(vovworld)- ສືບຕໍ່ຜັນຂະຫຍາຍແນວທາງຕັ້ງຫນ້າເຊື່ອມໂຍງເຂົ້າກັບສາກົນຂອງປະເທດຊາດ, ປີ 2014 ບັນດາການເຄື່ອນໄຫວດ້ານການທູດຂອງຫວຽດນາມ ໄດ້ຮັບການຜັນຂະຫຍາຍຢ່າງເລິກເຊິ່ງ, ກວ້າງຂວາງ ແລະ ໄດ້ນຳມາເຊິ່ງບັນດາໝາກຜົນລະອຽດ. ການເຄື່ອນໄຫວດ້ານການທູດບໍ່ພຽງແຕ່ປະກອບສ່ວນສ້າງສະພາບແວດລ້ອມສາກົນຢ່າງສະດວກໃຫ້ແກ່ການພັດທະນາຂອງປະເທດຊາດເທົ່ານັ້ນ ຫາກຍັງຫນູນຊ່ວຍການປົກປັກຮັກສາອະທິປະໄຕ, ຜືນແຜນດິນອັບຄົບຖ້ວນ ຢ່າງມີປະສິດທິຜົນ ອີກດ້ວຍ.
ທ່ານເລຂາທິການໃຫຍ່ຫງວຽນຟູຈ້ອງ
ແລະ ທ່ານປະທານາທິບໍດີລັດເຊຍ V. Putinໃນການຢ້ຽມຢາມລັດເຊຍເມື່ອເດືອນ 11/2014
ພາບ:TTXVN
|
ປີ 2014, ການທູດ ຫວຽດນາມ ສືບຕໍ່ຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ຄັ້ງທີ 11 ຂອງພັກກອມມູນິດຫວຽດນາມ, ສືບຕໍ່ເຊື່ອມໂຍງເຂົ້າກັບສາກົນຢ່າງຮອບດ້ານ. ວຽກງານການຕ່າງປະເທດປີ 2014 ທັງປະກອບສ່ວນສ້າງສະພາບແວດລ້ອມສັນຕິພາບ, ສະຖຽນລະພາບ ເພືື່ອສ້າງ ແລະ ພັດທະນາປະເທດຊາດ, ທັງສະແດງໃຫ້ເຫັນພາບພົດປະເທດຫວຽດນາມ ສວມບົດບາດໃຫຍ່ກວ່າໃນບັນດາບັນຫາທົ່ວໂລກ.
ການທູດຮັບໃຊ້ຈຸດໝາຍພັດທະນາເສດຖະກິດຂອງປະເທດຊາດ
ອາດຈະຢືນຢັນໄດ້ວ່າ ປີ 2014 ແມ່ນປີຊື່ງວີວັດການເຈລະຈາບັນດາສັນຍາການຄ້າເສລີ (FTA) ຂອງຫວຽດນາມ ມີບາດກ້າວສຳຄັນ. ໄລ່ມາຮອດຈຸດເວລານີ້, ຫວຽດນາມ ໄດ້ສຳເລັດ 2/6 ວຽກງານເຈລະຈາ FTA, ຊື່ງລວມມີ FTA ກັບ ສເກົາຫລີ ແລະ ສຳພັນທະມິດພາສີ ລັດເຊຍ - ເບລາຣຸດ -ກາຊັກສະຖານ ພ້ອມທັງຮັກສາທ່ວງທ່າ ເຈລະຈາຂອງບັນດາ FTA ອື່ນ. ການເຈລະຈາ FTA ກັບບັນດາຄູ່ຮ່ວມມືສຳຄັນຕົ້ນຕໍ ນັ້ນແມ່ນ ສະຫະພາບເອີລົບ (EU) ແລະ ສັນຍາຄູ່ຮ່ວມມືຂ້າມປາຊີຟີກ (TPP) ພວມກ້າວເຂົ້າສູ່ໄລຍະສຸດທ້າຍ ແລະ ຄາດວ່າ ຈະສຳເລັດໃນໄຕມາດ 1/2015. ໃນສະພາວະເສດຖະກິດໂລກສືບຕໍ່ປະສົບກັບຄວາມຫຍຸ້ງຍາກ ແລະ ການເຈລະຈາ FTA ຫລາຍຄັ້ງຢູ່ໃນໂລກເກືອບຄືວ່າພວມຊັກຊ້າລົງ, ບັນດາໝາກຜົນການເຈລະຈາ FTA ຂອງຫວຽດນາມ ມີຄວາມໝາຍສຳຄັນ, ສະແດງໃຫ້ເຫັນຄວາມຕັດສິນໃຈຂອງຫວຽດນາມໃນການຜັນຂະຫຍາຍຈຸດໝາຍເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ຮອບດ້ານຢ່າງແຮງ, ປະກອບສ່ວນເຮັດໃຫ້ການພົວພັນສອງຝ່າຍລະຫວ່າງຫວຽດນາມ ແລະ ບັນດາຄູ່ຮ່ວມມືເລິກເຊິ່ງຂຶ້ນຕື່ມ.
ສຳລັບການພົວພັນຄູ່ຮ່ວມມືຍຸດທະສາດກັບ 14 ປະເທດ ແລະ ການພົວພັນຮ່ວມມືຮອບດ້ານກັບ 11 ປະເທດ ຊື່ງຫວຽດນາມ ໄດ້ກຳນົດຂອບເຂດການພົວພັນກ່ອນນີ້, ການເຄື່ອນໄຫວພົວພັນກັບຕ່າງປະເທດປີ 2014 ສືບຕໍ່ເຮັດໃຫ້ບັນດາການພົວພັນຮ່ວມມືຍຸດທະສາດ, ຄູ່ຮ່ວມມືຮອບດ້ານນັ້ນ ໄດ້ນຳມາເຊິ່ງປະສິດທິຜົນ, ຜົນປະໂຫຍດຢ່າງແທດຈິງ. ປີຜ່ານມາ, ຍ້ອນມີການຜັນຂະຫຍາຍຢ່າງແຮງ ແລະ ຖືກກັບຈຸດເວລາທີ່ວຽກງານຂົນຂວາຍການເມືອງ, ການທູດ ຢູ່ທຸກຂັ້ນ, ຫວຽດນາມ ໄດ້ຂົນຂວາຍຕື່ມອີກ 12 ຄູ່ຮ່ວມມື ຮັບຮູ້ຂໍ້ກຳນົດເສດຖະກິດການຕະຫລາດ, ບັນລຸຈຳນວນສູງສຸດໃນ 5 ປີຜ່ານມາ, ຍົກຍອດຈຳນວນຄູ່ຮ່ວມມືຮັບຮູ້ຫວຽດນາມ ປະຈຸບັນ ແມ່ນຂຶ້ນເຖິງ 56 ປະເທດ. ເປັນຫນ້າສົນໃຈ, ອາເມລິກາ ເປັນຄັ້ງທຳອິດ ຢືນຢັນ ເລື່ອງຮັບຮູ້ຂໍ້ກຳນົດເສດຖະກິດການຕະຫລາດຂອງຫວຽດນາມ ບໍ່ປະສົບສິ່ງກີດຂວາງກ່ຽວກັບດ້ານການເມືອງ ແລະ ອາເມລິກາ ຈະສຳເລັດວຽກງານດັ່ງກ່າວໂດຍໄວ. ສຳລັບ EU, ຖະແຫລງການຮ່ວມໃນການຢ້ຽມຢາມ EU ຂອງທ່ານນາຍົກລັດຖະມົນຕີ ຫງວຽນເຕີນຢູງ ເມື່ອເດືອນ 10/2014 ໄດ້ຢືນຢັນວ່າ: “EU ຊ່ວຍຫວຽດນາມ ເຊື່ອມໂຍງເຂົ້າກັບເສດຖະກິດໂລກສຳເລັດຜົນ ດ້ວຍຖານະແມ່ນພື້ນຖານເສດຖະກິດການຕະຫລາດ”
ປົກປັກຮັກສາຜືນແຜນດິນ, ຮັກສາສະພາບແວດລ້ອມສັນຕິພາບ, ສະຖຽນລະພາບເພື່ອພັດທະນາ
ປີ 2014, ການທູດຫວຽດນາມ ປະສົບກັບຄວາມຫຍຸ້ງຍາກ ເມື່ອແກ້ໄຂບັນດາບັນຫາກ່ຽວຂ້ອງເຖິງອະທິປະໄຕຢູ່ທະເລຕາເວັນອອກໃຫ້ສົມເຫດສົມຜົນ. ພາຍຫລັງ ຈີນ ຕັ້ງຮ້ານເຈາະນ້ຳມັນຢ່າງຜິດກົດໝາຍຢູ່ເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ. ໃນແນວຮົບການເມືອງ, ຫວຽດນາມໄດ້ດຳເນີນການພົບປະ ແລະ ແລກປ່ຽນຄຳເຫັນກັບຝ່າຍຈີນ 40 ຄັ້ງ ຜ່ານທຸກຂັ້ນ, ຂະແຫນງການ. ດ້ານອື່ນ ໃນເວທີປາໄສພາກພື້ນ ແລະ ສາກົນຄັ້ງຕ່າງໆ, ຫວຽດນາມ ເຊີດຊູ ທັດສະນະ, ຫລັກໝັ້ນເປັນທຳໃນບັນຫາທະເລຕາເວັນອອກ, ຢືນຢັນຢ່າງຈະແຈ້ງຫລັກໝັ້ນຂອງຕົນກ່ຽວກັບຄວາມໝັ້ນຄົງ, ຄວາມປອດໄພການເດີນທະເລ, ເຄົາລົບກົດໝາຍສາກົນ, ແກ້ໄຂບັນດາການຂັດແຍ້ງໂດຍສັນຕິວິທີ. ຫລັກໝັ້ນ, ທັດສະນະຂອງຫວຽດນາມ ໄດ້ຮັບຄວາມເຫັນດີເຫັນພ້ອມ, ການສະຫນັບສະຫນູນຢ່າງກວ້າງຂວາງຈາກປະຊາຄົມໂລກ. ມີຫລາຍປະເທດ, ອົງການຈັດຕັ້ງ ໄດ້ອອກສຽງສະຫນັບສະຫນູນຫວຽດນາມ, ຄັດຄ້ານການກະທຳລະເມີດກົດໝາຍສາກົນຂອງຈີນ. ພິເສດ ໃນອາຊຽນ, ຫວຽດນາມໄດ້ມານະພະຍາຍາມຮັກສາຄວາມສາມັກຄີ ແລະ ຫລັກໝັ້ນລວມໃນບັນຫາທະເລຕາເວັນອອກ. ອາດຈະຢືນຢັນໄດ້ວ່າ ບັນດາການເຄື່ອນໄຫວພົວພັນຕ່າງປະເທດສອງຝ່າຍ ແລະ ຫລາຍຝ່າຍ ໄດ້ຮັບການປະຕິບັດຢ່າງຄົບຊຸດ, ມີປະສິດທິຜົນ, ທັນການ ໃນການຫນູນຊ່ວຍໃຫ້ການຕໍ່ສູ້ປົກປັກຮັກສາອະທິປະໄຕຢູ່ທະເລຕາເວັນອອກ, ປະກອບສ່ວນປົກປັກຮັກສາເອກະລາດ, ອະທິປະໄຕຜືນແຜນດິນອັນຄົບຖ້ວນ, ຮັກສາສະພາບແວດລ້ອມສັນຕິພາບ, ສະຖຽນລະພາບ ຮັບໃຊ້ການພັດທະນາເສດຖະກິດສັງຄົມ.
ທ່ານນາຍົກລັດຖະມົນຕີ ຫງວຽນເຕີນຢູງ ແລະ ທ່ານປະທານ
ຄະນະກຳມະການເອີລົບ (EC) Manuel Barrosoໃນການຢ້ຽມຢາມເອີລົບເມື່ອເດືອນ 10/2014
ພາບ:http://vnexpress.net
|
ສະແດງໃຫ້ເຫັນທີ່ຕັ້ງ, ບົດບາດທີ່ມີຕໍ່ບັນຫາທົ່ວໂລກ
ປີ 2014, ຫວຽດນາມສືບຕໍ່ເສີມຂະຫຍາຍບົດບາດຂອງຕົນຢູ່ບັນດາເວທີປາໄສ, ອົງການຢູ່ພາກພື້ນ ແລະ ສາກົນ ຄື: ສປຊ, ອາຊຽນ, ການຮ່ວມມື ອາຊີ -ເອີລົບ, ເວທີປາໄສຮ່ວມມືອາຊີ-ປາຊີຟີກ. ຄຽງຄູ່ກັບການປະກອບສ່ວນຊຸກຍູ້ບັນດາຜົນປະໂຫຍດກ່ຽວກັບການພັດທະນາເສດຖະກິດ, ຫວຽດນາມ ຍັງສະແດງໃຫ້ເຫັນການປະກອບສ່ວນສຳລັບບັນດາຄວາມເອົາໃຈໃສ່ລວມຂອງສາກົນ. ພົ້ນເດັ່ນ ຫວຽດນາມເປັນເຈົ້າພາບຈັດຕັ້ງບັນດາກອງປະຊຸມສຳເລັດຜົນຄື: ກອງປະຊຸມລັດຖະມົນຕີແຫລ່ງຊັບພະຍາກອນມະນຸດ APEC. ກອງປະຊຸມສຳມະນາ ASEM ກ່ຽວກັບສິດທິມະນຸດ, ສະເຫນີສ້າງຕັ້ງສູນພັດທະນາແຫລ່ງຊັບພະຍາກອນມະນຸດ APEC ຢູ່ຫວຽດນາມ. ປີ 2014 ກໍແມ່ນປີທຳອິດ ຫວຽດນາມ ຮັບບັນດາຫນ້າທີ່ສຳຄັນໃນບັນດາກົນໄກຮ່ວມມືຫລາຍຝ່າຍຄື: ສະມາຊິກສະພາສິດທິມະນຸດ ສປຊ, ສະພາຜູ້ວ່າການອົງການພະລັງງານປະລະມານູສາກົນ (IAEA), ສະມາຊິກລັດຖະສະພາລະຫວ່ງຊາດໂລກ IPU ຄັ້ງທີ 132 ໃນປີ 2015.
ບົນພື້ນຖານຂອງບັນດາຜົນງານການຕ່າງປະເທດປີ 2014, ປີ 2015 ຫວຽດນາມສືບຕໍ່ປະຕິບັດແຜນນະໂຍບາຍເຊື່ອມໂຍງເຂົ້າກັບສາກົນຢ່າງຮອບດ້ານ. ບໍ່ພຽງແຕ່ເປີດກວ້າງການພົວພັນກັບທຸກປະເທດເທົ່ານັ້ນ ຫາກຫວຽດນາມ ຍັງແມ່ນສະມາຊິກມີຄວາມຮັບຜິດຊອບຂອງປະຊາຄົມໂລກ, ບໍ່ພຽງແຕ່ເຂົ້າຮ່ວມວຽກງານກ່ຽວຂ້ອງເຖິງຜົນປະໂຫຍດສະເພາະຂອງຕົນເທົ່ານັ້ນ ຫາກຍັງເຂົ້າຮ່ວມບັນດາບັນຫາອື່ນຂອງໂລກ. ປີ 2015 ໝັ້ນໝາຍຈະສ້າງບັນດາຂີດໝາຍໃຫມ່ໃຫ້ແກ່ການທູດຫວຽດນາມ.