(vovworld) - ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກຂ້າພະເຈົ້າຂໍຄັດສະເໜີເນື້ອໃນ ແລະ ຕອບບາງຄຳຖາມຂອງທ່ານຜູ້ຟັງຝາກມາລາຍການວິທະຍຸກະຈາຍສຽງຫວຽດນາມພາກພາສາລາວອາທິດຜ່ານມາ. ໃນນັ້ນມີເນື້ອໃນເຕື້ອງເຖິງສະຖານທີ່ທ່ອງທ່ຽວຢູ່ແຂວງ ນິງບິ່ງ ແລະ 4 ຂົ້ວຂອງປະເທດ ຫວຽດນາມ.
ເພື່ອນ ແສງແກ້ວ ວີລາລີ, ແຂວງ ວຽງຈັນ ໄດ້ຝາກ ອີແມວມາຍັງລາຍການໂດຍໃຫ້ຮູ້ວ່າ: ໄລຍະຈະມາເຖິງ, ຄອບຄົວຂ້າພະເຈົ້າຈະໄປຢ້ຽມຢາມນະຄອນຫຼວງ ຮ່າໂນ້ຍ ແລະ ທັງໄປຢ້ຽມຊົມທິວທັດທຳມະຊາດແຫ່ງຕ່າງໆຢູ່ແຂວງ ນິງບິ່ງອີກ. ແຕ່ວ່າຂ້າພະເຈົ້າບໍ່ຮູ້ຫຼາຍກ່ຽວກັບບັນດາທິວທັດທຳມະຊາດຢູ່ແຂວງນີ້. ຫວັງວ່າລາຍການຈະແນະນຳຕື່ມອີກກ່ຽວກັບບັນດາສະຖານທີ່ທ່ອງທ່ຽວທີ່ສວຍງາມຢູ່ແຂວງນີ້ເພື່ອໃຫ້ຄອບຄົວຂ້າພະເຈົ້າສາມາດຄົ້ນຫາຄວາມງາມທັງໝົດຢູ່ແຂວງນີ້.”
ເພື່ອນ ແສງແກ້ວ ທີີ່ຮັກແພງ, ເມື່ອຢ້ຽມຢາມແຂວງ ນິງບິ່ງ, ແມ່ນແຂວງທີ່ຫ່າງຈາກໃຈກາງນະຄອນຫຼວງ ຮ່າໂນ້ຍ ປະມານ 100 ກມ, ຄອບຄົວຂອງເພື່ອນສາມາດໄປຢ້ຽມຢາມທັດສະນີຍະພາບທີ່ມີຊື່ສຽງຈ່າງອານ. ມີປູຊະນີຍະສະຖານຫຼາຍແຫ່ງໃນເຂດດັ່ງກ່າວໄດ້ຮັບການຮັບຮອງຈາກລັດຖະບານຫວຽດນາມວ່າເປັນປູຊະນີຍະສະຖານແຫ່ງຊາດສຳຄັນພິເສດຄື: ເຂດທ່ອງທ່ຽວຊີວະພາບ ຈ່າງອານ, ເຂດທ່ອງທ່ຽວ ຕາມກົກ - ບີກດົ້ງ, ວັດ ບ໋າຍດິ໋ງ, ຄຸ້ມເມືອງເກົ່າ ຮວາລື… ລະຫວ່າງບັນດາເຂດທ່ອງທ່ຽວດັ່ງກ່າວແມ່ນລະບົບປ່າ ຮວາລື ເທິງພູຫີນປູນ, ດິນ ນ້ຳຖ້ວມ ແລະ ລະບົບແມ່ນຳ້, ໜອງ, ບຶງ… ດ້ວຍເນື້ອທີ 12.252 ha. ວັນທີ 23/6/2014, ຢູ່ນະຄອນຫຼວງ Doha, ປະເທດ Qatar ດ້ວຍຄວາມເຫັນດີເຫັນພ້ອມສູງສຸດຂອງຄະນະກຳມະການມໍລະດົກໂລກ, ກຸ່ມທັດສະນີຍະພາບຈ່າງອານ ໄດ້ກາຍເປັນມໍລະດົກປະສົມໂລກແຫ່ງທຳອິດຢູ່ ຫວຽດນາມ ຢ່າງເປັນທາງການ ຍ້ອນຕອບສະໜອງໄດ້ທັງ 2 ປັດໄຈຕົ້ນຕໍກ່ຽວກັບວັດທະນະທຳ ແລະ ທຳມະຊາດ. ປະຈຸບັນ, ຈ່າງອານ ກໍແມ່ນມໍລະດົກໂລກເປັນຄູ່ແຫ່ງທຳອິດ ແລະ ໜຶ່ງດຽວ ຢູ່ ພາກພື້ນອາຊີຕາເວັນອອກສຽງໃຕ້. ໃນແຜນຜັງພັດທະນາການທ່ອງທ່ຽວຢູ່ ຫວຽດນາມ, ຈ່າງອານ ກໍແມ່ນສະຖານທີ່ໄດ້ຮັບການລົງທຶນເພື່ອກາຍເປັນເຂດທ່ອງທ່ຽວລະດັບສາກົນ. ນອກຈາກນັ້ນ, ເມື່ອໄປຢ້ຽມຢາມແຂວງ ນິງບີ່ງ ເພື່ອນ ແລະ ຄອບຄົວກໍສາມາດໄປຢ້ຽມຊົມປ່າສະຫງວນ ກຸກເຟືອງ. ປ່າແຫ່ງນີ້ມີເນື້ອທີ 22,200 ha, ໃນນັ້ນມີ ¾ ແມ່ນພູຫີນປູນສູງແຕ່ 300 - 600 ມ ເມື່ອທຽບໃສ່ໜ້ານ້ຳທະເລ. ປ່າສະຫງວນກຸກເຟືອງກໍແມ່ນບ່ອນມີສັດມີຄ່າຫາຍາກຫຼາຍປະເພດ. ໂບດຫີນ ຟາດຢ້ຽມແມ່ນສະຖານທີ່ຄວນແວ່ຢາມ. ໂບດຫີນ ຟາດຢ້ຽມ ແມ່ນກຸ່ມສະຖາປັດຕະຍາກຳແບບສາລາ, ວັດຂອງຝ່າຍຕາເວັນອອກ, ສົມທົບກັບສະຖາປັດຕະຍາກຳ Gotic ຂອງໂບດຝ່າຍຕາເວັນຕົກເຊິ່ງລວມມີ: ໜອງ, ສາລາ, ໂບດໃຫຍ່, ໂບດຫີນ…
ແຫຼມ ກາເມົາ, ຂົ້ວໃຕ້ສຸດຂອງປະເທດ ຫວຽດນາມ
|
ເພື່ອນ ພຽນມະສອນ, ແຂວງ ໄຊສົມບູນ ໄດ້ໂທລະສັບຫາລາຍການໂດຍຖາມວ່າ: ອາທິດຜ່ານມາ, ຂ້າພະເຈົ້າໄດ້ອ່ານບົດຂຽນໃນລາຍການ “ຄົ້ນຫາ ຫວຽດນາມ” ແລະ ໃນບົດຂຽນດັ່ງກ່າວໄດ້ເວົ້າເຖິງ 4 ຂົ້ວຂອງ ປະເທດ ຫວຽດນາມ ແລະ ແນະນຳ ຂົ້ວເໜືອຂຶ້ນກັບຕາແສງ ລູງກູ໋, ແຂວງ ຮ່າຢາງ. ດັ່ງນັ້ນຂ້າພະເຈົ້າຢາກຖາມວ່າ 3 ຂົ້ວທີ່ຍັງເຫຼືອແມ່ນຂຶ້ນກັບສະຖານທີ່ໃດແດ່?
ທ່ານ ພຽນມະສອນ ທີ່ເຄົາລົບ, ຄືດັ່ງທ່ານໄດ້ຮູ້ແລ້ວວ່າຂົ້ວເໜືອຂອງ ຫວຽດນາມ ແມ່ນແຫຼມລູງກູ໋, ຢູ່ແຂວງຮ່າຢາງ. ສ່ວນ 3 ຂົ້ວທີ່ຍັງເຫຼືອອື່ນອີກແມ່ນ: ຂົ້ວຕາເວັນອອກຂຶ້ນກັບແຫຼມ ໂດຍ, ແຂວງ ແຄ໋ງຮ່ວາ, ຂົ້ວຕາເວັນຕົກແມ່ນ ອາປາຈ໋າຍ, ແຂວງ ດ້ຽນບຽນ, ຂົ້ວໃຕ້ສຸດແມ່ນ ແຫຼມ ກາເມົາ, ແຂວງກ່າເມົາ. ຖ້າຫາກມີເວລາເຊີນເພື່ອນຢ້ຽມຢາມ 4 ຂົ້ວດັ່ງກ່າວຍ້ອນວ່າທຳມະຊາດຢູ່ ສະຖານທີ່ເຫຼົ່ານັ້ນສວຍງາມທີ່ສຸດ ທັງແມ່ນບ່ອນທີ່ນັກທ່ອງທ່ຽວຫວຽດນາມ ຫຼາຍຄົນນິຍົມທີ່ສຸດ.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການພວກເຮົາໄດ້ເລີຍໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov@yahoo.com, laovov5@gmail.com.