(vovworld) – ນັບແຕ່ວັນທີ 1/7 ເປັນຕົ້ນໄປ, Croatia ໄດ້ກາຍເປັນສະມາຊິກທີ 28 ຂອງສະຫະພາບເອີລົບ (ອີຢູ) ຢ່າງເປັນທາງການ. ພາຍຫຼັງ 10 ປີແຫ່ງການຍື່ນໃບຮ້ອງຂໍ ແລະ 7 ປີ ແຫ່ງການມານະພະຍາຍາມປະຕິບັດບັນດາຄວາມຮຽກຮ້ອງຂອງອີຢູ. ນີ້ໄດ້ຮັບຖືວ່າ ແມ່ນຂີດໝາຍສຳຄັນສຳລັບການພັດທະນາຂອງ Croatia, ແຕ່ນີ້ກໍ່ແມ່ນການທ້າທາຍທີ່ມີຕໍ່ປະເທດນີ້.
(ພາບ ອິນເຕີແນດ)
ເພື່ອກາຍເປັນສະມາຊິກອີຢູ, Croatia ຕ້ອງຜ່ານການປະຕິຮູບເປັນເວລາ 7 ປີ, ໃນນັ້ນມີການປະຕິບັດຕາມຄຳຮຽກຮ້ອງຂອງອີຢູ ກ່ຽວກັບການຍູ້ແຮງການປະຕິຮູບໂຄງປະກອບ ເພື່ອແນໃສ່ຊຸກຍູ້ການເຕີບໂຕທາງດ້ານເສດຖະກິດ ແລະ ຟື້ນຟູຕະຫຼາດແຮງງານຄືນໃໝ່, ຄວບຄູມໄພສໍ້ລາດບັງຫຼວງ, ຕໍ່ສູ້ຕ້ານອາດສະຍາກຳທີ່ມີການຈັດຕັ້ງ ແລະ ຮ່ວມມືກັບສານສາກົນເພື່ອພິພາກສາກ່ຽວກັບອາດສະຍາກຳສົງຄາມຢູ່ ຢູໂກສະລາເວຍ ເກົ່າ. ນີ້ແມ່ນໄລຍະທາງຍາວ ແລະ ປະສົບກັບຄວາມຫຍຸ້ງຍາກຫຼາຍຢ່າງ.
ຍ້ອນເຫດນັ້ນ, ຈຸດເວລາທີ່ Croatia ເຂົ້າເປັນສະມາຊິກອີຢູ ຈຶ່ງມີຄວາມໝາຍສຳຄັນກວ່າ. ປະທານຄະນະກຳມະການເອີລົບທ່ານ Jose Manuel Barroso ໄດ້ກ່າວປາໄສອ່ວຍພອນ ໂດຍເນັ້ນໜັກວ່າ ເອີລົບຈະກາຍເປັນຊາຍຄາລວມຂອງ Croatia ແລະ ຈະນຳເອົາອະນາຄົດອັນດີງາມມາໃຫ້ປະເທດນີ້. ສ່ວນປະທານາທິບໍດີ Croatia Ivo Josipovic ພັດຢັ້ງຢືນວ່າ, ເລື່ອງເຂົ້າເປັນສະມາຊິກອີຢູ ຢ່າງເປັນທາງການ ຈະເປັນຂີດໝາຍໃໝ່ໃນປະຫວັດສາດອັນຍາວນານຂອງປະເທດນີ້.
ຕາມການຄາດຄະເນແລ້ວ, ການເຂົ້າເປັນສະມາຊິກອີຢູ ຈະນຳເອົາບ້ວງເງິນຊ່ວຍເຫຼືອເກືອບ 12.000 ຕື້ເອີໂຮມາໃຫ້ປະເທດທີ່ມີພົນລະເມືອງ 4,4 ລ້ານຄົນນີ້, ນັ້ນແມ່ນຍັງບໍ່ທັນຄິດໄລ່ເຖິງແຫຼ່ງລາຍຮັບງົບປະມານທີ່ຈະເພີ່ມຂຶ້ນ ນັບແຕ່ Croatia ລົບລ້າງຊາຍແດນພູມສາດກັບບັນດາປະເທດສະມາຊິກອີຢູ. ກ່ອນໜ້ານັ້ນ, ທີ່ກອງປະຊຸມພິເສດຂອງສະພາແຫ່ງຊາດເມື່ອວັນທີ 29/6, ທ່ານນາຍົກລັດຖະມົນຕີ Croatia zoran Milanovic ກໍ່ຍອມຮັບວ່າ, ເລື່ອງ Croatia ເຂົ້າເປັນສະມາຊິກອີຢູ ຈະສ້າງແງ່ຫວັງໃໝ່ໃຫ້ແກ່ປະເທດຊາດ ແລະ ໂລກໃໝ່ໃຫ້ແກ່ປະຊາຊົນ. ກ່ອນນີ້ 1 ປີ, ທ່ານນາຍົກລັດຖະມົນຕີ zoran Milanovic ໄດ້ສ້າງຄວາມອຸ່ນອ່ຽນໃຈໃຫ້ແກ່ປະຊາຊົນ ໂດຍເວົ້າວ່າ ສະພາບເສດຖະກິດຂອງເອີລົບພວມຊຸດໂຊມ, ແຕ່ບໍ່ມີເສັ້ນທາງໃດດີກວ່າໃນປະຈຸບັນ ນັ້ນແມ່ນ Croatia ຕ້ອງເລືອກເຟັ້ນອີຢູ.
ກົງກັນຂ້າມກັບວົງການເຈົ້າໜ້າທີ່ Croatia, ປະຊາຊົນປະເທດນີ້ພັດບໍ່ສົນໃຈເຖິງເລື່ອງ Croatia ກາຍເປັນສະມາຊິກອີຢູ. ຖ້າຫາກວ່າຜົນແຫ່ງການຢັ່ງຫາງສຽງເມື່ອປີ 2003 ໃຫ້ເຫັນວ່າ 80% ຈຳນວນຜູ້ຖືກຖາມປາຖະໜາຢາກໃຫ້ປະເທດກາຍເປັນສະມາຊິກຂອງອີຢູ, ແຕ່ຫຼັງຈາກນັ້ນ 9 ປີ, ຕົວເລກດັ່ງກ່າວໄດ້ຫຼຸດລົງເຫຼືອພຽງ 67% ເທົ່ານັ້ນ. ສາຍເຫດແມ່ນຍ້ອນໃນວິວັດແຫ່ງການເຈລະຈາ, ເຂົາເຈົ້າຕ້ອງປະຕິບັດຫຼາຍເງື່ອນໄຂໂດຍອີຢູ ວາງອອກ ແລະ ພິເສດ, ວິກິດການໜີ້ສາທາລະນະນັບແຕ່ປີ 2008 ໄດ້ສະແດງໃຫ້ເຫັນສະພາບການທີ່ມືດມົວຂອງເອີລົບ. ຊຳ້ບໍ່ໜຳ, ປະຊາຊົນຫຼາຍຄົນຍັງຖືວ່າ ເຂົ້າເປັນສະມາຊິກອີຢູ ຈະບໍ່ມີຫຍັງດີກວ່າອີກ. ລາຄາຈະເພີ່ມຂຶ້ນ ແລະ ຊາວຜູ້ອອກແຮງງານ Croatia ຈະກາຍເປັນກຳລັງແຮງງານລາຄາຕຳ່.
ຍິ່ງກວ່ານັ້ນ, ວົງການນັກໄຈ້ແຍກໄດ້ໃຫ້ຂໍ້ສັງເກດວ່າ, Croatia ຈະບໍ່ໄດ້ຮັບຜົນປະໂຫຍດຈາກເລື່ອງເຂົ້າເປັນສະມາຊິກອີຢູ ໃນໄລຍະສັ້ນ. ວິກິດການເສດຖະກິດຢ່າງເລິກເຊິ່ງ ແລະ ກວ້າງຂວາງ ໄດ້ມີການກະທົບບໍ່ດີເຖິງ Croatia ໃນໄລຍະ 5 ປີຜ່ານມາ. ພ້ອມກັບອັດຕາຜູ້ວ່າງງານສູງໃນລະດັບສະຖິຕິ (21% ຜູ້ໃນເກນອາຍຸອອກແຮງງານ), ຜະລິດຕະພັນພາຍໃນ (GDP) ໄລ່ຕາມຫົວຄົນຂອງ Croatia ແມ່ນຕຳ່ກວ່າລະດັບສະເລ່ຍໃນອີຢູ ແມ່ນ 39%. ໜັງສືພິມ Bild ລາຍວັນຂອງເຢຍລະມັນ ໄດ້ກ່າວເຕືອນວ່າ, ສະມາຊິກໃໝ່ສຸດຂອງອີຢູ ອາດຈະກາຍເປັນປະເທດເກຼັັກທີ 2. ນອກນັ້ນ, ໃນການດຳເນີນທຸລະກິດ, ພາຍຫຼັງເຂົ້າເປັນສະມາຊິກອີຢູ, ບັນດາຜະລິດຕະພັນຂອງ Croatia ຈະຕ້ອງປະຕິບັດຕາມມາດຕະຖານ, ຂໍ້ກຳນົດຕ່າງໆຂອງອີຢູ. ບັນດາລັດວິສາຫະກິດທີ່ດຳເນີນທຸລະກິດຫຼຸບທຶນ ຈະຕ້ອງປະຕິບັດບັນດາມາດຕະການສ້າງໂຄງປະກອບຄືນໃໝ່ຢ່າງແຮງ ເພື່ອສາມາດແກ່ງແຍ້ງກັບສະພາບແວດລ້ອມທີ່ຮ້າຍແຮງ, ພິເສດແມ່ນຂົງເຂດທະນາຄານ ແລະ ໄຟຟ້າ.
ບໍ່ສາມາດປະຕິເສດບັນດາຜົນປະໂຫຍດເຊິ່ງ Croatia ຈະໄດ້ຊົມໃຊ້ ເມື່ອເຂົ້າເປັນສະມາຊິກອີຢູ. ແຕ່ບັນດາສິ່ງທ້າທາຍທີ່ວາງອອກສຳລັບປະເທດທີ່ທຸກຍາກກວ່າໝູ່ຂອງສະຫະພາບເອີລົບນີ້ ກໍ່ບໍ່ແມ່ນໜ້ອຍ, ພິເສດແມ່ນໃນສະຖານະການທີ່ວິກິດການດ້ານເສດຖະກິດຢູ່ທະວີບນີ້ບໍ່ທັນສິ້ນສຸດລົງ. ຮອດເວລາໃດ Croatia ແກ້ໄຂສິ່ງດັ່ງກ່າວໃຫ້ໄດ້ນັ້ນ, ຫາງສຽງຈຶ່ງໝົດສົງໃສຕໍ່ຂີດໝາຍໃໝ່ໃນປະຫວັດສາດຂອງ Croatia.