(vovworld)- ກ່ອນນີ້ 70 ປີ, ເປັນຄັ້ງທຳອິດທີ່ຜ່ານຄື້ນກະຈາຍສຽງຂອງວິທະຍຸກະຈາຍສຽງຫວຽດນາມ, ທ່ານປະທານໂຮ່ຈິມີນ ໄດ້ອ່ານບົດກາບກອນອວຍພອນປະຊາຊົນໃນທົ່ວປະເທດ ເນື່ອງໃນໂອກາດບຸນປີໃຫມ່ປະຈຳຊາດ(ບຸນເຕັດ) . ນັບແຕ່ນັ້ນຈົນຮອດມື້ເຖິງແກ່ມໍລະນະກຳ, ທ່ານປະທານໂຮ່ຈິມີນ ໄດ້ແຕ່ງກາບກອນອວຍພອນບຸນເຕັດດ້ວຍເນື້ອໃນເຂົ້າໃຈງ່າຍ, ກະທັດລັດ 21 ບົດ ແຕ່ສ້າງຄວາມຕື້ນຕັນໃຈທີ່ສຸດ. ເຖິງວ່າບົດກາບກອນບໍ່ຍາວປານໃດ, ເນື້ອໃນທັງຮຽກຮ້ອງ, ທັງອວຍພອນລະດູບານໃຫມ່” ແຕ່ເມື່ອໂອກາດບຸນເຕັດ, ລະດູບານໃຫມ່ວຽນມາ, ປະຊາຊົນຫວຽດນາມ ພັດມີຄວາມຮູ້ສຶກຄວາມໝາຍຂອງ ກາບກອນ ແຕ່ລະຄຳທີ່ຈິງໃຈ, ລຽບງ່າຍນັ້ນຢ່າງຈະແຈ້ງ. ບົດຂຽນຂອງນັກຂ່າວ ເຟືອງທູຍ
ເມື່ອປະເທດຊາດພວມຢູ່ໃນໄລຍະສົງຄາມ, ບັນດາພາຫະນະສື່ມວນຊົນ ຍັງຈຳກັດຢູ່, ກະຈາຍສຽງແມ່ນຊ່ອງສື່ສານມີປະສິດທິຜົນ, ແລະ ເປັນເຄື່ອງມືສົ່ງຂໍ້ມູນຂ່າວສານ ເຖິງປະຊາຊົນໃນທົ່ວປະເທດຢ່າງລຽນຕິດ. ເມື່ອບຸນປີໃຫມ່ປະຈຳຊາດວຽນມາ, ຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ແມ່ນຈຸດເວລາເຮັດໃຫ້ທຸກຄົນລ້ວນແຕ່ມີຄວາມຮູ້ສຶກຕື້ນຕັນໃຈລໍຖ້າຮັບຟັງປະທານໂຮ່ຈິມີນ ອວຍພອນບຸນເຕັດຜ່ານຄື້ນຂອງວິທະຍຸກະຈາຍສຽງຫວຽດນາມ.
 ປະທານ ໂຮ່ຈີມິນ ຢູ່ VOV
|
ບັນດາວັກ,ຕອນໃນບົດກາບກອນມີລັກສະນະຈິດໃຈຊາດ
ສຳລັບນັກກະວີ ເວືອງຈ້ອງ, ຄາວເຍົາໄວຂອງທ່ານແມ່ນຕິດພັນກັບບັນຍາກາດໃນຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ ໄດ້ຮັບຟັງ ກາບກອນອວຍພອນບຸນເຕັດຂອງປະທານໂຮ່ຈິມີນ.
“ເມື່ອຍັງຢູ່ບ້ານເກີດເມືອງນອນ, ບ້ານຂອງຂ້າພະເຈົ້າມີຄວາມໂຊກດີແມ່ນໃກ້ກັບ ກອງພົນທະຫານ ໄດ້ດຶງສາຍໂທລະໂຄ່ງຍາວກວ່າ 1 ກິໂລແມັດ ຈາກກອງພົນທະຫານມາເຖິງບ້ານເພື່ອຕິດຕັ້ງໂທລະໂຄ່ງ ແລະ ຮັບຟັງ ກາບກອນອວຍພອນບຸນເຕັດຂອງປະທານໂຮ່ຈິມີນຜ່ານໂທລະໂຄ່ງ. ຕອນຄ່ຳຂອງວັນພຸດ ຮອດເວລາ 21 ໂມງເຄິ່ງ, ພວກຂ້າພະເຈົ້າໄດ້ເຕົ້າໂຮມກັນເພື່ອຮັບຟັງລາຍການ “ສຽງກາບກອນ”. ສ່ວນຕອນຄ່ຳວັນເສົາ ແມ່ນຮັບຟັງ “ບົດລະຄອນເວທີສະແດງຜ່ານໂທລະໂຄ່ງ. ພິເສດ ໃນຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ ໝົດທຸກຄົນເຕົ້າໂຮມກັນເພື່ອຮັບຟັງ ກາບກອນອວຍພອນບຸນເຕັດຂອງປະທານໂຮ່ຈິມິນ.”
ທ່ານປະທານໂຮ່ຈິມີນ ຈື່ຄຳກາບກອນໃນເລື່ອງກ່ຽວເປັນຈຳນວນຫລວງຫລາຍ ແລະ ເປັນຜູ້ມີຄວາມເຂົ້າໃຈກາບກອນສຳຜັດ 6,8 ຢ່າງລະອຽດລະອໍ. ສະນັ້ນ ຄຳກາບກອນຂອງເພີ່ນ ເຂົ້າໃຈງ່າຍ, ໂຄງຮ່າງເປັນລະບົບລະບຽບ, ທຳນອງມ່ວນ. ໂດຍແມ່ນຜູ້ນຳຂອງປະເທດຊາດ, ເນື້ອໃນກາບກອນຂອງເພີ່ນ ມີລັກສະນະຄາດຄະເນສູງ, ຍາມໃດກໍຢັ້ງຢືນເປົ້າໝາຍອັນສູງສົ່ງຂອງການຕໍ່ສູ້ກູ້ຊາດ ນັ້ນແມ່ນ ຄວາມເປັນເອກະລາດ, ເສລີພາບເພື່ອປະເທດຊາດ, ຄວາມອີ່ມໜຳສຳລານພຸນສຸກໃຫ້ແກ່ປະຊາຊົນທຸກຄົນ. ຄຳກາບກອນຂອງປະທານໂຮ່ຈິມີນ ແມ່ນຈະແຈ້ງ, ລຽບງ່າຍ ແຕ່ມີຄວາມເດັດດ່ຽວ, ຢັ້ງຢືນ ຈິດໃຈ, ຄວາມຕັດສິນໃຈຂອງກອງທັບ ແລະ ປະຊາຊົນຫວຽດນາມ. ຄືໃນບົດກາບກອນອວຍພອນບຸນເຕັດປີລະກາປີ 1969, ເພີ່ນຂຽນວ່າ: “ປີຜ່ານມາໄດ້ຮັບໄຊຊະນະຢ່າງສະຫງ່າລາສີ, ປີນີ້ ແນວຫນ້າຈະໄດ້ຮັບໄຊຊະນະໃຫຍ່ກວ່າ, ເພື່ອເອກະລາດ, ເພື່ອເສລີພາບ, ຕີໃຫ້ອາເມລິກາຖອຍໄປ, ຕີໃຫ້ຫຸ່້ນໄຊງ່ອນປະລາໄຊໄປ, ນັກຮົບ, ປະຊາຊົນ ກ້າວຂຶ້ນ, ສອງພາກເຫນືອ -ໃຕ້ ໂຮມເຂົ້າກັນຕ້ອນຮັບລະດູບານໃຫມ່ຢ່າງເບີກບານມ່ວນຊື່ນກວ່າລະດູບານໃຫມ່ທຸກໆປີ. ບົດກາບກອນດັ່ງກ່າວໄດ້ຮັບການແຕ່ງເປັນບົດດົນຕີຈາກນັກດົນຕີ ຮູຍທຸກ ສະນັ້ນ ຍິ່ງມີຄຸນຄ່າລະດົມກຳລັງໃຈ, ຊຸກຍູ້ ຈິດໃຈສູ້ຮົບຂອງກອງທັບ ແລະ ປະຊາຊົນໃນໄລຍະນັ້ນ. ນັກກະວີ ເວືອງຈ້ອງ, ອະດີດນາຍທະຫານຫວຽດນາມ ເລົ່າຄືນສູ່ຟັງວ່າ:
“ພົນທະຫານຄືພວກຂ້າພະເຈົ້າບໍ່ພຽງແຕ່ໄດ້ຮັບຟັງປະທານໂຮ່ຈິມີນ ອ່ານບົດກາບກອນອວຍພອນບຸນເຕັດເທົ່ານັ້ນ ຫາກຍັງໄດ້ຮັບຟັງລາຍການສິລະປະຈາກກອງສິລະປະກອນຂອງວິທະຍຸກະຈາຍສຽງຫວຽດນາມສະແດງບົດເພງທີ່ແຕ່ງດ້ວຍບົດກາບກອນຂອງເພີ່ນ ສະນັ້ນ ຄວາມໝາຍຂອງບົດກາບກອນຍິ່ງເພີ່ມຂຶ້ນ.”
ສ້າງຄວາມດູດດື່ມ, ຄວາມປະເອີບໃຈໃນປີໃຫມ່
ເມື່ອທົບທວນຄືນຊຸມປີແຫ່ງການຕໍ່ຕ້ານທີ່ຫຍຸ້ງຍາກລຳບາກ, ບັນດາບົດກາບກອນອວຍພອນບຸນເຕັດຂອງປະທານໂຮ່ຈິມີນ ຄືດັ່ງຄຳຮຽກຮ້ອງໄດ້ສົ່ງຜ່ານ ສື່ມວນຊົນປະເພດຕ່າງໆທີ່ມີປະສິດທິຜົນທີ່ສຸດໃນໄລຍະນັ້ນ ນັ້ນແມ່ນວິທະຍຸກະຈາຍສຽງ. ແລະນັບແຕ່ປີໃຫມ່ປີກຸນ 1947 ເປັນຕົ້ນມາ, ເລື່ອງອ່ານບົດກາບກອນອວຍພອນບຸນເຕັດຜ່ານຄື້ນວິທະຍຸກະຈາຍສຽງຫວຽດນາມ ໄດ້ກາຍເປັນຈຸດທີ່ດີງາມຂອງກິລິຍາທ່າທາງປະທານໂຮ່ຈິມີນ. ບົດກາບກອນອວຍພອນບຸນເຕັດຂອງປະທານໂຮ່ຈິມີນ ຍາມໃດກໍໄດ້ຮັບຄວາມລໍຄອຍໃນຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ປະຈຳປີ. ນັກຂ່າວ ເຈີນດືກນວຍ, ອະດີດນັກຂ່າວວິທະຍຸກະຈາຍສຽງປົດປ່ອຍ A ຖືວ່າ: ຄວາມໝາຍເລິກເຊິ່ງໃນບັນດາບົດກາບກອນອວຍພອນບຸນເຕັດຂອງປະທານໂຮ່ຈິມີນ ແມ່ນສ້າງຄວາມດູດດື່ມໃຈ, ຄວາມປະເອີບໃຈ, ຄວາມເຊື່ອໝັ້ນເມື່ອກ້າວເຂົ້າສູ່ປີໃຫມ່.
“ແຕ່ລະປີ ເມື່ອຮອດຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ ຍາມໃດກໍມີບົດກາບກອນອວຍພອນບຸນເຕັດຂອງປະທານປະເທດ. ແຕ່ເພື່ອໃຫ້ມີບົດກາບກອນມ່ວນ, ສ້າງຄວາມຕື່ນຕັນໃຈຄືແນວນັ້ນ, ພຽງແຕ່ທ່ານປະທານໂຮ່ຈິມີນຈຶ່ງສາມາດແຕ່ງໄດ້. ດ້ວຍຈິດໃຈຕົ້ນປີໃຫມ່ຈະໄດ້ຮັບໄຊຊະນະຫລາຍຢ່າງ, ມີຄວາມເຊື່ອໝັ້ນ ແລະການກະທຳລ້ວນແຕ່ເລີ່ມມາຈາກບົດກາບກອນຂອງເພີ່ນ.”
ມີໄລຍະຫນຶ່ງ, ເລື່ອງຮັບຟັງບົດກາບກອນອວຍພອນບຸນເຕັດຂອງປະທານໂຮ່ຈິມີນໃນຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ຜ່ານຄື້ນຂອງວິທະຍຸກະຈາຍສຽງຫວຽດນາມ ແມ່ນຄວາມຊີນເຄີຍຂອງທົ່ວປວງຊົນ. ນັບທັງເມື່ອທ່ານປະທານໂຮ່ຈິມີນ ໄດ້ລ່ວງລັບໄປ ຂອງຂວັນດ້ານຈິດໃຈອັນລ້ຳຄ່າໃນຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ ຍາມໃດກໍແມ່ນສິ່ງທີ່ສັກກະລະບູຊາ ເປັນຄຳຕັກເຕືອນໃຫ້ລຸ້ນຄົນປະຈຸບັນ ຮູ້ຈັກເຖິງການເຄົາລົບບັນດາຄຸນຄ່າອັນລ້ຳເລີດຂອງຄວາມເປັນເອກະລາດ, ເສລີພາບ, ຄວາມສາມັກຄີ, ສັນຕິພາບ.