(vovworld) - ປີ 2012 ຜ່ານມາແມ່ນປີທີ່ປະສົບກັບຄວາມຫຍຸ້ງຍາກຫລາຍຢ່າງ ແຕ່ຂະແຫນງທ່ອງທ່ຽວ ຫວຽດນາມ ຍັງຄົງບັນລຸໄດ້ໝາກຜົນດີພໍສົມຄວນ ດ້ວຍຈຳນວນນັກທ່ອງທ່ຽວສາກົນມາຢ້ຽມຢາມ ຫວຽດນາມ ບັນລຸກວ່າ 6,8 ລ້ານເທື່ອຄົນ, ເພີ່ມຂຶ້ນ 14% ເມື່ອທຽບໃສ່ປີ 2011. ແລະໃນປີ 2012 ມີວາລະສານຫລາຍສະບັບ ແລະ ອົງການຮັບຜິດຊອບສະເພາະກ່ຽວກັບການທ່ອງທ່ຽວສາກົນ ແລະ ພາກພື້ນ ໄດ້ຈັດ ຫວຽດນາມ ເຂົ້າບັນຊີລາຍຊື່ບັນດາຈຸດນັດພົບອັນດູດດື່ມທີ່ສຸດສຳລັບນັກທ່ອງທ່ຽວສາກົນ.
ເຫດການທີ່ເປີດສາດໃຫ້ແກ່ຂະແຫນງທ່ອງທ່ຽວ ຫວຽດນາມ ແມ່ນການເຄື່ອນໄຫວຕ່າງໆຂອງປີທ່ອງທ່ຽວເຂດແຄມທະເລທາງທິດເຫນືອພາກກາງ - ເຫ້ວປີ 2012 ພາຍໃຕ້ຫົວຂໍ້ວ່າ: ທ່ອງທ່ຽວມໍລະດົກ. ມີເກືອບ 30 ເຫດການວັດທະນະທຳ, ກິລາ, ການທ່ອງທ່ຽວທີ່ພົ້ນເດັ່ນຖືກດຳເນີນໄປໃນຕະຫລອດປີທີ່ເຂັ້ມຂົ້ນໄປດ້ວຍສີສັນຂອງບັນດາແຂວງທາງທິດເຫນືອພາກກາງ, ພິເສດແມ່ນວັດທະນະທຳເຫ້ວໃນການປະສົມປະສານກັບວັດທະນະທຳ ຫວຽດນາມ. ແຂວງເທື່ອທຽນເຫ້ວ ສືບຕໍ່ຢືນຢັນເຄື່ອງໝາຍທ່ອງທ່ຽວຂອງຕົນດ້ວຍງານບຸນປະເພນີຕ່າງໆຄື: Festival ເຫ້ວ, Festival ອາຊີບທີ່ເປັນມູນເຊື້ອເຫ້ວ, ງານບຸນ ຮ່ວຽນເຈີນ, ງານບຸນບັ້ງໄຟດອກຢູ່ແມ່ນ້ຳເຮືອງ.... ຂະແຫນງວັດທະນະທຳກິລາ ແລະທ່ອງທ່ຽວ ແຂວງເທື່ອທຽນເຫ້ວ ກໍໄດ້ສ້າງບໍລິການທ່ອງທ່ຽວໃຫມ່ຫລາຍຢ່າງ, ຂຸດຄົ້ນຄວາມສາມາດບ່ົມຊ້ອນ, ທ່າແຮງຂອງເຂດທະເລ, ບືງ, ຄວາມງາມຂອງແມ່ນ້ຳລຳເຊ, ພູຜາປ່າໄມ້.. ຍ້ອນເຫດນັ້ນ ຈຳນວນນັກທ່ອງທ່ຽວມາຢ້ຽມຢາມນະຄອນເຫ້ວ ເພີ່ມຂຶ້ນເກືອບ 25%ເມື່ອທຽບໃສ່ປີ 2011, ລາຍຮັບເກັບມາໄດ້ຈາກການທ່ອງທ່ຽວບັນລຸເກືອບ 1.800 ຕື້ດົ່ງ. ທ່ານ ໂງຮ່ວາ, ຮອງປະທານຄະນະກຳມະການປະຊາຊົນແຂວງເທື່ອທຽນເຫ້ວ ໃຫ້ຮູ້ວ່າ:
“ເຫ້ວ ແມ່ນນະຄອນແຫ່ງ Festival, ງານບຸນຕ່າງໆ. ສະນັ້ນ ບົນພື້ນຖານຄວາມສາມາດບົ່ມຊ້ອນ, ສີສັນວັດທະນະທຳຂອງເຂດດິນແດນ, ພວກຂ້າພະເຈົ້າຈະອອກແບບເພື່ອເຮັດແນວໃດໃຫ້ງານບຸນວັດທະນະທຳ, ງານບຸນການເຫລື້ອມໃສ, ງານບຸນວັດທະນະທຳຈິດວິນຍານຈະໄດ້ຮັບການໂຄສະນາຢ່າງກວ້າງຂວາງ ເພື່ອດຶງດູດນັກທ່ອງທ່ຽວ.”
ຄຸ້ມເມືອງເກົ່າ ໂຮ້ຍອານ
ພາບ:internet
|
ປີ 2012 ກໍເປັນປີທີ່ບັນດາການເຄື່ອນໄຫວທ່ອງທ່ຽວຂອງບັນດາແຂວງຄື: ດາຫນັງ, ບີ່ນທ້ວນ, ແຄນຮ່ວາ...ມີບາດກ້າວບຸກທະລຸ ກາຍເປັນຈຸດພົ້ນເດັ່ນຂອງທ່ອງທ່ຽວ ຫວຽດນາມ, ທີ່ດຶງດຸດນັກທ່ອງທ່ຽວຢູ່ພາຍໃນ ແລະ ຕ່າງປະເທດເປັນຈຳນວນຫລວງຫລາຍ. ຜົນສຳເລັດໃຫຍ່ສຸດຂອງຂະແຫນງທ່ອງທ່ຽວ ດາຫນັງໃນປີ 2012 ນັ້ນແມ່ນຮັກສາການເຕີບໂຕໄວ້ໄດ້ນັບທັງຈຳນວນນັກທ່ອງທ່ຽວ ແລະ ລາຍຮັບຈາກການທ່ອງທ່ຽວ ໃນຂະນະທີ່ເສດຖະກິດປະສົບກັບຄວາມຫຍຸ້ງຍາກ, ຊຶ່ງສະແດງໃຫ້ເຫັນຜ່ານຍອດຈຳນວນນັກທ່ອງທ່ຽວມາຢ້ຽມຢາມນະຄອນ ຄາດວ່າບັນລຸກວ່າ 2,6 ລ້ານເທື່ອຄົນ, ເພີ່ມຂຶ້ນ 12% ເມື່ອທຽບໃສ່ປີ 2011. ສິ່ງດັ່ງກ່າວໄດ້ປະກອບສ່ວນຢືນຢັນລັກສະນະປະສິດທິຜົນຈາກບັນດາມາດຕະການຂອງຂະແຫນງທ່ອງທ່ຽວທ້ອງຖິ່ນໃນການເພີ່ມທະວີ ແລະ ເຜີຍແຜ່ໂຄສະນາພາບພົດ “ດາຫນັງ - ນະຄອນທ່ອງທ່ຽວ” ອອກສູ່ໂລກ. ທ່ານ ຫງວຽນແມ້ນເກືື່ອງ, ຮອງຫົວຫນ້າກົມໃຫຍ່ທ່ອງທ່ຽວ ຫວຽດນາມ ໃຫ້ຮູ້ວ່າ:
“ດາຫນັງ ກໍແມ່ນສະຖານທີ່ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍໃນປີຜ່ານມາ, ສ້າງບັນດາພາບພົດອັນດີງາມ ແລະ ສ້າງຜະລິດຕະພັນທ່ອງທ່ຽວຫລາຍຢ່າງ. ຢູ່ ແຄງຮ່ວາ ໄດ້ດຳເນີນຫລາຍເຫດການສາກົນ ແລະ ຄາດວ່າ ປີ 2013, ງານມະໂຫລານສາກົນກ່ຽວກັບທະເລຈະຖືກຈັດຂຶ້ນເປັນຄັ້ງທຳອິດຢູ່ ຫວຽດນາມ ໂດຍແຄງຮ່ວາ ເປັນເຈົ້າພາບ. ໃນງານມະໂຫລານສາກົນກ່ຽວກັບທະເລຄັ້ງນີ້ ຈະຈັດງານຕະຫລາດນັດສາກົນພ້ອມກັບບັນດາເຫດການອື່ນຂອງສະຫະສະມາຄົມທ່ອງທ່ຽວ ຫວຽດນາມ. ປະຈຸບັນ ວຽກງານກະກຽມພວມໄດ້ຮັບການຜັນຂະຫຍາຍ.ສິ່ງດັ່ງກ່າວສະແດງໃຫ້ເຫັນຄວາມຕັດສິນໃຈຂອງແຄງຮ່ວາແມ່ນສູງທີ່ສຸດ”
ປີ 2012 ກໍເປັນປີທີ່ຂະແຫນງທ່ອງທ່ຽວ ແຂວງ ບີ່ນທ້ວນ ປະສົບຜົນສຳເລັດ ດ້ວຍຈຳນວນນັກທ່ອງທ່ຽວມາຢ້ຽມຢາມກວ່າ 3,1 ລ້ານເທ່ືອຄົນ, ເພີ່ມຂຶ້ນກວ່າ 11% ເມື່ອທຽບໃສ່ປີ 2011. ໃນນັ້ນ ນັກທ່ອງທ່ຽວມາຈາກລັດເຊຍ ຍັງນຳຫນ້າດ້ານຈຳນວນ, ໄລຍະເວລາພັກອາໄສ ແລະ ລາຍຈ່າຍ. ທ່ານ Nikolay Surkov ນັກທ່ອງທ່ຽວມາຈາກລັດເຊຍມາພັກຜ່ອນບຳລຸງສຸຂະພາບຢູ່ແຂວງ ບີ່ນທ້ວນ ໃຫ້ຮູ້ວ່າ:
“ຂ້າພະເຈົ້າມັກພັກຜ່ອນບຳລຸງສຸຂະພາບຢູ່ທີ່ນີ້. ທະເລພຽງຫ່າງຈາກບ່ອນທີ່ຂ້າພະເຈົ້າພັກຜ່ອນພຽງປະມານ 10 ແມັດ. ສະນັ້ນ ຂ້າພະເຈົ້າສາມາດຕາກແດດໃນຕະຫລອດມື້. ຢູ່ທີ່ນີ້ ຂ້າພະເຈົ້າຍັງໄດ້ຮັບປະທານເຍື່ອງອາຫານທະເລສົດຫລາຍເຍື່ອງ ແລະ ໝາກໄມ້ທ້ອງຖິ່ນຫລາຍແນວທີ່ແຊບອີກດ້ວຍ. ຂ້າພະເຈົ້າຮູ້ສຶກປະທັບໃຈຫລາຍເມື່ອໄປຢ້ຽມຢາມບັນດາສະຖາປັດຕະຍະກຳຂອງຊາວເຜົ່າຈຳ. ໄລຍະຈະມາເຖິງ ຂ້າພະເຈົ້າຈະກັບຄືນບີ່ນທ້ວນ ພ້ອມກັບ ລູກຫລານຂອງຕົນ.”
ອ່າວ ຮ້າລອງ
ພາບ: internet
|
ເຫດການພົ້ນເດັ່ນຫນຶ່ງອີກທີ່ດຶງດູດຄວາມສົນໃຈຂອງນັກທ່ອງທ່ຽວທົ່ວໂລກ ນັ້ນແມ່ນ ອ່າວຮ້າລອງ ຢູ່ແຂວງ ກວ໋າງນີງ ໄດ້ຮັບການຮັບຮອງເປັນສິ່ງມະຫັດສະຈັນທຳມະຊາດແຫ່ງໃຫມ່ຂອງໂລກຢ່າງເປັນທາງການ, ອັນໄດ້ເພີ່ມນາມມະຍົດລະດັບສາກົນຕື່ມອີກແຫ່ງຫນຶ່ງກ່ຽວກັບຄຸນຄ່າຂອງອ່າວຮ້າລອງ, ປະກອບສ່ວນດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ມາຢ້ຽມຢາມທັດສະນີຍະພາບນີ້ນັບມື້ນັບຫລາຍ. ດ້ວຍນາມມະຍົດດັ່ງກ່າວ ອ່າວຮ້າລອງ ໄດ້ກາຍເປັນເຄື່ອງໝາຍທ່ອງທ່ຽວຂອງ ຫວຽດນາມ. ທ່ານ ຈີ້ງດັງແທນ, ຮອງຫົວຫນ້າພະແນກວັດທະນະທຳ ກິລາ ແລະ ທ່ອງທ່ຽວ ແຂວງ ກວ໋າງນີງ ໃຫ້ຮູ້ວ່າ:
“ພວກຂ້າພະເຈົ້າຈະຮັກສາເຄື່ອງໝາຍທ່ອງທ່ຽວໄວ້ ແລະ ເຮັດແນວໃດເສີມຂະຫຍາຍປະສິດທິຜົນສູງກວ່າ ເພື່ອດຶງດູດນັກທ່ອງທ່ຽວມາຢ້ຽມຢາມ ຮ້າລອງ ນັບມື້ນັບຫລາຍກວ່າ, ພ້ອມກັນນັ້ນ ກໍຢາກເຮັດໃຫ້ຊາວ ຫວຽດນາມ ອາໄສຢູ່ຕ່າງປະເທດ ແລະ ນັກທ່ອງທ່ຽວສາກົນ ມີຄວາມຮັກ ຫວຽດນາມກວ່າ ແລະ ຢາກມາຢ້ຽມຢາມ ຫວຽດນາມ ຫລາຍກວ່າອີກ. ”
ແລະກໍໃນປີ 2012, ໂຮງແຮມ 3 ແຫ່ງຂອງ ຫວຽດນາມ ຖືກຈັດເຂົ້າບັນຊີລາຍຊື່ບັນດາໂຮງແຮມມີຄຸນນະພາບທີ່ສຸດຂອງໂລກ. ວາລະສານ Travel + Leisure ຊຶ່ງແມ່ນວາລະສານທ່ອງທ່ຽວໃຫຍ່ສຸດຂອງໂລກ ໃຫ້ຮູ້ວ່າ ໂຮງແຮມ 3 ແຫ່ງຂອງ ຫວຽດນາມ ນັ້ນແມ່ນ The Nam Hai (ນາມຫ໋າຍ) ຢູ່ ໂຮ້ຍອານ, Sofitel Legend Metropole ຮ່າໂນ້ຍ ແລະ Park Hyatt ໄຊງ່ອນ ມີຫນ້າໃນບັນຊີລາຍຊື່ “T+L 500” ຄັ້ງຫລ້າສຸດ. ນອກນັ້ນ ໝາກຜົນແຫ່ງການສຳຫລວດໂດຍສະຫະສະມາຄົມທ່ອງທ່ຽວ ອາເມລິກາ ປະກາດວ່າ: ຫວຽດນາມ ນຳຫນ້າໃນບັນຊີລາຍຊື່ບັນດາສະຖານທີ່ທ່ອງທ່ຽວຊຶ່ງນັກທ່ອງທ່ຽວຢາກເລືອກເຟັ້ນໃນປີ 2012. ຫນ້າເວັບ The Huffington Post ຜ່ານຜູ້ນຳໃຊ້ Facebook ໃຫ້ຮູ້ວ່າ: ຫວຽດນາມ ນອນໃນຈຳນວນສະຖານທີ່ທ່ອງທ່ຽວ 10 ແຫ່ງດີສຸດໃນໂລກ.
ປີ 2012 ແມ່ນປີທີ່ປະສົບກັບຄວາມຫຍຸ້ງຍາກດ້ານເສດຖະກິດ ແຕ່ດ້ວຍບັນດາຂີດໝາຍເຊິ່ງຂະແຫນງທ່ອງທ່ຽວ ຫວຽດນາມ ບັນລຸໄດ້ ນັບທັງຈຳນວນນັກທ່ອງທ່ຽວສາກົນມາຢ້ຽມຢາມ ຫວຽດນາມ ພ້ອມກັບລາຍຮັບເກັບມາໄດ້ຈາກການທ່ອງທ່ຽວ ແມ່ນ 160.000 ຕື້ດົ່ງ ເປັນການຢືນຢັນວ່າ ຂະແຫນງທ່ອງທ່ຽວແມ່ນຫນຶ່ງໃນບັນດາຂະແຫນງເສດຖະກິດທີ່ນຳມາເຊິ່ງປະສິດທິຜົນສູງໃຫ້ແກ່ພື້ນຖານເສດຖະກິດ ຫວຽດນາມ.