(vovworld) – ປະເທດໄທ ພວມຕົກຢູ່ໃນສະພາບຂາດສະຖຽນລະພາບຢ່າງຮ້າຍແຮງທີ່ສຸດ ພາຍຫຼັງເກີດການແຫ່ຂະບວນປະທ້ວງທີ່ນອງເລືອດເມື່ອປີ 2010. ການແຫ່ຂະບວນປະທ້ວງມີທ່າອ່ຽງນັບມື້ນັບເພີ່ມຂຶ້ນ ແລະ ບໍ່ທັນມີສັນຍານຫຼຸດລົງ, ເຖິງວ່າໄດ້ກ້າວເຂົ້າສູ່ມື້ທີ 32 ຢ່າງລຽນຕິດແລ້ວກໍ່ຕາມ. ພາຍຫຼັງການຈາລະຈົນທີ່ພາໃຫ້ 4 ຄົນເສຍຊີວິດ ແລະ ນັບຮ້ອຍຄົນຖືກບາດເຈບ. ວັນທີ 2/12 ຕຳຫຼວດໄທຕ້ອງນຳໃຊ້ທໍ່ສີດນ້ຳ ແລະ ແກັດນຳ້ຕາເພື່ອຍຸບເລີກຂະບວນແຫ່. ແນ່ນອນວ່າໃນຊຸມວັນຈະມາເຖິງ, ປະເທດນີ້ຈະມີການຜັນແປຫຼາຍຢ່າງ ຍາກທີ່ຈະຄາດຄະເນລ່ວງໜ້າໄດ້.
ທ່ານນາງນາຍົກລັດຖະມົນຕີໄທ ຍິງຣັກ ຊິນນະວັດ
(ພາບອິນເຕີແນດ)
ວັນທີ 2/12, ສານອາຍາໄທ ໄດ້ຮັບຮອງເອົາຄຳສັ່ງຈັບຕົວທ່ານ ສຸເທບ ເທືອກສຸບັນ, ອະດີດສະມາຊິກສະພາແຫ່ງຊາດຂອງພັກປະຊາທິປັດຝ່າຍຄ້ານ ແລະ ປະຈຸບັນເປັນຜູ້ນຳຂະບວນແຫ່ຕ່າງໆຢູ່ນະຄອນຫຼວງບາງກອກ. ທ່ານ ສຸເທບ ເທືອກສຸບັນ ໄດ້ຮຽກຮ້ອງ ແລະ ຊີ້ນຳໃຫ້ຜູ້ແຫ່ຂະບວນນັບພັນຄົນບຸກເຂົ້າ ແລະ ຢືດຄອງສຳນັກງານຈຳນວນໜຶ່ງຂອງກະຊວງ, ຂະແໜງການຕ່າງໆ. ນອກຈາກທ່ານ ສຸເທບ ເທືອກສຸບັນ ແລ້ວ, ຍັງມີ 4 ຄົນທີ່ເປັນຫົວໜ້າ “ຂະບວນການນັກສຶກສາ ແລະ ປະຊາຊົນເພື່ອການປະຕິຮູບໄທ“ ກໍ່ຖືກສານຕິດສິນຈັບຕົວ ດ້ວຍໂທດບຸກເຂົ້າ ແລະ ທຳລາຍສຳນັກງານຂອງລັດ. ກ່ອນນັ້ນຫົວໜ້າຝ່າຍຄ້ານທ່ານ ສຸເທບ ເທືອກສຸບັນ ໄດ້ອອກຄຳຂາດຮຽກຮ້ອງໃຫ້ທ່ານນາງນາຍົກລັດຖະມົນຕີໄທ ຍິງຣັກ ຊິນນະວັດ ລາອອກຈາກຕຳແໜ່ງ ມອບຄືນສິດອຳນາດໃຫ້ແກ່ປະຊາຊົນ, ແຕ່ຄຳຂາດນີ້ ໄດ້ຖືກລັດຖະບານໄທ ປະຕິເສດ ຍ້ອນຝືນກັບລັດຖະທຳມະນູນ.
ຄວາມຈິງກ່ຽວກັບຫົວໜ້າຝ່າຍຄ້ານ
ທ່ານ ສຸເທບ ເທືອກສຸບັນ ເຄີຍເປັນຮອງນາຍົກລັດຖະມົນຕີໄທ ໄລຍະ 2008-2011. ນີ້ແມ່ນລັດຖະບານທີ່ໄດ້ອອກຄຳສັ່ງປາບປາມການແຫ່ຂະບວນສະໜັບສະໜູນອະດີດການນຳຖືກໂຄ່ນລົ້ມທ່ານ ທັກສິນ ຊິນນະວັດ ເມື່ອປີ 2010, ອັນໄດ້ເຮັດໃຫ້ 90 ຄົນເສຍຊີວິດ. ທ່ານ ສຸເທບ ເທືອກສຸບັນ ເຄີຍເປັນລັດຖະມົນຕີກະສີກຳ ແລະ ໂທລະຄົມ. ພາຍຫຼັງທີ່ລັດຖະບານໃໝ່ຂອງທ່ານນາງນາຍົກລັດຖະມົນຕີ ຍິງຣັກ ຊິນນະວັດ ໄດ້ຮັບການເລືອກຕັ້ງຈາກປະຊາຊົນ, ທ່ານ ສຸເທບ ເທືອກສຸບັນ ໄດ້ຫັນມາເປັນຝ່າຍຄ້ານ. ແລະ ໃນຂະນະທີ່ທ່ານນາງນາຍົກລັດຖະມົນຕີ ຍິງຣັກ ຊິນນະວັດ ຄິດໄລ່ຊັ່ງຊາເຖິງກົດໝາຍອະໄພຍະໂທດທີ່ກໍ່ຄວາມໂຕ້ຖຽງກັນນັ້ນ, ທ່ານ ສຸເທບ ເທືອກສຸບັນພັດອອກຈາກພັກປະຊາທິປັດໃນທັນທີ ເພື່ອຊີ້ນຳການແຫ່ຂະບວນປະທ້ວງຄັ້ງຕ່າງໆ. ດ້ວຍຄວາມຕັດສິນໃຈໂຄ່ນລົ້ມ “ອຳນາດການປົກຄອງຂອງທ່ານ ທັກສິນ“ ທີ່ພວມເຄື່ອນໄຫວພາຍໃຕ້ລັດຖະບານຂອງທ່ານນາງນາຍົກລັດຖະມົນຕີ ຍິງຣັກ. ທ່ານ ສຸເທບ ເທືອກສຸບັນ ຮຽກຮ້ອງໃຫ້ປ່ຽນແທນລັດຖະບານນີ້ດ້ວຍ “ສະພາຂອງປະຊາຊົນ“, ບໍ່ແມ່ນໂດຍປະຊາຊົນເລືອກຕັ້ງ, ເພື່ອເລືອກເຟັ້ນການນຳແຫ່ງຊາດ.
ຈຸດປະສົງດ້ານການເມືອງ
ສະພາບການເມືອງຢູ່ໄທ ໃນຫຼາຍປີຜ່ານມາ ເຄີຍເກີດການປະທະກັນລະຫວ່າງຝ່າຍເສື້ອສືເຫຼືອງທີ່ຄັດຄ້ານອະດີດນາຍົກລັດຖະມົນຕີ ທັກສິນ ແລະ ຝ່າຍເສື້ອແດງທີ່ສະໜັບສະໜູນທ່ານ. ຖ້າຫາກວ່າລັດຖະບານກຳອຳນາດ ແມ່ນກຳລັງນິຍົມທ່ານ ທັກສິນ, ຝ່າຍເສື້ອສີເຫຼືອງຈະລົງຖະໜົນເພື່ອແຫ່ຂະບວນຄັດຄ້ານ. ກົງກັນຂ້າມຖ້າຫາກລັດຖະບານແມ່ນຂຶ້ນກັບກຳລັງຄັດຄ້ານທ່ານ ທັກສິນ, ຝ່າຍເສື້ອແດງກໍ່ຈະດຳເນີນການແຫ່ຂະບວນປະທ້ວງເຊັ່ນດຽວກັນ. ແຕ່ຄວາມຈິງນັບແຕ່ປີ 2001 ມາຮອດປະຈຸບັນ, ບັນດາພັກຝ່າຍທີ່ນິຍົມທ່ານ ທັກສິນຍາມໃດກໍ່ໄດ້ຮັບຊະນະໃນການເລືອກຕັ້ງຄັ້ງຕ່າງໆ ແລະ ຝ່າຍຄ້ານພຽງແຕ່ໄດ້ກຳອຳນາດເມື່ອອີງໃສ່ການລັດຖະປະຫານ, ໂຄ່ນລົ້ມອຳນາດການປົກຄອງເທົ່ານັ້ນ. ຍ້ອນເຫດນັ້ນ, ຮ່າງກົດໝາຍອະໄພຍະໂທດ ເຊິ່ງທ່ານນາງນາຍົກລັດຖະມົນຕີ ຍິງຣັກ ຍົກອອກມາ ໄດ້ກາຍເປັນເຫດຜົນເພື່ອໃຫ້ຝ່າຍເສື້ອສືເຫຼືອງສວຍໂອກາດໂຄ່ນລົ້ມລັດຖະບານຂອງທ່ານນາງ ຍິງຣັກ.
ຍຸດທະວິທີໄກ່ເກ່ຍປອງດອງຊາດຈະໄດ້ຮັບຜົນຫຼືບໍ
ໂດຍຈົ່ງຮັກພັກດີກັບແນວທາງໄກ່ເກ່ຍປອງດອງຊາດ, ດັ່ງນັ້ນຕໍ່ໜ້າຄວາມດັນຂອງຝ່າຍຄ້ານໃນຫຼາຍມື້ຜ່ານມາ, ທ່ານນາງນາຍົກລັດຖະມົນຕີ ຍິງຣັກ ໄດ້ປະກາດພ້ອມແລ້ວທີ່ຈະເຈລະຈາ ແລະ ຖືວ່າ, ຖ້າຫາກມີບໍ່ວ່າມາດຕະການໃດສາມາດຟື້ນຟູສັນຕິພາບຄືນໃໝ່ໄດ້, ທ່ານນາງກໍ່ຈະນຳໃຊ້ໃນທັນທີ. ລັດຖະບານໃຫ້ຄຳໝັ້ນສັນຍາພຽງແຕ່ນຳໃຊ້ມາດຕະການໄກ່ເກ່ຍປອງດອງຊາດເທົ່ານັ້ນ ແລະ ປະຕິບັດຫຼັກການຕ່າງໆຕາມກົດໝາຍເພື່ອຮັບມືກັບການແຫ່ຂະບວນປະທ້ວງ. ທ່ານນາງ ຍິງຣັກ ໄດ້ປະກົດທາງໂທລະພາບເປັນປະຈຳເພື່ອແນໃສ່ຫຼຸດຜ່ອນຄວາມເຄັ່ງຕຶງ. ຕາມວົງການນັກສັງເກດການແລ້ວ, ລັດຖະບານຂອງທ່ານນາງນາຍົກລັດຖະມົນຕີ ຍິງຣັກ ອາດຖອດຖອນບົດຮຽນມາໄດ້ຈາກວິກິດການເມື່ອປີ 2010 ຂະນະທີ່ນຳໃຊ້ວິທີການປາບປາມເພື່ອຍຸບເລີກການແຫ່ຂະບວນ. ແຕ່ລັດຖະບານໄທອາດຈະຖືກຕົກຢູ່ໃນສະພາບທີ່ເຄີຍເກີດຂຶ້ນໃນປີ 2008 ເມື່ອຜູ້ແຫ່ຂະບວນຢືດຄອງບັນດາສຳນັກງານ, ເຮັດໃຫ້ລະບົບບໍລິຫານປະເທດຢືກຢຸດສະງັກ.
ປະຈຸບັນ, ສະພາບເຄັ່ງຕຶງທາງດ້ານການເມືອງຢູ່ໄທ ອາດຈະເຮັດໃຫ້ ລັດຖະບານບໍ່ສາມາດຄວບຄຸມວຽກງານທັງໝົດໄດ້ ແລະ ບາງເທື່ອຈະເກີດລັດຖະປະຫານດ້ານການທະຫານ. ແຕ່ເຫດການທີ່ໄດ້ຮັບຄວາມຫວັງຈະຊ່ວຍຫຼຸດຜ່ອນຄວາມເຄັ່ງຕຶງນັ້ນແມ່ນ, ຍັງມີອີກ 2 ວັນ (5/12/2013) ກໍ່ຈະຮອດວັນຄ້າຍວັນເກີດຂອງພະເຈົ້າມະຫາຊີວິດແຫ່ງລາຊະອານາຈັກໄທ, ນີ້ແມ່ນເຫດການທີ່ໄດ້ຮັບຄວາມເຄົາລົບນັບຖືຈາກ ປະຊາຊົນທຸກຄົນ ແລະ ພັກຝ່າຍຕ່າງໆ. ແຕ່ນັ້ນພຽງແຕ່ແມ່ນສະພາບຄວາມສະຫງົບຊົ່ວຄາວເທົ່ານັ້ນ, ເພາະວ່າເພື່ອແກ້ໄຂຄວາມແບ່ງແຍກກັນຢ່າງເລິກເຊິ່ງໃນສັງຄົມຢ່າງເຖິງຖອງນັ້ນ ພັດບໍ່ແມ່ນເລື່ອງທີ່ງາຍດາຍ.