ພັກປະຊາຊົນກຳປູເຈຍ CPP ພວມເຄືອ່ນໄຫວຫາສຽງເລືອກຕັ້ງ
(ພາບ : baomoi.com)
|
ຍັງອີກພຽງ 3 ວັນເທົ່ານັ້ນ, ປະເທດກຳປູເຈຍຈະກ້າວເຂົ້າສູ່ການເລືອກຕັ້ງທີ່ສຳຄັນ. ນີ້ແມ່ນ ການເລືອກຕັ້ງສະພາແຫ່ງຊາດຄັ້ງທີ 5 ຢູ່ກຳປູເຈຍ. ມີ 8 ພັກຝ່າຍເຂົ້າຮ່ວມ ການເລືອກຕັ້ງຄັ້ງນີ້, ແຕ່ເບິ່ງຄືວ່າ ນີ້ແມ່ນການແຂ່ງຂັນ ລະຫວ່າງ 2 ພັກຄື ພັກປະຊາຊົນກຳປູເຈຍ CPP ຂອງທ່ານນາຍົກລັດຖະມົນຕີ ຮຸນແຊນ ແລະ ພັກກູ້ຊາດກຳປູເຈຍ CNRP ຂອງທ່ານ ຊາມຣາຍຊີ ເທົ່ານັ້ນ. ແຕ່ບັນດາການຜັນແປໃນປະຈຸບັນໄດ້ສະແດງໃຫ້ເຫັນທ່າໄດ້ປຽບພວມອຽງໃສ່ ພັກປະຊາຊົນກຳປູເຈຍ CPP ແລະ ກາລະໂອກາດເພື່ອໃຫ້ ທ່ານນາຍົກລັດຖະມົນຕີ ຮຸນແຊນສືບຕໍ່ເດີນຕາມເສັ້ນທາງນຳພາປະເທດກຳປູເຈຍພັດທະນາ ແມ່ນສິ່ງທີ່ແນ່ນອນພໍສົມຄວນ.
ຕາມຄະນະກຳມະການເລືອກຕັ້ງກຳປູເຈຍແລ້ວ, ຄາດຄະເນວ່າ ຈະມີຜູ້ມີສິດເລືອກຕັ້ງປະມານ 9,6 ລ້ານຄົນໃນຍອດຈຳນວນຜູ້ມີສິດເລືອກຕັ້ງ 14 ລ້ານຄົນໄປປ່ອນບັດເພື່ອເລືອກເອົາ 123 ທີ່ນັ່ງໃນສະພາແຫ່ງຊາດໃນ ການເລືອກຕັ້ງຄັ້ງນີ້. ກ່ອນນີ້ 1 ເດືອນເຕັມ, 8 ພັກການເມືອງຢູ່ກຳປູເຈຍ, ໃນນັ້ນມີ 3 ພັກການເມືອງໃຫຍ່ກ່ວາໝູ່ແມ່ນ ພັກປະຊາຊົນກຳປູເຈຍ CPP ກຳອຳນາດ, ພັກກູ້ຊາດກຳປູເຈຍ CNRP ຝ່າຍຄ້ານ ແລະ ພັກ FUNCINPEC ໄດ້ເລີ່ມດຳເນີນບັ້ນຫາສຽງເລືອກຕັ້ງດ້ວຍຄຳໝັ້ນສັນຍາຈະປົວແປງຊີວິດການເປັນຢູ່ໃຫ້ແກ່ປະຊາຊົນຖ້າຫາກຍາດໄດ້ໄຊຊະນະ.
ດ້ວຍກົງຈັກຫາສຽງເລືອກຕັ້ງທີ່ໃຫ່ຍໂຕ, ໂຄງການຫາສຽງເລືອກຕັ້ງຂອງພັກ CPP ເນັ້ນໜັກເຖິງເລື່ອງສືບຕໍ່ສະໜັບສະໜູນ ທ່ານ ຮຸນແຊນ ຜູ້ພວມດຳລົງຕຳແໜ່ງນາຍົກລັດຖະມົນຕີ , ເປັນຜູ້ສະໝັກເລືອກຕັ້ງເປັນນາຍົກລັດຖະມົນຕີໃນອາຍຸການ 5 ປີ ແລະ ບັນດາອາຍຸການຕໍ່ໄປ, ພ້ອມກັນນັ້ນກໍສືບຕໍ່ສຳພັນທະມິດກັບ ພັກ FUNCINPEC ເພື່ອສ້າງຕັ້ງລັດຖະບານຖ້າຫາກຍາດໄດ້ໄຊຊະນະໃນ ການເລືອກຕັ້ງ; ປັບປຸງ ແລະ ພັດທະນາການພົວພັນຮ່ວມມືກັບທຸກໆກຳລັງການເມືອງ ແລະ ວົງການຕ່າງໆໃນສັງຄົມເພື່ອກໍ່ສ້າງ ແລະ ປົກປັກຮັກສາປະເທດຊາດ. ໂຄງການຫາສຽງເລືອກຕັ້ງຍັງໝັ້ນໝາຍວ່າ ກຳປູເຈຍໂດຍພາຍໃຕ້ການນຳພາຂອງພັກປະຊາຊົນກຳປູເຈຍ CPP ຈະສືບຕໍ່ແກ້ໄຂບັນຫາຊາຍແດນກັບບັນດາປະເທດບ້ານໃກ້ເຮືອນຄຽງໂດຍອີງໃສ່ລັດຖະທຳມະນູນ, ກົດໝາຍແຫ່ງຊາດ ແລະ ສາກົນ, ບັນດາກົດບັດສາກົນ ແນໃສ່ຮັບປະກັນອະທິປະໄຕຜືນແຜ່ນດິນອັນຄົບຖ້ວນຂອງກຳປູເຈຍ, ສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະ ພັດທະນາ; ພະຍາຍາມຕໍ່ສູ້ໂດຍຜ່ານສານຍຸດຕິທຳສາກົນເພື່ອໃຫ້ສານນີ້ສືບຕໍ່ຮັບຮູ້ອະທິປະໄຕຂອງກຳປູເຈຍທີ່ມີ ຕໍ່ພະວິຫານ Preah Vihear ຄືດັ່ງຄຳຕັດສິນເມື່ອປີ 1962. ໃນຂະນະນັ້ນ, ຕາມ ໂຄງການຫາສຽງເລືອກຕັ້ງຂອງພັກຝ່າຍຄ້ານ CNRP ຂອງທ່ານຊາມຣາຍຊີ ພວມຢູ່ພັດຖິ່ນນັ້ນ, ຖ້າຫາກຍາດໄດ້ໄຊຊະນະ, ພັກນີ້ຈະສະໜອງເງິນໃຫ້ຊາວກຳປູເຈຍຜູ້ທີ່ມີອາຍຸເກີນ 65 ປີ ຜູ້ລະ 10 USD/ເດືອນ, ເພີ່ມເງິນເດືອນພື້ນຖານໃຫ້ຜູ້ອອກແຮງງານຂຶ້ນເປັນ 150 USD, ເງິນເດືອນຂອງລັດຖະກອນຂຶ້ນເປັນ 250 USD , ຫຼຸດຜ່ອນລາຄານ້ຳມັນເຊື້ອໄຟ, ໄຟຟ້ານ້ຳປະປາ ແລະ ຝຸ່ນ ກໍຄືສະໜອງການບໍລິການການແພດໂດຍບໍ່ເກັບເງິນໃຫ້ແກ່ຜູ້ທຸກຍາກ. ສ່ວນພັກ FUNCINPEC ໂດຍເຈົ້າຍິງ Norodom Arun Rasmey ຊຶ່ງແມ່ນບຸດຍິງຫຼ້າຂອງ ພຣະກະຣຸນາພຣະບາດສົມເດັດພຣະໂນໂຣດົມສີຫານຸ, ອະດີດພຣະມະຫາ ວິຣະກະສັດແຫ່ງກຳປູເຈຍ ເປັນຜູ້ນຳພາ ໄດ້ໝັ້ນໝາຍປົກປັກຮັກສາລະບອບລາຊາທິປະໄຕ, ປົກປັກຮັກສາຜືນແຜ່ນດິນອັນຄົບຖ້ວນ, ຮັກສາສັນຕິພາບ, ເອກະພາບ ແລະ ໄກ່ເກ່ຍປອງດອງຊາດ.
ເຖິງວ່າ ບັນດາພັກການເມືອງຂົນຂວາຍຫາສຽງເລືອກຕັ້ງ ແລະ ຈັດຕັ້ງບັນດາເຫດການແກ່ດຶງ ຜູ້ມີສິດເລືອກຕັ້ງ, ແຕ່ຕາມບັນດາຜູ້ສັງເກດການແລ້ວ , ກໍລະນີ ທ່ານ ຮຸນແຊນ ພັກປະຊາຊົນກຳປູເຈຍ CPP ກຳອຳນາດຂອງທ່ານຖືກປະລາໄຊແມ່ນບໍ່ອາດເກີດຂຶ້ນ. ທ່ານ ຮຸນແຊນ ໄດ້ກຳອຳນາດຢູ່ກຳປູເຈຍເປັນເວລາ 28 ປີ, ພ້ອມກັບກະສັດ ບຣູໄນ ໄດ້ກາຍເປັນບັນດາຜູ້ນຳທີ່ກຳອຳນາດເປັນເວລາດົນນານກ່ວາໝູ່ຢູ່ອາຊີຕາເວັນອອກສ່ຽງໃຕ້. ບໍ່ອາດປະຕິເສດໄດ້ໃນສະໄໝ ທ່ານນາຍົກລັດຖະມົນຕີ ຮຸນແຊນ, ກຳປູເຈຍໄດ້ຫັນປ່ຽນຈາກປະເທດຖືກສົງຄາມທຳລາຍ ກາຍເປັນໜຶ່ງໃນບັນດາພື້ນຖານເສດຖະກິດທີ່ເຕີບໂຕໄວທີ່ສຸດຢູ່ ອາຊີຕາເວັນອອກສ່ຽງໃຕ້. ຂະແໜງທ່ອງທ່ຽວຢູ່ກຳປູເຈຍໄດ້ຮັບການຕີລາຄາວ່າແມ່ນພວມຂະຫຍາຍຕົວຢ່າງແຂງແຮງທີ່ສຸດ. ປີ 2012, ກຳປູເຈຍຕ້ອນຮັບແຂກທ່ອງທ່ຽວ 3,5 ລ້ານເທື່ອຄົນ, ບັນລຸລາຍຮັບ 2,2 ຕື້ USD , ກວມເອົາ 12% GDP ຂອງທັງປະເທດ. ຈາກພື້ນຖານປະຊາທິປະໄຕທີ່ໜຸ່ມນ້ອຍຊຶ່ງໄດ້ຮັບການກໍ່ສ້າງຂຶ້ນເມື່ອປີ 1993 ພາຍຫຼັງ ການເລືອກຕັ້ງໂດຍ ສະຫະປະຊາຊາດເປັນຄົນກາງ, ມີບໍ່ເທົ່າໃດຄົນເຊື່ອໝັ້ນວ່າ ກຳປູເຈຍໄດ້ກາຍເປັນ“ເສືອນ້ອຍ” ຢູ່ພາກພື້ນ ແລະ ສາມາດຮັກສາທ່າເຕີບໂຕເສດຖະກິດ 10% ໃນກ່ວາທົດສະວັດ ຈົນເຖິງເວລາເກີດວິກິດການການເງິນປີ 2008. ເພາະສະນັ້ນ, ວົງການນັກໄຈ້ແຍກຖືວ່າ ດ້ວຍທຸກສິ່ງທຸກຢ່າງໃນຕົວຈິງທີ່ ທ່ານນາຍົກລັດຖະມົນຕີ ຮຸນແຊນ ໄດ້ນຳມາໃຫ້ແກ່ປະເທດຊາດນັ້ນ, ແນ່ນອນວ່າ ຜູ້ມີສິດເລືອກຕັ້ງຈະບໍ່ສ່ຽງໂຊກ, ສ່ຽງໄຊ ເພື່ອແລກສະຖຽນລະພາບການເມືອງໃນປະຈຸບັນ ເພື່ອເຊື່ອໝັ້ນຕໍ່ບັນດາຄຳໝັ້ນສັນຍາທີ່ບໍ່ທັນມີຫຍັງເພື່ອຮັບປະກັນໃນອະນາຄົດ. ພ້ອມກັນນັ້ນ, ກ່ອນທີ່ຈະດຳເນີນການເລືອກຕັ້ງ, ທ່ານນາຍົກລັດຖະມົນຕີ ຮຸນແຊນ ໄດ້ສະເໜີລາດຊະວົງຈົ່ງອະໄພຍະໂທດໃຫ້ແກ່ຜູ້ນຳພັກຝ່າຍຄ້ານ ຊາມຣາຍຊີ ຊຶ່ງແມ່ນຜູ້ໄດ້ຖືກຕັດສິນລົງໂທດຈຳຄຸກ 11 ປີ ແລະ ພວມຢູ່ພັກຖິ່ນ. ການກະທຳນີ້ຂອງ ທ່ານນາຍົກລັດຖະມົນຕີ ຮຸນແຊນ ໃນສ່ວນໃດສວ່ນໜຶ່ງສາມາດຍາດແຍ່ງການສະໜັບສະໜູນຈາກ ຜູ້ມີສິດເລືອກຕັ້ງກ່ຽວກັບຮູບພາບຜູ້ນຳປະຊາທິປະໄຕ, ສະໜັບສະໜູນລະບົບຫຼາຍພັກແກ່ງແຍ້ງ.
ດ້ວຍການສະໜັບສະໜູນຢ່າງຂາດຂັ້ນຈາກ ຜູ້ມີສິດເລືອກຕັ້ງ, ແນ່ນອນວ່າ ພັກປະຊາຊົນກຳປູເຈຍ CPP ຈະສາມາດຍາດໄດ້ທີ່ນັ່ງສ່ວນຫຼາຍທີ່ສະພາແຫ່ງຊາດໃນການເລືອກຕັ້ງທີ່ຈະມາເຖິງນີ້. ສິ່ງດັ່ງກ່າວກໍເຊັ່ນດຽວກັນກັບເລື່ອງ ທ່ານນາຍົກລັດຖະມົນຕີ ຮຸນແຊນຈະສືບຕໍ່ນຳພາປະເທດກປູເຈຍ ເພື່ອນຳປະເທດນີ້ສືບຕໍ່ພັດທະນາຢ່າງເປັນປົກກະຕິ, ວັດທະນາຖາວອນ, ເຊື່ອມໂຍງຢ່າງເຕັມສ່ວນກ່ວາເຂົ້າໃນປະຊາຄົມເສດຖະກິດພາກພື້ນ