(vovworld) - ເລື່ອງອິນເດຍ ແລະ ປາກິດສະຖານ ພ້ອມກັນດຳເນີນການຍິງທົດລອງລູກສອນໄຟຕິດຫົວນິວເຄຼຍ ໄດ້ເຮັດໃຫ້ປະຊາຄົມໂລກເກີດຄວາມວິຕົກກັງວົນ. ຄວາມຈິງຊີ້ໃຫ້ເຫັນວ່າ, ນີ້ບໍແມ່ນຄັ້ງທຳອິດທີ່ສອງປະເທດບ້ານໃກ້ເຮືອນຄຽງຢູ່ ອາຊີໃຕ້ດຳເນີນການຍິງທົດລອງລູກສອນໄຟ ແຕ່ໃນໄລຍະມໍ່ໆມານີ້ ການຍິງທົດລອງລູກສອນໄຟແມ່ນດຳເນີນໄປນັບມື້ນັບຫລາຍ, ໃນນັ້ນ ເມື່ອປະເທດນີ້ຍິງທົດລອງລູກສອນໄຟໄລຍະໄກກວ່າ, ແຂງແຮງກວ່າ, ປະເທດອື່ນກໍຖະແຫລງຈະຍິງທົດລອງລູກສອນໄຟປະເພດຄ້າຍຄືກັນ. ສິ່ງນັ້ນໄດ້ເຮັດໃຫ້ປະຊາຄົມໂລກເກີດຄວາມວິຕົກກັງວົນ.
ວັນທີ 19/9, ກອງທັບ ອິນເດຍ ປະກາດວ່າ, ຈາກສະຫນາມຍິງລູກສອນໄຟຢູ່ເກາະ Wheeler ນອກຝັ່ງທະເລ Odisha, ອິນເດຍໄດ້ຍິງທົດລອງ ລູກສອນໄລຍະໄກສາມາດຕິດຫົວນິວເຄຼຍ Agni 4 ສຳເລັດຜົນ. ນີ້ເປັນການຍິງທົດລອງ ລູກສອນໄຟຕິດຫົວນິວເຄຼຍ Agni 4 ຄັ້ງທີ 3 ຂອງອິນເດຍ. ພາຍຫລັງເຫດການນີ້, ໃນວັນທີ 20/9, ກອງບັນຊາການບັນດາກຳລັງຍຸດທະສາດ ອິນເດຍ ແລະ ບັນດານັກວິທະຍາສາດຂອງອົງການຄົ້ນຄ້ວາ ແລະ ພັດທະນາປ້ອງກັນປະເທດ ອິນເດຍ ກໍພວມກະກຽມການຍິງທົດລອງລູກສອນໄຟຕິດປີກ Nirbhay ໄລຍະໄກ 1000 ກິໂລແມັດ ແລະ ສາມາດຍິງຈາກບັນດາບໍລິພັນ. ກ່ອນຫນ້ານັ້ນ, ເມື່ອເດືອນ 8/2012, ອິນເດຍ ໄດ້ການຍິງທົດລອງລູກສອນໄຟຫນ້າດິນຕ້ານຫນ້າດິນ Prithvi 2 ສາມາດຕິດຫົວນິວເຄຼຍສຳເລັດຜົນ.
ການຍິງລູກສອນໄຟນິວເຄຼຍດັ່ງກ່າວ ບໍ່ເປັນຫນ້າປຶກສາຫາລື ຖ້າຫາກບໍ່ປະຕິດບັດ ພາຍຫລັງ ພຽງ 48 ຊົ່ວໂມງ ທີ່ປາກິດສະຖານຖະແຫລງຍິງທົດລອງລູກສອນໄຟຕິດປີກ Hatf 7 ສາມາດຕິດຫລາຍຫົວນິວເຄຼຍສຳເລັດຜົນ. ເຖິງວ່າ ອິນເດຍ ແລະ ປາກິດສະຖານ ລ້ວນແຕ່ບໍ່ຍອມຮັບມີເຈດຈຳນົງຊ່ວງເສັງອາວຸດໃຫມ່ ແຕ່ພາຍຫລັງການຍິງທົດລອງລູກສອນໄຟຂອງປະເທດນີ້, ປະເທດບ້ານໃກ້ເຮືອນຄຽງພັດດຳເນີນການຍິງທົດລອງເຊ່ັນກັນ, ສິ່ງດັ່ງກ່າວໄດ້ເຮັດໃຫ້ປະຊາຄົມໂລກເກີດຄວາມວິຕົກກັງວົນກ່ຽວກັບການຊ່ວງເສັງອາວຸດນິວເຄຼຍແບບປິດລັບຢູ່ ອາຊີໃຕ້.
ອິນເດຍໄດ້ຍິງທົດລອງ ລູກສອນໄລຍະໄກສາມາດຕິດຫົວນິວເຄຼຍ Agni 4
ສຳເລັດຜົນ
ພາບ: internet
|
ຄວາມຈິງແລ້ວ, ອິນເດຍ ແລະ ປາກິດສະຖານ ລ້ວນແຕ່ແມ່ນສອງປະເທດມະຫາອຳນາດກ່ຽວກັບນິວເຄຼຍຢູ່ ພາກພື້ນ. ສອງປະເທດນີ້ບໍ່ທັນລົງນາມໃນສົນທິສັນຍາບໍ່ແຜ່ຂະຫຍາຍອາວຸດນິວເຄຼຍ(NPT). ນັບແຕ່ເມື່ອສອງປະເທດນີ້ຖະແຫລງວ່າ ສາມາດຜະລິດອາວຸດນິວເຄຼຍ ເມື່ອປີ 1998, ການຍິງທົດລອງລູກສອນໄຟຄັ້ງຕ່າງໆໄດ້ຮັບການປະຕິບັດ ແລະ ໄລຍະມໍ່ໆມານີ້ ແມ່ນດຳເນີນໄປນັບມື້ນັບຫລາຍ. ເຖິງວ່າ ໄລຍະນີ້ ການພົວພັນລະຫວ່າງ ອິນເດຍ ແລະ ປາກິດສະຖານ ໄດ້ຮັບການປັບປຸງແລ້ວ, ສອງຝ່າຍພວມດຳເນີນການພົບປະສົນທະນາທີ່ມີລັກສະນະສ້າງສັນ ແຕ່ຈາກການຍິງທົດລອງລູກສອນໄຟດັ່ງກ່າວ ໄດ້ເຮັດໃຫ້ຫາງສຽງເກີດຄວາມສົງໃສວ່າ ຄວາມໄວ້ເນື້ອເຊື່ອໃຈຈາກທັງສອງຝ່າຍບໍ່ທັນສົມບູນ.
ຫວນຄືນອະດີດຕະການ, ການພົວພັນລະຫວ່າງ ສອງປະເທດບ້ານໃກ້ເຮືອນຄຽງນີ້ສະຫນິດສະຫນົມປານໃດ. ນັບແຕ່ເມື່ອໄດ້ຮັບຄວາມເອກະລາດ ແຕ່ປີ 1947 ມາຮອດປະຈຸບັນ, ສອງຝ່າຍໄດ້ຜ່ານຜ່າສົງຄາມພາກສ່ວນເຖິງ 3 ຄັ້ງ. ເມື່ອສະພາບການພວມເປັນປົກກະຕິ, ບັນດາເຫດຍິງທົດລອງລູກສອນໄຟ, ການຊ່ວງເສັງອາວຸດເກິດຂຶ້ນພາຍຫລັງວັນທີ 19/4 ອິນເດຍ ຍິງທົດລອງລູກສອນໄຟໄລຍະໄກສາມາດຕິດຫົວນິວເຄຼຍນັ້ນໄດ້ເຮັດໃຫ້ Islamabad ເກີດຄວາມວິຕົກກັງວົນ. ຫລັງຈາກນັ້ນ ພຽງໃນເວລາ 1 ເດືອນ, ກອງທັບປາກິດສະຖານ ໄດ້ດຳເນີນການຍິງທົດລອງລູກສອນໄຟຕິດປີກໄລຍະກາງ 4 ຄັ້ງສຳເລັດຜົນ ອັນເປັນການ ຢືນຢັນເຖິງຄວາມກ້າວຫນ້າຊື່ງປະເທດນີ້ບັນລຸໄດ້ໃນຂົງເຂດການທະຫານ. ລະອຽດຄື: ບັນລຸຄວາມສາມາດດຸນດຽງຍຸດທະສາດໃນທາງບົກ ແລະ ທາງທະເລ, ດ້ວຍເຕັກໂນໂລຊີຕິດປີກ ຢ່າງຍອດຢ້ຽມ ພຽງແຕ່ມີບາງປະເທດ ຢູ່ໃນໂລກຜະລິດໄດ້. ກ່ຽວກັບບັນຫານີ້ ຄຳຖາມວາງອອກນັ້ນແມ່ນ ຕາມຫລັງການຍິງທົດລອງລູກສອນໄຟນັ້ນ ມີການປົກປ້ອງຂອງປະເທດໃຫຍ່ຫລືບໍ່. ຍັງບໍ່ທັນມີ ຄຳຕອບເທື່ອ ແຕ່ຕາມວົງການໄຈ້ແຍກແລ້ວ, ເລື່ອງ ວໍຊິງຕັນ ແລະ New Delhi ເພີ່ມທະວີການພົວພັນ ແລະ ອິນເດຍ ພວມຄ່ອຍໆກາຍເປັນປະເທດພັນທະມິດ ແລະ ເປັນຄູ່ຮ່ວມມືໃຫຍ່ຂອງ ອາເມລິກາ ຢູ່ ພາກພື້ນ ອາຊີໃຕ້ ນັ້ນແມ່ນບໍ່ໄດ້ຮັບການສະຫນັບສະຫນູນຈາກ Islamabas .
ວິຕົກກັງວົນຕໍ່ສະພາບການອາດຈະເກີດການປະທະກັນ, ທ່ານ Ban Ki Moon ເລຂາທິການໃຫຍ່ ສປຊ ໄດ້ຮຽກຮ້ອງໃຫ້ ອິນເດຍ ແລະ ປາກິດສະຖານ ຄວນສືບຕໍ່ ການພົບປະສົນທະນາກ່ຽວກັບຄວາມໝັ້ນຄົງ ແລະ ສັນຕິພາບ ຢູ່ ພາກພື້ນ ເພື່ອສ້າງເງື່ອນໄຂດີທີ່ສຸດໃຫ້ແກ່ການພົວພັນທີ່ໄດ້ຮັບການປົວແປງ ລະຫວ່າງສອງປະເທດ. ປະຈຸບັນ ສາຍພົວພັນລະຫວ່າງ New Delhi ແລະ Islamabad ບັນລຸໄດ້ຜົນງານບາງຢ່າງ. ເມື່ອຕົ້ນເດືອນ 9 ນີ້, ໃນການເຈລະຈາກັບທ່ານ Somanahali Mallaiah Krishna ລັດຖະມົນຕີການຕ່າງປະເທດ ອິນເດຍ ເມື່ອໄປຢ້ຽມຢາມ Islamabad, ທ່ານນາຍົກລັດຖະມົນຕີ ປາກິດສະຖານ Pervez Ashraf ສະແດງຄວາມເຊື່ອໝັ້ນວ່າ ການພົວພັນລະຫວ່າງ ອິນເດຍ ແລະ ປາກິດສະຖານ ຈະໄດ້ຮັບການປັບປຸງ ແລະ ຕາມເສັ້ນທາງຊ່ືງສອງຝ່າຍໄດ້ເລືອກເຟັ້ນ. ສອງປະເທດໄດ້ກຳນົດ 8 ຂົງເຂດຮ່ວມມືສອງຝ່າຍ, ໃນນັ້ນມີຂົງເຂດກະສິກຳ, ການທ່ອງທ່ຽວ, ການສຶກສາ, ວິທະຍາສາດ ເຕັກໂນໂລຊີ, ເຕັກໂນໂລຊີຂໍ້ມູນຂ່າວສານ ແລະ ຕິດຕໍ່ສື່ສານ. ອິນເດຍ ແລະ ປາກິດສະຖານ ກໍເຫັນດີ ພິຈາລະນາບັນດາມາດຕະການສ້າງຄວາມໄວ້ເນື້ອເຊ່ືອໃຈຜ່ານເສັ້ນທາງກວດກາຢູ່ເຂດຊາຍແດນ ແລະ ຮັບຮູ້ຂໍ້ຕົກລົງຢຸດຍິງລຽບຕາມເສັ້ນຊາຍແດນນີ້ ຊື່ງໄດ້ຮັບການລົງນາມເມື່ອປີ 2003 ຍັງຄົງໄດ້ຮັບຄວາມເຄົາລົບ ແລະ ເຫັນດີຈະເພີ່ມທະວີການ ຄ້າຂາຍໄປມາ ຜ່ານເສັ້ນຊາຍແດນກວດການີ້, ຖືວ່າ ນັ້ນແມ່ນສ່ວນຫນຶ່ງໃນຄວາມມານະພະຍາຍາມເພີ່ມທະວີການສ້າງຄວາມໄວ້ເນື້ອເຊື່ອໃຈລະຫວ່າງສອງປະເທດ. ຫາງສຽງປາດຖະຫນາວ່າ, ບັນດາຄວາມຄືບຫນ້າດັ່ງກ່າວຈະຊ່ວຍຫລຸດຜ່ອນໄພອັນຕະລາຍທີ່ພວມຊ້ອນແຝງຢູ່ພາກພື້ນນີ້.