(vovworld)-
ພາຍຫຼັງການໄປປະຕິບັດງານຢູ່ 3 ປະເທດເອີລົບ, ວັນທີ 28/3, ປະທານາທິບໍດີອາເມລິກາ Barack Obama ຈະເດີນທາງໄປຢ້ຽມຢາມອາຣາບີ ຊາອູດີ ຊື່ງແມ່ນປະເທດອິດຊະລາມທີ່ມີການພົວພັນທາງການທູດເປັນເວລາ 70 ປີກັບອາເມລິກາ. ໃນການຢ້ຽມຢາມຕາເວັນອອກກາງເປັນຄັ້ງທີ 2 ນັບແຕ່ປີ 2009, ປະທານາທິບໍດີອາເມລິກາ Barack Obama ປາດຖະໜາຢາກປັບປຸງສາຍພົວພັນລະຫວ່າງສອງປະເທດໃຫ້ດີກ່ວາເກົ່າ. ແຕ່ເພື່ອບັນລຸໄດ້ຈຸດປະສົງດັ່ງກ່າວ, ທ່ານເຈົ້າຂອງທຳນຽບຂາວຕ້ອງຜ່ານຜ່າບັນດາສິ່ງທ້າທາຍບໍ່ແມ່ນໜ້ອຍ.
ໃນການຢ້ຽມຢາມພັນທະມິດມາແຕ່ດົນນານອາຣາບີ ຊາອູດີ, ປະທານາທິບໍດີອາເມລິກາ Barack Obama ສຸມໃສ່ປຶກສາຫາລືບັນດາບັນຫາຄວາມສະຫງົບໃນພາກພື້ນ, ໃນນັ້ນມີເສິກກາງເມືອງຊີຣີ ແລະ ການເຈລະຈາສາກົນກ່ຽວກັບໂຄງການນິວເຄຼຍຂອງອີຣານ. ປະທານາທິບໍດີອາເມລິກາ Barack Obama ຍັງຈະພົບປະກັບບັນດາການນຳສະພາຮ່ວມມືເຂດອ່າວເປີເຊຍ (GCC) ທີ່ສຳນັກງານຂອງອົງການນີ້ຢູ່ Riyadh.
ທ່ານ Bandar bin Sultan
ຜູ້ນຳຫນ້າອົງການສືບລາຊະການລັບ ອາຣາບີ ຊາອູດີ
(ພາບ: Reuters)
ບັນດາຄວາມບໍ່ລົງລອຍກັນ
ກ່ອນການຢ້ຽມຢາມ, ທ່ານ Jay Carney ໂຄສົກທຳນຽບຂາວຢືນຢັນວ່າ, ອາຣາບີ ຊາອູດີ ແມ່ນຄູ່ຮ່ວມມືທີ່ສະໜິດສະໜົມຂອງອາເມລິກາ. ເຖິງວ່າສອງປະເທດຍັງມີບັນດາຄວາມບໍ່ລົງລອຍກັນກໍ່ຕາມ ແຕ່ສິ່ງດັ່ງກ່າວກໍ່ບໍ່ສາມາດປ່ຽນແປງສາຍພົວພັນທີ່ສຳຄັນ ແລະ ສະໜິດສະໜົມລະຫວ່າງສອງຝ່າຍໄດ້. ຄຳເຫັນຂອງໂຄສົກທຳນຽບຂາວແມ່ນເພື່ອສ້າງຄວາມອຸ່ນອຽນໃຈໃຫ້ແກ່ຫາງສຽງ ແຕ່ຄວາມຈິງແລ້ວ, ໃນ 2,3 ປີ ມານີ້, ການພົວພັນລະຫວ່າງອາເມລິກາ- ອາຣາບີ ຊາອູດີ ໄດ້ຊົ່ວຮ້າຍລົງໃນປະຫວັດສາດ 70 ປີ ແຫ່ງການສ້າງຕັ້ງສາຍພົວພັນທາງການທູດລະຫວ່າງສອງປະເທດ.
ການພົວພັນແບບພັນທະມິດທີ່ມີມາແຕ່ດົນນານລະຫວ່າງ ອາເມລິກາ- ອາຣາບີ ຊາອູດີ ນັບມື້ນັບເຄັ່ງຕຶງຂຶ້ນນັບແຕ່ຕົ້ນປີ 2011 ເຊິ່ງກ່ຽວຂ້ອງເຖິງບັນດາຄວາມຂາດສະຖຽນລະພາບຢູ່ຕາເວັນອອກກາງ ແລະ ອາຟຼິກກາເໜືອ ຊື່ງສະແດງອອກຢ່າງຈະແຈ້ງທີ່ສຸດແມ່ນເລື່ອງຍາມໃດ ອາຣາບີ ຊາອູດີ ກໍ່ວິຕົກກັງວົນຕໍ່ວິທີແກ້ໄຂຂອງອຳນາດການປົກຄອງ ອາເມລິກາ ຕໍ່ບັນດາບັນຫາສະດຸ້ງໄວຂອງພາກພື້ນຄື: ອີຣານ, ຊີຣີ, ອີຢີບ…
ສະນັ້ນ, ວົງການນັກສັງເກດການຖືວ່າ: ໃນການຢ້ຽມຢາມຂອງ ປະທານາທິບໍດີອາເມລິກາ Barack Obama, ອາຣາບີ ຊາອູດີ ອາດຈະສືບຕໍ່ເຕື້ອງເຖິງເລື່ອງອາເມລິກາ ບໍ່ເດັດດ່ຽວມອບຄວາມຮັບຜິດຊອບໃຫ້ແກ່ອຳນາດການປົກຄອງຂອງປະທານາທິບໍດີ Bashar al Assad ກ່ຽວກັບສິ່ງທີ່ເອີ້ນວ່າຕ້ານຄືນ ປຊຊ ຊີຣີ ຢ່າງເປີດເຜີຍ, ພິເສດ, ແມ່ນເລື່ອງ ອາເມລິກາ ປ່ຽນແປງຂໍ້ຕົກລົງບໍ່ບຸກໂຈມຕີດ້ານການທະຫານແນໃສ່ຊີຣີ ໃນລະດູແລ້ງປີ 2013 ໂດຍກະທັນຫັນ.
ອີກຢ່າງໜື່ງ, ທ່າທີອ່ອນໂຍນຂອງອາເມລິກາ ແລະ ຝ່າຍຕາເວັນຕົກທີ່ມີຕໍ່ອີຣານ ໄດ້ກໍ່ຄວາມວິຕົກກັງວົນຫຼາຍຢ່າງໃຫ້ແກ່ ອາຣາບີ ຊາອູດີ ກໍ່ຄືບັນດາປະເທດເຂດອ່າວເປີເຊຍ. ອາຣາບີ ຊາອູດີ ບໍ່ພຽງແຕ່ມີຄວາມວິຕົກກັງວົນຕໍ່ຄວາມມຸ່ງຫວັງກຳມະສິດນິວເຄຼຍຂອງເຕເຮຣານ ເທົ່ານັ້ນ, ຫາກຍັງວິຕົກກັງວົນຕໍ່ເລື່ອງອີຣານ ສະໜັບສະໜູນອຳນາດການປົກຄອງປະທານາທິບໍດີຊີຣີ Bashar al Assad ອີກດ້ວຍ. ອາຣາບີ ຊາອູດີ ແລະ ຫຼາຍປະເທດເຂດອ່າວເປີເຊຍ ຖືວ່າ: ອີຣານ ພວມກໍ່ຄວາມຂາດສະຖຽນລະພາບໃຫ້ແກ່ພາກພື້ນ, ຝືນກັບທັດສະນະຂອງອາເມລິກາ.
ຄວາມຫຍູ້ງຍາກອີກຢ່າງໜຶ່ງສຳລັບທ່ານ Barack Obama ເມື່ອກັບຄືນຕາເວັນອອກກາງຄັ້ງນີ້ ແມ່ນ ອາຣາບີ ຊາອູດີ ເກືອບຄືວ່າພວມຊອກຫາການຮ່ວມມືໃໝ່ຈາກບັນດາປະເທດອາຊີ ແທນໃຫ້ເອົາໃຈໃສ່ເປັນພິເສດເຖິງອາເມລິກາ. ສິ່ງດັ່ງກ່າວສະແດງອອກດ້ວຍເລື່ອງສະເດັດເຈົ້າ ອາຣາບີ ຊາອູດີ Salman ຫາກໍ່ໄປຢ້ຽມຢາມລັດຖະກິດເຖິງບັນດາປະເທດປາກີສະຖານ, ອິນເດຍ, ຈີນ ແລະ ຍີ່ປຸ່ນ…
ການພົບປະລະຫວ່າງລັດຖະມົນຕີການຕ່າງ
ປະເທດອາເມລິກາ-ອາຣາບີ ຊາອູດີ
(ພາບ: Reuters)
ໄກ່ເກ່ຍພັນທະມິດ
ວົງການນັກການເມືອງອາເມລກາ ເຂົ້າໃຈແຈ້ງບັນດາຄວາມບໍ່ລົງລອຍກັນທີ່ພວມກີດຂວາງການພົວພັນລະຫວ່າງສອງປະເທດ. ສະນັ້ນ, ບໍ່ແມ່ນເລື່ອງບັງເອີນທີ່ກ່ອນການຢ້ຽມຢາມ ອາຣາບີ ຊາອູດີ, ວັນທີ 18/3, ວໍຊິງຕັນ ໄດ້ຮຽກຮ້ອງລັດຖະບານຊີຣີ ປິດປະຕູສະຖານທູດຢູ່ນະຄອນຫຼວງວໍຊິງຕັນ ແລະ ບັນດາສະຖານກົງສູນຢູ່ Michigan, Texas ໂດຍທັນທີ. ພາລະກອນເຮັດວຽກຢູ່ບັນດາອົງການການທູດນີ້ທີ່ບໍ່ແມ່ນພົນລະເມືອງອາເມລິກາ ຕ້ອງອອກຈາກອາເມລິກາ ກ່ອນວັນທີ 31/3.
ກ່ອນການຢ້ຽມຢາມເປັນເວລາ 3 ວັນ, ໃນການພົບປະກັບເຈົ້າຟ້າຊາຍ Sheikh Mohamed bin Zayed ຂອງລາຊະອານາຈັກ Abu Dhabi, ປະທານາທິບໍດີອາເມລິກາ Barack Obama ຢືນຢັນວ່າ: ອາເມລິກາ ຈະບໍ່ປະໃຫ້ບັນດາພັນທະມິດທີ່ມີມາແຕ່ດົນນານຢູ່ເຂດອ່າວເປີເຊຍ ມີຄວາມຮູ້ສຶກວ່າຖືກປະລະ.
ປະຫວັດສາດໃຫ້ເຫັນວ່າ, ການພົວພັນລະຫວ່າງອາເມລິກາ-ອາຣາບີ ຊາອູດີ ແມ່ນການພົວພັນເພື່ອຜົນປະໂຫຍດຂອງແຕ່ລະຝ່າຍໃນແຕ່ລະຈຸດເວລາ. ໃນ 70 ປີແຫ່ງການຮ່ວມມືກັບອາເມລິກາ, ປະເທດອິດຊະລາມ ອາຣາບີ ຊາອູດີ ໄດ້ມີນັກອຸປະຖຳຄວາມປອດໄພທີ່ເຂັ້ມແຂງທີ່ສຸດ. ສ່ວນວໍຊິງຕັນ ກໍ່ມີແຫຼ່ງສະໜອງນ້ຳມັນທີ່ອຸດົມສົມບູນ ແລະ ຖານທີ່ໝັ້ນທີ່ມີຄ່າຢູ່ Riyadh ເພື່ອແນໃສ່ຮັກສາ, ເປີດກ້ວາງບົດບາດຂອງຕົນຢູ່ຕາເວັນອອກກາງ.
ຍ້ອນເຫດນັ້ນ, ດ້ວຍບັນດາຜົນປະໂຫຍດລວມ ແລະ ສ່ວນຕົວ, ວົງການນັກສັງເກດການຖືວ່າ, ຜ່ານການຢ້ຽມຢາມ ອາຣາບີ ຊາອູດີ, ປະທານາທິບໍດີອາເມລິກາ Barack Obama ຈະໝູນໃຊ້ໂອກາດຢ່າງເຖິງຖອງ ເພື່ອແນໃສ່ແກ້ໄຂຄວາມບໍ່ລົງລອຍກັນ ເຖິງວ່າ ສິ່ງທ້າທາຍທີ່ວາງອອກບໍ່ແມ່ນໜ້ອຍ./.