(vovworld) – ໃນອາທິດຜ່ານມາ, ລາຍການພາກພາສາລາວ, ວິທະຍຸກະຈາຍສຽງຫວຽດນາມ, ໄດ້ຮັບໂທລະສັບ, ອີແມວ, ຈົດໝາຍຈາກຜູ້ຟັງລາວ ທີ່ສົ່ງມາລາຍການ. ໃນລາຍການໂອ້ລົມກັບເພື່ອນລາວ ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ.
ເພື່ອນສິງຄຳ ໄຊຍະວົງ, ຢູ່ເມືອງ ປາກເຊ, ແຂວງຈຳປາສັກ ໄດ້ສົ່ງອີແມວມາລາຍການໂດຍໃຫ້ຮູ້ວ່າ: ຂ້າພະເຂົ້າສະແດງຄວາມພາກພູມໃຈເມື່ອເຫັນວ່າ, ການພົວພັນລະຫວ່າງຫວຽດນາມ ແລະ ລາວ ນັບມື້ນັບສະໜິດແໜ້ນ, ໂດຍສະເພາະແມ່ນໃນອາທິດຜ່ານມາ ໄດ້ມີເຫດການຫຼາຍຢ່າງລະຫວ່າງ 2 ປະເທດຄື: ການໄປຢ້ຽມຢາມ ແລະ ເຮັດວຽກຂອງຄະນະຜູ້ແທນຄະນະກຳມະການສັນຕິພາບ ແລະ ສາມັກຄີສປປ.ລາວ ຢູ່ຫວຽດນາມ; ກອງປະຊຸມ 2 ຝ່າຍປະຈຳປີລະຫວ່າງທະນາຄານແຫ່ງລັດຫວຽດນາມ ແລະ ທະນາຄານແຫ່ງຊາດລາວ; ກອງປະຊຸມສຳມະນາວິທະຍາສາດທີ່ມີຫົວຂໍ້ວ່າ "ວຽກງານສຶກສາ, ບຳລຸງສ້າງ, ພະນັກງານການນຳ, ຄຸ້ມຄອງ, ຕອບສະໜອງຄວາມຮຽກຮ້ອງຕ້ອງການຫັນອຸດສາຫະກຳເປັນທັນສະໄໝ ແລະ ເຊື່ອມໂຍງເຂົ້າກັບສາກົນຢູ່ຫວຽດນາມ ແລະ ລາວ"... ບັນດາການເຄື່ອນໄຫວເຫຼົ່ານັ້ນຈະປະກອບສ່ວນສຳຄັນເຂົ້າໃນການປັບປຸງ ແລະ ເພີ່ມທະວີການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງຫວຽດນາມ - ລາວ.
ເພື່ອນດາລາວັນ ພິຈິດ, ຢູ່ແຂວງຈຳປາສັກ ໄດ້ສົ່ງອີແມວມາຍັງລາຍການໂດຍໃຫ້ຮູ້ວ່າ: ຂ້າພະເຈົ້າໄດ້ຮັບຟັງບົດຂຽນໃນລາຍການຊີວິດສັງຄົມຫວຽດນາມ ກ່ຽວກັບອາຫານ ແກງບອນ ຂອງຊາວເຜົ່າຜູ້ໄທ ຢູ່ເຂດຕາເວັນຕົກສ່ຽງເໜືອ ຫວຽດນາມ, ຂ້າພະເຈົ້າບໍ່ຄິດວ່າ ຢູ່ຫວຽດນາມ ກໍມີແກງບອນ ເຊັ່ນດຽວກັນກັບຢູ່ລາວ. ຂ້າພະເຈົ້າຫວັງວ່າ, ຈະໄດ້ຮັບຟັງບົດຂຽນກ່ຽວກັບບັນດາເຜົ່າຂອງຫວຽດນາມ ໃນໄລຍະຈະມາເຖິງຫຼາຍກວ່າອີກ, ເພື່ອສາມາດເຂົ້າໃຈໄດ້ຈຸດວັດທະນະທຳທີ່ເປັນເອກະລັກສະເພາະຂອງຊົນເຜົ່າຕ່າງໆຢູ່ຫວຽດນາມ.
ເພື່ອນ ສຸກສາຄອນ ບຸນລັງສີ, ຢູ່ແຂວງຊຽງຂວາງ ໄດ້ສົ່ງອີແມວມາຍັງລາຍການໂດຍຢາກຮູ້ຄວາມໝາຍ, ຜົນງານຂອງກອງປະຊຸມສະຫຼຸບ 2 ປີຂະບວນການແຮກຊ່ຽວລະຫວ່າງແຂວງ ຫົວພັນ, ຊຽງຂວາງ, ບໍລິຄຳໄຊ ກັບແຂວງ ເງ້ອານ ຂອງຫວຽດນາມ ໃນໄລຍະຜ່ານມາ.
ເພື່ອນ ສຸກສາຄອນ ບຸນລັງສີ ທີ່ຮັກແພງ, ໃນທ້າຍເດືອນ 10 ຜ່ານມາ, ຄະນະກຳມະການປະຊາຊົນແຂວງ ເງ້ອານ ໄດ້ຈັດກອງປະຊຸມສະຫຼຸບ 2 ປີແຫ່ງການປະຕິບັດຂະບວນການແຮກຊ່ຽວລະຫວ່າງເຂດຊຸມຊົນ (ບ້ານ - ບ້ານ) ທີ່ຕິດກັັບຊາຍແດນແຂວງເງ້ອານ ແລະ 3 ແຂວງຫົວພັນ, ຊຽງຂວາງ, ບໍລິຄຳໄຊ, ລາວ. ໃນໄລຍະຜ່ານມາ, ການນຳແຂວງເງ້ອານ ແລະ ການນຳ 3 ແຂວງ ຫົວພັນ, ຊຽງຂວາງ, ບໍລິຄຳໄຊ ໄດ້ມີການເຈລະຈາເປັນຫຼາຍຄັ້ງ, ແລກປ່ຽນ ແລະ ປຶກສາຫາລືເພື່ອເປັນເອກະພາບກ່ຽວກັບບັນດາແຜນນະໂຍບາຍ, ມາດຕະການແກ້ໄຂໃນການຊີ້ນຳນຳພາ ແລະ ຈັດຕັ້ງການປະຕິບັດວຽກງານກໍ່ສ້າງ ແລະ ປົກປັກຮັກສາເຂດຊາຍແດນ, ຕໍ່ສູ້ປ້ອງກັນ, ຕ້ານ, ສະກັດກັ້ນທຸກການເຄື່ອນໄຫວຕ້ານທຳລາຍຂອງບັນດາກຳລັງທີ່ເປັນປໍລະປັກ. ໝາກຜົນທີ່ບັນລຸໄດ້ໃນທຸກວຽກງານ ພົ້ນເດັ່ນແມ່ນເລື່ອງສົມທົບກັນໂຄສະນາ, ຍົກສູງຄວາມຮັບຮູ້ໃຫ້ປະຊາຊົນຢູ່ 2 ປະເທດຢູ່ຕິດກັບເຂດຊາຍແດນກ່ຽວກັບແຜນນະໂຍບາຍ, ນະໂຍບາຍ, ກົດໝາຍຂອງແຕ່ລະປະເທດ, ໂດຍສະເພາະແມ່ນອະທິປະໄຕຜືນແຜ່ນດິນ, ຊາຍແດນແຫ່ງຊາດ, ເພີ່ມທະວີການສົມທົບກັນໃນວຽກງານຕ້ານການຂ້າຂາຍ, ຂົນສົ່ງ, ນຳໃຊ້ຢາເສບຕິດ ແລະ ການລະເມີດກົດໝາຍອື່ນ; ຊ່ວຍປ້ອງກັນ, ຕ້ານ, ແກ້ໄຂຜົນຮ້າຍຢ້ອນຫຼັງຈາກໄພທຳມະຊາດ, ຖ່າຍທອດວິທະຍາສາດ - ເຕັກນິກ, ພັດທະນາເສດຖະກິດຄອບຄົວ... ທີ່ກອງປະຊຸມ, ທ່ານເລຊວນດ້າຍ ຮອງປະທານຄະນະກຳມະການປະຊາຊົນແຂວງ ເງ້ອານ ຢືນຢັນວ່າ, ບັນດາໝາກຜົນເຊິ່ງພະນັກງານ ແລະ ປະຊາຊົນບັນດາໝູ່ບ້ານແຮກຊ່ຽວຢູ່ເຂດຕິດກັບຊາຍແດນ 2 ປະເທດບັນລຸໄດ້ນັ້ນ ໄດ້ປະກອບສ່ວນຮັກສາສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍ, ປອດໄພທາງສັງຄົມຢູ່ເຂດຊາຍແດນໄວ້ຢ່າງໝັ້ນຄົງ, ຮັບໃຊ້ຄວາມຕ້ອງການພັດທະນາເສດຖະກິດສັງຄົມ, ຍົກສູງຄວາມຮູ້, ລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ປັບປຸງຊີວິດການເປັນຢູ່ຂອງປະຊາຊົນຢູ່ເຂດຕິດກັບຊາຍແດນ 2 ປະເທດ. ພ້ອມທັງປັບປຸງ ແລະ ເພີ່ມພູນຄູນສ້າງສາຍພົວພັນສາມັກຄີມິດຕະພາບແບບພິເສດລະຫວ່າງຫວຽດນາມ - ລາວ ເວົ້າລວມ ແລະ ລະຫວ່າງແຂວງ ເງ້ອານ ກັບ 3 ແຂວງຫົວພັນ, ຊຽງຂວາງ, ບໍລິຄຳໄຊຂອງລາວ ເວົ້າສະເພາະ.
ທ່ານຜູ້ຟັງທີ່ເຄົາລົບ, ດັ່ງທີ່ກ່າວມາຂ້າງເຖິງແມ່ນເນື້ອໃນຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ສົ່ງອີແມວດ້ວຍລະຫັດ laovov@yahoo.com; laovov5@gmail.com. ຂໍອວຍພອນໃຫ້ທ່ານຈົ່ງມີສຸຂະພາບເຂັ້ມແຂງ ແລະ ມີຄວາມຜາສຸກ.