ໝວດທີ 2 ແມ່ນ “ພື້ນຖານໂຄງລ່າງເສດຖະກິດ - ສັງຄົມ” ດ້ວຍບັນດາມາດຖານຄົມມະນາຄົມ, ຊົນລະປະທານ, ໄພຟ້າ, ໂຮງຮຽນ, ພື້ນຖານດ້ານວັດຖຸ, ວັດທະນະທຳ, ຕະຫຼາດຊົນນະບົດ, ໄປສະນີ, ເຮືອນຢູ່ຂອງປະຊາຊົນ. ໝວດທີ 3 ແມ່ນ “ເສດຖະກິດ ແລະ ຈັດຕັ້ງການຜະລິດ”, ເຊິ່ງລວມມີມາດຕະຖານດ້ານລາຍຮັບ, ຄອບຄົວທຸກຍາກ, ໂຄງປະກອບແຮງງານ ແລະ ຮູບການຈັດຕັ້ງການຜະລິດ. ໝວດທີ 4 ແມ່ນ “ວັດທະນະທຳ - ສັງຄົມ - ສິ່ງແວດລ້ອມ” ເຊິ່ງລວມມີການສຶກສາ, ສາທາລະນະສຸກ, ວັດທະນະທຳ ແລະ ສິ່ງແວດລ້ອມ. ແລະ ມາດຖານສຸດທ້າຍແມ່ນໝວດກ່ຽວກັບ “ລະບົບການເມືອງ” ດ້ວຍ 2 ມາດຖານ: ລະບົບອົງການການເມືອງສັງຄົມໝັ້ນຄົງເຂັ້ມແຂງ ແລະ ມີຄວາມສະຫງົບ, ມີຄວາມເປັນລະບຽບຮຽບຮ້ອຍທາງສັງຄົມ. ມາດຖານແຫ່ງຊາດໄດ້ກຳນົດບັນດາຄາດໝາຍຢ່າງລະອຽດທີ່ສຸດໃນຊີວິດສັງຄົມ, ການຜະລິດ, ການດຳລົງຊີວິດຢູ່ເຂດຊົນນະບົດ. ມີບັນດາມາດຖານທີ່ມີລັກສະນະເປັນຮູບຮ່າງຄື: ລະບົບຕາໜ່າງໄຟຟ້າ, ທາງຄົມມະນາຄົມ, ສຸກສາລາ, ລາຍຮັບ, ເຮືອນຢູ່, ແຕ່ກໍມີບັນດາມາດຖານກໍມີລັກສະນະບໍ່ເປັນຮູບຮ່າງຄື: ອັດຕາສ່ວນສຳເລັດການສຶກສາພາກບັງຄັບ, ຄົນງານໄດ້ຮັບການບຳລຸງສ້າງ, ການເຂົ້າຮ່ວມປະກັນສຸຂະພາບ, ບັນດາໝູ່ບ້ານບັນລຸມາດຖານບ້ານວັດທະນະທຳ...
(ລົດໄຟຟ້າຮັບໃຊ້ນັກທ່ອງທ່ຽວ)
ເພື່ອນ ມີນາ ແກ້ວມາລີວົງ, ຢູ່ແຂວງ ບໍ່ແກ້ວ ໄດ້ສົ່ງອີແມວ ມາຍັງລາຍການໂດຍຖາມວ່າ: ຂ້າພະເຈົ້າພ້ອມກັບເພື່ອນມິດ ປະມານ 10 ຄົນຈະມາທ່ອງທ່ຽວຢູ່ຮ່າໂນ້ຍ. ພວກຂ້າພະເຈົ້າລ້ວນແຕ່ຢາກໄປຢ້ຽມຢາມຢູ່ໃນບໍລິເວນນະຄອນຫຼວງຮ່າ ໂນ້ຍ ແຕ່ບໍ່ຮູ້ທາງໄປ ກໍ່ຄືບັນດາສະຖານທີ່ທ່ອງທ່ຽວ. ສະນັ້ນຢາກໃຫ້ທາງລາຍການແນະນຳໃຫ້ພວກຂ້າພະເຈົ້າວິທີເດີນທາງທີ່ສະດວກທີ່ສຸດ. ຂໍຂອບໃຈລາຍການ.
ເພື່ອນ ມີນາ ແກ້ວມາລີ ທີ່ຮັກແພງ, ປະຈຸບັນ, ຢູ່ຖະໜົນ ດິງຕຽນຮ່ວາງ, ຕິດກັບໜອງຮ່ວານກ໋ຽມ, ໄດ້ມີລົດໄຟຟ້າຮັບໃຊ້ນັກທ່ອງທ່ຽວຢູ່ພາຍໃນ ແລະ ຕ່າງປະເທດທີ່ມາຢ້ຽມຢາມບັນດາສະຖານທີ່ທີ່ມີຊື່ສຽງຢູ່ບໍລິເວນ. ດ້ວຍຄວາມຍາວ 7 ກມ, ລົດໃຊ້ພະລັງງານໄຟຟ້າ ຈະແລ່ນໄປຜ່ານ 28 ຖະໜົນການຄ້າ, 13 ຖະໜົນອາຊີບຫັດຖະກຳ, 22 ສາລາບ້ານ, 9 ວິຫານ, 3 ວັດ, 8 ປູຊະນີຍະສະຖານປະຫວັດສາດ, ທັດສະນີຍະພາບຢູ່ເຂດໜອງຮ່ວານກ໋ຽມ ແລະ ຕະຫຼາດ ດົ່ງຊວນ. ລົດໄຟຟ້າສາມາດບັນຈຸຜູ້ໂດຍສານໄດ້ຈຳນວນ 8 ຄົນ, ໃຊ້ເວລາປະມານ 45 ນາທີ/ ຖ້ຽວ. ເປີດການບໍລິການຮັບໃຊ້ແຂກແຕ່ເວລາ 8ໂມງ 30 ນາທີຮອດ 16 ໂມງ 30 ນາທີ ແລະ 19ໂມງ - 23 ໂມງ. ເພື່ອນສາມາດຊື້ປີ້ຢູ່ກັບທີ່ເລີຍ. ຂໍອວຍພອນໃຫ້ເພື່ອນ ແລະ ສະມາຊິກໃນຄະນະຈົ່ງມີການເດີນທາງດ້ວຍຄວາມມ່ວນຊື່ນ, ປອດໄພ.
ເພື່ອນ ວຽງ ສິນທຳມະວົງ, ສົ່ງອີແມວ ມາຍັງລາຍການໂດຍຖາມວ່າ: ຂ້າພະເຈົ້າໄດ້ຮູ້ວ່າ ຢູ່ຫວຽດນາມ ມີປະເພດສິລະປະພື້ນເມືອງທີ່ເປັນເອກະລັກນັ້ນແມ່ນ "ການສະແດງຕຸກກະຕານ້ຳ”. ຂ້າພະເຈົ້າໄດ້ຮັບຊົມບັນດາລາຍການສະແດງຕຸກກະຕາຂອງຫຼາຍປະເທດໃນໂລກຜ່ານໂທລະພາບແລ້ວຄືໄທ, ມາເລເຊຍ... ແຕ່ການສະແດງຕຸກກະຕານ້ຳຂອງຫວຽດນາມ ພັດສະແດງບົນໜ້ານ້ຳ. ຂ້າພະເຈົ້າຢາກຮູ້ວ່າ ຢູ່ຫວຽດນາມ ຂ້າພະເຈົ້າສາມາດຊົມສິລະປະຟ້ອນຕຸກກະຕານ້ຳຢູ່ໃສ?
ເພື່ອນ ວຽງ ສິນທຳມະວົງ ທີ່ຮັກແພງ, ສິລະປະຟ້ອນຕຸກກະຕານ້ຳແມ່ນປະເພດສິລະປະສະແດງບົນເວທີ່ ພື້ນເມືອງທີ່ເປັນເອກະລັກສະເພາະ, ຕິດພັນກັບ ພື້ນຖານອະລິຍະທຳປູກເຂົ້າ ນາທາມ ແລະ ໄດ້ມີມາກ່ອນນີ້ເກືອບພັນປີຢູ່ຫວຽດນາມ. ບັນດາ ລາຍການສະແດງລະຄອນຕຸກກະຕານ້ຳ ສ່ວນຫຼາຍແມ່ນສ່ອງແສງຊີວິດ, ການເຄື່ອນໄຫວວັດທະນະທຳຂອງຊາວຫວຽດນາມ ຜ່ານບັນດາເລື່ອງລາວ, ເທບນິຍາຍ, ເລື່ອງລາວປະຫວັດສາດ, ຮີດຄອງປະເພນີ, ການອອກແຮງງານທຳການຜະລິດຂອງຊາວກະສິກອນຫວຽດນາມ... ອັນໄດ້ດຶງດູດແຂກມາຊົມເປັນຈຳນວນຫຼວງຫຼາຍ, ໂດຍສະເພາະແມ່ນຊາວຕ່າງປະເທດ. ເພື່ອນສາມາດໄປຊົມລາຍການສະແດງຟ້ອນຕຸກກະຕານ້ຳ ໄດ້ຢູ່ໂຮງລະຄອນ ຕຸກກະຕານ້ຳທັງລອງ ທີ່ເຮືອນເລກທີ 57 B ຖະໜົນດິງຕຽນຮ່ວາງ - ຮ່າໂນ້ຍ.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການເພື່ອປະກອບຄຳເຫັນ ຊ່ວຍລາຍການນັບມື້ນັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼືສົ່ງອີແມວດ້ວຍລະຫັດ laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວທີ່ຈະຕອບສະໜອງຕາມຄວາມປະສົງຂອງທຸກໆທ່ານ.