ປະທາປະເທດ ເຈືອງເຕີນຊາງ ເຂົ້າຮ່ວມພິທີສະເຫຼີມສະຫຼອງ 35 ປີແຫ່ງວັນທີທະຫານອາສາສະໝັກຫວຽດນາມ ຊ່ວຍເຫຼືອປະຊາຊົນກຳປູເຈຍ
ຫຼຸດພົ້ນອອກຈາກລະບອບດັບສູນເຊື້ອຊາດ
(ພາບປະກອບ)
(vovworld) - ກ່ອນນີ້ 35 ປີເຕັມ (7/1/1979-7/1/2014), ກອງທັບ ແລະ ປະຊາຊົນກຳປູເຈຍ ພ້ອມກັບການຊ່ວຍເຫລືອຂອງທະຫານອາສາສະໝັກຫວຽດນາມ ໄດ້ດັບສູນລະບອບຂະແມແດງ, ປົດປ່ອຍປະເທດຊາດໃຫ້ຫລຸດພົ້ນອອກຈາກໄພດັບສູນເຊື້ອຊາດ. ໄຊຊະນະເມື່ອວັນທີ 7/1/1979 ໄດ້ເຂົ້າສູ່ຫນ້າປະຫວັດສາດເປັນຂີດໝາຍແຫ່ງຄວາມສາມັກຄີສາກົນທີ່ບໍລິສຸດຜຸດຜ່ອງຂອງນ້ຳໃຈມິດຕະພາບແບບພິເສດລະຫວ່າງສອງຊາດຫວຽດນາມ ແລະ ກຳປູເຈຍ. ໄຊຊະນະນີ້ໄດ້ນຳປະເທດກຳປູເຈຍ ຫລຸດພົ້ນອອກຈາກໄພດັບສູນເຊື້ອຊາດ, ກ້າວເຂົ້າສູ່ສັງກາດໃຫມ່ແຫ່ງເອກະລາດ, ເສລີພາບ ພ້ອມທັງເປີດຫນ້າປະຫວັດສາດໃຫມ່ໃນການພົວພັນບ້ານໃກ້ເຮືອນຄຽງລະຫວ່າງສອງປະເທດ.
35 ປີຜ່ານມາ, ປະຊາຊົນກຳປູເຈຍ ທັງໝົດ ບໍ່ອາດຫລົງລືມໄລຍະອັນມືດມົວທີ່ສຸດຂອງປະເທດຕົນ ພາຍໃຕ້ລະບອບດັບສູນເຊື້ອຊາດ, ການກະທຳທໍລະມານທີ່ບໍ່ເຄີຍມີມາກ່ອນໃນປະຫວັດສາດ ກຳປູເຈຍ ກໍຄືຂອງມວນມະນຸດ. ໃນໄລຍະປະມານ 4 ປີກຳອຳນາດຢູ່ ກຳປູເຈຍ, ກຸ່ມ Pol Pot ໄດ້ເຂັ່ນຂ້າຊາວກຳປູເຈຍ ປະມານ 2 ລ້ານຄົນໃນຈຳນວນພົນລະເມືອງ 8 ລ້ານຄົນ. ບໍ່ພຽງແຕ່ດຳເນີນນະໂຍບາຍດັບສູນເຊື້ອຊາດຢ່າງໂຮດຮ້າຍສາມານ, ລົບລ້າງທຸກຮາກຖານສັງຄົມຢູ່ ກຳປູເຈຍ ເທົ່ານັ້ນ, ກຸ່ມ Pol Pot ຍັງລະເມີດອະທິປະໄຕຜືນແຜນດິນຂອງຫວຽດນາມ, ກໍ່ໃຫ້ເກີດບັນດາການກະທຳທໍລະມານທີ່ໂຫດຮ້າຍສຳລັບປະຊາຊົນ ຫວຽດນາມອີກດ້ວຍ.
ໄຊຊະນະຂອງພາລະກິດເປັນທຳ
ຕໍ່ຫນ້າການກະທຳວິນາດນັບມື້ນັບເປີດແປນຂອງອຳນາດການປົກຄອງ ຂະແມແດງ, ໂດຍ Pol Pot ນຳພາຢູ່ທົ່ວເສັ້ນຊາຍແດນລະຫວ່າງຫວຽດນາມ ແລະ ກຳປູເຈຍ, ຕໍ່ຫນ້າໄພດັບສູນເຊື້ອຊາດຢູ່ປະເທດບ້ານໃກ້ເຮືອນຄຽງ, ໂດຍຕອບສະຫນອງຄຳຮຽກຮ້ອງຂອງແນວໂຮມສາມັກຄີກູ້ຊາດກຳປູເຈຍທີ່ວ່າ” ຈົ່ງກູ້ຊ່ວຍພວກຂ້າພະເຈົ້າ, ບໍ່ແມ່ນພຽງກູ້ຊ່ວຍຊາວລີ້ໄພນັບໝື່ນຄົນເທົ່ານັ້ນ ຫາກກູ້ຊ່ວຍທັງປະເທດຫນຶ່ງອີກດ້ວຍ”, ຫວຽດນາມ ໄດ້ຕົກລົງສົ່ງກຳລັງທະຫານໄປຊ່ວຍເຫລືອກຳປູເຈຍ, ທັງສະກັດກັ້ນການກະທຳຮຸກຮານຫວຽດນາມຂອງ ກຳລັງ Pol Pot ຢູ່ເຂດຊາຍແດນທາງທິດຕາເວັນຕົກພາກໃຕ້. ຂໍ້ຕົກລົງດັ່ງກ່າວຂອງຫວຽດນາມ ບໍ່ພຽງແຕ່ປະຕິບັດສິດປ້ອງກັນຕົນເອງອັນຊອບທຳ, ປົກປັກຮັກສາປະເທດຊາດຂອງຕົນເທົ່ານັ້ນ ຫາກຍັງຊ່ວຍປະຊາຊົນກຳປູເຈຍ ຕີເອົາຊະນະລະບອບດັບສູນເຊື້ອຊາດ Pol Pot, ຫລຸດພົ້ນອອກຈາກໄພດັບສູນເຊື້ອຊາດ, ຍາດເອົາໄຊຊະນະເມື່ອວັນທີ 7/1/1979. ໄຊຊະນະນີ້ກໍແມ່ນໄຊຊະນະຂອງພາລະກິດເປັນທຳ, ຂອງນ້ຳໃຈສາມັກຄີສູ້ຮົບລະຫວ່າງສອງຊາດ.
ຊ່ວຍກຳປູເຈຍຟື້ນຕົວປະເທດຊາດ
ພາຍຫລັງຊ່ວຍປະຊາຊົນກຳປູເຈຍ ຕີເອົາຊະນະລະບອບດັບສູນເຊື້ອຊາດ Pol Pot, ຕາມການສະເຫນີຂອງແນວໂຮມສາມັກຄີກູ້ຊາດ ແລະ ລັດຖະບານຊົ່ວຄາວກຳປູເຈຍ, ໃນໄລຍະ 10 ປີ, ແຕ່ປີ 1979 ຮອດປີ 1989, ພັກ ແລະ ລັດຖະບານ ຫວຽດນາມ ໄດ້ສົ່ງພະນັກງານໄປຍັງກຳປູເຈຍ ນັບໝື່ນຄົນເພື່ອເປັນຊ່ຽວຊານຊ່ວຍ ກຳປູເຈຍ ປະຕິບັດພາລະກິດຟື້ນຕົວປະເທດຊາດ. ທັງຊ່ວຍປະເທດເພື່ອນບ້ານຕ້ານຄວາມອຶດຫິວ, ພະຍາດໂລກລະບາດ, ສ້າງກົງຈັກອຳນາດການປົກຄອງ, ອົງການຈັດຕັ້ງມະຫາຊົນຄືນໃຫມ່. ທ່ານຮອງສາດສະດາຈານ, ດຣ ຫງວຽນແມ້ງຫ່າ, ຫົວຫນ້າສະຖາບັນປະຫວັດສາດພັກ, ສະຖາບັນການເມືອງການປົກຄອງແຫ່ງຊາດໂຮ່ຈິມີນ ຖືວ່າ:
“ພາຍຫຼັງ 4 ປີແຫ່ງການກຳອຳນາດຂອງກຳລັງກຳປູເຈຍປະຊາທິປະໄຕ, ປະເທດກຳປູເຈຍເກືອບຄືວ່າບໍ່ມີຫຍັງໃນທຸກຂົງເຂດ. ສັງຄົມໜຶ່ງຖືກທຳລາຍຢ່າງໜັກໜ່ວງ, ປະຊາຊົນຖືກເຂັ່ນຂ້າ, ເສດຖະກິດຊຸດໂຊມ. ໃນ 10 ປີແຫ່ງການຊ່ວຍເຫຼືອປະຊາຊົນກຳປູເຈຍ, ທະຫານອາສາສະໝັກຫວຽດນາມ ໄດ້ຊ່ວຍເຫຼືອອຳນາດການປົກຄອງ ແລະ ທະຫານກຳປູເຈຍສ້າງຊີວິດເປັນປົກກະຕິ, ຕ້ານການເຄື່ອນໄຫວທຳລາຍຂອງກຳລັງ Pol Pot“
35 ປີຜ່ານມາ, ປະເທດກຳປູເຈຍ ໄດ້ຟື້ນຕົວຈາກດິນແດນແຫ່ງຄວາມລົ້ມຕາຍ, ສົງຄາມ, ການແບ່ງແຍກ ແລະ ການໃຊ້ຄວາມຮຸນແຮງ ກາຍເປັນປະເທດສັນຕິພາບ, ສະຖຽນລະພາບ, ສາມັກຄີ, ປະຊາທິປະໄຕ ແລະ ພັດທະນາ.
ການພົວພັນຮ່ວມມືແບບພິເສດ
ການພົວພັນມິດຕະພາບທີ່ເປັນມູນເຊື້ອອັນດີງາມ ແລະ ການຮ່ວມມືຮອບດ້ານລະຫວ່າງສອງປະເທດໄດ້ຮັບການພັດທະນາຢ່າງບໍ່ຢຸດຢັ້ງໃນຕະຫຼອດ 35 ປີ ຜ່ານມາ. ຫວຽດນາມ ຍາມໃດກໍ່ຊ່ວຍເຫຼືອກຳປູເຈຍ ຢ່າງສຸດຈິດສຸດໃຈ ນັບແຕ່ຊຸ່ມວັນທຳອິດແຫ່ງການປົດປ່ອຍປະເທດ ຈົນຮອດໄລຍະພັດທະນາໃນປະຈຸບັນ. ທ່ານ Khun Chhy, ອະດີດລັດຖະມົນຕີກະຊວງຄົມມະນາຄົມຂົນສົ່ງລັດຖະບານກຳປູເຈຍ, ທີ່ປຶກສາຂອງທ່ານຮອງນາຍົກລັດຖະມົນຕີລາຊະອານາຈັກກຳປູເຈຍ, ຢືນຢັນວ່າ:
“ພວກຂ້າພະເຈົ້າບໍ່ມີວັນລືມບັນດາບຸນຄູນອັນໃຫຍ່ຫຼວງ, ການຊ່ວຍເຫຼືອຢ່າງສຸດຈິດສຸດໃຈຂອງຫວຽດນາມ ໄດ້. ຊາວກຳປູເຈຍ ພວກຂ້າພະເຈົ້າເອີ້ນວ່າ ນັ້ນແມ່ນນຳ້ໃຈອຳມະຕະ ແລະ ຕ້ອງໄດ້ຮັບການສືບທອດຈາກລຸ່ນນີ້ສູ່ລຸ່ນຕໍ່ໆໄປ. ເຖິງວ່າປະເທດພວກຂ້າພະເຈົ້າໄດ້ຮັບການປົດປ່ອຍມາເປັນເວລາ 35 ປີແລ້ວກໍ່ຕາມ. ແຕ່ລັດຖະບານຫວຽດນາມ ຍັງຄົງເອົາໃຈໃສ່ທີ່ສຸດ ແລະ ຊ່ວຍເຫຼືອພວກຂ້າພະເຈົ້າຈົນຮອດປະຈຸບັນ. ການຮ່ວມມື ຢ່າງຮອບດ້ານລະຫວ່າງສອງປະເທດ ກໍ່ໄດ້ຮັບການພັດທະນາຢ່າງບໍ່ ຢຸດຢັ້ງ ແລະ ນັບມື້ນນັບເປີດກວ້າງ. ຂ້າພະເຈົ້າເຊື້ອໝັ້ນວ່າ, ການຮ່ວມມືນີ້ນັບມື້ນັບໄດ້ ຮັບການ ປັບປຸງ ແລະ ພັດທະນາໃນທຸກດ້ານ“.
ຫວຽດນາມ ໄດ້ຊ່ວຍເຫຼືອກຳປູເຈຍໃນສະພາບຫຍຸ້ງຍາກທີ່ສຸດ ເຊິ່ງບໍ່ແມ່ນ ປະເທດ ໃດກໍ່ສາມາດເຮັດໄດ້. ນັ້ນແມ່ນຄຳເວົ້າຈາກນຳ້ໃຈຂອງທ່ານນາຍົກລັດຖະ ມົນຕີກຳປູເຈຍ Samdech Hun Sen ເນື່ອງໃນໂອກາດທີ່ທ່ານມາຢ້ຽມຢາມຫວຽດນາມ ແລະ ທ່ານເອງກໍ່ໄດ້ເນັ້ນໜັກວ່າ: “ປະເທດຊາດ ແລະ ປະຊາຊົນກຳປູເຈຍ ໄດ້ຝັງເລິກໃນຫົວໃຈຂອງຕົນ, ປະຫວັດສາດກຳປູເຈຍຈະຈົດຈຳບຸນຄຸນອັນໃຫຍ່ຫຼວງຂອງບັນດາຜູ້ຊ່ຽວຊານ, ພະນັກງານ, ນັກຮົບອາສາສະໝັກຫວຽດນາມ ທີ່ໄດ້ປະຕິບັດສຳເລັດພັນທະສາກົນອັນສູງສົ່ງຂອງຕົນໃນປະເທດກຳປູເຈຍ. ຍາກທີ່ຈະມີປະເທດໃດ ພັດມີການຊ່ວຍເຫຼືອຢ່າງສຸດຈິດສຸດໃຈຄືຫວຽດນາມ“. ສິ່ງດັ່ງກ່າວເປັນການຢັ້ງຢືນສັດຈະທຳທີ່ວ່າ: ເຖິງວ່າໂລກມີການຜັນແປຫຼາຍຢ່າງກໍ່ຕາມ, ແຕ່ຄວາມສາມັກຄີລະຫວ່າງສອງປະເທດຫວຽດນາມ - ກຳປູເຈຍ ແມ່ນບໍ່ອາດຕັດແຍກອອກໄດ້.