ຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ

Minh Duc -

ວັນພະຫັດ ທີ 2 ມິຖຸນາ ຄ.ສ. 2016 | 12:02:57

(vovworld) - ໃນອາທິດຜ່ານມາ, ລາຍການພາກພາສາລາວ, ວິທະຍຸກະຈາຍສຽງຫວຽດນາມ, ໄດ້ຮັບໂທລະສັບ, ອີແມວ, ຈົດໝາຍຈາກຜູ້ຟັງລາວ ທີ່ສົ່ງມາລາຍການໃນນັ້ນໄດ້ເຕື້ອງເຖິງການຢ້ຽມຢາມຫວຽດນາມ ຂອງທ່ານປະທານາທິບໍດີອາເມລິກາ Barack Obama ແລະ ການເຄື່ອນໄຫວສະເຫຼີມສະຫຼອງວັນເດັກສາກົນ 01/06. ໃນລາຍການໂອ້ລົມກັບເພື່ອນລາວ ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ.

ຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ - ảnh 1

(ທ່ານປະທານປະເທດ ເຈີນດ້າຍກວາງ
ແລະ ທ່ານປະທານາທິບໍດີ Barack Obama)

ເພື່ອນມາລີວົງ, ຢູ່ແຂວງວຽງຈັນ ໄດ້ໂທລະສັບມາຫາລາຍການໂດຍໃຫ້ຮູ້ວ່າ: ຂ້າພະເຈົ້າເອົາໃຈໃສ່ເຖິງການຢ້ຽມຢາມຫວຽດນາມ ຂອງທ່ານປະທານາທິບໍດີອາເມລິກາ Barack Obama ໃນອາທິດຜ່ານມາ. ຍ້ອນຂ້າງຄາກັບວຽກງານ, ສະນັ້ນຂ້າພະເຈົ້າບໍ່ໄດ້ຕິດຕາມຂ່າວກ່ຽວກັບການເຄື່ອນໄຫວຂອງທ່ານ Obama ຢູ່ຫວຽດນາມ ຢ່າງຄົບຖ້ວນ. ຜ່ານລາຍການ, ຂ້າພະເຂົ້າຢາກຮັບຟັງໂດຍຫຍໍ້ກ່ຽວກັບການເຄື່ອນໄຫວສຳຄັນນີ້ຂອງທ່ານຢູ່ຫວຽດນາມ.

ເພື່ອນມາລີວົງ ທີ່ຮັກແພງ, ທ່ານປະທານາທິບໍດີອາເມລິກາ Barack Obama ໄດ້ສິ້ນສຸດການຢ້ຽມຢາມຫວຽດນາມ ຢ່າງເປັນທາງການ, ໃນລະຫວ່າງວັນທີ 23-25/05. ການຢ້ຽມຢາມບັນລຸໄດ້ໝາກຜົນພົ້ນເດັ່ນຫຼາຍຢ່າງໃນບັນດາຂົງເຂດການເມືອງ, ເສດຖະກິດ, ການປ້ອງກັນຊາດ, ປ້ອງກັນຄວາມສະຫງົບ, ການສຶກສາບຳລຸງສ້າງ ແລະ ບັນດາບັນຫາທົ່ວໂລກ, ເປີດໄລຍະຮ່ວມມືໃໝ່ໃນການພົວພັນລະຫວ່າງຫວຽດນາມ ແລະ ອາເມລິກາ. ໃນການຢ້ຽມຢາມຫວຽດນາມ ຄັ້ງນີ້, ຄຳຕັດສິນທີ່ໄດ້ຮັບຄວາມຊົມເຊີຍຈາກຫາງສຽງສອງປະເທດ ນັບທັງປະຊາຄົມສາກົນ ນັ້ນແມ່ນ ເລື່ອງທ່ານປະທານາທິບໍດີ ອາເມລິກາ Brack Obama ປະກາດຖະແຫລງຍົກເລີກຄຳສັ່ງຂວ້ຳບາດດ້ານອາວຸດສຳລັບຫວຽດນາມ. ເປັນອັນວ່າ ບັນດາຮົ້ວກີດຂວາງສຸດທ້າຍຂອງໄລຍະສົງຄາມເຢັນຖືກຍົກເລີກ. ເລື່ອງປະທານາທິບໍດີ ອາເມລິກາ B. Obama ຍົກເລີກຄຳສັ່ງຂວ້ຳບາດດັ່ງກ່າວ ແມ່ນບາດກ້າວສຳຄັນໃນການພົວພັນລະຫວ່າງຫວຽດນາມ ແລະ ອາເມລິກາ. ການຕັດສິນນີ້ສະແດງໃຫ້ເຫັນວ່າ ສາຍພົວພັນລະຫວ່າງຫວຽດນາມ ແລະ ອາເມລິກາ ພວມເປັນປົກກະຕິ ຖືກກັບຄວາມໝາຍຂອງມັນ, ສ້າງເງື່ອນໄຂຊຸກຍູ້ການຮ່ວມມືຮອບດ້ານລະຫວ່າງສອງຝ່າຍ, ໃນນັ້ນ ມີການຮ່ວມມືດ້ານປ້ອງກັນຊາດ, ປະກອບສ່ວນສ້າງຄວາມໄວ້ເນື້ອເຊື່ອໃຈລະຫວ່າງສອງປະເທດ. ການຢ້ຽມຢາມ ບັນລຸໄດ້ບັນດາຜົນງານພົ້ນເດັ່ນດ້ານເສດຖະກິດ, ການສຶກສາ. ຕາມຖະແຫລງການຮ່ວມທີ່ບັນລຸໄດ້ລະຫວ່າງ ປະທານາທິບໍດີ ອາເມລິກາ B. Obama ແລະ ປະທານປະເທດ ເຈີນດ້າຍກວາງ, ສອງຝ່າຍຈະສຸມໃສ່ຮ່ວມມືຫລາຍກວ່າອີກໃນຂົງເຂດການຄ້າ, ການລົງທຶນ, ວິທະຍາສາດເຕັກໂນໂລຊີ, ກໍ່ສ້າງຊັບພະຍາກອນມະນຸດ, ຮັບມືກັບການປ່ຽນແປງຂອງດິນຟ້າອາກາດ. ປະທານາທິບໍດີ ອາເມລິກາ B. Obama ໄດ້ຢືນຢັນເຖິງຄວາມຕັດສິນໃຈຊຸກຍູ້ສະພາແຫ່ງຊາດຮັບຮອງເອົາສັນຍາຄູ່ຮ່ວມມືຂ້າມປາຊີຟີກ (TPP) ໃນປີ 2016 ພ້ອມທັງໃຫ້ຄຳໝັ້ນສັນຍາຈະຫນູນຊ່ວຍຫວຽດນາມດ້ານເຕັກນິກ ເພື່ອຜັນຂະຫຍາຍສັນຍາສະບັບນີ້ຢ່າງມີປະສິດທິຜົນ. ເນື່ອງໃນໂອກາດມາຢ້ຽມຢາມຫວຽດນາມຄັ້ງນີ້, ມະຫາວິທະຍາໄລ Fulbright ຫວຽດນາມ ໄດ້ຮັບຫນັງສືອະນຸຍາດໃຫ້ເຄື່ອນໄຫວຢ່າງເປັນທາງການ, ດ້ວຍຈຸດໝາຍສ້າງສະພາບແວດລ້ອມການສຶກສາໃຫ້ມີຄຸນນະພາບສູງ ແລະ ບັນລຸມາດຖານສາກົນ ຢູ່ຫວຽດນາມ. ນອກນັ້ນ, ທ່ານປະທານປະເທດ ເຈີນດ້າຍກວາງ ແລະ ທ່ານປະທານາທິບໍດີ Barack Obama ໄດ້ເປັນສັກຂີພິຍານພິທີລົງນາມໃນສັນຍາຊື້ເຮືອບິນລະຫວ່າງບໍລິສັດ Vietjet Air ແລະ Boeing ທີ່ມີມູນຄ່າ 11,3 ຕື້ USD.

ຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ - ảnh 2

(ຈັດການເຄື່ອນໄຫວລະຫຼີ້ນຢ່າງຈັບອົບຈັບໃຈ
ກ່ຽວກັບການປົກປ້ອງສັດປ່າໃຫ້ເດັກນ້ອຍ)

ເພື່ອນວົງຄຳ, ຢູ່ແຂວງຫົວພັນ ໄດ້ສົ່ງອີແມວເຖິງລາຍການໃຫ້ຮູ້ວ່າ: ເນື່ອງໃນໂອກາດວັນເດັກສາກົນ 01/06, ຢູ່ຮ່າໂນ້ຍ ໄດ້ຈັດການເຄື່ອນໄຫວພິເສດໃດແດ່ໃຫ້ແກ່ເດັກນ້ອຍ?

ເພື່ອນວົງຄຳ ທີ່ຮັກແພງ, ເນື່ອງໃນໂອກາດວັນເດັກສາກົນ 01/06, ຢູ່ຮ້ານສັບພະສິນຄ້າ Aeon Mall, ລອງບຽນ, ບັນດາຄູອາຈານ ແລະ ນັກສຶກສາຍີ່ປຸ່ນ ທີ່ພວມສິດສອນ ແລະ ຮ່ຳຮຽນຢູ່ມະຫາວິທະຍາໄລບ່າງແຫ່ງໃນບໍລິເວັນຮ່າໂນ້ຍ ໄດ້ຈັດການເຄື່ອນໄຫວລະຫຼີ້ນຢ່າງຈັບອົບຈັບໃຈກ່ຽວກັບການປົກປ້ອງສັດປ່າໃຫ້ເດັກນ້ອຍ. ຢູ່ເຂດໃຈກາງຮ້ານສັບພະສິນຄ້າ, ນັບແຕ່ເຊົ້າວັນທີ 29/05, ບັນດານັກສຶກສາຍີ່ປຸ່ນ ໄດ້ພ້ອມກັບບັນດານັກສຶກສາຫວຽດນາມຕິດຮູບພາບປ່າແຫ່ງໜຶ່ງດ້ວຍຂະໜາດ2ມ x 3ມ, ໃນນັ້ນມີແຮດໂຕໜຶ່ງພວມກິນຫຍ້າເພື່ອໃຫ້ພວກນ້ອງທາສີ. ນອກນັ້ນຍັງຈັດການເສັງຊອກຮູ້ກ່ຽວກັບສັດຊະນິດນີ້, ລາງວັນໃຫ້ເດັກຕອບໄດ້ ແມ່ນກາໝາຍປົກປັກຮັກສາສັດປ່າ, ແລະບັນດາພາບແຕ້ມກ່ຽວກັບການເຄື່ອນໄຫວປົກປັກຮັກສາໂຕແຮດຂອງເດັກນ້ອຍ. ເພື່ອນ Fumi Fujimura, ນັກສຶກສາຍີ່ປຸ່ນ, ເຊິ່ງແມ່ນນັກອາສາສະໝັກຂອງສູນສຶກສາທຳມະຊາດ ໃຫ້ຮູ້ວ່າ.

“ຢູ່ຫວຽດນາມ ມີຫຼາຍຄົນຖືວ່າ, ເຂົາຂອງໂຕແຮດ ແມ່ນຢາບິນບົວພະຍາດສະໜິດໜຶ່ງ, ແຕ່ຄວາມຈິງແລ້ວ ເຂົາຂອງໂຕແຮດບໍ່ສາມາດໃຊ້ເປັນຢາເພື່ອບິນບົ່ວພະຍາດໄດ້. ຜ່ານບັນດາການເຄື່ອນໄຫວນີ້, ພວກຂ້າພະເຈົ້າຢາກສົ່ງສານເຖິງພວກນ້ອງວ່າຈົ່ງຍົກສູງສະຕິກ່ຽວກັບການປົກປັກຮັກສາສັດປ່າ ແລະ ບໍ່ນຳໃຊ້ເຂົາຂອງໂຕແຮດ”.

ຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ - ảnh 3

(ພາບກ່ຽວກັບການເຄື່ອນໄຫວປົກປັກຮັກສາໂຕແຮດ)

ການເຄື່ອນໄຫວນີ້ໄດ້ດຶງດູດເດັກນ້ອຍເປັນຈຳນວນຫຼວງຫຼາຍເຂົ້າຮ່ວມ. ໃນຂະນະທີ່ພວກນ້ອງທາສີໃສ່ພາບແຕ້ມນັ້ນ, ບັນດານັກສຶກສາຫວຽດນາມ ກໍ່ໄດ້ອະທິບາຍກ່ຽວກັບຄວາມໝາຍຂອງພາບແຕ້ມນັ້ນໃຫ້ພວກນ້ອງມີຄວາມເຂົ້າໃຈກວ່າ. ທ່ານນາງ Yuko Imaizumi, ເປັນຄູສອນຊາວຍີ່ປຸ່ນ ໄດ້ແບ່ງປັນບັນດາຄວາມຫຍຸ້ງຍາກເມື່ອຈັດການເຄື່ອນໄຫວລະຫຼີ້ນນີ້ຢູ່ຫວຽດນາມ ວ່າ.

“ຄວາມຫຍຸ້ງຍາກທີ່ສຸດແມ່ນດ້ານພາສາ, ທຳອິດພວກຂ້າພະເຈົ້າບໍ່ຮູ້ວ່າຕ້ອງເຮັດແນວໃດ ເພື່ອສົ່ງສານນີ້ເຖິງເດັກນ້ອຍໄດ້. ຫຼັງຈາກນັ້ນ, ພວມເຮົາໄດ້ເຊີນນັກສຶກສາຫວຽດນາມ ທີ່ຮູ້ພາສາຍີ່ປຸ່ນ ເຂົ້າຮ່ວມການເຄື່ອນໄຫວນີ້. ຂ້າພະເຈົ້າຄິດວ່າການທາສີໃສ່ພາບພາບນັ້ນ, ຈະເປັນສານເພື່ອໃຫ້ພວກນ້ອງເຂົ້າໃຈງ່າຍທີ່ສຸດ. ນອກນັ້ນ, ພວກຂ້າພະເຈົ້າຍັງຢາກສົ່ງສານນີ້ເຖິງທຸກໆຄົນວ່າ ບໍ່ຄວນສະໜັບສະໜູນໃຫ້ບັນດາການກະທຳຜິດພາດນີ້”.

ແລະກໍໃນໂອກາດນີ້, ຢູ່ຖະໜົນ ລິ໋ກ໋ວກຊື, ຮ່າໂນ້ຍ ກໍໄດ້ຈັດພິທີວາງສະແດງພາບແຕ້ມພິເສດໃຫ້ເດັກນ້ອຍ ທີ່ມີຊື່ວ່າ “ເດັກນ້ອຍແຕ້ມ”, ລາຍການຖືກຈັດຕັ້ງປະຈຳປີ ເນື່ອງໃນໂອກາດວັນເດັກສາກົນ 01/06, ດ້ວຍຄວາມຫວັງສ້າງເງື່ອນໄຂໃຫ້ເດັກທີ່ມີຄວາມນິຍົມແຕ້ມພາບສະແດງຄວາມສາມາດຂອງຕົນ. ນອກນັ້ນ, ຢູ່ ວັນມຽວ - ກ໋ວກຕືຢາມ (ມະຫາຫາວິທະຍາໄລແຫ່ງທຳອິດຂອງຫວຽດນາມ) ໄດ້ຈັດ “ວັນບູນປື້ມໃຫ້ເດັກ 01/06/2016”. ບັນດາເດັກນ້ອຍເຂົ້າຮ່ວມງານບຸນຈະໄດ້ຮັບຟັງແນະນຳກ່ຽວກັບປື້ມທີ່ມ່ວນໆ, ງານບຸນກໍ່ປຸກລະດົມຂະບວນການ “ອ່າມປື້ມມື້ລະ 10 ນາທີ”…

ດັ່ງທີ່ກ່າວມາຂ້າງເຖິງແມ່ນເນື້ອໃນຄຳເຫັນຂອງທ່ານຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຝັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບມືມັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າໜ້າຊ່ອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov5@gmail.com.

Minh Duc