(vovworld)- ວັນທີ 17/6, ກອງປະຊຸມສະໄຫມສາມັນເທື່ອທີ 5 ສະພາແຫ່ງຊາດຫວຽດນາມ ຊຸດທີ 13 ໄດ້ປຶກສາຫາລືຄັ້ງສຸດທ້າຍກ່ຽວກັບກົດໝາຍວ່າດ້ວຍທີ່ດິນສະບັບປັບປຸງ ກ່ອນທີ່ຍື່ນສະເຫນີຕໍ່ສະພາແຫ່ງຊາດເພື່ອຮັບຮອງເອົາ. ຮ່າງກົດໝາຍມີຫລາຍເນື້ອໃນສຳຄັນໄດ້ຮັບການປັບປຸງ ເພື່ອຮັບປະກັນຄວາມກົມກ່ຽວລະຫວ່າງສິດຜົນປະໂຫຍດຂອງລັດ ແລະ ປະຊາຊົນ.
ສສຊປຶກສາຫາລືກ່ຽວກັບກົດໝາບວ່າດ້ວຍທີ່ດິນສະບັບປັບປຸງ
ພາບ:thuvienphapluat.vn
|
ການຕີລາຄາລວມສະແດງໃຫ້ເຫັນວ່າ: ຮ່າງກົດໝາຍວ່າດ້ວຍທີ່ດິນສະບັບປັບປຸງຄັ້ງນີ້ ໄດ້ເພີ່ມເຕີມບັນດາຂໍ້ກຳນົດເພື່ອແກ້ໄຂຂໍ້ຈຳກັດໃນກົດໝາຍວ່າດ້ວຍທີ່ດິນພວມນຳໃຊ້ໃນປະຈຸບັນ ກ່ຽວກັບບັນດາບັນຫາວາງແຜນກຳນົດນຳໃຊ້ທີ່ດິນ, ຄ່າຊົດເຊີຍ, ບຸກເບີກຫນ້າພຽງ, ກຳນົດລາຄາທີ່ດິນ, ຫນູນຊ່ວຍການຕັ້ງຖິ່ນຖານຄືນໃຫມ່. ຮ່າງກົດໝາຍດັ່ງກ່າວແມ່ນປັບປຸງຕາມທິດຜົນປະໂຫຍດຂອງລັດ ແລະ ປະຊາຊົນຖືກຖອນທີ່ດິນໄດ້ຮັບການຮັບປະກັນໃຫ້ເໝາະສົມ, ແຫລ່ງກຳລັງກ່ຽວກັບທີ່ດິນໄດ້ຮັບການເສີມຂະຫຍາຍເພ່ືອໃຫ້ກາຍເປັນກຳລັງແຮງພາຍໃນທີ່ສຳຄັນ ຮັບໃຊ້ການພັດທະນາເສດຖະກິດສັງຄົມ. ທ່ານນາງ ຫງວຽນແທງຖູຍ, ສສຊ ແຂວງ ບີ່ງດີ້ງ ເຫັນດີເຫັນພ້ອມກັບຮ່າງກົດໝາຍວ່າດ້ວຍທີ່ດິນສະບັບປັບປຸງ ຊື່ງໄດ້ກຳນົດ: ບັນດາກໍລະນີຖອນທີ່ດິນເພື່ອຜົນປະໂຫຍດແຫ່ງຊາດ, ການປ້ອງກັນຊາດ ປ້ອງກັນຄວາມສະຫງົບ, ຜົນປະໂຫຍດຂອງສ່ວນລວມ ແລະ ປະຕິບັດບັນດາໂຄງການພັດທະນາເສດຖະກິດສັງຄົມ. ເຖິງຢ່າງໃດກໍຕາມ, ທ່ານນາງ ຫງວຽນແທງຖູຍຖືວ່າ:
“ກ່ຽວກັບບັນດາກໍລະນີຖືກຖອນທີ່ດິນ, ຂ້າພະເຈົ້າສະເຫນີ: ສຳລັບການຖອນທີ່ດິນຮັບໃຊ້ບັນດາໂຄງການພັດທະນາເສດຖະກິດສັງຄົມ ຕ້ອງມີການກຳນົດຢ່າງຈະແຈ້ງກວ່າ ເພື່ອພິສູດໃຫ້ເຫັນບັນດາໂຄງການນີ້ແມ່ນເພື່ອຜົນປະໂຫຍດແຫ່ງຊາດ, ຜົນປະໂຫຍດສ່ວນລວມ, ສ່ວນບັນດາໂຄງການທີ່ມີລັກສະນະສະເພາະດ້ານເສດຖະກິດ ເພື່ອຜົນປະໂຫຍດຂອງນັກລົງທຶນ ແມ່ນມອບໃຫ້ນັກລົງທຶນປຶກສາຫາລືຕົກລົງກັບຜູ້ນຳໃຊ້ທີ່ດິນເພື່ອຮັບການປະກອບທຶນ, ເໝາະສົມກັບການກຳນົດນຳໃຊ້ທີ່ດິນ.”
ຕາມ ສສຊ ຈຳນວນຫນຶ່ງແລ້ວ ຕ້ອງຮັບປະກັນຄວາມກົມກຽວລະຫວ່າງເປົ້າໝາຍຖອນທີ່ດິນເພື່ອພັດທະນາເສດຖະກິດສັງຄົມກັບນະໂຍບາຍຮັບປະກັນຊີວິດການເປັນຢູ່ຂອງປະຊາຊົນ. ຖ້າບໍ່ເຮັດຄືແນວນັ້ນ, ອາດຈະເກີດສະພາບຟ້ອງຮ້ອງກ່ຽວກັບທີ່ດິນ, ສະພາບຟຸມເຟືອຍທີ່ດິນ. ສະນັ້ນ ຄະນະຮຽບຮຽງຄວນຄົ້ນຄ້ວາບັນຫາດັ່ງກ່າວໃຫ້ເຖິງຖອງເພື່ອຮັບປະກັນການພັດທະນາເສດຖະກິດ ແລະ ແບບຍືນຍົງ.
ພາບປະກອບ:internet
|
ກ່ຽວກັບການຊົດເຊີຍ, ຫນູນຊ່ວຍການຕັ້ງຖິ່ນຖານຄືນໃຫມ່ໃຫ້ແກ່ປະຊາຊົນເມື່ອລັດຖອນທີ່ດິນ. ຕາມ ສສຊ ຈຳນວນຫນຶ່ງ ນີ້ແມ່ນສາຍເຫດທີ່ພາໃຫ້ເກີດການຟ້ອງຮ້ອງທີ່ດິນນັບມື້ນັບເພີ່ມຂຶ້ນ, ສະນັ້ນ ການປັບປຸງກົດໝາຍວ່າດ້ວຍທີ່ດິນຄັ້ງນີ້ຕ້ອງປັບປຸງຢ່າງຮອບດ້ານບັນດາຂໍ້ກຳນົດກ່ຽວກັບການຊົດເຊີຍ, ຫນູນຊ່ວຍ, ຕັ້ງຖິ່ນຖານຄືນໃຫມ່ໃຫ້ແກ່ປະຊາຊົນເມື່ອລັດຖອນທີ່ດິນ. ທ່ານ ເຈີນງອກວີງ ສສຊ ນະຄອນຫາຍຟ່ອງ ຍົກຄຳເຫັນວ່າ:
“ສະເຫນີຄະນະຮຽບຮຽງຈົ່ງຄົ້ນຄ້ວານຳໃຊ້ບັນດາກົນໄກລາຄາໃຫ້ມີຄວາມຍຸຕິທຳ,ດ້ວຍການແລກທີ່ດິນເອົາທີ່ດິນ, ແລກເຮືອນຢູ່ເອົາເຮືອນຢູ່. ປະຊາຊົນບໍ່ຕ້ອງເສຍເງິນຕື່ມອີກ ພ້ອມທັງລັດຕ້ອງຫນູນຊ່ວຍລາຍຈ່າຍຕື່ມອີກເພື່ອໃຫ້ປະຊາຊົນທີ່ຖືກຖອນທີ່ດິນນັ້ນກັບຄືນສູ່ຊີວິດເປັນປົກກະຕິໂດຍໄວ. ທີສອງ ຍົກລະດັບຄ່າຊົດເຊີຍໃຫ້ແກ່ຊາວກະສິກອນທີ່ຖືກຖອນທີ່ດິນກະສິກຳ ພ້ອມກັນນັ້ນ ລັດຕ້ອງສອນວິຊາຊີບເພື່ອຫັນປ່ຽນອາຊີບໃຫ້ແກ່ຊາວກະສິກອນພາຍຫລັງຖືກຖອນທີ່ດິນ. ທີສາມ ຕ້ອງສ້າງກົນໄກຊື້ສິດນຳໃຊ້ທີ່ດິນ ແລະ ກົນໄກຕົກລົງກັນເອງກ່ຽວກັບລາຄາຊົດເຊີຍທີ່ດິນລະຫວ່າງ ວິສາຫະກິດ ແລະ ຜູ້ມີທີ່ດິນຖືກຖອນ.”
ກ່ຽວກັບລາຄາທີ່ດິນ, ເຖິງວ່າ ຄະນະຮຽບຮຽງໄດ້ສ້າງຂໍ້ມາດຕາສະເພາະ ໂດຍກຳນົດຢ່າງລະອຽດກ່ຽວກັບຫລັກການກຳນົດລາຄາທີ່ດິນ, ຕາຕະລາງລາຄາທີ່ດິນ ແລະ ລາຄາທີ່ດິນລະອຽດກໍຕາມ ແຕ່ຕາມ ສສຊ ຈຳນວນຫນຶ່ງແລ້ວ, ເນື້ອໃນກຳນົດກ່ຽວກັບລາຄາທີ່ດິນໃນຮ່າງກົດໝາຍວ່າດ້ວຍທີ່ດິນສະບັບປັບປຸງຄັ້ງນີ້ ບໍ່ທັນມີບາດກ້າວບຸກທະລຸພື້ນຖານເທື່ອ. ສະນັ້ນ ເພື່ອສ້າງບັນດາຂໍ້ກຳນົດກ່ຽວກັບລາຄາທີ່ດິນໃຫ້ສົມບູນແບບ, ຕາມທ່ານ ຫງອກວີງ ແລ້ວ, ຄວນກຳນົດຢ່າງລະອຽດກວ່າ.
“ບັນດາການກຳນົດກ່ຽວກັບລາຄາທີ່ດິນຕ້ອງຮັບປະກັນລະຫວ່າງຜົນປະໂຫຍດລະຫວ່າງລັດ, ວິສາຫະກິດ ແລະ ປະຊາຊົນ. ຈຳເປັນຕອ້ງສ້າງອົງການມີສິດອຳນາດຕັດສິນກ່ຽວກັບລາຄາທີ່ດິນ ກັບບັນດາອົງການມີສິດອຳນາດຄຸ້ມຄອງທີ່ດິນ. ຄວນສ້າງກົນໄກປຶກສາຫາລືລະຫວ່າງວິສາຫະກິດ ແລະ ປະຊາຊົນ.”
ກ່ຽວກັບການວາງແຜນກຳນົດ, ແຜນການນຳໃຊ້ທີ່ດິນ, ສສຊ ຫລາຍທ່ານໄດ້ເຫັນດີເຫັນພ້ອມກັບການກຳນົດໃນຮ່າງແຜນການ, ແຜນນຳໃຊ້ທີ່ດິນ ຊື່ງລວມມີ 3 ຂັ້ນ: ລະດັບລັດ, ລະດັບແຂວງ ແລະ ລະດັບເມືອງ.ແຕ່ເຖິງຢ່າງໃດກໍຕາມ, ຍັງມີຫລາຍຄຳເຫັນຢາກຮັກສາ 4 ຂັ້ນຄືເກົ່າໃນກົດໝາຍນຳໃຊ້ປະຈຸບັນ ກ່ຽວກັບການສ້າງແຜນນຳໃຊ້ທີ່ດິນ, ນັ້ນແມ່ນລະດັບລັດ, ລະດັບແຂວງ, ລະດັບເມືອງ ແລະ ລະດັບຕາແສງ. ທ່ານ ບຸ່ຍວັນເຟືອງ, ສສຊ ແຂວງ ນີງບີ່ງ ສະເຫນີວ່າ:
“ຄວນຮັກສາການວາງແຜນກຳນົດ, ແຜນນຳໃຊ້ທີ່ດິນຢູ່ລະດັບຕາແສງຄືກົດໝາຍນຳໃຊ້ປະຈຸບັນ. ທີສອງ ຫລັກການສ້າງແຜນກຳນົດ ແລະ ແຜນນຳໃຊ້ທີ່ດິນຈາກຂອດສັງລວມເຖິງລະອຽດ ສະນັ້ນ ບົນພື້ນຖານວາງແຜນກຳນົດສັງລວມຢູ່ຂັ້ນເມືອງ, ບັນດາຕາແສງ ຈະວາງແຜນກຳນົດຢ່າງລະອຽດກວ່າ.
ກົດໝາຍວ່າດ້ວຍທີ່ດິນແມ່ນປະມວນກົດໝາຍສຳຄັນ, ກ່ຽວຂ້ອງເຖິງຜົນປະໂຫຍດຂອງປະຊາຊົນ. ການປຶກສາຫາລືກ່ຽວກັບຮ່າງກົດໝາຍວ່າດ້ວຍທີ່ດິນສະບັບປັບປຸງຄັ້ງນີ້ ຈະແກ້ໄຂບັນດາຂໍ້ຈຳກັດໃນກົດໝາຍວ່າດ້ວຍທີ່ດິນປະຈຸບັນ, ປະກອບສ່ວນສຳຄັນໃນການຂຸດຄົ້ນ ແລະ ນຳໃຊ້ຊັບພະຍາກອນຢ່າງມີປະສິດທິຜົນ ພ້ອມທັງຮັບປະກັນຄວາມກົມກຽ່ວລະຫວ່າງຜົນປະໂຫຍດຂອງປະຊາຊົນ ແລະ ລັດ.