(vovworld)- ປະຊາຄົມໂລກໄດ້ຮັບຮູ້ກ່ຽວກັບບາດກ້າວພັດທະນາຂອງຫວຽດນາມ ໃນຕະຫລອດ 30 ປີຜ່ານມາ. ຜົນສຳເລັດຂອງພາລະກິດທີ່ມີລັກສະນະປະຕິວັດນັ້ນແມ່ນເລີ່ມຕົ້ນນັບແຕ່ ກອງປະຊຸມໃຫຍ່ຄັ້ງທີ 6 ຂອງພັກກອມມູນິດຫວຽດນາມ ເມື່ອປີ 1986 ສົ່ງສານຢ່າງແຮງກ່ຽວກັບການປະຕິບັດແນວທາງການປ່ຽນແປງໃຫມ່. ພ້ອມກັບການຢັ້ງຢືນຜົນສຳເລັດຂອງໄລຍະນີ້, ພັກກອມມູນິດຫວຽດນາມ ໄດ້ກຳນົດສືບຕໍ່ປະຕິບັດກິດຈະການປ່ຽນແປງໃຫມ່ຢ່າງຮອບດ້ານ ແລະ ຄົບຊຸດໃນຊຸມປີຈະມາເຖິງ.
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູຈ້ອງ
ແລະ ອະດີດການນຳພັກ, ລັດລຸ້ນຕ່າງໆ
ພາບ:TTXVN
|
ເບິ່ງລວມແລ້ວ, ພາລະກິດປ່ຽນໃຫມ່ບັນລຸໄດ້ບັນດາຜົນງານອັນໃຫຍ່ຫລວງ ແລະ ມີຄວາມໝາຍປະຫວັດສາດ, ແມ່ນປະຖົມປັດໄຈສຳຄັນເພື່ອໃຫ້ປະເທດຊາດສືບຕໍ່ພັດທະນາຢ່າງແຮງໃນຊຸມປີຈະມາເຖິງ. ພຶດຕິກຳຕົວຈິງໄດ້ຢັ້ງຢືນແນວທາງການປ່ຽນໃຫມ່ຂອງພັກກອມມູນິດຫວຽດນາມ ແມ່ນຖືກຕ້ອງ, ມີຫົວຄິດປະດິດສ້າງ, ສອດຄອ່ງກັບພຶດຕິກຳຕົວຈິງຂອງຫວຽດນາມ ແລະ ທ່າອ່ຽງພັດທະນາຂອງປະຫວັດສາດ.
ການຕັດສິນທີ່ມີລັກສະນະປະຕິວັດ
ທ່ານນາງ ຟ້າມທິຍືຖູຍ ຢູ່ ບ້ານ ຢຽນແຄງ ຕາແສງ ຫາຍທາຍ ເມືອງ ຫາຍລັງ ແຂວງ ກວ໋າງຈີ້ ຍັງຄົງຮັກສາບັນດາສະແຕມຊື້ອາຫານ, ປື້ມຊື້ທັນຍາຫານທີ່ເກົ່າແກ່ ເຊິ່ງໄດ້ນຳໃຊ້ກ່ອນນີ້ 30 ປີ ເພື່ອຕັກເຕືອນໃຫ້ລູກຫລານຂອງຕົນໄດ້ຮັບຮູ້ກ່ຽວກັບໄລຍະເກື້ອກູນ. ຕາມທ່ານນາງແລ້ວ, ໃນໄລຍະນັ້ນ ປະຊາຊົນຂາດແຄນເຂົ້າກິນ, ເຄື່ອງນຸ່ງຫົ່ມ ແລະ ນັບທັງເຄື່ອງຂອງທີ່ຈຳເປັນຮັບໃຊ້ຊີວິດປະຈຳວັນ. ດ້ວຍທັດສະນະຢ່າງກົງໄປກົງມາຕໍ່ສະພາບຕົວຈິງນັ້ນ, ພັກກອມມູນິດ ຫວຽດນາມ ໄດ້ມີຄຳຕັດສິນທີ່ມີລັກສະນະປະຕິວັດ, ບຸກທະລຸກ່ຽວກັບການປະຕິບັດແນວທາງປ່ຽນແປງໃຫມ່ຮອບດ້ານ, ເລິກເຊິ່ງ ແລະ ຖືວ່ານັ້ນແມ່ນຄຳສັ່ງຂອງຊີວິດ. ທ່ານນາງ ຟ້າມທິຍືຖູຍ ໃຫ້ຮູ້ວ່າ:
“ ໄລຍະກ່ອນນີ້ ເຄື່ອງຂອງທຸກສິ່ງທຸກຢ່າງ ຈາກແຜ່ນແພຕະຫລອດຮອດຢາງລົດລ້ວນແຕ່ໄດ້ຮັບການແຈກຢາຍ. ແຕ່ເມື່ອດຳເນີນກອງປະຊຸມໃຫຍ່ຄັ້ງທີ 6 ຊື່ງແມ່ນກອງປະຊຸມໃຫຍ່ແຫ່ງການປ່ຽນແປງໃຫມ່, ທ່ານເລຂາທິການໃຫຍ່ ຫງວຽນວັນລີງ ໄດ້ເຮັດໃຫ້ຊີວິດການເປັນຢູ່ຂອງປະຊາຊົນປ່ຽນແປງຢ່າງສິ້ນເຊິງ.”
ບັນດາບາດກ້າວອັນຖືກຕ້ອງ
ທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 6 ຂອງພັກ (ປີ 1986), ເມື່ອວາງອອກແນວທາງການປ່ຽນແປງໃຫມ່, ພັກໄດ້ເລີ່ມຕົ້ນຈາກການປ່ຽນໃຫມ່ຈີນຕະນາການ, ຊື່ງກ່ອນອື່ນໝົດແມ່ນຈີນຕະນາດ້ານເສດຖະກິດ. ທ່ານ ຫວໍດ້າຍເລືອກ, ຜູ້ຊ່ຽວຊານດ້ານເສດຖະກິດຖືວ່າ: ດ້ານເສດຖະກິດໄດ້ຮັບການດັດສົມຕາມກົນໄກຕະຫລາດ ແມ່ນແຜນນະໂຍບາຍທີ່ມີຄຸນຄ່າເປີດຊ່ອງທາງຂອງກິດຈະກຳປ່ຽນແປງໃຫມ່:
“ສິ່ງສຳຄັນ ນັ້ນແມ່ນ ພວກເຮົາປະຕິບັດວິວັດການຫັນເສດຖະກິດເປັນເສລີ, ໝາຍຄວາມວ່າ ແມ່ນລົບລ້າງຄຳສັ່ງເກື້ອກູນ ແລະ ປະຕິບັດການພົວພັນການຕະຫລາດ, ບໍ່ເກັບຊື້ເຂົ້າສານຂອງຊາວກະສິກອນຄືກ່ອນນີ້ ບໍ່ເກື້ອກູນທັນຍາຫານໃຫ້ເຂດຕົວເມືອງອີກ ຫາກປະໃຫ້ຕະຫລາດຕັດສິນການພົວພັນຈໍລະຈອນສິນຄ້າ, ຈໍລະຈອນລະຫວ່າງເຂດຊົນນະບົດ ແລະ ເຂດຕົວເມືອງເອງ. ບັນດາໂຮງຈັກໂຮງງານໄດ້ລົບລ້າງລະບອບເກື້ອກູນອີກ ຫາກຕ້ອງປະເຊີນຫນ້າກັບຕະຫລາດ ແລະ ພົວພັນກັບຕ່າງປະເທດ. ເມື່ອຮອດປີ 1989, ກິດຈະການປ່ຽນແປງໃຫມ່ ໄດ້ຮັບການປະຕິບັດໃນສະພາບຕົວຈິງຢ່າງແທ້ຈິງ ແລະ ກົນໄກອາດຍາສິດ, ເກື້ອກູນຖືກລົບລ້າງ, ຈາກນັ້ນ ເສດຖະກິດການຕະຫລາດຈຶ່ງໄດ້ຮັບການໝູນໃຊ້ຢູ່ຫວຽດນາມ ຢ່າງແທດຈິງ.”
30 ປີຜ່ານມາ, ປະຊາຊົນທຸກຄົນລ້ວນແຕ່ເຫັນໄດ້ບົດບາດອັນໃຫຍ່ຫລວງຂອງພັກແມ່ນຜູ້ລິເລີ່ມ ແລະ ຊີ້ນຳນຳພາການປ່ຽນແປງໃຫມ່. ແຕ່ການປ່ຽນແປງໃຫມ່ນັ້ນ ບໍ່ພຽງແຕ່ແມ່ນວຽກງານສະເພາະຂອງພະນັກງານ, ສະມາຊິກພັກ ເທົ່ານັ້ນ ຫາກຍັງແມ່ນຂອງທົ່ວປວງຊົນຫວຽດນາມ ອີກດ້ວຍ. ຍ້ອນບັນດາຄຳເຫັນ, ຄວາມມຸ້ງມາດປາດຖະຫນາ ແລະ ຂໍ້ລິເລີ່ມຂອງປະຊາຊົນທີ່ມີຂຶ້ນຈາກພຶດຕິກຳນັ້ນໄດ້ເປັນ ພື້ນຖານໃຫ້ແກ່ການສ້າງແນວທາງປ່ຽນແປງໃຫມ່ຂອງພັກ. ຮອງສາດສະດາຈານ, ດຣ ບູ່ຍດີງຟອງ, ສະຖາບັນການເມືອງແຫ່ງຊາດ ໂຮ່ຈິມີນ ຖືວ່າ: ຜົນສຳເລັດຂອງແນວທາງປ່ຽນແປງໃຫມ່ຂອງ ພັກກອມມູນິດ ຫວຽດນາມ ແມ່ນຍ້ອນຍາມໃດກໍຊາບຊືມທັດສະນະທີ່ວ່າ: “ປະຊາຊົນເປັນກົກເຄົ້າ”
“ພັກ ຕ້ອງແກ້ໄຂຄວາມຮຽກຮ້ອງຕ້ອງການ, ຄວາມມຸ້ງມາດປາດຖະຫນາອັນຊອບທຳຂອງປະຊາຊົນ. ພວກເຮົາ ຕ້ອງມີທັດສະນະຢ່າງກົງໄປກົງມາຕໍ່ຄວາມຈິງ, ຕີລາຄາຖືກກັບຄວາມຈິງ. ເມື່ອມີກຳລັງແຮງສັງລວມ ເຖິງວ່າຈະຫຍຸ້ງຍາກແນວໃດ ກໍນຳປະເທດຊາດຜ່ານຜ່າໄດ້. ເມື່ອບໍ່ມີຄວາມເຫັນດີເຫັນພ້ອມຈາກປະຊາຊົນ, ບໍ່ໄດ້ຮັບການສະຫນັບສະຫນູນຂອງປະຊາຊົນ ເຖິງວ່າມີຄວາມສະດວກກໍ່ບໍ່ສາມາດສຳເລັດໄດ້”
ສືບຕໍ່ປ່ຽນໃຫມ່ເພື່ອເຊື່ອມໂຍງ
ຮ່າງບົດລາຍງານການເມືອງຂອງກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຫວຽດນາມ ຄັ້ງທີ 12 ໄດ້ຊີ້ແຈ້ງ: ການຍູ້ແຮງ ກິດຈະການປ່ຽນແປງໃຫມ່ ຮອບດ້ານ ແລະ ຄົບຊຸດ”. ໄລຍະນີ້ກໍແມ່ນຈຸດເວລາ ພັກກອມມູນິດຫວຽດນາມ ຊີ້ນຳນຳພາປະເທດຊາດປ່ຽນແປງໃຫມ່ຢ່າງແຮງກວ່າດ້ານຈີນຕະນາການ, ການປັບປຸງລະບອບນະໂຍບາຍ, ພັດທະນາເສດຖະກິດການຕະຫລາດຕາມການກຳນົດທິດສັງຄົມນິຍົມ, ມານະພະຍາຍາມປະຕິຮູບລະບົບບໍລິຫານແຫ່ງຊາດຢ່າງຮອບດ້ານ ແລະ ເລິກເຊິ່ງ, ເປັນເຈົ້າການໃນການເຊື່ອມໂຍງເຂົ້າກັບສາກົນເພື່ອຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ. ຮອງສາດສະດາຈານ, ດຣ ຫງວຽນຈ້ອງຟຸກ, ອະດີດຫົວຫນ້າສະຖາບັນປະຫວັດສາດພັກ, ສະຖາບັນການເມືອງແຫ່ງຊາດ ໂຮ່ຈິມີນ ຖືວ່າ:
“ການປ່ຽນແປງໃຫມ່ຢ່າງຮອບດ້ານນັ້ນ ແມ່ນສ້າງການພົວພັນເຊິ່ງກັນ ແລະ ກັນ ພ້ອມກັບການພັດທະນາລະຫວ່າງບັນດາຂົງເຂດ. ຮ່າງເອກະສານກອງປະຊຸມຄັ້ງນີ້ ກໍເນັ້ນຫນັກຕື່ມອີກ “ການຄົບຊຸດ”. ນັ້ນແມ່ນຄົບຊຸດລະຫວ່າງແນວທາງ, ລະຫວ່າງແຜນນະໂຍບາຍຂອງພັກ ກັບລະບົບນະໂຍບາຍກົດໝາຍຂອງລັດກັບບັນດາມາດຕະການປະຕິບັດ. ທີສອງ ຄົບຊຸດ ລະຫວ່າງຂະແຫນງເສດຖະກິດ ການເມືອງ ວັດທະນະທຳ ສັງຄົມ ຢູ່ ສູນກາງ ຕ້ອງສົມທົບນຳກັນ ດຳເນີນຢ່າງຄົບຊຸດ. ການເຄື່ອນໄຫວເປັນຈຸດສຸມ, ເອກະພາບ ແລະ ມີປະສິດທິຜົນ.”
ກ່ອນດຳເນີນກອງປະຊຸມໃຫຍ່ຄັ້ງທີ 12 ຂອງພັກ, ເມື່ອຫວນຄືນຜົນສຳເລັດອັນສະຫງ່າລາສີຂອງກອງປະຊຸມໃຫຍ່ຄັ້ງທີ 6 ຂອງພັກ ແລະ ບັນດາຜົນງານອັນໃຫຍ່ຫລວງ ແລະ ມີຄວາມໝາຍປະຫວັດສາດ ໃນ 30 ປີແຫ່ງການປ່ຽນແປງໃຫມ່ ເພື່ອໃຫ້ນັບມື້ນັບຍິ່ງມີຄວາມເຊື່ອໝັ້ນຕໍ່ເສັ້ນທາງປ່ຽນແປງໃຫມ່ ຊື່ງພັກ ແລະ ປະຊາຊົນຫວຽດນາມ ໄດ້ເລືອກເຟັ້ນ. ໂດຍປະຕິບັດກິດຈະການປ່ຽນແປງໃຫມ່ ຢ່າງຮອບດ້ານ ແລະຄົບຊຸດ ໃນໄລຍະຈະມາເຖິງ, ແນ່ນອນວ່າ ຈະສ້າງບາດກ້າວຫັນປ່ຽນໂດຍພື້ນຖານ, ສ້າງກຳລັງຫນູນໃຫ້ແກ່ການພັດທະນາຂອງປະເທດຊາດ.