ເອີລົບພວມປະເຊີນໜ້າກັບກະແສຟອງຊາວອົບພະຍົບທີ່ຮ້າຍແຮງທີ່ສຸດໃນຮອບຫຼາຍທົດສະວັດທີ່ຜ່ານມາ. ເອີລົບຈະນັບມື້ນັບຂາດສະຖຽນລະພາບ ແລະ ຖືກສູນເສຍທາງດ້ານສີສັນຂອງຕົນ, ນັ້ນແມ່ນບັນດາຂໍ້ສັງເກດທີ່ຖືກເຕື້ອງເຖິງຢ່າງຫຼວງຫຼາຍໃນໄລຍະມໍ່ໆມານີ້. ແຕ່ເມື່ອບໍ່ດົນມານີ້, ບັນດາຜູ້ຊ່ຽວຊານດ້ານເສດຖະກິດ ພັດຍັກອອກທັດສະນະທີ່ກົງກັນຂ້າມ ໂດຍຖືວ່າ ພ້ອມກັບບັນດາສິ່ງທ້າທາຍນັ້ນ, ຊາວອົບພະຍົບກໍມີການປະກອບສ່ວນຢ່າງຕັ້ງໜ້າເຂົ້າໃນພື້ນຖານເສດຖະກິດຂອງບັນດາປະເທດຮັບ ຊາວອົບພະຍົບເຂົ້າເມືອງ, ຊ້ຳບໍໜຳຍັງຊ່ວຍແກ້ໄຂສະພາບຊັບພະຍາກອນມະນຸດທີ່ພວມເຖົ້າແກ່ໄປຢູ່ເອີລົບ.
ປະຈຸບັນ, ໃນແຕ່ລະມື້ ມີຊາວອົບພະຍົບນັບພັນຄົນຍັງຄົງຫຼັ່ງໄຫຼເຂົ້າເມືອງບັນດາປະເທດເອີລົບ |
ນັບແຕ່ຕົ້ນປີມາຮອດປະຈຸບັນ, ຕາມການປະເມີນຂອງອົງການຊາວອົບພະຍົບແຫ່ງສະຫະປະຊາຊາດ UNHCR ແລ້ວ, ໄດ້ມີຊາວອົບພະຍົບປະມານກວ່າເຄິ່ງລ້ານຄົນໄປຍັງເອີລົບ. ໃນນັ້ນ, ສະເພາະ ຊີຣີ ມີຊາວອົບພະຍົບເກືອບ 350.000 ຄົນໃນຍອດຈຳນວນຊາວຊີຣີ ກວ່າ 4 ລ້ານຄົນຂໍເຂົ້າເມືອງເອີລົບຍ້ອນສົງຄາມ ແລະ ຄວາມອຶດຫິວທຸກຍາກ. ປະຈຸບັນ, ໃນແຕ່ລະມື້ ມີຊາວອົບພະຍົບນັບພັນຄົນຍັງຄົງຫຼັ່ງໄຫຼເຂົ້າເມືອງບັນດາປະເທດເອີລົບ ໂດຍບໍ່ຫົວຊາຕໍ່ຄວາມອັນຕະລາຍຕໍ່ຊີວິດອີນຊີໃນການເດີນທາງ ດ້ວຍຄວາມຫວັງຢາກຫຼຸດພົ້ນອອກຈາກສົງຄາມ.
ຜົນປະໂຫຍດທີ່ຊາວອົບພະຍົບເຂົ້າເມືອງນຳມາໃຫ້
ຕາມບົດລາຍງານຂອງອົງການຮ່ວມມື ແລະ ພັດທະນາເສດຖະກິດ OECD, ນັບແຕ່ປີ 2014, ຊາວອົບພະຍົບເຂົ້າເມືອງກວມເຖິງ 70% ກຳລັງແຮງງານທີ່ເພີ່ມຕື່ມຢູ່ເອີລົບໃນ 10 ປີທີ່ ຜ່ານມາ. ຊາວອົບພະຍົບເຂົ້າເມືອງໄດ້ຊ່ວຍເພີ່ມເກນອະຍຸອອກແຮງງານ, ເພີີ່ມເຕີມແຮງງານເຂົ້າບັນດາຂະແໜງການທີ່ກຳລັງແຮງງານພວມຫຼຸດລົງຫຼາຍ. ບັນດາປະເທດຮັບເອົາຊາວອົບພະຍົບເຂົ້າເມືອງ ແມ່ນຕ້ອງການຜູ້ມີຄວາມສາມາດ, ເປັນໄວໜຸ່ມເພື່ອເຮັດວຽກງານຕ່າງໆທີ່ຊາວທ້ອງຖິ່ນບໍ່ສາມາດເຮັດຫຼືບໍ່ຢາກເຮັດ.
ຕາມການສະຖີຕິແລ້ວ, ຈຳນວນຊາວອົບພະຍົບເຂົ້າເມືອງ EU ໄດ້ເພີ່ມຂຶ້ນທົບ 3 ເທົ່າໃນປີນີ້, ຄາດຄະເນວ່າ ໃນທ້າຍປີ ຈະແມ່ນປະມານ 2 ລ້ານຄົນ, ອັນໄດ້ເຮັດໃຫ້ຄວາມຕ້ອງການຢູ່ພາກພື້ນນີ້ເພີ່ມຂຶ້ນຢ່າງກະໂດດຂັ້ນ. ເພາະສະນັ້ນ, GDP ຂອງພາກພື້ນ EU ກໍໄດ້ເພີ່ມຂຶ້ນ, ອັນໄດ້ສົ່ງຜົນກະທົບຢ່າງຕັ້ງໜ້າໃນໄລຍະສັ້ນ. ໃນຍາວນານ, ຊາວອົບພະຍົບອາດຈະກາຍເປັນບັນດາຜູ້ມີການປະກອບສ່ວນຫຼາຍພໍສົມຄວນໃຫ້ແກ່ພື້ນຖານເສດຖະກິດຂອງບັນດາປະເທດຮັບເຂົ້າເມືອງ. ບັນດາຜູ້ຊ່ຽວຊານຖືວ່າ ຍ້ອນອັດຕາການເກີດຢູ່ເອີລົບໃນທົດສະວັດທີ່ ຜ່ານມາແມ່ນຕ່ຳເກີນໄປ, ດັ່ງນັ້ນ, ໃນປະຈຸບັນ, ຢູ່ພາກພື້ນນີ້ ເບິ່ງຄືວ່າບໍ່ມີຄົນງານໜຸ່ມ ແລະ ມີຄວາມຂະຫຍັນຂັ່ນເຄື່ອນ. ແລະ ຊາວອົບພະຍົບທີ່ມາຈາກບັນດາປະເທດທີ່ທຸກຍາກອຶດຫິວ ແລະ ເກີດສົງຄາມນີ້ເອງ ຈະເພີ່ມເຕີມໃສ່ການກຂາດຫາຍນັ້ນຢູ່ເອີລົບ. ການເຂົ້າຮ່ວມອອກແຮງງານຂອງ ຊາວອົບພະຍົບຈະຊ່ວຍເພີ່ມ GDP, ບັນດາບ້ວງເງິນເສຍອາກອນໂດຍຊາວອົບພະຍົບຕ້ອງເສຍ ຈະເປັນການຊ່ວຍລັດຖະບານດຸ່ນດ່ຽງງົບປະມານ.
ກາລະໂອກາດຈະໃຫຍ່ກວ່າສິ່ງທ້າທາຍຫຼືບໍ່ ?
ເວົ້າເຊັ່ນນັ້ນ ບໍ່ໝາຍຄວາມວ່າ ບັນຫາຊາວອົບພະຍົບເຂົ້າເມືອງເອີລົບໃນປະຈຸບັນ ລ້ວນແຕ່ເປັນການດີ. ການຮັບຊາວອົບພະຍົບເຂົ້າເມືອງຕື່ມອີກ ກໍໝາຍຄວາມວ່າ ປະເທດນນັ້ນ ພວມປະເຊີນໜ້າກັບຄວາມຂາດສະຖຽນລະພາບຫຼາຍຢ່າງ.
ກ່ອນອື່ນໝົດ ແມ່ນບັນຫາເຊື່ອມຕົວເຂົ້າກັບສັງຄົມໃໝ່. ຊາວອົບພະຍົບ ກໍ ແມ່ນບັນດາຜູ້ເມື່ອກ່ອນນີ້ ເຄີຍມີຊີວິດໃນສະພາບເປັນອັນຕະລາຍ ແລະ ອຶດຫິວທຸກຍາກ, ເຂົາເຈົ້າຈະຕ້ອງເຊື່ອມຕົວເຂົ້າກັບກັບຊາວທ້ອງຖິ່ນຄືແນວໃດ? ນີ້ແມ່ນຄຳຖາມ ຊຶ່ງມາຮອດປະຈຸບັນ ໃນຕົວຈິງ, ບັນດານັກເສດຖະສາດຍັງບໍ່ທັນມີຄຳຕອບໂດຍລະອຽດ. ບໍ່ອາດສາມາດເຊື່ອມຕົວເຂົ້າກັບສະພາບແວດລ້ອມສັງຄົມເປັນຢ່າງດີ, ໄລຍະນານໄປ, ຈະເກີດໃຫ້ມີການຈຳແນກປະພຶດ, ແບ່ງແຍກຊົນຊັ້ນໃນສັງຄົມ ຊຶ່ງແມ່ນໜໍ່ແໜງກໍ່ໃຫ້ເກີດສະພາບຂາດສະຖຽນລະພາບ. ຄວາມວິຕົກກັງວົນນີ້ແມ່ນມີພື້ນຖານຢ່າງສິ້ນເຊິ່ງ ເພາະໃນຕົວຈິງ, 2-3 ເດືອນມໍ່ໆມານີ້, ບັນດາການເດີນຂະບວນປະທ້ວງຄັດຄ້ານບັນຫາຊາວອົບພະຍົບເຂົ້າເມືອງໄດ້ເກີດຂຶ້ນຢ່າງຕໍ່ເນື່ອງຢູ່ບັນດາປະເທດເອີລົບ, ພິເສດແມ່ນພາຍຫຼັງທີ່ພາກພື້ນນີ້ ໄດ້ເປັນເອກະພາບກັນໃນການຈັດແບ່ງຈຳນວນຊາວອົບພະຍົບເຂົ້າເມືອງ. ໃນຂະນະທີ່ສະພາບໄພວ່າງງານເພີ່ມຂຶ້ນ, ການຮັບເອົາຊາວອົບພະຍົບເຂົ້າເມືອງຕື່ມອີກ ຈະເພີ່ມການແບກຫາບຢ່າງໜັກໜ່ວງໃຫ້ແກ່ສັງຄົມ. ກະແສຟອງຊາວອົບພະຍົບຫຼັ່ງໄຫຼເຂົ້າມາ ຈະເຮັດໃຫ້ກອງທຶນໜູນຊ່ວຍສັງຄົມຊຶ່ງແມ່ນເງິນທຶນທີ່ໄດ້ຈາກການປະກອບສ່ວນຂອງຊາວທ້ອງຖິ່ນເພື່ອສະຫງວນໃຫ້ແກ່ຂົງເຂດສາທາລະນະສຸກ, ໜູນຊ່ວຍໄພວ່າງງານ, ເງິນເບ້ຍບຳນານ ແລະ ການສຶກສາຖືກຫຼຸດໜ້ອຍລົງ.
ເບິ່ງຄືວ່າ ບໍ່ມີຍາມໃດທີ່ເອີລົບຕ້ອງປະເຊີນໜ້າກັບຄວາມຫຍຸ້ງຍາກ, ສິ່ງທ້າທາຍນາໆປະການຄືໃນປະຈຸບັນ. ວິກິດການການເງິນ ຍັງບໍ່ທັນສິ້ນສຸດການສົ່ງຜົນກະທົບເທື່ອນັ້ນ, ປະຈຸບັນ, ບັນດາປະເທດເອີລົບ ພັດຕ້ອງປະເຊີນໜ້າກັບກະແສຟອງຊາວອົບພະຍົບເຂົ້າເມືອງຢ່າງຫຼວງຫຼາຍໃນປະຫວັດສາດ. ເປັນທີ່ຈະແຈ້ງແລ້ວວ່າ: ພ້ອມກັບການຮັບຜົນໄດ້ທີ່ຊາວອົບພະຍົບນຳມາບໍ່ຫຼາຍນັ້ນ, ບັນດາປະເທດເອີລົບ ກໍຕ້ອງໄດ້ຮັບຜົນເສຍຫຼາຍທີ່ສຸດ. ບໍ່ພຽງແຕ່ຂາດສະຖຽນລະພາບເທົ່ານັ້ນ, ກະແສຟອງຊາວອົບພະຍົບຍັງເປັນໄພນາບຂູ່ຢ່າງຮ້າຍແຮງຕໍ່ສີສັນຂອງເອີລົບ ຊຶ່ງພາກພື້ນນີ້ທຸມເຫື່ອເທແຮງຮັກສານັບແຕ່ໃດໆມາ.