(vovworld) – ປີ 2016, ເຖິງວ່າມີຫຼາຍມາດຕະການເພື່ອຮັບມືກັບບັນດາກະແສຊາວອົບພະຍົບກໍ່ຕາມແຕ່ບັນດາປະເທດ ເອີລົບ ຍັງບໍ່ມີຄຳຕອບລວມເທື່ອ. ເຖິງວ່າໃນສະພາບການຕົວຈິງແລ້ວ, ຈຳນວນຊາວອົບພະຍົບທີ່ຂ້າມທະເລເຂົ້າສະຫະພາບເອີລົບ (ອີຢູ) ໃນປີ 2016 ໄດ້ຫລຸດລົງເມື່ອທຽບໃສ່ປີ 2015 ກໍ່ຕາມ, ແຕ່ການຜັນແປຂອງວິກິດການອົບພະຍົບເຂົ້າ ອີຢູພັດປະກົດຄວາມອັນຕະລາຍ, ເປັນໜ້າວິຕົກວັງວົນໃໝ່ຢູ່. ບົດຂຽນ “ວິກິດການອົບພະຍົບ: ຄວາມມືດມົວໃນສະພາບການໂລກປີ 2016” ຂອງບັນນາທິການ VOV ແອ໋ງຮ່ວຽນ.
.jpg)
ຊາວອົບພະຍົບຢູ່ສະຫະພາບເອີລົບ
(ພາບ: AFP/TTXVN)
|
ເຖິງວ່າໄດ້ນຳໃຊ້ຫຼາຍມາດຕະການຄື: ຮັດແໜ້ນການຄວບຄຸມຢູ່ເຂດຊາຍແດນ, ສ້າງຕັ້ງບັນດາກອງລາດຕາເວນບົນທະເລເພື່ອຮັບມືກັບພວກຄ້າຂາຍມະນຸດ, ເຈລະຈາຂໍ້ຕົກລົງກັບ ຕວກກີ ເພື່ອສະກັດກັ້ນກະແສຊາວ ອົບພະຍົບ, ອັດປະຕູເສັ້ນທາງ Balkan, ເຊິ່ງແມ່ນເສັ້ນທາງອົບພະຍົບຕົ້ນຕໍເຂົ້າເອີລົບ, ຍູ້ໄວການເນລະເທດຜູ້ຖືກຍົບເລີກໃບຮ້ອງຂໍຫຼົບໄພ… ກໍ່ຕາມ ແຕ່ບັນຫາຊາວອົບພະຍົບປີ 2016 ຍັງຄົງເຮັດໃຫ້ບັນດາການນຳ ເອີລົບ ຕ້ອງເຈັບຫົວ ແລະ ມາຮອດປະຈຸບັນຍັງບໍ່ທັນຊອກຫາຄຳຕອບໄດ້ເທື່ອ.
ທີ່ກອງປະຊຸມສຸດຍອດຂອງສະຫະປະຊາຊາດ ກ່ຽວກັບຊາວອົບພະຍົບຖືກດຳເນີນໃນເດືອນ 9, ໃນບົດກ່າວປາໄສຂອງຕົນ, ທ່ານປະທານາທິບໍດີ ອາເມລິກາ Barack Obama ໄດ້ຍອມຮັບວ່າ: ວິກິດການຊາວອົບພະຍົບທົ່ວໂລກແມ່ນໜຶ່ງໃນບັນດາ “ສິ່ງທ້າທາຍຮີບດ່ວນທີ່ສຸດໃນປະຈຸບັນ”. ແຕ່ເຖິງຢ່າງໃດກໍ່ຕາມ, ບັນດາຄຳໝັ້ນສັນຍາເຊິ່ງການນຳປະເທດຕ່າງໆຍົກອອກມານັ້ນບໍ່ທັນເໝາະສົມກັບສິ່ງທ້າທາຍນີ້ເທື່ອ. ໃນຂະນະນັ້ນ, ບັນດາໄພລີ້ຊ້ອນໃນວິກິດການຊາວອົບພະຍົບນີ້ນັບມື້ຍູ້ ເອີລົບ ຕົກເຂົ້າສູ່ຄວາມຂາດສະຖຽນລະພາບ, ຍາກທີ່ຈະຄາດຄະເນລ່ວງໜ້າໄດ້.
ບັນດາການຜັນແປທີ່ອັນຕະລາຍຈາກວິກິດການຊາວອົບພະຍົບ
ຕາມການສະຖິຕິ, ຈຳນວນຜູ້ອົບພະຍົບເຂົ້າເອີລົບທາງທະເລໃນປີ 2016 ໄດ້ຫຼຸດລົງກວ່າເມື່ອທຽບໃສ່ປີ 2015, ແຕ່ຈຳນວນຜູູ້ເສຍຊີວິດຢູ່ທະເລ ແມດີເຕີຣານຽມ ໃນປີ 2016 ຍັງເພີ່ມຂຶ້ນເຖິງລະດັບສະຖິຕິແມ່ນ 5.000 ຄົນ, ເພີ່ມຂຶ້ນເກືອບ 25% ເມື່ອທຽບໃສ່ປີ 2015. ຍ້ອນການກວາດລ້າງ ແລະ ທຳລາຍກຳ່ປັ່ນຂອງບັນດາອົງການຄ້າຂາຍມະນຸດ ກໍ່ຄືການເຄື່ອນໄຫວລາດຕາເວນບັນດາເສັ້ນທາງບົນທະເລຂອງເອີລົບ, ດັ່ງນັ້ນບັນດາຜູ້ອົບພະຍົບເຂົ້າເອີລົບທາງທະເລຕ້ອງປະເຊີນໜ້າກັບຄວາມຫຍຸ້ງຍາກກວ່າ. ຄຽງຂ້າງນັ້ນ, ອັດຕາສ່ວນເດັກນ້ອຍໄປອົບພະຍົບແຕ່ຜູ້ດຽວກໍ່ເພີ່ມຂຶ້ນ, ພາໄປເຖິງສະພາບມີເດັກນ້ອຍຫຼາຍຄົນຖືກຕົກຢູ່ໃນກຳມືຂອງພວກຄ້າຂາຍເດັກນ້ອຍ.
ວິກິດການຍັງຄົງສືບຕໍ່ຢູ່ບັນດາເຂດອ້ອມຂ້າງເອີລົບດ້ວຍຈຳນວນຊາວອົບພະຍົບທີ່ມາຈາກ ຊີຣີ, ອາບການິສຖານ ແລະ ອີຣັກ ກວມເກືອບ 90%. ໃນຂະນະທີ່ ຊີຣີ ຍັງປະເຊີນໜ້າກັບການປະທະກັນໃນບໍລິເວນອັນກວ້າງຂວາງນັ້ນ, ການປະທະກັນຢູ່ ອາບການິສະຖານ ແລະ ອີຣັກ ກໍ່ມີໄພລະເບີດຂຶ້ນໃນບໍ່ວ່າເວລາໃດ. ສິ່ງດັ່ງກ່າວໄດ້ເປັນການນາບຂູ່ຂະບວນຄົນອົບພະຍົບເຂົ້າເອີລົບໃນໄລຍະຈະມາເຖິງ. ນັ້ນແມ່ນບໍ່ທັນເວົ້າເຖິງເລື່ອງ ພວກກໍ່ການຮ້າຍທີ່ລີ້ຊ້ອນໃນຈຳນວນຊາວອົບພະຍົບໄດ້ກໍ່ຄວາມເສຍຫາຍຫຼາຍຢ່າງໃຫ້ແກ່ບັນດາປະເທດສະມາຊິກ ອີຢູໃນປີ 2016.
ບໍ່ທັນເປັນເອກະພາບໃນການກະທຳ
ໃນຂະນະທີ່ວິກິດການຊາວອົບພະຍົບພວມນາບຂູ່ເຖິງສະຖຽນລະພາບຂອງ ເອິລົບ ນັ້ນ, ບັນດາການນຳຍັງຄົງສືບຕໍ່ໂຕ້ຖຽງກັນກ່ຽວກັບເລື່ອງປະເທດຂອງເຂົາເຈົ້າຈະກຽມພ້ອມ ຫຼືເຮັດແນວໃດເພື່ອແບ່ງປັນຄວາມໜັກໜ່ວງກັບຊາວອົບພະຍົບ. ທີ່ກອງປະຊຸມບັນດາລັດຖະມົນຕີກະຊວງພາຍໃນ ເອີລົບ ເຊິ່ງດຳເນີນເມື່ອທ້າຍເດືອນ 11 ຜ່ານມາ ຢູ່ ແບນຊິກ, ທ່ານລັດຖະມົນຕີກະຊວງພາຍໃນ ເຢັຍລະມັນ Thomas de Maiziere ຍອມຮັບວ່າ, ອີຢູ ພວມຖືກແບ່ງແຍກຢ່າງຮ້າຍແຮງ ແລະ ຍັງມີຄວາມບໍ່ລົງລອຍກັນຫຼາຍຢ່າງໃນບັນຫານີ້. ນັບແຕ່ປີ 2015, ບັນດາປະເທດ ອີຢູ ໄດ້ເຫັນດີເປັນເອກະພາບນຳກັນວ່າ, ແຕ່ລະປະເທດສະມາຊິດຕ້ອງຮັບເອົາຊາວອົບພະຍົບຈຳນວນໃດໜຶ່ງຢ່າງແນ່ນອນ, ເຖິງຢ່າງໃດກໍ່ຕາມມາຮອດປະຈຸບັນ, ເຖິງວ່າໄດ້ຜ່ານການເຈລະຈາຫຼາຍຄັ້ງແລ້ວກໍ່ຕາມ, ແຕ່ບັນດາຝ່າຍຍັງບໍ່ທັນຊອກຫາຄວາມເຫັນດີເຫັນພ້ອມລວມໄດ້. ໃນຂະນະທີ່ບັນດາປະເທດເອີລົບຕາເວັນຕົກ ສະໜັບສະໜູນທັດສະນະກ່ຽວກັບ “ຄວາມເປັນເອກະພາບຢ່າງມີໄຫວພິບ”, ກຽມພ້ອມເປີດປະຕູເພື່ອຕ້ອນຮັບຊາວອົບພະຍົບ, ບັນດາປະເທດ ເອີລົບຕາເວັນອອກ ພັດຄັດຄ້ານເລື່ອງຕ້ອນຮັບຈຳນວນຊາວອົບພະຍົບ. ແທນທີນັ້ນ, ເຂົາເຈົ້າ ພຽງແຕ່ຮັບຮູ້ການປະກອບສ່ວນດ້ານການເງິນ ຫຼື ບັນດາຮູບການໜູນຊ່ວຍອື່ນໆເທົ່ານັ້ນ. ສອງປະເທດ ເອີລົບກາງ ແມ່ນ ຮູງກາຣີ ແລະ ສະໂລວາເກຍ ຍັງສົ່ງໃບຟ້ອງຮ້ອງຂຶ້ນສານຍຸຕິທຳເອີລົບ ເພື່ອຄັດຄ້ານແຜນການແບ່ງປັນການຕ້ອນຮັບຊາວອົບພະຍົບຂອງ ອີຢູ. ມາຮອດປະຈຸບັນ, ອີຢູ ຍັງມານະພະຍາຍາມເພື່ອປະຕິບັດຂໍ້ຕົກລົງທີ່ບັນລຸໄດ້ໃນການຈັດແບ່ງຊາວອົບພະຍົບ 160.000 ຄົນເຖິງບັນດາປະເທດສະມາຊິກ, ເປັນຕົ້ນແມ່ນ ຊີຣີ, ອີຣານ ແລະ ອີຣີເຕຣຍ, ອາໄສຊົ່ວຄາວຢູ່ ອີຕາລີ ແລະ ເກຼັກ. ໃນບົດລາຍງານຫວ່າງມໍ່ໆມານີ້, ອົງການອະໄພຍະໂທດສາກົນຄາດວ່າ, ມີພຽງ 6% ໃນຈຳນວນຊາວອົບພະຍົບ 66.000 ຄົນໄປເຖິງ ເກຼັກໃນປີ 2015 ໄດ້ຢູ່ອາໄສໃນບັນດາປະເທດສະມາຊິກ ອີຢູ. ຈຳນວນຊາວອົບພະຍົບທີ່ຍັງເຫຼືອຕ້ອງອາໄສຢູ່ສູນຕ້ອນຮັບ ແລະ ລໍຖ້າຄຳຕັດສິນທາງການສຳລັບໃບຂໍຫຼົບໄພ. ບັນດາປະເທດສະມາຊິກ ອີຢູ ເກືອບຄືວ່າບໍ່ມີການກະທຳໃດໆເພື່ອແນໃສ່ແກ້ໄຂສະພາບການດັ່ງກ່າວ. ທ່າທີເມີນເສີຍຂອງບັນດາປະເທດສະມາຊິກ ອີຢູ ໄດ້ພາໃຫ້ການແກ້ໄຂວິກິດການຊາວອົບພະຍົບຕົກເຂົ້າສູ່ສະພາບບໍ່ມີທາງອອກ.
ຍັງມີເວລາພຽງອີກ 2 ວັນເທົ່ານັ້ນ, ໂລກຈະກ້າວເຂົ້າສູ່ປີໃໝ່ 2017. ເອີລົບຕ້ອນຮັບປີໃໝ່ໃນຄວາມວິຕົກວັງວົນຫຼາຍຢ່າງ. ເອີລົບ ນັບມື້ນັບຖືກແບ່ງແຍກ, ການໃຊ້ຄວາມຮຸນແຮງ ແລະ ຂາດສະຖຽນລະພາບ. ວິກິດການຊາວອົບພະຍົບໄດ້ ແລະ ຈະສືບຕໍ່ສ້າງຮູບພາບທີ່ມືດມົວໃຫ້ແກ່ຄວາມໝັ້ນຄົງຂອງໂລກ.