ທີ່ການເຈລະຈາ, ການນຳ 2 ທ່ານໄດ້ເຫັນດີກ່ຽວກັບຄວາມຈຳເປັນຕ້ອງສ້າງການພົວພັນໃຫ້ເປັນປົກກະຕິ. 2 ຝ່າຍໄດ້ປຶກສາຫາລືບັນຫາຍົກເລີກຄຳສັ່ງຫ້າມນຳເຂົ້າທັນຍາຫານຂອງຕວກກີ ເຂົ້າລັດເຊຍ; ເຊື່ອມຕໍ່ການຄົມມະນາຄົມທາງການບິນ, ໂຄງການທໍ່ສົ່ງອາຍແກັດຄືນໃໝ່; ກ່ຽວກັບການປະທະກັນຊີຣີ, ບັ້ນຮົບຕ້ານກໍ່ການຮ້າຍ ແລະ ບັນດາບັນຫາອື່ນ. ຝ່າຍລັດເຊຍ ຢືນຢັນວ່າ, ຈະຍົກເລີກບັນດາຄຳສັ່ງລົງໂທດສຳລັບຕວກກີ ເທື່ອລະກ້າວ, ແຕ່ບຸລິມະສິດຂອງລັດເຊຍ ແມ່ນຟຶ້ນຟູການພົວພັນລະຫວ່າງ 2 ປະເທດຄືນໃໝ່ໃນລະດັບຄືກ່ອນໄລຍະວິກິດການ. ໃນຂະນະນັ້ນ, ທ່ານປະທານາທິບໍດີຕວກກີ ສະແດງຄວາມຫວັງວ່າ, ການພົບປະຈະສ້າງໄລຍະໃໝ່ໃນການພົວພັນ 2 ຝ່າຍ.
ການຢ້ຽມຢາມຜ່ານຜ່າວິກິດການ
ການຢ້ຽມຢາມຂອງທ່ານ Erdogan ເຖິງລັດເຊຍ ກໍແມ່ນການຢ້ຽມຢາມຕ່າງປະເທດເປັນຄັ້ງທຳອິດ ພາຍຫຼັງການກໍ່ລັດຖະປະຫານຖືກປະລາໄຊຢູ່ຕວກກີ. ບັ້ນຮົບປາບປາມທະຫານກໍ່ລັດຖະປະຫານຂອງທ່ານປະທານາທິບໍດີ Erdogan ໄດ້ເຮັດໃຫ້ການພົວພັນລະຫວ່າງຕວກກີ ແລະ ບັນດາພັນທະມິດຝ່າຍຕາເວັນຕົກ ເຄັ່ງຕຶງຂຶ້ນຕື່ມ. ພາຍຫຼັງການລັດຖະປະຫານ, ຕວກກີ ຖືວ່າ, ບັນດາພັນທະມິດຝ່າຍຕາເວັນຕົກ ບໍ່ສະໜັບສະໜູນຕວກກິ, ຊຳ້ບໍ່ໜ້ຳຍັງກ່າວຫາບາງປະເທດຝ່າຍຕາເວັນຕົກ “ໜູນຫຼັງ” ບັນດາພາກສ່ວນກໍ່ລັດຖະປະຫານ. ແຕ່ວ່າ, ປະຕິກິລິຍາຂອງລັດເຊຍ ພັດກົງກັນຂ້າມກັບປະຕິກິລິຍາຈາກບັນດາພັນທະມິດຝ່າຍຕາເວັນຕົກຂອງຕວກກີ ເມື່ອບໍ່ມີຄຳຕຳໜີຕິຕຽນໃດໆສຳລັບບັ້ນຮົບລົງໂທດພາຍຫຼັງການລັດຖະປະຫານ ຂອງທ່ານປະທານາທິບໍດີ Erdogan. ລັດເຊຍ ແມ່ນໜຶ່ງໃນບັນດາປະເທດທຳອິດປະກາດຢ່າງເປັນທາງການ ການສະໜັບສະໜູນລັດຖະບານຕວກກີ ພາຍຫຼັງການກໍ່ລັດຖະປະຫານຖືກປະລາໄຊຢູ່ປະເທດນີ້ ໃນວັນທີ 15/07 ຜ່ານມາ. ເພາະສະນັ້ນ, ເລື່ອງຕວກກີ ຊອກຫາລັດເຊຍ ເພື່ອປັບປຸງການພົວພັນ 2 ຝ່າຍ ໃນສະພາບການຄືປະຈຸບັນແມ່ນສາມາດເຂົ້າໃຈໄດ້.
ເດືອນ 11/2015, ເລື່ອງນັກບິນຕວກກີ ຍິງເຮືອບິນສູ້ຮົບຂອງລັດເຊຍ ຕົກຢູ່ເຂດຊາຍແດນຊີຣີ ໄດ້ເຮັດໃຫ້ການພົວພັນລະຫວ່າງ 2 ປະເທດຕົກເຂົ້າສູ່ສະພາບເຄັ່ງຕຶງທີ່ສຸດ, ພາໄປເຖິງບັນດາການກະທຳໂຕ້ຕອບຂອງທັງ 2 ຝ່າຍ. ໃນຂະນະທີ່ ມົດສະກູ ຈັດວາງບັນດາຄຳສັ່ງລົງໂທດຕໍ່ຕວກກີ ນັ້ນ, ອາກາຣາ ກໍ່ອອກຄຳສັ່ງຫ້າມນັກທ່ອງທ່ຽວລັດເຊຍ ໄປເຖິງປະເທດນີ້. ແຕ່ວ່າ, ຄວາມເຄັ່ງຕຶງຖືກຫຼຸດລົງພາຍຫຼັງທີ່ທ່ານປະທານາທິບໍດີ Erdogan ຂໍໂທດກ່ຽວກັບເຫດການນີ້ຢ່າງເປີດເຜີຍ. ກ່ອນການຢ້ຽມຢາມ, ເພື່ອສະແດງເຈດຕະນາດີ, ວົງການສືມວນຊົນຕວກກີ ໄດ້ອະນຸຍາດໃຫ້ປະຊາຊົນເຂົ້າແວັບໄຊທີ່ມີຊື່ສຽງ Sputnick ຂອງລັດເຊຍ, ເຊິ່ງເຄີຍຖືກຫ້າມເຂົ້າໃນເດືອນ 4/2016 ຄືນໃໝ່.
ຫຍັບເໝາະໃກ້ກັນກວ່າເພື່ອຜົນປະໂຫຍດລວມ
ໃນສະພາບການພົວພັນລະຫວ່າງຕວກກີ ກັບຝ່າຍຕາເວັນຕົກ ເຄັ່ງຕຶງພາຍຫຼັງການກໍ່ລັດຖະປະຫານຖືກປະລາໄຊ, ແງ່ຫວັງກ່ຽວກັບໄລຍະໃໝ່ໃນການພົວພັນລະຫວ່າງຕວກກີ ແລະ ລັດເຊຍ ນັບມື້ນັບເພີ່ມຂຶ້ນ. ເຖິງວ່າ 2 ຝ່າຍຍາມໃດກໍ່ແກ່ງແຍ້ງກັນກ່ຽວກັບຜົນສະທ້ອນຢູ່ເຂດທະເລດຳ ຍຸດທະສາດ ແລະ ເຂດຕາເວັນອອກກາງ, ແຕ່ທັງມົດສະກູ ແລະ ອານກາຣາ ລ້ວນແຕ່ມານະພະຍາຍາມສະກັດກັ້ນບັນດາການຖົກຖຽງກັນກ່ຽວກັບບັນຫາຊີຣີ ແລະ ຢູແກຼນ ທີ່ກໍ່ຄວາມເສຍຫາຍເຖິງການພົວພັນຮ່ວມມືຍຸດທະສາດໃນບັນດາບັນຫາຄືທໍ່ສົ່ງອາຍແກັດ TurkStream ແລະ ໂຮງງານໄຟຟ້ານິວເຄຼຍ ໂດຍລັດເຊຍລົງທຶນກໍ່ສ້າງຢູ່ຕວກກີ, ພິເສດແມ່ນການຮ່ວມມືດ້ານເສດຖະກິດ, ການຄ້າ. ກ່ອນຈຸດເວລາເຮືອບິນ Su – 24 ຂອງລັດເຊຍ ຖືກຍິງຕົກ, ລັດເຊຍ ແລະ ຄວກກີ ໄດ້ວາງຄາດໝາຍຍົກວົງເງິນການຄ້າ 2 ສົ້ນຂຶ້ນເຖິງ 100 ຕື້ USD. ເລື່ອງຢຸດຕິການຮ່ວມມືກັບຕວກກີ ຫຼັງຈາກນັ້ນໄດ້ເຮັດໃຫ້ລັດເຊຍ ຖືກເສຍຫາຍຫຼາຍພໍສົມຄວນ ກົງກັບໄລຍະເວລາທີ່ອຳນາດການປົກຄອງຂອງທ່ານປະທານາທິບໍດີ Vladimir Putin ພວມຖືກກົດດັ່ນດ້ານເສດຖະກິດຢ່າງໜັກໜ່ວງ ຍ້ອນນະໂຍບາຍ “ປິດລ້ອມ” ຂອງຝ່າຍຕາເວັນຕົກ ກໍຄືລາຄານຳ້ມັນຖືກຫຼຸດລົງ ໄດ້ເຮັດໃຫ້ງົບປະມານຖືກເສຍຫາຍປະມານ 150 ຕື້ USD/ປີ. ໃນຂະນະນັ້ນ, ຕວກກີ ກໍຕ້ອງປະເຊີນໜ້າກັບບັນດາໄພກ່ຽວກັບຄວາມສະຫງົບ ແລະ ຄວາມຂາດສະຖຽນລະພາບດ້ານການເມືອງ. ໄລ່ສະເພາະ 6 ເດືອນຕົ້ນປີ 2016, ເຫດວາງລະເບີດກໍ່ການຮ້າຍໃຫຍ່ 7 ຄັ້ງຢູ່ນະຄອນ ອານກາຣາ ແລະ ອິດຕານບູນ ໄດ້ເຮັດໃຫ້ 200 ກ່ວາຄົນເສຍຊີວິດ. ການປະທະກັນທີ່ແກ່ຍາວສຳລັບປະຊາຄົມຊາວ Kurd, ເຊິ່ງໄດ້ໃຫ້ເຮັດໃຫ້ 40.000 ຄົນເສຍຊີວິດ, ພວມມີສັນຍານປິນຂັ້ນໄດທີ່ຮ້າຍແຮງ. ການປະທະກັນດ້ານການເມືອງພາຍໃນປະເທດຖືກແກ່ຍາວ ພ້ອມກັບການຍາດແຍ່ງສິດອຳນາດ ໄດ້ພາໄປເຖິງການປ່ຽນແປງລັດຖະບານຢູ່ຕວກກີ ເມື່ອເດືອນ 05 ຜ່ານມາ. ສະນັ້ນ, ເລື່ອງປັບປຸງການພົວພັນກັບລັດເຊຍ ຈະຊ່ວຍໃຫ້ຕວກກີ ບໍ່ຖືກຕົກເຂົ້າສູ່ວິກິດການຢ່າງເລິກເຊິ່ງຂຶ້ນຕື່ມອີກ. ຫາກຍັງໝັ້ນໝາຍຈະນຳມາເຊິ່ງຜົນປະໂຫຍດຫຼາຍພໍສົມຄວນ, ພິເສດແມ່ນໃນຂົງເຂດເສດຖະກິດ. ຕາມຕົວເລກສະຖິຕິແລ້ວ, ໃນໄລຍະທີ່ຕວກກີ ຖືກລັດເຊຍ ລົງໂທດ, ສະເພາະຂະແໜງທ່ອງທ່ຽວ, ເຊິ່ງເຄີຍປະກອບ 4,5% GDP ຂອງຕວກກີ ຖືກເສຍຫາຍຢ່າງຮ້າຍແຮງ. ສະນັ້ນ, ທ່ານປະທານາທິບໍດີ Erdogan ຫວັງວ່າ, ການປັບປຸງສາຍພົວພັນກັບລັດເຊຍ ຄືນໃໝ່ຈະນຳມາເຊິ່ງບັນດາຜົນປະໂຫຍດດ້ານເສດຖະກິດຍາກທີ່ຈະໄດ້ຮັບຈາກບໍ່ວ່າປະເທດໃດໆ. ໃນຂະນະນັ້ນ, ລັດເຊຍ ກໍໄດ້ຮັບບັນດາຜົນປະໂຫຍດດ້ານເສດຖະກິດບໍ່ແມ່ນໜ້ອຍ ຈາກການໜູນຊ່ວຍຂອງຕວກກີ, ໂດຍສະເພາະແມ່ນການສົ່ງອອກອາຍແກັດ.
ການໄປປະຕິບັດງານເຖິງລັດເຊຍ ຂອງທ່ານປະທານາທິບໍດີ Erdogan ຄັ້ງນີ້ ໄດ້ສະແດງຢ່າງຈະແຈ້ງເຈດຕະນາດີຂອງອາກາຣາ ໃນການຟື້ນຟູການຮ່ວມມືກັບມົດສະກູ. ບັນດາການຜັນແປຜ່ານມາລະຫວ່າງ 2 ປະເທດ ເຊິ່ງເຄີຍເປັນພັນທະມິດນຳກັນໄດ້ຜ່ານຜ່າແລ້ວ, ຍ້ອນຜົນປະໂຫຍດຂອງແຕ່ລະປະເທດໃນສະພາບໂລກທີ່ພວມຂາດຄວາມມີສະຖຽນລະພາບຫຼາຍຢ່າງ.