(vovworld) - ກອງປະຊຸມສຳມະນາວິທະຍາສາດສາກົນກ່ຽວກັບທະເລຕາເວັນອອກຄັ້ງທີ 4 ດ້ວຍຫົວຂໍ້ວ່າ ”ທະເລຕາເວັນອອກ: ການຮ່ວມມືເພື່ອຄວາມສະຫງົບປອດໄພ ແລະ ການພັດທະນາໃນພາກພື້ນ” ພວມດຳເນີນຢູ່ນະຄອນໂຮ່ຈີມິນ. ດ້ວຍຈຸດໝາຍແມ່ນປຶກສາຫາລືກ່ຽວກັບກົດໝາຍສາກົນ ແລະ ການພົວພັນສາກົນ, ກ່ຽວກັບຄວາມສຳຄັນຂອງທະເລຕາເວັນອອກ, ກ່ຽວກັບຜົນປະໂຫຍດ ຂອງບັນດາຝ່າຍທີ່ກ່ຽວຂ້ອງ, ກ່ຽວກັບການພິພາດທີ່ເກີດຂຶ້ນບົນທະເລໃນໄລຍະຫວ່າງມໍ່ໆມານີ້. ກອງປະຊຸມສຳມະນາ ເພື່ອແນໃສ່ຊ່ວຍໃຫ້ມະຫາຊົນເຂົ້າໃຈຢ່າງຈະແຈ້ງກ່ຽວກັບທາດແທ້ຂອງບັນດາບັນຫາທີ່ກ່ຽວຂ້ອງເຖິງທະເລຕາເວັນອອກ, ສະເໜີບັນດາຄຳເຫັນໃຫ້ລັດຖະບານປະເທດຕ່າງໆທີ່ກ່ຽວຂ້ອງໂດຍກົງ ແລະ ໂດຍທາງອ້ອມເຖິງການພິພາດ ແນໃສ່ເພີ່ມທະວີການຮ່ວມມື. ສຳຫຼັບຫວຽດນາມແລ້ວ, ຜ່ານກອງປະຊຸມສຳມະນາຄັ້ງນີ້, ຫວຽດນາມສືບຕໍ່ຢັ້ງຢືນຄວາມມານະພະຍາຍາມຂອງຕົນ ນັ້ນແມ່ນເດັດດ່ຽວແກ້ໄຂການພິພາດບົນທະເລ ດ້ວຍສັນຕິວິທີ, ອີງຕາມກົດໝາຍສາກົນ ແລະ ຄວາມຈິງຂອງປະຫວັດສາດ.
ກອງປະຊຸມສຳມະນາວິທະຍາສາດສາກົນກ່ຽວກັບທະເລຕາເວັນອອກຄັ້ງທີ 4
(ພາບ: vietnamplus.vn)
ໂດຍສືບຕໍ່ໝາກຜົນຂອງກອງປະຊຸມສຳມະນາ 3 ຄັ້ງກ່ອນນີ້. ກອງປະຊຸມສຳມະນາວິທະຍາສາດສາກົນກ່ຽວກັບທະເລຕາເວັນອອກຄັ້ງນີ້ສືບຕໍ່ໄດ້ຮັບຄວາມເອົາໃຈໃສ່ຈາກວົງການນັກຮຽນຮູ້ ແລະ ເຈົ້າໜ້າທີ່ລັດຖະບານທັງຢູ່ພາຍໃນ ແລະ ຕ່າງປະເທດ. ມີຜູ້ແທນເກືອບ 200 ທ່ານ, ໃນນັ້ນຜູ້ແທນສາກົນເກືອບ 100 ທ່ານ ທີ່ມາຈາກ 27 ປະເທດ ແລະ ເຂດແຄວ້ນ, ຜູ້ຕາງໜ້າຄະນະທູຕານຸທູດຫວຽດນາມ 30 ທ່ານ ໄດ້ເຂົ້າຮ່ວມກອງປະຊຸມສຳມະນາຄັ້ງນີ້.
ໃນໄລຍະຫວ່າງມໍ່ໆມານີ້, ບັນດາກອງປະຊຸມສຳມະນາກ່ຽວກັບທະເລຕາເວັນອອກ ຍາມໃດກໍ່ຮັບຄວາມເອົາໃຈໃສ່ຈາກປະຊາຄົມໂລກ. ເພາະວ່າທະເລຕາເວັນອອກນັບມື້ນັບມີຄວາມໝາຍສຳຄັນທີ່ມີຕໍ່ສັນຕິພາບ, ສະຖຽນລະພາບ ແລະ ການພັດທະນາ. ດຮ Nguyen Hong Thao, ຜູ້ຊ່ຽວຊານຄົ້ນຄ້ວາກ່ຽວກັບທະເລຕາເວັນອອກຂອງມະຫາວິທະຍາໄລແຫ່ງຊາດຮ່າໂນ້ຍ, ອະດີດຮອງຫົວໜ້າຄະນະກຳມະການຊາຍແດນແຫ່ງຊາດ, ໃຫ້ຮູ້ວ່າ:
”ບັນຫາທະເລຕາເວັນອອກແມ່ນບັນຫາສາກົນ, ເພາະວ່າທະເລຕາເວັນອອກແມ່ນເສັ້ນທາງບົນທະເລທີ່ເຊື່ອມຕໍ່ມະຫາສະໝຸດນຳກັນ. ທະເລຕາເວັນນອນຕັ້ງຢູ່ໃນກາງເຂດອາຊີ-ປາຊີຝິກທີ່ມີການເຄື່ອນໄຫວທາງດ້ານເສດຖະ
ກິດຢ່າງຟົດຟື້ນ. ນີ້ແມ່ນທະເລຮ່ວມຂອງທຸກໆປະເທດຢູ່ອ້ອມທະເລຕາເວັນອອກ. ນັບແຕ່ດົນນານມາແລ້ວ, ຊາວປະມົງຂອງປະເທດຕ່າງໆໄດ້ເຄື່ອນໄຫວຢູ່ທີ່ນີ້. ເຂດທະເລນີ້ຍັງຂຶ້ນກັບສິດຜົນປະໂຫຍດຂອງຫຼາຍປະເທດ, ຄືສິດເສລີໃນການເດີນທະເລ ແລະ ການບິນ. ດັ່ງນັ້ນບໍ່ພຽງແຕ່ບັນດາປະເທດຢູ່ອ້ອມທະເລຕາເວັນອອກໄດ້ຮັບຜົນປະໂຫຍດເທົ່ານັ້ນ, ຫາກບັນດາປະເທດອື່ນໆກໍ່ມີຜົນປະໂຫຍດເຊັ່ນດຽວກັນ”.
ຍ້ອນຄວາມຮັ່ງມີ ແລະ ທີ່ຕັ້ງຍຸດທະສາດທີ່ສຳຄັນຂອງຕົນ, ດັ່ງນັ້ນທະເລຕາເວັນອອກຈຶ່ງກາຍເປັນໜຶ່ງໃນບັນດາເຂດທະເລທີ່ເຄີຍເກີດການພິພາດກັນ. ການພິພາດກັນໃນເຂດທະເລນີ້ໃນໄລຍະຜ່ານມາມີທ່າອ່ຽງເພີ່ມຂຶ້ນພ້ອມກັບການເຕີບໂຕທາງດ້ານເສດຖະກິດ ແລະ ການທະຫານຂອງປະເທດມະຫາອຳນາດທີ່ກ່ຽວຂ້ອງ. ປະກອບສ່ວນເຂົ້າຄວາມມານະພະຍາຍາມລວມ ແນໃສ່ຫຼຸດຜ່ອນການປະທະກັນບົນທະເລໃນໄລຍະຜ່ານມາແມ່ນບັນດາໝາກຜົນແຫ່ງການຄົ້ນຄ້ວາ, ຂອງບັນດານັກຮຽນຮູ້, ນັກຄົ້ນຄ້ວາປະຫວັດສາດ, ກົດໝາຍສາກົນ. ຜ່ານຜົນຂອງການຄົ້ນຄ້ວານີ້, ຫາງສຽງສາມາດເຂົ້າໃຈແຈ້ງກວ່າກ່ຽວກັບທາດແທ້ຂອງການພິພາດ, ຄວາມເຄັ່ງຕຶງ, ຊ່ວຍໃຫ້ບັນດານັກວາງແຜນນະໂຍບາຍຄິດໄລ່ຢ່າງລະອຽດກວ່າ ກ່ຽວກັບຜົນປະໂຫຍດຂອງປະເທດຕ່າງໆ ກ່ອນທີ່ເຂົາເຈົ້າມີຂໍ້ຕົກລົງທີ່ກ່ຽວຂ້ອງເຖິງທະເລຕາເວັນອອກ. ຜູ້ອຳນວຍການສະຖາບັນການຕ່າງປະເທດ Dang Dinh Quy, ໃຫ້ຂໍ້ສັງເກດວ່າ:
”ບັນດາບັນຫາປຶກສາຫາລື, ການຕີລາຄາ ແລະ ຂໍ້ສະເໜີນັບມື້ນັບແທດຈິງສຳຫຼັບການຮັກສາສັນຕິພາບ, ສະຖຽນລະພາບ ແລະ ການພັດທະນາຢູ່ທະເລຕາເວັນອອກ. ການເຄື່ອນໄຫວຄົ້ນຄ້ວາ ແລະ ການປຶກສາຫາລືນີ້ໄດ້ປະກອບສ່ວນສຳຄັນ ເຮັດໃຫ້ທະເລຕາເວັນອອກກາຍເປັນຄວາມເອົາໃຈໃສ່ລວມຂອງປະຊາຄົມໂລກ. ທາດແທ້ຂອງການພິພາດບົນທະເລ ກໍ່ຄືກໍລະນີຕ່າງໆທີ່ເກີດຂຶ້ນຢູ່ທະເລຕາເວັນອອກ ໄດ້ຮັບການໄຈ້ແຍກ, ຕີລາຄາ ບົນຈິດໃຈວິທະຍາສາດ, ພາວະວິໄສ ເພື່ອເຮັດໃຫ້ຫາງສຽງຂອງບັນດາປະເທດທີ່ກ່ຽວຂ້ອງເຖິງການພິພາດ ແລະ ຫາງສຽງສາກົນມີຂໍ້ມູນຂ່າວສານຢ່າງຄົບຖ້ວນກວ່າ”
ໂດຍໄດ້ຮັບການດຳເນີນໃນສະຖານະການທີ່ປະຊາຄົມໂລກ ສະເຫຼີມ ສະຫຼອງ 30 ປີ ແຫ່ງວັນລົງນາມໃນສົນທິສັນຍາສະຫະປະຊາຊາດ ກ່ຽວກັບກົດໝາຍວ່າດ້ວຍທະເລ, 10 ປີ ແຫ່ງວັນປະກາດກ່ຽວກັບການປະພຶດຂອງຝ່າຍຕ່າງໆທີ່ກ່ຽວຂ້ອງເຖິງທະເລຕາເວັນອອກ (DOC), ແລະ ຫວ່າງແລ້ວນີ້, ອາຊຽນ ແລະ ຈີນບັນລຸໄດ້ຂໍ້ຕົກລົງກ່ຽວກັບການສ້າງຂໍ້ກຳນົດການປະພຶດໃນເຂດທະເລຕາເວັນອອກ (COC), ກອງປະຊຸມສຳມະນາວິທະຍາສາດສາກົນກ່ຽວກັບທະເລຕາເວັນອອກຄັ້ງນີ້ ແນໃສ່ສະເໜີບັນດາຊ່ອງທາງ, ວິທີການ, ເພື່ອເຮັດໃຫ້ບັນດາຜົນການຄົ້ນຄ້ວາ, ການແລກປ່ຽນວິຊາການຄົ້ນຄ້ວາ ກະທົບຢ່າງຕັ້ງໜ້າເຖິງໝູ່ມະຫາຊົນ, ຊ່ວຍໃຫ້ບັນດາການນຳຫວຽດນາມຕົກລົງບັນດານະໂຍບາຍ ເພື່ມທະວີການຮ່ວມມືຕ່າງຝ່າຍຕ່າງມີຜົນປະໂຫຍດ ຢູ່ທະເລຕາເວັນອອກ. ສາດສະດາຈານ, ດຣ. Nguyen Ba Dien, ຜູ້ອຳນວຍການສູນຄົ້ນຄ້ວາກົດໝາຍວ່າດ້ວຍທະເລ ແລະ ການເດີນທະເລສາກົນ, ສັງກັດມະຫາວິທະຍາໄລແຫ່ງຊາດຮ່າໂນ້ຍ, ຖືວ່າ:
”ຂ້າພະເຈົ້າຄິດວ່ານີ້ແມ່ນວິທີດີທີ່ສຸດ ເພື່ອໃຫ້ປະຊາຊົນຫວຽດນາມ ກໍ່ຄືປະຊາຄົມໂລກເຂົ້າໃຈກ່ຽວກັບຄວາມເປັນຈິງ, ສັດຈະທຳຂອງຕົນ, ກໍ່ຄືເຮັດໃຫ້ເພື່ອນມິດ ແລະ ປະຊາຊົນຈີນເຂົ້າໃຈໄດ້ສິ່ງດັ່ງກ່າວ. ພວກເຮົາຈະປະກາດບັນດາຫຼັກຖານເທື່ອລະກ້າວຢ່າງເປີດເຜີຍ, ເພື່ອຢັ້ງຢືນອະທິປະໄຕຂອງຕົນ”.
ເພື່ອຫຼຸດຜ່ອນການປະທະກັນ ໂດຍການພິພາດອະທິປະໄຕບົນທະເລກໍ່ຂຶ້ນຢ່າງມີປະສິດທິຜົນ. ວິທີດີທີ່ສຸດແມ່ນຕ້ອງເປີດເຜີຍຂ່າວຢ່າງໂປ່ງໃສ. ຜົນການຄົ້ນຄ້ວາປະຫວັດສາດ, ການໄຈ້ແຍກ, ຕີລາຄາທີ່ອີງໃສ່ດ້ານກົດໝາຍ ແລະ ວິທະຍາສາດຈະແມ່ນສຽງເວົ້າທີ່ມີປະໂຫຍດ, ຊ່ວຍແກ້ໄຂການພິພາດກັນ. ນີ້ແມ່ນທ່າອ່ຽງທີ່ແນ່ນອນໃນໂລກແຫ່ງໂລກາພິວັດ. ຄວາມມານະພະຍາຍາມຂອງຫວຽດນາມຜ່ານການຈັດຕັ້ງກອງປະຊຸມສຳມະນາວິທະຍາສາດສາກົນກ່ຽວກັບທະເລຕາເວັນອອກ 4 ຄັ້ງ ກໍ່ແມ່ນເພື່ອແນໃສ່ຈຸດໝາຍດັ່ງກ່າວ