(vovworld) – ໃນອາທິດຜ່ານມາ, ພາກພາສາລາວ ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີແມວ, ໂທລະສັບຈາກທ່ານຜູ້ຟັງລາວ ຫຼາຍທ່ານ. ໃນລາຍການໂອ້ລົມກັບເພື່ອນລາວພາກນີ້, ພວກຂ້າພະເຈົ້າຂໍຄັດສະເໜີບາງຄຳເຫັນ ແລະ ຕອບຈົດໝາຍ, ອີແມວເຊິ່ງທ່ານຜູ້ຟັງໄດ້ຝາກມາລາຍການ.
ອາທິດຜ່ານມາ, ບັນນາທິການພາກພາສາລາວ ວິທະຍຸກະຈາຍສຽງຫວຽດນາມ ໄດ້ຮັບອີແມວຈາກເພື່ອນ ວັນຈິດ, (wern999@hotmail.com). ໃນອີແມວເພື່ອນ ວັນຈິດ ໃຫ້ຮູ້ວ່າ: ຂ້າພະເຈົ້າຫາກໍ່ຊອກເຫັນເວັບໄຊຂອງ VOV. ຂອບໃຈທີ່ພວກເພື່ອນໄດ້ຈັດບັນດາລາຍການດີໆໃຫ້ຟັງ. ເພາະຄົນລາວ ສ່ວນຫຼາຍເຄີຍຕິດຕາມຂ່າວຈາກບັນດາປະເທດຝ່າຍຕາເວັນຕົກ ແລະ ບໍ່ໄດ້ຮັບຟັງຂ່າວທີ່ເປັນທາງການຈາກຝ່າຍຕາເວັນອອກເລີຍ.
ເພື່ອນ ວັນຈິດ ທີ່ຮັກແພງ, ບັນນາທິການພາກພາສາລາວ, VOV ຂໍຂອບໃຈເພື່ອນໄດ້ສົ່ງອີແມວມາຍັງລາຍການ. ບັນດາຂໍ້ມູນໂດຍ VOV ຜະລິດ, ແມ່ນເພື່ອແນໃສ່ຕອບສະໜອງຄວາມຕ້ອງການຂອງຜູ້ຟັງ, ຜູ້ອ່ານໃນທົ່ວໂລກ ກ່ຽວກັບຂໍ້ມູນຂ່າວໃນໂລກເວົ້າລວມ ແລະ ຂອງຫວຽດນາມ ເວົ້າສະເພາະ. ປະຈຸບັນ, ໃນເວັບໄຊທາງການຂອງລະບົບບັນດາລາຍການກະຈາຍສຽງ ພາກພາສາຕ່າງປະເທດ (VOV5) ດ້ວຍລະຫັດ vov5.vn ຫຼື vovworld.vn, ມີ 12 ພາສາຄື: ອັງກິດ, ຝລັ່ງ, ເຢຍລະມັນ, ຍີ່ປຸ່ນ, ໄທ, ລາວ, ອີນໂດເນເຊຍ, ກຳປູເຈຍ, ຈີນ, ລັດເຊຍ, ແອດສປາຍ ແລະ ລາຍການສະຫງວນໃຫ້ຊາວຫວຽດນາມ ຢູ່ຕ່າງປະເທດ ເພື່ອສ້າງຄວາມສະດວກໃຫ້ຜູ້ຟັງ, ຜູ້ອ່ານຂອງຫຼາຍປະເທດ. ໃນໄລຍະຈະມາເຖິງ, ຫວັງວ່າ, ເພື່ອນວັນຈິດ ຈະສົ່ງອີແມວມາຍັງລາຍການເພື່ອປະກອບຄຳເຫັນຫຼາຍກວ່າອີກ, ຊ່ວຍໃຫ້ລາຍການນັບມື້ນັບດີກວ່າເກົ່າ.
ພິທີລົງນາມສັນຍາການຄ້າຊາຍແດນລະຫວ່າງ
ສສ.ຫວຽດນາມ ແລະ ສປປ.ລາວ
(ພາບ: chinhphu.vn)
ໃນອາທິດຜ່ານມາ, ເພື່ອນ ຈິດຕະວົງ ຢູ່ແຂວງຄຳມ່ວນ, ໄດ້ສົ່ງອີແມວມາຍັງລາຍການຢາກຮູ້ກ່ຽວກັບເນື້ອໃນຂອງສັນຍາການຄ້າຊາຍແດນລະຫວ່າງຫວຽດນາມ - ລາວ ທີ່ຫາກໍ່ໄດ້ຮັບການລົງນາມຢູ່ແຂວງເງ້ອານ ໃນອາທິດຜ່ານມາ.
ເພື່ອນ ຈິດຕະວົງ ທີ່ຮັກແພງ. ໃນທ້າຍເດືອນ 06 ຜ່ານມາ, ຢູ່ແຂວງ ເງ້ອານ,ໄດ້ດຳເນີນພິທີລົງນາມສັນຍາການຄ້າຊາຍແດນລະຫວ່າງ ສສ.ຫວຽດນາມ ແລະ ສປປ.ລາວ, ພາຍໃຕ້ການເປັນສັກຂີພິຍານຂອງທ່ານຮອງນາຍົກລັດຖະມົນຕີ ຫງວຽນຊວນຟຸກ ແລະ ທ່ານຮອງນາຍົກລັດຖະມົນຕີລາວ ສົມສະຫວາດ ເລັ່ງສະຫວັດ. ທີ່ພິທີ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ: ພິທີລົງນາມສັນຍາການຄ້າຊາຍແດນລະຫວ່າງຫວຽດນາມ-ລາວ ຄັ້ງນີ້ ແມ່ນເຫດການມີຄວາມໝາຍສຳຄັນ, ສ້າງເງື່ອນໄຂດ້ານນິຕິກຳເພື່ອໃຫ້ການຮ່ວມມືພັດທະນາດ້ານການຄ້າ ແທດເໝາະກັບສາຍພົວພັນທີ່ເປັນມູນເຊື້ອແບບພິເສດ, ການຮ່ວມມືຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດ. ສັນຍາການຄ້າຊາຍແດນລະຫວ່າງຫວຽດນາມ-ລາວ ມີບັນດາເນື້ອໃນຕົ້ນຕໍຄື: ຂໍ້ກຳນົດການເຄື່ອນໄຫວຄ້າຂາຍ, ແລກປ່ຽນສິນຄ້າຂອງນັກທຸລະກິດ, ປະຊາຊົນເຂດຊາຍແດນ; ໃຫ້ບຸລິມະສິດອັດຕາພາສີນຳເຂົ້າ 0% ແກ່ສິນຄ້າມີຕົ້ນກຳເນີດຈາກຫວຽດນາມ ແລະ ລາວ. ນອກນັ້ນ, ສັນຍາຍັງກຳນົດກ່ຽວກັບການຊຳລະດ້ານການຄ້າຊາຍແດນ; ໃຫ້ຄຳໝັ້ນສັນຍາເພີ່ມທະວີການເຄື່ອນໄຫວສົ່ງເສີມການຄ້າ, ການລົງທຶນ ແລະ ທ່ອງທ່ຽວຜ່ານຊາຍແດນ; ສ້າງຕັ້ງຄະນະຊີ້ນຳການຄ້າເຂດຊາຍແດນຫວຽດນາມ - ລາວ…
.jpg)
ເພື່ອນ ຈະເລີນສຸກ, ຢູ່ແຂວງ ຫົວພັນ ໄດ້ສົ່ງອີແມວມາຍັງລາຍການໂດຍຖາມວ່າ: ໃນໄລຍະຜ່ານມາ, ບໍລິສັດໂທລະຄົມລາວ-Asia ແລະ ບໍລິສັດ Viettel ຂອງຫວຽດນາມ ໄດ້ ເປີດສະຫຼອງບໍລິການ 4 ຈີ ຢູ່ລາວ. ຂ້າພະເຈົ້າຢາກຮູ້ກ່ຽວກັບການບໍລິການ 4 ຈີ ມີຈຸດພິເສດຄືແນວໃດເມື່ອທຽບໃສ່ 3 ຈີ, ປະຈຸບັນຢູ່ແຂວງໃດສາມາດນຳໃຊ້ບໍລິການ 4 ຈີ?
ເພື່ອນ ຈະເລີນສຸກ ທີ່ຮັກແພງ, ວັນທີ 23/06 ຜ່ານມາ, ບໍລິສັດ Star Telecom, ບໍລິສັດຮ່ວມທຸລະກິດ ລະຫວ່າງບໍລິສັດໂທລະຄົມ ລາວ-Asia ຂຶ້ນກັບກະຊວງປ້ອງກັນປະເທດລາວ ແລະ ບໍລິສັດ Vietel ຂຶ້ນກັບກະຊວງປ້ອງກັນປະເທດຫວຽດນາມ, ໄດ້ເປີດສະຫຼອງບໍລິການ 4 ຈີ ດ້ວຍລະດັບຄວາມໄວສູງເພື່ອຮັບໃຊ້ໃຫ້ແກ່ຜູ້ນຳໃຊ້ບໍລິການອີນເຕີແນັດມືຖືຂອງເຄືອຂ່າຍ Unitel. ຕາມທ່ານຟານເຈື່ອງເຊີນ, ຮອງຫົວໜ້າບໍລິສັດ Star Telecom ແລ້ວ, ດ້ວຍລະດັບຄວາມໄວສູງທົບ 10 ເທົ່າເມື່ອທຽບໃສ່ເຄືອຂ່າຍ 3 ຈີ, ບໍລິການ 4 ຈີ ໂດຍ Unitel ສະໜອງຈະນຳເອົາປະໂຫຍດຫຼາຍຢ່າງມາໃຫ້ຜູ້ຊົມໃຊ້ ຄື: ຊົມຮູບເງົາ, ຟັງເພງ, ບັນເທີງໃນ youtube , ຊົມໂທລະພາບໂດຍກົງ, dowload ຫຼາຍຂໍ້ມູນໃນພາບດຽວ…ເພື່ອຕອບສະໜອງຄວາມຮຽກຮ້ອງຕ້ອງການໃນລະດັບ ສູງສຸດຂອງຜູ້ນຳໃຊ້ການບໍລິການ 4 ຈີ, Unitel ແມ່ນເຄືອຂ່າຍອິນເຕີແນັດທຳອິດ ຢູ່ ລາວ ທີ່ໄດ້ສ້າງຄ່າບໍລິການຫຼາຍຢ່າງອີງຕາມຄວາມຕ້ອງການຂອງຜູ້ໃຊ້, ດ້ວຍຄ່າບໍລິການປະຢັດ, ເທົ່າກັບຄ່າບໍລິການ 3 ຈີ. ກ່ອນທີ່ເປີດສະຫຼອງບໍລິການ 4 ຈີ, Unitel ໄດ້ສະຫຼອງບໍລິການ 4 ຈີ ຢູ່ລາວ ນັ້ນແມ່ນ, ວຽງຈັນ, ຈຳປະສັກ, ສະຫວັນນະເຂດ ແລະ ຫຼວງພະບາງ. ທ່ານ ຟານເຈື່ອງເຊີນ ໃຫ້ຮູ້ວ່າ.
“ຈຸດປະສົງຂອງ Unitel ເມື່ອຜັນຂະຫຍາຍການບໍລິການດັ່ງກ່າວແມ່ນ ຄວາມປາດຖະໜາຢາກມຸ່ງໄປເຖິງຈຸດໝາຍຜູ້ນຳໃຊ້ໄດ້ຮັບການບໍລິການດີທີ່ສຸດ, ນຳຂະແໜງໂທລະຄົມຂອງລາວ ທັດທຽມກັບທ່າອ່ຽງພັດທະນາຂອງຂະແໜງໂທລະຄົມໂລກ. ຄາດວ່າ, ພາຍຫຼັງຜັນຂະຫຍາຍຢູ່ 4 ແຂວງແລ້ວ, ພວກຂ້າພະເຈົ້າຈະສືບຕໍ່ຜັນຂະຫຍາຍໃນທົ່ວປະເທດລາວ”.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ. ຖ້າຫາກຜູ້ຟັງ, ຜູ້ອ່ານທ່ານໃດມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການພວກເຮົາໄດ້ເລີຍໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov@yahoo.com, laovov5@gmail.com.