ວັນທີ 7/5, ປະເທດອັງກິດຈະກ້າວເຂົ້າສູ່ການເລືອກຕັ້ງທົ່ວປະເທດທີ່ສຳຄັນກວ່າໝູ່ໃນໄລຍະ 5 ປີມານີ້. ດ້ວຍການເລືອກຕັ້ງທົ່ວປະເທດຄັ້ງນີ້, ປະເທດອັງກິດຈະເລືອກເອົາຄະນະລັດຖະບານໃໝ່ດ້ວຍບັນດານະໂຍບາຍໃໝ່ເພື່ອສ້າງເສັ້ນທາງພັດທະນາໃນເກືອບທົດສະວັດຕໍ່ໄປ. ໃນຈຸດເວລານີ້, ການແຂ່ງຂັນລະຫວ່າງບັນດາພັກຝ່າຍພວມຮ້ອນເຮັ່ງທີ່ສຸດ ແລະ ນັບມື້ນັບຍາກທີ່ສາມາດຄາດຄະເນໄດ້ ຂະນະທີ່ການຢັ່ງຫາງສຽງຄັ້ງຕ່າງໆ ລ້ວນແຕ່ໃຫ້ເຫັນວ່າ ອັດຕາສ່ວນຜູ້ສະໜັບສະໜູນລະຫວ່າງ 2 ພັກການເມືອງໃຫຍ່ ແມ່ນເກືອບຄືເທົ່າກັນ.
ທ່ານ David Cameron ນາຍົກລັດຖະມົນຕີພວມກຳອຳນາດ ແລະ ຜູ້ນຳພັກແຮງງານ Ed MiliBand |
ກໍເຊັ່ນດຽວກັນກັບການເລືອກຕັ້ງທົ່ວປະເທດກ່ອນນີ້ 5 ປີ, ຮູບແບບສຳພັນທະມິດກຳອຳນາດນັ້ນ, ຄາດວ່າຈະສືບຕໍ່ດຳເນີນໃນ ການເລືອກຕັ້ງທົ່ວປະເທດຄັ້ງນີ້. ເພາະໃນປະຈຸບັນ, ທັງພັກນິຍົມຮັກສາເດີມຂອງນາຍົກລັດຖະມົນຕີພວມກຳອຳນາດ ທ່ານ David Cameron ແລະ ພັກແຮງງານຝ່າຍຄ້ານຂອງຜູ້ນຳ Ed MiliBand ກໍລ້ວນແຕ່ຖືກຄາດຄະເນວ່າ ຍາກທີ່ຈະສາມາດຍາດໄດ້ຈຳນວນທີ່ນັ່ງເກີນເຄິ່ງໜຶ່ງໃນສະພາຕ່ຳເພື່ອສ້າງຕັ້ງລັດຖະບານ.
ການແຂ່ງຂັນໃນການເລືອກຕັ້ງລະຫວ່າງ 2 ພັກ.
ທີ່ຈິງແລ້ວ, ການເລືອກຕັ້ງຢູ່ອັງກິດຄັ້ງນີ້ ແມ່ນການແຂ່ງຂັນລະຫວ່າງ 2 ພັກການເມືອງໃຫຍ່ໃນເວທີການເມືອງອັງກິດ, ນັ້ນແມ່ນ ພັກນິຍົມຮັກສາເດີມ ແລະ ພັກແຮງງານຝ່າຍຄ້ານ. ດ້ວຍຈຸດສຸມຂອງການຫາສຽງເລືອກຕັ້ງແມ່ນບັນດານະໂຍບາຍເສດຖະກິດທີ່ເຕັມໄປດ້ວຍແງ່ຫວັງ, ທັງ 2 ພັກພວມ ຂຸ້ນຂ້ຽວຊອກຫາການສະໜັບສະໜູນຈາກຜູ້ມີສິດເລືອກຕັ້ງຂອງປະເທດນີ້.
ບັນດາການຢັ່ງຫາງສຽງເມື່ອມໍ່ໆມານີ້ ໃຫ້ເຫັນວ່າ : ບໍ່ມີຄວາມຜິດດ່ຽງກັນຫຼາຍ ແລະ 2 ພັກພວມໄດ້ຮັບສຽງສະໜັບສະໜູນຫວຸດຫວິດກັນໃນການແຂ່ງຂັນ. ຕາມຜົນຂອງການຢັ່ງຫາງສຽງເມື່ອມໍ່ໆມານີ້ ຂອງອົງການ Opinium ແລ້ວ, ອັດຕາການສະໜັບສະໜູນພັກນິຍົມຮັກສາເດີມຂອງນາຍົກລັດຖະມົນຕີພວມກຳອຳນາດ ທ່ານ David Cameron ບັນລຸ 36%, ໃນຂະນະທີ່ອັດຕາການສະໜັບສະໜູນພັກແຮງງານຝ່າຍຄ້ານຂອງຜູ້ນຳ Ed MiliBand ແມ່ນ 32%. ແຕ່ໃນ ການຢັ່ງຫາງສຽງອື່ນໂດຍອົງການ You Gov ປະຕິບັດ ພັດໃຫ້ເຫັນວ່າ : ພັກແຮງງານພວມນຳໜ້າດ້ວຍອັດຕາການສະໜັບສະໜູນແມ່ນ 36% ສູງກວ່າ 3 ຄະແນນເມື່ອທຽບໃສ່ພັກນິຍົມຮັກສາເດີມ. ດ້ວຍການຍາດຄະແນນຢ່າງຫວຸດຫວິດນີ້, ວົງການນັກສັງເກດການໃຫ້ຂໍ້ສັງເກດວ່າ ພັກນິຍົມຮັກສາເດີມ ແລະ ພັກແຮງງານພວມເທົ່າທຽມກັນ ແລະ 2 ພັກພວມມານະພະຍາຍາມຢ່າງສຸດຂີດເພື່ອຍາດເອົາການສະໜັບສະໜູນຂອງຜູ້ມີສິດເລືອກຕັ້ງ. ໂຄງການເຄື່ອນໄຫວຫາສຽງເລືອກຕັ້ງຂອງ ພັກແຮງງານຝ່າຍຄ້ານຂອງຜູ້ນຳ Ed MiliBand ໄດ້ເລັ່ງໃສ່ການເພີ່ມເງິນເດືອນພື້ນຖານ, ເອົາໃຈໃສ່ເຖິງການປົກປ້ອງສິດຜົນປະໂຫຍດຂອງຜູ້ອອອກແຮງງານ…ໃນຂະນະນັ້ນ, ໂຄງການເຄື່ອນໄຫວຫາສຽງເລືອກຕັ້ງຂອງພັກນິຍົມຮັກສາເດີມຂອງນາຍົກລັດຖະມົນຕີພວມກຳອຳນາດ ທ່ານ David Cameron ແມ່ນໃຫ້ບຸລິມະສິດອັນດັບໜຶ່ງແກ່ການແກ້ໄຂການຂາດດຸນງົບປະມານ ແລະ ກ້າວໄປເຖິງມີວສ່ວນເກີນງົບປະມານ. ນອກຈາກນັ້ນ ກໍເອົາໃຈໃສ່ເຖິງການກໍ່ສ້າງເຮືອນຢູ່, ເປີດໂຮງຮຽນໂດຍບໍ່ເກັບຄ່າຮຽນ, ຍົກເວັ້ນອາກອນລາຍຮັບສຳລັບຜູ້ຮັບເງິນເດືອນພື້ນຖານ…
ໝາກຜົນທີ່ຍາກຈະຄາດຄະເນໄດ້.
ມາຮອດປະຈຸບັນ, ຄວາມຜິດໂຕນກັນລະຫວ່າງ ພັກນິຍົມຮັກສາເດີມ ແລະ ພັກແຮງງານຝ່າຍຄ້ານແມ່ນບໍ່ເທົ່າໃດ. ເຖິງວ່າ ສະພາບການເສດຖະກິດທີ່ດີຂອງອັງກິດໃນທ່າມກາງສະພາບເສດຖະກິດທີ່ອຶດອາດຊັກຊ້າຂອງພາກພື້ນໃນໄລຍະທີ່ຜ່ານມາ ແມ່ນທ່າໄດ້ປຽບທີ່ສຳຄັນເພື່ອໃຫ້ ພັກນິຍົມຮັກສາເດີມ ແລະ ນາຍົກລັດຖະມົນຕີພວມກຳອຳນາດ ທ່ານ David Cameron ຍາດໄດ້ທ່າດີໃນການແຂ່ງຂັນນີ້ກໍຕາມ, ແຕ່ລັດຖະບານ ແລະ ພັກນິຍົມຮັກສາເດີມກຳອຳນາດ ກໍໄດ້ຖືກຕຳໜິຕິຕຽນບໍ່ໜ້ອຍຈາກບັນດາພັກຝ່າຍຄ້ານ, ເພາະການຟື້ນຟູເສດຖະກິດຍັງບໍ່ສາມາດຊ່ວຍປົວແປງຊີວິດການເປັນຢູ່ໃຫ້ຊາວອັງກິດດີຂຶ້ນ. ໃນຂະນະນັ້ນ, ໂຄງການເຄື່ອນໄຫວຫາສຽງເລືອກຕັ້ງຂອງ ພັກແຮງງານໄດ້ເຮັດໃຫ້ຫຼາຍຄົນລະແວງສົງໄສກ່ຽວກັບຄວາມສາມາດແກ້ໄຂວິກິດການໂດຍບໍ່ຕ້ອງການກູ້ຢືມເງິນຄືເມື່ອກ່ອນນີ້.
ວົງການນັກໄຈ້ແຍກຖືວ່າ : ບໍ່ວ່າພັກໃດກາຍເປັນພັກໃຫຍ່ພາຍຫຼັງ ການເລືອກຕັ້ງເມື່ອວັນທີ 7/5 ນັ້ນ, ການຜ່ອນສັ້ນຜ່ອນຍາວເພື່ອສ້າງຕັ້ງຄະນະລັດຖະບານໃໝ່ ກໍຈະຖືກດຳເນີນເພາະ ບໍ່ມີພັກໃດສາມາດຍາດໄດ້ໄຊຊະນະຢ່າງຂາດຂັ້ນເພື່ອເປັນເອກະລາດໃນການສ້າງຕັ້ງລັດຖະບານ. ແຕ່ແນ່ນອນວ່າ ຈະມີບາດກ້າວຫັນປ່ຽນດ້ານການເມືອງທີ່ສຳຄັນຢູ່ອັງກິດ. ເຖິງຢ່າງໃດກໍຕາມ, ລັດຖະບານໃໝ່ຕ້ອງປະຕິບັດຄຳໝັ້ນສັນຍາຕໍ່ຜູ້ມີສິດເລືອກຕັ້ງ, ສ້າງເສັ້ນທາງພັດທະນາໃໝ່ໃຫ້ປະເທດຊາດໃນໄລຍະທີ່ຈະມາເຖິງ.