ໂດຍໄດ້ຮັບຄຳເຊີນຂອງທ່ານປະທານປະເທດແຫ່ງ ສສ ຫວຽດນາມ ເຈີ່ນດ້າຍກວາງ, ວັນທີ 28/02, ເຈົ້າຈັກກະພັດ ຍີ່ປຸ່ນ Akihito ແລະ ພະມະເຫສີ ເລີ່ມຕົ້ນສະເດັດຢ້ຽມຢາມທາງລັດຖະກິດເຖິງ ຫວຽດນາມ. ການຢ້ຽມຢາມທີ່ແກ່ຍາວເຖິງວັນທີ 05/03 ນີ້ແມ່ນການຢ້ຽມຢາມ ຫວຽດນາມ ເປັນຄັ້ງທຳອິດຂອງເຈົ້າຈັກກະພັດ ແລະ ພະມະເຫສີ ຍີ່ປຸ່ນ, ເປັນຂີດໝາຍປະຫວັດສາດໃນການພົວພັນຮ່ວມມືມິດຕະພາບລະຫວ່າງ 2 ປະເທດ.
(ພາບປະກອບ)
ເຈົ້າຈັກກະພັດ ແລະ ພະມະເຫສີ ຍີ່ປຸ່ນ ແມ່ນສັນຍາລັກອັນສູງສົ່ງຂອງປະເທດ ແລະ ກຸ່ມກ້ອນສາມັກຄີທົ່ວປວງຊົນທັງຊາດ ຍີ່ປຸ່ນ. ເຈົ້າຈັກກະພັດ ແລະ ພະມະເຫສີ ຍີ່ປຸ່ນ ພຽງແຕ່ປະຕິບັດບັນດາການຢ້ຽມຢາມ ເນື່ອງໃນໂອກາດສະເຫຼີມສະຫຼອງພິເສດ ສຳລັບບັນດາຄູ່ຮ່ວມມືທີ່ມີການພົວພັນຢ່າງສະໜິດແໜ້ນກັບ ຍີ່ປຸ່ນ ເທົ່ານັ້ນ. ໂດຍແມ່ນເຈົ້າຈັກກະພັດທີ່ມີນ້ຳໃຈອັນດີງາມກັບ ຫວຽດນາມ, ເຈົ້າຈັກກະພັດ Akihito ຍາມໃດກໍ່ສະໜັບສະໜູນບັນດາສະມາຊິກໃນລາດຊະວົງ ຍີ່ປຸ່ນ ເພີ່ມທະວີການພົບປະແລກປ່ຽນກັບ ຫວຽດນາມ.
ດັ່ງນັ້ນ, ການຢ້ຽມຢາມທາງລັດຖະກິດເຖິງ ຫວຽດນາມ ໃນຄັ້ງນີ້ຂອງເຈົ້າຈັກກະພັດ ແລະ ພະມະເຫສີ ຍີ່ປຸ່ນ ແມ່ນເຫດການສຳຄັນ, ມີຄວາມໝາຍສັນຍາລັກ, ສ້າງຂີດໝາຍປະຫວັດສາດໃນການພົວພັນຮ່ວມມືມິດຕະພາບລະຫວ່າງ 2 ປະເທດ; ສະແດງໃຫ້ເຫັນນ້ຳໃຈ ແລະ ຄວາມເອົາໃຈໃສ່ຂອງ ຍີ່ປຸ່ນ ສຳລັບປະເທດ ແລະ ປະຊາຊົນ ຫວຽດນາມ; ປະກອບສ່ວນຊຸກຍູ້ການພົວພັນຄູ່ຮ່ວມມືຍຸດທະສາດຢ່າງເລິກເຊິ່ງກ້ວາງຂວາງລະຫວ່າງ ຫວຽດນາມ - ຍີ່ປຸ່ນ ນັບມື້ນັບພັດທະນາຮອບດ້ານ, ເພີ່ມທະວີຄວາມເຂົ້າອົກເຂົ້າໃຈກັນລະຫວ່າງປະຊາຊົນ 2 ຊາດ.
ປະຫວັດຄວາມເປັນມາແຫ່ງການພົວພັນ ແມ່ນມີມາແຕ່ດົນນານ
ປະຫວັດສາດໄດ້ສະແດງໃຫ້ເຫັນວ່າ ການພົວພັນແລກປ່ຽນລະຫວ່າງ ຫວຽດນາມ - ຍີ່ປຸ່ນ ແມ່ນມີມາແຕ່ດົນນານ. ໃນສະຕະວັດທີ 8, ພະພິກຂຸ ເຟີດຈ໋ຽດ ຈາກພາກກາງ ຫວຽດນາມ ໄດ້ໄປ ຍີ່ປຸ່ນ ເພື່ອສອນສາສະໜາ ແລະ ສອນດົນຕີ ເລີມເອີ໋ບ ພາຍຫລັງພະອົງປະລິນິບພານປະຊາຊົນທ້ອງຖິ່ນໄດ້ບູຊາຢູ່ວັດ ດ້າຍອານ ນະຄອນ Nara. ໃນສະຕະວັດທີ 16, 17, ບັນດານັກທຸລະກິດ ຍີ່ປຸ່ນ ໄດ້ມາແລກປ່ຽນຄ້າຂາຍຢູ່ ໂຮ້ຍອານ ແລະ ປະຈຸບັນຍັງມີປູຊະນີຍະສະຖານຫລາຍແຫ່ງຍັງຄົງຮັກສາໄວ້ໄດ້ຄື: ຂົວ ຍີ່ປຸ່ນ, ເຂດສຸສານຂອງຊາວ ຍີ່ປຸ່ນ.
ນັບແຕ່ປີ 1992 ມາຮອດປະຈຸບັນ, ການພົວພັນດ້ານເສດຖະກິດ, ການເມືອງ, ພົວພັນແລກປ່ຽນວັດທະນະທຳລະຫວ່າງ 2 ປະເທດໄດ້ຮັບການເປີດກ້ວາງຢ່າງບໍ່ຢຸດຢັ້ງ, ຄວາມເຂົ້າອົກເຂົ້າໃຈ ແລະ ຄວາມໄວ້ເນື້ອເຊື່ອໃຈໄດ້ເພີ່ມຂຶ້ນເທື່ອລະກ້າວ. ໃນຊຸມປີມໍ່ໆມານີ້, ການພົວພັນ ຫວຽດນາມ ແລະ ຍີ່ປຸ່ນ ພັດທະນາຢ່າງວ່ອງໄວ. ຍີ່ປຸ່ນ ແມ່ນປະເທດໃນກຸ່ມ G7 ທຳອິດຕ້ອນຮັບເລຂາທິການໃຫຍ່ພັກກອມມູນິດ ຫວຽດນາມ ມາຢ້ຽມຢາມ (1995) ແລະ ແມ່ນປະເທດ G7 ທຳອິດສ້າງຕັ້ງການພົວພັນຄູ່ຮ່ວມມືຍຸດທະສາດກັບ ຫວຽດນາມ (2009), ປະເທດ G7 ທຳອິດຮັບຮອງເອົາຖານະດ້ານເສດຖະກິດການຕະຫລາດຂອງ ຫວຽດນາມ (2011), ປະເທດ G7 ທຳອິດເຊື້ອເຊີນ ຫວຽດນາມ ເຂົ້າຮ່ວມກອງປະຊຸມສຸດຍອດ G7 ເປີດກ້ວາງ (05/2016). ໃນຂອບເຂດການພົວພັນໄດ້ຍົກລະດັບຢ່າງລຽນຕິດຈາກການພົວພັນ “ຄູ່ຮ່ວມມືໄວ້ເນື້ອເຊື່ອໃຈ, ເປັນປົກກະຕິຍາວນານ” ປີ 2002 ຖືກຍົກລະດັບເປັນການພົວພັນ “ຄູ່ຮ່ວມມືຍຸດທະສາດເລິກເຊິ່ງກ້ວາງຂວາງ ເພື່ອສັນຕິພາບ ແລະ ຄວາມວັດທະນາຖາວອນຢູ່ອາຊີ” ປີ 2014. ປີ 2015, ໃນການຢ້ຽມຢາມ ຍີ່ປຸ່ນ ຢ່າງເປັນທາງການ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ແລະ ທ່ານນາຍົກລັດຖະມົນຕີ ຍີ່ປຸ່ນ Shinzo Abe ໄດ້ອອກ “ຖະແຫຼງການກ່ຽວກັບວິໄສທັດລວມແຫ່ງການພົວພັນ ຫວຽດນາມ - ຍີ່ປຸ່ນ”.
ເຈົ້າຈັກກະພັດ ແລະ ພະມະເຫສີ ຍີ່ປຸ່ນ
(ພາບອິນເຕີແນັດ)
ບໍ່ພຽງແຕ່ຮ່ວມມືໃນຂອບເຂດ 2 ຝ່າຍເທົ່ານັ້ນ, ຫວຽດນາມ ແລະ ຍີປຸ່ນ ຍັງຮ່ວມມືຢ່າງແໜ້ນແຟ້ນ ແລະ ສະໜັບສະໜູນຊຶ່ງກັນ ແລະ ກັນໃນບັນດາເວທີປາໄສຫຼາຍຝ່າຍຄື : ສະຫະປະຊາຊາດ, ອາຊຽນ, ອາເປັກ, ອາແຊມ, ສະພາສິດທິມະນຸດ…ຫວຽດນາມສະໜັບສະຫນູນຍີປຸ່ນເຂົ້າເປັນກຳມະການບໍ່ປະຈຳຂອງສະພາຄວາມໝັ້ນຄົງ ສ.ປ.ຊ (2016-2017) ແລະ ໝັ້ນໝາຍສືບຕໍ່ສະໜັບສະຫນູນ ເປັນກຳມະການປະຈຳຂອງສະພາຄວາມໝັ້ນຄົງ ສ.ປ.ຊ ຂະນະທີ່ອົງການນີ້ໄດ້ຮັບການເປີດກ້ວາງ. ກ່ຽວກັບບັນຫາທະເລຕາເວັນອອກ, ຍີປຸ່ນຢືນຢັນວ່າ ຄວນຮັບປະກັນຄວາມໝັ້ນຄົງ, ປອດໄພ ແລະ ສິດເສລີໃນການເດີນເຮືອ, ການບິນຢູ່ ທະເລຕາເວັນອອກ; ສະໜັນສະໜູນທັດສະນະທີ່ບັນດາການຂັດແຍ້ງກັນຢູ່ ທະເລຕາເວັນອອກຕ້ອງໄດ້ຮັບການແກ້ໄຂໂດຍສັນຕິວິທີ, ບໍ່ນຳໃຊ້ກຳລັງອາວຸດ, ບົນພື້ນຖານກົດໝາຍສາກົນ, ຄັດຄ້ານບັນດາການກະທຳພຽງລຳພັງຝ່າຍດຽວ ແນໃສ່ເຮັດໃຫ້ປ່ຽນແປງສະພາບເດີມຢູ່ ທະເລຕາເວັນອອກ.
ຊຸກຍູ້ການພົວພັນຄູ່ຮ່ວມມືຍຸດທະສາດຢ່າງກ້ວາງເລິກຫວຽດນາມ-ຍີປຸ່ນ
ການຢ້ຽມຢາມຫວຽດນາມຂອງເຈົ້າຈັກກະພັດຍີປຸ່ນ ແລະ ພະມະເຫສີຍີປຸ່ນໄດ້ດຳເນິນໃນສະພາບການພົວພັນຄູ່ຮ່ວມມືຍຸດທະສາດຢ່າງກ້ວາງເລິກເພື່ອສັນຕິພາບ ແລະ ຄວາມຈະເລີນຮຸ່ງເຮືອງຢູ່ອາຊີລະຫວ່າງຫວຽດນາມ ແລະ ຍີ່ປຸ່ນທີ່ນັບມື້ນັບພັດທະນາຢ່າງດີງາມ, ຮອບດ້ານໃນຫຼາຍຂົງເຂດ. ໄລ່ຮອດຈຸດເວລານີ້, ຍີປຸ່ນແມ່ນຄູ່ຮ່ວມມືເສດຖະກິດທີ່ສຳຄັນແຖວໜ້າຂອງຫວຽດນາມ ແລະ ແມ່ນຜູ້ໃຫ້ການຊ່ວຍເຫຼືອພັດທະນາ ODA ລາຍໃຫຍ່ກວ່າໝູ່ ແລະ ແມ່ນຄູ່ຮ່ວມມືທີ່ 2 ກ່ຽວກັບການລົງທຶນໂດຍກົງຂອງຕ່າງປະເທດ FDI, ແມ່ນຄູ່ຮ່ວມມືທີ 3 ກ່ຽວກັບການທ່ອງທ່ຽວ ແລະ ຄູ່ຮ່ວມມືທີ 4 ກ່ຽວກັບການຄ້າ. ພິເສດ, ການຢ້ຽມຢາມຖືກດຳເນີນພາຍຫຼັງທີ່ທ່ານນາຍົກລັດຖະມົນຕີຍີປຸ່ນ Shinzo Abe ມາຢ້ຽມຢາມຫວຽດນາມເມື່ອເດືອນ 1/2017 ຊຶ່ງໄດ້ບັນລຸບັນດາໝາກຜົນທີ່ໜ້າປະທັບໃຈ.
ບົນພື້ນຖານດັ່ງກ່າວ, ການຢ້ຽມຢາມທາງລັດຖະກິດຢູ່ຫວຽດນາມຂອງເຈົ້າຈັກກະພັດຍີປຸ່ນ ແລະ ພະມະເຫສີຍີປຸ່ນ ກໍແມ່ນເຫດການທີ່ສຳຄັນ, ມີຄວາມໝາຍເປັນສັນຍາລັກ, ເປັນຂີດໝາຍແຫ່ງປະຫວັດສາດໃນການພົວພັນຮ່ວມມືມິດຕະພາບລະຫວ່າງ 2 ປະເທດ, ສະແດງໃຫ້ເຫັນນ້ຳໃຈ ແລະ ຄວາມເອົາໃຈໃສ່ຂອງຍີປຸ່ນທີ່ມີຕໍ່ປະເທດຊາດ ແລະ ປະຊາຊົນຫວຽດນາມ. ຜ່ານນັ້ນ ກໍເປັນການປະກອບສ່ວນຊຸກຍູ້ ການພົວພັນຄູ່ຮ່ວມມືຍຸດທະສາດຢ່າງກ້ວາງເລິກລະຫວ່າງຫວຽດນາມ-ຍີປຸ່ນໃຫ້ນັບມື້ນັບພັດທະນາຢ່າງຮອບດ້ານ, ເພີ່ມທະວີຄວາມເຂົ້າອົກເຂົ້າໃຈລະຫວ່າງ 2 ຊາດ.