ວັນທີ 5/9, ສອງຊາດຫວຽດນາມ-ລາວ ໄດ້ພ້ອມກັນສະເຫຼີມສະຫຼອງ 50 ປີເຕັມແຫ່ງວັນສ້າງຕັ້ງສາຍພົວພັນທາງການທູດຫວຽດນາມ-ລາວ (5/9/1962-5/9/2012). ຜ່ານໄລຍະເວລາ 50 ປີ, ສາຍພົວພັນອັນສັດຊື່, ບໍລິສຸດຜຸດຜ່ອງນັ້ນ ໄດ້ຮັບການເພີ່ມພູນຄູນສ້າງຢ່າງບໍ່ຢຸດຢັ້ງ ແລະ ພັດທະນາຢ່າງໝັ້ນຄົງ. ເນື່ອງໃນໂອກາດນີ້, ວິທະຍຸກະຈາຍສຽງຫວຽດນາມ ຂໍຄັດສະເໜີບາງເນື້ອໃນຕົ້ນຕໍໃນບົດຕອບສຳພາດຕໍ່ວົງການສື່ມວນຊົນຂອງປະທານປະເທດຫວຽດນາມ Truong Tan Sang ຊື່ງໄດ້ຕີລາຄາວິວັດທະນາການ ແລະ ແງ່ຫວັງອັນດີງາມຂອງສາຍພົວພັນແບບພິເສດຫວຽດນາມ-ລາວ.
(ພາບ:cantho.gov.vn)
ເມື່ອໄດ້ເນັ້ນໜັກເຖິງຄວາມໝາຍຂອງສາຍພົວພັນຫວຽດນາມ-ລາວ, ທ່ານປະທານປະເທດຫວຽດນາມ Truong Tan Sang ໄດ້ຢືນຢັນວ່າ: ສາຍພົວພັນດັ່ງກ່າວໄດ້ກາຍເປັນແບບຢ່າງ, ສັດຊື່, ບໍລິສຸດຜຸດຜ່ອງ, ໝັ້ນຄົງ, ຫາຍາກໃນສາຍພົວພັນກັບສາກົນ. ການພົວພັນແບບພິເສດຫວຽດນາມ-ລາວ ຖືກຖືວ່າແມ່ນການສາຍໃນເລືອດເນື້ອ, ສະໜິດສະໜົມ, ສະເໝີຕົ້ນສະເໝີປາຍ, ໄດ້ຮັບການທົດສອບຜ່ານຄວາມຫຍຸ້ງຍາກ, ລຳບາກອັນຕະລາຍ ແລະ ໄດ້ຮັບການປັບປຸງຢ່າງບໍ່ຢຸດຢັ້ງແລະ ພັດທະນາຢ່າງໝັ້ນຄົງ. ກາຍເປັນຊັບສົມບັດອັນລ້ຳຄ່າຂອງທັງສອງຊາດ ແລະ ແມ່ນກົດເກນແຫ່ງການພັດທະນາຂອງການປະຕິວັດແຕ່ລະປະເທດ.
ເມື່ອຕີລາຄາການພັດທະນາສາຍພົວພັນຫວຽດນາມ-ລາວ ຜ່ານແຕ່ລະໄລຍະປະຫວັດສາດອັນສຳຄັນຂອງສອງປະເທດໃນ 50 ປີຜ່ານມາ, ທ່ານປະທານປະເທດຫວຽດນາມ Truong Tan Sang ຖືວ່າ, ໃນໄລຍະຕໍ່ສູ້ຕ້ານສັດຕູໂຕດຽວ, ຍາດເອົາເອກະລາດ, ເສລີພາບ, ສອງຊາດຫວຽດນາມ-ລາວ ໄດ້ຮຽງບ່າຮຽງໄຫລ່ຮ່ວມສຸກຮ່ວມທຸກ, ເສຍສະຫຼະເລືອດເນື້ອ ແລະ ໜູນຊ່ວຍກັນເພື່ອຄົງຕົວ ແລະ ພັດທະນາ. ນັບແຕ່ກ່ອນມາຮອດປະຈຸບັນ, ຜົນງານແຕ່ລະຢ່າງຂອງທີ່ການປະຕິວັດສອງປະເທດລ້ວນແຕ່ຕິດພັນກັບບັນດາບາດກ້າວພັດທະນາອັນດີງາມຂອງສາຍພົວພັນແບບພິເສດຫວຽດນາມ-ລາວ. ໃນໄລຍະແຕ່ປີ 1962-1975, ການພົວພັນລະຫວ່າງສອງປະເທດແມ່ນພັນທະມິດສູ້ຮົບເພື່ອເອກະລາດເສລີພາບ, ປົດປ່ອຍຊາດ. ບົນພື້ນຖານມີຄວາມເປັນເອກະພາບກ່ຽວກັບແຜນນະໂຍບາຍ, ແນວທາງການເມືອງ, ການທະຫານ, ກ້າວເຂົ້າສູ່ການຕໍ່ຕ້ານຕ້ານສັດຕູໂຕດຽວ, ພັກແຮງງານຫວຽດນາມ ແລະ ພັກປະຊາຊົນປະຕິວັດລາວ ໄດ້ເຊີດຊູຄັນທຸງແຫ່ງເອກະລາດຂອງຊາດ ແລະ ລັດທິສັງຄົມນິຍົມ, ຮຽງບ່າຮຽງໄຫລ່ກັນ, ວາງອອກແຜນນະໂຍບາຍ, ແນວທາງອັນຖືກຕ້ອງ, ທັນການ, ນຳການປະຕິວັດສອງປະເທດກ້າວຂຶ້ນ.
(ພາບ: thanhnien.com.vn)
ແຕ່ປີ 1975 ມາຮອດປະຈຸບັນ, ການພົວພັນລະຫວ່າງຫວຽດນາມ-ລາວ ໄດ້ກ້າວເຂົ້າສູ່ໄລຍະໃໝ່-ຈາກການພົວພັນລະຫວ່າງສອງພັກ ແລະ ປະຊາຊົນສອງປະເທດເປັນຕົ້ນ, ຫັນໄປສູ່ການພົວພັນຮ່ວມມືຮອບດ້ານລະຫວ່າງສອງພັກກຳອຳນາດ, ສອງລັດ ແລະ ສອງປະເທດເອກະລາດ, ມີອະທິປະໄຕ, ພ້ອມກັນຊອກຫາບາດກ້າວແຫ່ງການປ່ຽນໃໝ່ເພື່ອນຳປະເທດຊາດພັດທະນາຢ່າງຈະເລີນຮຸ່ງເຮືອງ. ຄຽງຄູ່ກັບການພົວພັນຮ່ວມມືດ້ານການເມືອງ, ການປ້ອງກັນຊາດປ້ອງກັນຄວາມສະຫງົບອັນດີງາມນັ້ນ, ການຮ່ວມມືດ້ານເສດຖະກິດ, ການຄ້າ ແລະ ການລົງທຶນກໍພວມໄດ້ຮັບການຍູ້ແຮງ.
ຫວນຄືນໄລຍະປະຫວັດສາດໃນ 50 ປີຜ່ານມາ, ພິເສດ, ຜ່ານ 35 ປີແຫ່ງການປະຕິບັດສົນທິສັນຍາມິດຕະພາບ ແລະ ການຮ່ວມມືຫວຽດນາມ-ລາວ, ການພົວພັນມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ-ລາວ ນັບມື້ນັບສະໜິດຕິດພັນ ແລະ ພັດທະນາຢ່າງເລິກເຊີ່ງກ້ວາງຂວາງ, ໃນທຸກໆຂົງເຂດ, ຈາກດ້ານການເມືອງ, ການຕ່າງປະເທດ, ການປ້ອງກັນຊາດປ້ອງກັນຄວາມສະຫງົບ, ການສຶກສາບຳລຸງສ້າງ ຕະຫຼອດຮອດດ້ານເສດຖະກິດ, ການຄ້າ, ການລົງທຶນ, ວິທະຍາສາດເຕັກນິກ. ຫວນຄືນໄລຍະເວລາ 50 ປີຜ່ານມາ, ສອງປະເທດມີສິດເອກອ້າງທະນົງໃຈຕໍ່ບັນດາຄວາມຄຶບໜ້າກ້າວກະໂດດຂັ້ນໃນການພົວພັນຮ່ວມມືລະຫວ່າງສອງປະເທດໃນຂົງເຂດການຄ້າ ແລະ ການລົງທຶນ. ປະຈຸບັນ, ຫວຽດນາມ ມີ 345 ໂຄງການລົງທຶນຢູ່ລາວດ້ວຍຍອດຈຳນວນເງິນລົງທຶນກ່ວາ 5,2 ຕື້ໂດລາສະຫະລັດ, ແມ່ນ 1 ໃນບັນດາປະເທດນຳໜ້າໃນຈຳນວນ 53 ປະເທດ ແລະ ເຂດແຄ້ວນລົງທຶນຢູ່ລາວ. ສອງປະເທດສູ້ຊົນນຳວົງເງິນການຄ້າສອງຝ່າຍບັນລຸ 1 ຕື້ໂດລາສະຫະລັດໃນປີ 2012 ແລະ ບັນລຸ 2 ຕື້ໂດລາສະຫະລັດໃນປີ 2015. ບົນພື້ນຖານບັນດາຜົນງານບັນລຸໄດ້ນັ້ນ, ການນຳຂັ້ນສູງສອງປະເທດໄດ້ເລືອກປີ 2012 ແມ່ນ “ປີສາມັກຄີມິດຕະພາບຫວຽດນາມ-ລາວ“ ເພື່ອແນໃສ່ສະເຫຼີມສະຫຼອງສອງເຫດການສຳຄັນຍິ່ງຄື: 50 ປີແຫ່ງວັນສ້າງຕັ້ງສາຍພົວພັນທາງການທູດຫວຽດນາມ-ລາວ ແລະ 35 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືລະຫວ່າງສອງປະເທດ.
ຂ່ຳນັບຊົມເຊີຍປີສາມັກຄີມິດຕະພາບຫວຽດນາມ-ລາວ
(ພາບ:baohatinh.vn)
ເມື່ອເຕື້ອງເຖິງແງ່ຫວັງຂອງສາຍພົວພັນຫວຽດນາມ-ລາວ ໃນຊຸມປີຕໍ່ໜ້າ, ທ່ານປະທານປະເທດຫວຽດນາມ Truong Tan Sang ເຊື່ອໝັ້ນວ່າ, ສອງປະເທດຫວຽດນາມ-ລາວ ຈະມີບາດກ້າວພັດທະນາໃໝ່, ຂະຫຍັນຂັນເຄື່ອນ, ມີປະສິດທິຜົນ, ແທດຈິງ, ຕອບສະໜອງຄວາມມຸ້ງຫວັງຂອງປະຊາຊົນສອງປະເທດ ນັ້ນແມ່ນສ້າງສາປະເທດຫວຽດນາມ ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸດຕິທຳ, ສີວິໄລສຳເລັດຜົນ ແລະ ສ້າງສາປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນະຖາວອນສຳເລັດຜົນ, ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ. ທ່ານປະທານປະເທດຫວຽດນາມ Truong Tan Sang ກໍ່ມີຄວາມເຊື່ອໝັ້ນວ່າ, ປະຊາຊົນສອງປະເທດລຸ້ນຕ່າງໆຈະສືບທອດລຸ້ນພໍ່ລຸ້ນອ້າຍ, ຮັກສານ້ຳໃຈສາມັກຄີມິດຕະພາບຫວຽດນາມ-ລາວ “ປຽບເໝືອນຮັກສາແກ້ວຕາຂອງຕົນ“ ຄືດັ່ງຄຳຕັກເຕືອນຂອງປະທານໂຮ່ຈິມິນ ແລະ ເຮັດໃຫ້ຳສາຍພົວພັນແບບພິເສດຫວຽດນາມ-ລາວ ນັບມື້ນັບພັດທະນາຢ່າງຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ.