(vovworld) - ການຊ່ວງເສັງເຂົ້າທຳນຽບຂາວ ພວມກ້າວເຂົ້າສູ່ໄລຍະຕັດສິນເມື່ອຜູ້ສະໝັກຮັບເລືອກຕັ້ງເປັນປະທານາທິບໍດີ 2 ທ່ານນັ້ນແມ່ນທ່ານນາງ Hilary Clinton ແລະ ເສດຖີເງິນຕື້ Donald Trump ຈະເລີ່ມມີການໂຕ້ວາທີໂດຍກົງຄັ້ງທຳອິດທາງໂທລະພາບໃນວັນທີ 27/9. ບັນດາການໂຕ້ວາທີນີ້ມີຄວາມໝາຍສຳຄັນ, ອາດສາມາດສ້າງບັນດາການປ່ຽນແປງທີ່ມີລັກສະນະເປັນບາດລ້ຽວກ່ຽວກັບອັດຕາສະໜັບສະໜູນ ຂອງຜູ້ມີສິດເລືອກຕັ້ງ ສຳລັບຜູ້ສະໝັກຮັບເລືອກຕັ້ງທັງ 2 ທ່ານ, ຜ່ານນັ້ນ ສາມາດຕັດສິນຜູ້ໃດຈະກາຍເປັນການນຳຜູ້ຕໍ່ໄປຂອງທຳນຽບຂາວ. ບົດຂຽນ “ການໂຕ້ວາທີໂດຍກົງ, ຈຸດເວລາຕັດສິນບັດເລືອກຕັ້ງໃນການເລືອກຕັ້ງປະທານາທິບໍດີ ອາເມລິກາ” ຂອງນັກຂ່າວ ແອ໋ງຮ່ວຽນ.
ຜູ້ສະໝັກຮັບເລືອກຕັ້ງ 2 ທ່ານຈັບມືກັນກ່ອນທີ່ເຂົ້າການໂຕ້ວາທີ
|
ຍັງມີເວລາພຽງ 1,5 ເດືອນອີກແມ່ນຈະຮອດເຫດການເລືອກຕັ້ງປະທານາທິບໍດີ. ນັບແຕ່ເວລານີ້, ຜູ້ສະໝັກຮັບເລືອກຕັ້ງ Hilary Clinton ແລະ ທ່ານ Donald Trump ພວມຍາດແຍ່ງເວລາເພື່ອແນໃສ່ຈັດຕັ້ງບັນດາລາຍການຂົນຂວາຍຫາສຽງເລືອກຕັ້ງ, ດຶງດູດການສະໜັບສະໜູນຂອງບັນດາຜູ້ມີສິດເລືອກຕັ້ງ.
ຕາມແຜນການແລ້ວ, ຜູ້ສະໝັກຮັບເລືອກຕັ້ງຂອງພັກປະຊາທິປະໄຕ ອາເມລິກາ ທ່ານນາງ Hilary Clinton ແລະ ຜູ້ສະໝັກຮັບເລືອກຕັ້ງຂອງພັກສາທາລະນະລັດ Donald Trump ຈະຕ້ອງຜ່ານການໂຕ້ວາທີເປັນ 3 ຄັ້ງແຕ່ນີ້ຮອດວັນທີ 8/11 ຈະມາເຖິງ. ການໂຕ້ວາທີທັງ 3 ນີ້ລ້ວນແຕ່ໄດ້ຖ່າຍທອດສົດໃນຊ່ອງໂທລະພາບໃຫຍ່ຂອງ ອາເມລິກາ ແລະ ການໂຕ້ວາທີຄັ້ງທຳອິດຈະຖືກດຳເນີນໄປໃນວັນທີ 27/9 ຢູ່ມະຫາວິທະຍາໄລ Hofstra, ນະຄອນຫຼວງ ນິວຢອກ.
ດຶງດູດຄວາມສົນໃຈພິເສດຈາກຫາງສຽງ
ການໂຕ້ວາທີໂດຍກົງລະຫວ່າງຜູ້ສະໝັກຮັບເລືອກຕັ້ງເປັນປະທານາທິບໍດີສອງທ່ານ ທາງໂທລະພາບ ໄດ້ກາຍເປັນເຫດການທຳນຽມທີ່ເຄີຍມີມານັບແຕ່ປີ 1960. ການໂຕ້ວາທີໂດຍກົງຄືດັ່ງກ່າວ ຍາມໃດກໍ່ດຶງດູດຄວາມສົນໃຈພິເສດຈາກຫາງສຽງ ອາເມລິກາ. ການໂຕ້ວາທີໂດຍກົງຄັ້ງທຳອິດລະຫວ່າງທ່ານ D. Trumph ແລະ ທ່ານນາງ H.Clinton ໄດ້ດຶງດູດຜູ້ຊົມໃນລະດັບສະຖິຕິ, ແມ່ນຂຶ້ນເຖິງປະມານ 100 ລ້ານຄົນ, ໝາຍຄວາມວ່າແມ່ນເກືອບ 1/3 ຈຳນວນພົນລະເມືອງ ອາເມລິກາ.
ໃນຮອບເວລາໂຕ້ວາທີ 90 ນາທີ, ຜູ້ສະໝັກຮັບເລືອກຕັ້ງແຕ່ລະທ່ານຈະແນະນຳທັດສະນະ ກໍ່ຄືຍົກອອກບັນດາຂໍ້ອ້າງອີງເພື່ອແນໃສ່ຄັດຄ້ານຫຼັກໝັ້ນຂອງຄູ່ແຂ່ງໃນ 6 ບັນຫາທີ່ກ່ຽວຂ້ອງເຖິງຫົວຂໍ້ຂອງ ການໂຕ້ວາທີ. ສຳລັບແຕ່ລະຫົວຂໍ້, ໂຄສົກຈະຕັ້ງຄຳຖາມ ແລະ ບັນດາຜູ້ສະໝັກຮັບເລືອກຕັ້ງຕ້ອງມີຄຳຕອບໃນເວລາ 2 ນາທີ. ສາມຫົວຂໍ້ຂອງ ການໂຕ້ວາທີທຳອິດໃນການເລືອກຕັ້ງປີນີ້ ແມ່ນທິດທາງໃນອະນາຄົດຂອງປະເທດ ອາເມລິກາ, ຕ້ອງເຮັດແນວໃດເພື່ອໃຫ້ປະເທດມີຄວາມວັດທະນາຖາວອນ ແລະ ຮັບປະກັນຄວາມປອດໄພໃຫ້ແກ່ປະເທດ. ບັນດາບັນຫາກ່ຽວຂ້ອງເຖິງຫົວຂໍ້ນີ້, ຜູ້ສະໝັກຮັບເລືອກຕັ້ງສອງທ່ານລ້ວນແຕ່ໄດ້ຮັບຈາກປະທານຂອງ ການໂຕ້ວາທີກ່ອນນັ້ນ 1 ສັບປະດາແລ້ວ, ເພື່ອໃຫ້ທັງສອງທ່ານມີເວລາກະກຽມ ແລະ ຄົ້ນຄ້ວາບັນດາຈຸດດີ, ຈຸດອ່ອນຂອງຄູ່ແຂງ.
ເລີ່ມດຳເນີນການໂຕ້ວາທີທີ່ໄດ້ຖ່າຍທອດສົດທາງໂທລະພາບ
(ພາບ: AFP)
|
ການຊ່ວງເສັງທີ່ຂ້ຽວຂາດລະຫວ່າງຜູ້ສະໝັກຮັບເລືອກຕັ້ງສອງທ່ານ
ພາຍຫຼັງ ໂຕ້ວາທີເປັນເວລາ 90 ນາທີຢູ່ມະຫາວິທະຍາໄລ Hofstra ທີ່ Hempstead, ນະຄອນ ນິວຢອກ, ຜູ້ສະໝັກຮັບເລືອກຕັ້ງ ສອງທ່ານແມ່ນ ທ່ານນາງ Hilary Clinton ແລະ ທ່ານ Donald Trump ໄດ້ສິ້ນສຸດການໂຕ້ວາທີໂດຍກົງທຳອິດ. ທັງສອງທ່ານໄດ້ໝູນໃຊ້ເວທີປາໄສນີ້ເພື່ອຄັດຄ້ານບັນດາທັດສະນະ, ນະໂຍບາຍຂອງກັນ ແລະ ທ່ານນາງ Hilary Clinton ໄດ້ຮັບການຕີລາຄາວ່າ ໄດ້ສ້າງຄວາມປະທັບໃຈຫຼາຍກວ່າໃນການໂຕ້ວາທີນີ້. ຕາມຜົນແຫ່ງການຢັ່ງຫາງສຽງທາງອິນເຕີແນດ, ທ່ານນາງ
Hilary Clinton ໄດ້ຮັບການຕີລາຄາວ່າ ສາມາດສ້າງຄວາມປະທັບໃຈກວ່າ ດ້ວຍຈຳນວນບັດສະໜັບສະໜູນແມ່ນ 54% , ໃນຂະນະນັ້ນ, ທ່ານ Donald Trump ໄດ້ຮັບບັດສະໜັບສະໜູນພຽງ 45% ເທົ່ານັ້ນ, ເຖິງວ່າພວມນຳໜ້າຄູ່ແຂ່ງໃນການຢັ່ງຫາງສຽງຄັ້ງຕ່າງໆເກືອບທັງໝົດແລ້ວກໍ່ຕາມ, ແຕ່ທ່ານນາງ Clinton ຍັງສະແດງຄວາມລະມັດລະວັງທີ່ສຸດຢູ່. ກ່ອນນີ້ສອງສາມສັບປະດາ, ໜ່ວຍຫາສຽງເລືອກຕັ້ງຂອງອະດີດລັດຖະມົນຕີການຕ່າງປະເທດ ອາເມລິກາ ໄດ້ແຕ່ງຕັ້ງທີ່ປຶກສາທີ່ມີປະສົບການ 2 ທ່ານ ແມ່ນ Ron Klain ແລະ Karen Dunn ຮັບຜິດຊອບດ້ານເນື້ອໃນບັນດາບົດກ່າວປາໄສ. ຄຽງຂ້າງໄຈ້ແຍກ ບັນດາຂໍ້ສະເໜີນະໂຍບາຍຂອງທ່ານ Trumph ແລ້ວ, ທ່ານນາງກໍ່ຄົ້ນຄ້ວາບັນດາ video ຂົນຂວາຍຫາສຽງເລືອກຕັ້ງຂອງເສດຖີເງິນຕື້ນີ້ ເພື່ອຊອກຫາຈຸດອ່ອນຂອງຄູ່ແຂ່ງ. ເຖິງຢ່າງໃດກໍ່ຕາມ, ຕາມບັນດານັກໄຈ້ແຍກແລ້ວ, ເຖິງວ່າມີປະສົບການໃນການເຄື່ອນໄຫວບົນເວທີການເມືອງອາເມລິກາຫຼາຍແລ້ວກໍ່ຕາມ, ແຕ່ທ່ານນາງ Clinton ຍັງຕ້ອງມີຄວາມລະມັດລະວັງທີ່ສຸດຕໍ່ຄວາມສາມາດປາຖະກະຖາ ແລະ ດຶງດູດຜູ້ຊົມຂອງທ່ານ Trumph, ເຊິ່ງແມ່ນຜູ້ທີ່ມີຄວາມລຶ້ງເຄີຍໃນບັນດາລາຍການໂທລະພາບນີ້.
ໃນຂະນະນັ້ນ, ເສດຖີເງິນຕື້ອະສັງຫະລິມະຊັບ Trump ພວມກຳແໜ້ນບັນດາ “ປັດໄຈ” ຊ່ວຍໃຫ້ທ່ານຍາດໄດ້ທ່າແຮງຕໍ່ຄູ່ແຂ່ງໃນບັນດາການໂຕ້ວາທີຈະມາເຖິງ. ພົ້ນເດັ່ນໃນນັ້ນແມ່ນທ່ານ ອະດິດຜູ້ອຳນວຍການຊ່ອງໂທລະພາບ Fox News Roger Ailes, ຜູ້ສາມາດໜູນຊ່ວຍໃຫ້ທ່ານ Trump ດ້ານທັກສະ ແລະ ຍຸດໂທບາຍໃນການໂຕ້ວາທີ. ການຂາດປະສົບການໃນເວທີການເມືອງຂອງທ່ານ Trump ອາດຈະໄດ້ຮັບການໜູນຊ່ວຍຈາກພົນຕີຜູ້ກິນເບ້ຍບຳນານ Mike Flynn, ຜູ້ເຄີຍດຳລົງຕຳແໜ່ງຫົວໜ້າກົມສືບຂ່າວການທະຫານ (ກະຊວງປ້ອງກັນປະເທດ ອາເມລິກາ) ໃນໄລຍະ 2012 – 2014.
ຜູ້ມີສິດເລືອກຕັ້ງອາເມລິກາລໍຄອຍສິ່ງໃດແດ່?
ການເລືອກຕັ້ງປະທານາທິບໍດີ ອາເມລິກາ ປີນີ້ໄດ້ດຳເນີນໄປໃນຈຸດເວລາປະຊາຊົນ ອາເມລິກາ ສ່ວນຫຼາຍ ບໍ່ພໍໃຈຕໍ່ພື້ນຖານເສດຖະກິດ, ເຖິງວ່າອັດຕາຜູ້ຫວ່າງງານໄດ້ຫລຸດລົງ ແຕ່ສະພາບພື້ນຖານເສດຖະກິດ ອາເມລິກາ ເວົ້າລວມຍັງເຮັດໃຫ້ຜູ້ມີສິດເລືອກຕັ້ງມີຄວາມວິຕົກວັງວົນ. ດັ່ງນັ້ນ, ບັນດານະໂຍບາຍລະອຽດເພື່ອຟື້ນຟູປະເທດ ອາເມລິກາ ແລະ ການກຳນົດຍຸດທະສາດໃຫ້ແກ່ອະນາຄົດແມ່ນບັນຫາທີ່ປະຊາຊົນປະເທດນີ້ຢາກໄດ້ຮັບຟັງ. ເຮັດແນວໃດເພື່ອເພີ່ມເງິນເດືອນພື້ນຖານ, ພັດທະນາການສຶກສາ ແລະ ລະບົບສາທາລະນະສຸກ, ຄວາມສະເໝີພາບລະຫວ່າງຍິງ - ຊາຍ, ແນ່ນອນວ່ານັ້ນຈະແມ່ນບັນດາຫົວຂໍ້ທີ່ດຶງດູດຄວາມສົນໃຈຈາກຜູ້ມີສິດເລືອກຕັ້ງ. ເລື່ອງສຸມໃສ່ຂຸດຄົ້ນບັນດານະໂຍບາຍທີ່ແທດຈິງໃຫ້ແກ່ປະຊາຊົນ ອາເມລິກາ ເອງ ຈະແມ່ນຄະແນນບວກຂອງຜູ້ສະໝັກຮັບເລືອກຕັ້ງແຕ່ລະທ່ານໃນໄລຍະຊ່ວງເສັງສຸດທ້າຍນີ້ເພື່ອກາຍເປັນຜູ້ນຳທຳນຽບຂາວ ໃນອາຍຸການຈະມາເຖິງ.