ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ
ໃຫ້ການ ຕ້ອນຮັບທ່ານປະທານສະພາເອີລົບ Herman Van Rompuyເມື່ອເດືອນ 10/2012 (ພາບ: internet)
|
ການເດີນທາງຢ້ຽມຢາມລາຊະອານາຈັກແບນຊິກ ແລະ ສະຫະພາບເອີລົບ EU ຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ແມ່ນການຢ້ຽມຢາມບັນດາປະເທດເອີລົບຕາເວັນຕົກຄັ້ງທຳອິດຂອງ ທ່ານເລຂາທິການໃຫຍ່ ຫງວຽນຟູ້ຈ້ອງ ໃນຖານະຕຳແໜ່ງເປັນຜູ້ນຳຄະນະບໍລິຫານງານສູນກາງພັກກອມມູນິດຫວຽດນາມ. ການຢ້ຽມຢາມຄັ້ງນີ້ຂອງທ່ານ ແມ່ນບໍ່ພຽງແຕ່ເປີດຂອບເຂດການຮ່ວມມືໃໝ່ໃນສາຍພົວພັນຫວຽດນາມ - EU ເທົ່ານັ້ນ, ຫາກຍັງເປັນການສ້າງກຳລັງໜູນຊຸກຍູ້ການພົວພັນຫວຽດນາມ-ແບນຊິກ ໃຫ້ພັດທະນາຢ່າງແຂງແຮງກ່ວາໃນໄລຍະທີ່ຈະມາເຖິງອີກດ້ວຍ. ການເດີນທາງຢ້ຽມຢາມສະຫະພາບເອີລົບ EU ຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ແມ່ນດຳເນີນໃນສະຖານະການໂລກມີການຫັນປ່ຽນຫຼາຍຢ່າງຍ້ອນຜົນສະທ້ອນຈາກວິກິດການການເງິນ ແລະ ການຊຸດໂຊມທາງດ້ານເສດຖະກິດທົ່ວໂລກສືບຕໍ່ແກ່ຍາວຢ່າງຮ້າຍແຮງ. ບັນດາປະເທດ, ນັບທັງບັນດາພື້ນຖານເສດຖະກິດອັນດັບໜຶ່ງໃນໂລກພວມພະຍາຍາມຊອກຫາແບບວິທີການແກ້ໄຂຜົນຮ້າຍຈາກວິກິດການ ແລະ ສັນຕິພາບ, ການຮ່ວມມື, ການເຊື່ອມໂຍງ ແລະ ພັດທະນາຍັງຄົງແມ່ນທ່າອຽງໃຫຍ່. ອາຊີ-ປາຊີຟິກ ສືບຕໍ່ຮັບຖືວ່າ ແມ່ນພາກພື້ນພັດທະນາທີ່ຂະຫຍັນຂັ່ນເຄື່ອນ ແລະ EU ກໍພວມຫັນທິດການຮ່ວມມືໄປສູ່ບັນດາປະເທດໃນພາກພື້ນນີ້, ໃນນັ້ນມີຫວຽດນາມ. ໃນຊຸມປີມໍ່ໆມານີ້, EU ຍາມໃດກໍຮັບຮູ້ບົດບາດສຳຄັນຂອງຫວຽດນາມໃນພາກພື້ນ ແລະ ຫວັງຢາກຊຸກຍູ້ການພົວພັນກັບຫວຽດນາມ, ແລະ ຜ່ານຫວຽດນາມເປັນຂົວເຊື່ອມຕໍ່ ເພື່ອຊຸກຍູ້ການພົວພັນກັບອາຊຽນ. ໃນການເດີນທາງມາຢ້ຽມຢາມຫວຽດນາມເມື່ອເດືອນ 10/2012, ທ່ານປະທານສະພາເອີລົບ Herman Van Rompuy ໄດ້ຢືນຢັນວ່າ :
“ ຫວຽດນາມແມ່ນຄູ່ຮ່ວມມືສຳຄັນພິເສດຂອງ EU ໃນພາກພື້ນອາຊີ ແລະ ອາຊຽນ. ຂ້າພະເຈົ້າປາດຖະໜາວ່າ ຈະເປີດກ້ວາງການພົວພັນລະຫວ່າງ 2 ຝ່າຍ ບົນພື້ນຖານສັນຍາ PCA ຊຶ່ງໄດ້ຮັບການລົງນາມ, ພ້ອມກັນນັ້ນ, ຂ້າພະເຈົ້າຍັງຕີລາຄາສູງການດຳເນີນການເຈລະຈາສັນຍາການຄ້າເສລີ FTA ລະຫວ່າງ ຫວຽດນາມ - EU. ສິ່ງທັງໝົດເຫຼົ່ານັ້ນ, ແມ່ນມີຄວາມໝາຍວ່າ ຈະນຳມາເຊິ່ງຜົນປະໂຫຍດໃຫ້ແກ່ທັງ 2 ຝ່າຍໂດຍຜ່ານການຊຸກຍູ້ການເຕີບໂຕ, ການສ້າງວຽກເຮັດງານທຳຢູ່ຫວຽດນາມ ແລະ EU. ພວກຂ້າພະເຈົ້າມີຄວາມເອົາໃຈໃສ່ຢ່າງເລິກເຊິ່ງຕໍ່ຜົນສຳເລັດຂອງຫວຽດນາມ, ເພາະວ່າເມື່ອຫວຽດນາມປະສົບຜົນສຳເລັດ ຈະນຳມາເຊິ່ງຜົນປະໂຫຍດໃຫ້ແກ່ພາກພື້ນ ແລະ ບັນດາປະເທດເພື່ອນມິດຂອງຕົນໃນໂລກ ”
ອາດຈະເຫັນໄດ້ວ່າ, ໃນ 20 ກ່ວາປີທີ່ຜ່ານມາ, ການພົວພັນຫວຽດນາມ - EU ໄດ້ພັດທະນາຢ່າງວ່ອງໄວ ແລະ ເລິກເຊິ່ງກ້ວາງຂວາງ. ທາງດ້ານເສດຖະກິດ, ການຄ້າ, EU ແມ່ນຄູ່ຮ່ວມມືອັນດັບໜຶ່ງຂອງຫວຽດນາມ, ແມ່ນຕະຫຼາດສົ່ງອອກສຳຄັນອັນດັບ 2 ຂອງຫວຽດນາມ, ຖັດຈາກອາເມລິກາ ແລະ ໃນປີ 2012 ໄດ້ຢືນອັນດັບໜ່ຶງ. ໃນຊຸມປີມໍ່ໆມານີ້, ວົງເງິນການຄ້າ 2 ສົ້ນໄດ້ເພີ່ມຂຶ້ນ ຄິດສະເລຍແມ່ນ 15-20%/ປີ. ທາງດ້ານການຮ່ວມມືເພື່ອການພັດທະນາ, EU ແມ່ນນັກອຸປະຖຳ 2 ຝ່າຍ ໃຫຍ່ອັນດັບທີ່ 2 ກ່ຽວກັບທຶນ ODA ແລະ ແມ່ນກຸ່ມບັນດາປະເທດໃຫ້ການຊ່ວຍເຫຼືອລ້າລາຍໃຫຍ່ກ່ວາໝູ່ໃຫ້ແກ່ຫວຽດນາມ, ກວມເອົາ 20% ຍອດມຸນຄ່າການອຸປະຖຳ ໃນຄຳໝັ້ນສັນຍາຂອງປະຊົມໂລກທີ່ສະຫງວນໃຫ້ແກ່ຫວຽດນາມ. ພິເສດ, ໃນປີ 2012 ຜ່ານມາ, 2 ຝ່າຍໄດ້ລົງນາມໃນສັນຍາແມ່ຄູ່ຮ່ວມມື ແລະ ການຮ່ວມມືຮອບດ້ານ(PCA) ແລະ ສຳເລັດການເຈລະຄາຮອບທີ່ 1 ກ່ຽວກັບສັນຍາການຄ້າເສລີ (FTA) . ທ່ານ ເລຫາຍບິງ ຫົວໜ້າກົມນະໂຍບາຍການພົວພັນຕ່າງປະເທດສັງກັດກະຊວງການຕ່າງປະເທດຫວຽດນາມຖືວ່າ (ເທບ)
“ ອາຊີ-ປາຊີຟິກ ໄດ້ກາຍເປັນພາກພື້ນທີ່ບັນດາປະເທດໃຫຍ່, ອົງການຈັດຕັ້ງໃຫຍ່ຕ່າງໆຖືເປັນສຳຄັນທີ່ສຸດ, ໃນນັ້ນ, EU ເອົາໃຈໃສ່ຫຼາຍເຖິງຫວຽດນາມ. ທີ່ ໜຶ່ງ, 2 ຝ່າຍໄດ້ເຊັນ ສັນຍາແມ່ຄູ່ຮ່ວມມື ແລະ ການຮ່ວມມືຮອບດ້ານ(PCA) ຢ່າງເປັນທາງການ, ແລະ ໃນວິວັດການແຕ່ນີ້ຈົນເຖິງເວລາທີ່ສັນຍາມີຜົນສັກສິດນັ້ນ ກໍແມ່ນໄລຍະທາງຍາວ ເພາະວ່າ ຕ້ອງຜ່ານການເຊັນ, ໃຫ້ສັດຕະຍາບັນຈາກ 27 ປະເທດ. ແຕ່ນີ້ແມ່ນຫຼັກໝາຍໃຫຍ່ ຂີດໝາຍບາດກ້າວຫັນປ່ຽນທີ່ສຳຄັນໃນການຮ່ວມມືລະຫວ່າງຫວຽດນາມ - EU, ເພາະ ກ່ອນນີ້ຫວຽດນາມໄດ້ມີສັນຍາແມ່ປີ 1995, ມາຮອດດຽວນີ້ແມ່ນໄດ້ 17 ປີແລ້ວ, ແລະ ປະຈຸບັນ ໄດ້ມີສັນຍາສະບັບທີ່ 2 ກຳນົດຂອບເຂດການຮ່ວມມື, ໃນນັ້ນ EU ຖືຫວຽດນາມເປັນສຳຄັນກ່ວາ ແລະ ຍົກລະດັບການພົວພັນກັບຫວຽດນາມ. ທາງດ້ານເສດຖະກິດການຄ້າ, ນອກຈາກຕົວເລກໂດຍລະອຽດແລ້ວ, 2 ຝ່າຍໄດ້ດຳເນີນການເຈລະຈາສັນຍາການຄ້າເສລີ FTA. ນີ້ແມ່ນໝາກຜນທີ່ສຳຄັນທີ່ສຸດ ”
ດ້ວຍທ່ວງທ່າການພົວພັນພວມພັດທະນາຢ່າງດີງາມຄືໃນປະຈຸບັນ, ການເດີນ ທາງຢ້ຽມຢາມສະຫະພາບເອີລົບ EU ຢ່່າງເປັນທາງການຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງຄັ້ງນີ້ ຈະສ້າງພະລັງຊີວິດໃໝ່ເພື່ອໃຫ້ການພົວພັນຫວຽດນາມ - EU ພັດທະນາແຂງແຮງຍິ່ງຂຶ້ນອີກ, ປະກອບສ່ວນແກ້ໄຂບັນດາບັນຫາທີ່ຍັງຄົງຄ້າງ ແລະ ຊຸກຍູ້ການຜັນຂະຫຍາຍບາງໂຄງການຊຶ່ງບັນດາຄູ່ຮ່ວມມືໃນ EU ມີຄວາມສົນໃຈ ແລະ ຫວຽດນາມມີຜົນປະໂຫຍດຢ່າງແທດຈິງ. ໂດຍຜ່ານການພົບປະແລກປ່ຽນກັບບັນດາການນຳຄະນະກຳມະການເອີລົບ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ກໍໄດ້ສົ່ງສານສະບັບໜຶ່ງທີ່ວ່າ : ຫວຽດນາມຖືການພົວພັນກັບ EU ເປັນສຳຄັນທີ່ສຸດ, ໝັ້ນໝາຍພ້ອມກັບ EU ຊຸກຍູ້ການພົວພັນເຂົ້າສູ່ລວງເລິກກ່ວາອີກ, ພ້ອມກັນນັ້ນ ກໍເສີມຂະຫຍາຍບົດບາດເປັນປະເທດປະສານງານເພື່ອຊຸກຍູ້ການພົວພັນ ອາຊຽນ-EU .
ໂດຍແມ່ນປະເທດສະມາຊິກຂອງ EU, ລາຊະອານາຈັກແບນຊິກ ກໍແມ່ນໜຶ່ງໃນບັນດາປະເທດໄດ້ສ້າງການພົວພັນທາງການທູດໂດຍໄວທີ່ສຸດ. ມາຮອດປະຈຸບັນ, ການພົວພັນມິດຕະພາບ ແລະ ການຮ່ວມມືຫຼາຍດ້ານລະຫວ່າງ 2 ປະເທດໄດ້ພັດທະນາຢ່າງເລິກເຊິ່ງກ້ວາງຂວາງໃນຫຼາຍຂົງເຂດ, ພິເສດແມ່ນການເມືອງ, ການທູດ, ເສດຖະກິດ, ການຮ່ວມມືພັດທະນາ ແລະ ການສຶກສາບຳລຸງສ້າງ; ເພີ່ມທະວີການຮ່ວມມືລະຫວ່າງບັນດາເຂດ, ທ້ອງຖິ່ນຂອງ 2 ປະເທດ. ໃນສະຖານະການປະຈຸບັນ, ການເດີນທາງຢ້ຽມຢາມລາຊະອານາຈັກແບນຊິກ ຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຈະສ້າງປະຖົມປັດໄຈໃຫ້ແກ່ການພົວພັນລະຫວ່າງ 2 ປະເທດພັດທະນາຍາວນານໃນຂົງເຂດຕ່າງໆໃນໄລຍະທີ່ຈະມາເຖິງ. ໃນການຢ້ຽມຢາມຄັ້ງນີ້, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຈະພ້ອມກັບບັນດາການນຳແຫ່ງ ລາຊະອານາຈັກແບນຊິກ ພິຈາລະນາການຍົກລະດັບການພົວພັນ 2 ຝ່າຍໃນບາງຂົງເຂດທີ່ເໝາະສົມໃນອະນາຄົດ, ພ້ອມກັນນັ້ນ ກໍແບ່ງປັນທັດສະນະກ່ຽວກັບບັນດາບັນຫາໃນພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ.
ການເດີນທາງຢ້ຽມຢາມລາຊະອານາຈັກແບນຊິກ ແລະ ສະຫະພາບເອີລົບ EU ຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຄັ້ງນີ້ ແມ່ນເພື່ອແນໃສ່ສືບຕໍ່ຜັນຂະຫຍາຍແນວທາງການຕ່າງປະເທດຂອງຫວຽດນາມຢ່າງຄົບຊຸດ ແລະ ຮອບດ້ານ. ແນ່ນອນວ່າ ການຢ້ຽມຢາມຄັ້ງນີ້ ຈະເປັນຫຼັກໝາຍສຳຄັນໃນການພົວພັນລະຫວ່າງຫວຽດນາມກັບ EU ແລະ ລາຊະອານາຈັກ ແບນຊິກ ເພື່ອຊຸກຍູ້ ແລະ ເປີດກ້ວາງການຮ່ວມມືຫຼາຍດ້ານກັບບັນດາຄູ່ຮ່ວມມືທີ່ສຳຄັນນີ້ໃນສະພາບການໃໝ່ .