ຄວາມເຄັ່ງຕຶງໃນແຫຼມເກົາຫຼີເພີ່ມຂຶ້ນ
Huyen -
(vovworld) – ໃນຂະນະທີ່ສະພາບການເຄັ່ງຕຶງ ແລະ ບັນດາຄຳນາບຂູ່ລະຫວ່າງ ພຽງຢາງ ແລະ ວໍຊິງຕັນ ສືບຕໍ່ເກີດຂຶ້ນຢ່າງບໍ່ຢຸດຢັ້ງ, ສປປ.ເກົາຫຼີ ພັດດຳເນີນການຍິງລູກສອນໄຟໃນວັນທີ 16/04 ເນື່ອງໃນໂອກາດສະເຫຼີມສະຫຼອງ 105 ປີແຫ່ງວັນຄ້າຍວັນເກີດຜູ້ກໍ່ຕັ້ງປະເທດ ກິມອິນຊຸງ. ສິ່ງທັງໝົດນັ້ນ ພວມສ້າງບັນຍາກາດເຄັ່ງຕຶງ ອັນໄດ້ພາໃຫ້ຫລາຍຄົນມີຄວາມວິຕົກກັງວົນວ່າ ອາດຈະເກີດສົງຄາມທຳລາຍລ້າງຜານ. ບົດຂຽນຂອງບັນນາທິການ ແອ໋ງຮວຽນ, VOV.
ການເດີນຂະບວນສວນສະໜາມສະແດງກຳລັງຂອງ ສປປ.ເກົາຫຼີ
(ພາບ: EPA/ TTXVN)
ກໍລະນີຍິງລູກສອນໄຟໃນວັນທີ 16/04, ດຳເນີນໄປກ່ອນທີ່ທ່ານຮອງປະທານາທິບໍດີ ອາເມລິກາ Mike Pence ມາ ສ.ເກົາຫຼີ ເປັນເວລາ 2 - 3 ຊົ່ວໂມງ ເພື່ອສະແດງໃຫ້ເຫັນຄຳໝັ້ນສັນຍາຂອງ ອາເມລິກາ ທີ່ມີຕໍ່ປະເທດພັນທະມິດຂອງຕົນ ໃນສະພາບຄວາມເຄັ່ງຕຶງນັບມື້ນນັບເພີ່ມຂຶ້ນ ຍ້ອນໂຄງການອາວຸດຂອງ ສປປ.ເກົາຫຼີ. ລູກສອນໄຟ ຖືກຍິງຈາກທ່າກ່ຳປັ່ນຢູ່ຝັ່ງທະເລທາງທິດຕາເວັນອອກ, ເຖິງວ່າບໍ່ປະສົບຜົນສຳເລັດກໍ່ຕາມ, ແຕ່ພັດເຮັດໃຫ້ສະພາບການໃນແຫຼມເກົາຫຼີ ເຄັ່ງຕຶງຂຶ້ນຕື່ມ. ແລະ ເຫດການດັ່ງກ່າວ ຖ້າຫາກບໍ່ມີຄວາມລະງັບໃຈຂອງບັນດາຝ່າຍ ອາດຈະພາໃຫ້ເກີດຜົນຮ້າຍເປັນໜ້າເສຍດາຍ.
ທັດສະນາແຂງກະດ້າງຂອງບັນດາຝ່າຍ
ໃນການກະທຳດ້ວຍປະຕິກິລິຍາໃນທັນທີ, ສ.ເກົາຫຼີ ຖະແຫຼງວ່າ ກໍລະນີຍິງລູກສອນໄຟດຳເນີນໄປພາຍຫລັງ ສປປ.ເກົາຫຼີ ໄດ້ສະແດງກຳລັງອາວຸດດ້ວຍບັນດາລູກສອນໄຟບຸກໂຈມຕີໃນການເດີນຂະບວນສວນສະໜາມສະແດງກຳລັງໃຫຍ່ທີ່ສຸດ ໃນວັນທີ 15/04 ເນື່ອງໃນໂອກາດສະເຫຼີມສະຫຼອງວັນຄ້າຍວັນເກີດປະທານ ກິມອິນຊຸງ ແມ່ນການກະທຳໂອ້ອວດກຳລັງແຮງນາບຂູ່ຕໍ່ໂລກ. ພ້ອມກັນນັ້ນ ສປປ.ເກົາຫຼີ ກ່າວເຕືອນວ່າ ຈະມີມາດຕະການລົງໂທດ ຖ້າຫາກ ພຽງຢາງ ສືບຕໍ່ມີການກະທຳເກາະຜິດ.
ໃນຂະນະນັ້ນ ວັນທີ 17/04, ເມື່ອຢູ່ຢ້ຽມຢາມ ສ.ເກົາຫຼີ, ທ່ານຮອງປະທານາທິບໍດີ ອາເມລິກາ Mike Pence ຖະແຫຼງ “ໄລຍະອົດທົນ” ກັບ ສປປ.ເກົາຫຼີ ໄດ້ສິ້ນສຸດລົງພາຍຫລັງກ່ວາ 2 ທົດສະວັດ, ພ້ອມທັງໃຫ້ຮູ້ວ່າ: ອາເມລິກາ ພວມປະປ່ອຍບັນດາວິທີການເລືອກເຟັ້ນ ໃນການສະກັດກັ້ນໂຄງການອາວຸດນິວເຄຼຍ ແລະ ລູກສອນໄຟຂອງ ພຽງຢາງ. ຊ້ຳບໍ່ໜຳ ທ່ານ Mike Pence ຍັງກ່າວເຕືອນວ່າ ສປປ.ເກົາຫຼີ ບໍ່ຄວນທ້າທາຍຕໍ່ຄວາມຕັດສິນ ຫຼື ກຳລັງປະກອບອາວຸດຂອງ ອາເມລິກາ ໃນຂະນະທີ່ໂລກໄດ້ເຫັນປະຈັກຕາກຳລັງແຮງ ແລະ ຄວາມຕັດສິນໃຈຂອງປະທານາທິບໍດີຄົນໃໝ່ຂອງ ອາເມລິກາ ໂດຍຜ່ານບັນດາການກະທຳຢູ່ ຊີຣີ ແລະ ອາບການິດສະຖານ ໃນຊຸມວັນຜ່ານມາ. ສະແດງຄວາມວິຕົກກັງວົນ ຕໍ່ໜ້າຄຳຖະແຫຼງຂອງ ອາເມລິກາ, ລັດເຊຍ ກ່າວເຕືອນ ອາເມລິກາ ກ່ຽວກັບເລື່ອງບຸກໂຈມຕີພຽງລຳພັງຝ່າຍດຽວທີ່ແນໃສ່ ສປປ.ເກົາຫຼີ ແມ່ນເສັ້ນທາງເຕັມໄປດ້ວຍຄວາມສ່ຽງ ແລະ ຫວັງວ່າ ອາເມລິກາ ຈະບໍ່ມີການກະທຳພຽງລຳພັງຝ່າຍດຽວຄືໄດ້ເກີດຂຶ້ນຢູ່ ຊີຣີ.
ທ່ານຮອງປະທານາທິບໍດີ ອາເມລິກາ Mike Pence
(ພາບ: Reuters)
ແຫຼມເກົາຫຼີພວມເຄັ່ງຕຶງຂຶ້ນໃນແຕ່ລະຊົ່ວໂມງ
ນີ້ບໍ່ແມ່ນຄັ້ງທຳອິດທີ່ພຽງຢາງດຳເນີນການຍິງລູກສອນໄຟ, ແຫຼມເກົາຫຼີໄດ້ເກີດການຂັດແຍ້ງກັນເຖິງຂັ້ນສູງສຸດເປັນຫຼາຍຄັ້ງມາແລ້ວ. ແຕ່ໃນຄັ້ງນີ້, ຂ່າວລືກ່ຽວກັບການເກີດການປະທະກັນທາງທະຫານໄດ້ຖືກແຜ່ລາມອອກສູ່ວົງກ້ວາງ. ຄວາມວິຕົກກັງວົນນີ້ ແມ່ນມີພື້ນຖານ ເພາະການປ່ຽນແປງອຳນາດການປົກຄອງໃໝ່ຢູ່ອາເມລິກາ. ອຳນາດການປົກຄອງຂອງປະທານາທິບໍດີອາເມລິກາ Donald Trumph ເບິ່ງຄືວ່າ ນັບມື້ນັບມີການກະທຳຢ່າງແຂງແຮງ. ວັນທີ 7/4, ອາເມລິກາໄດ້ຍິງລູກສອນໄຟ Tomahawk 59 ລູກໃສ່ຖານທີ່ໝັ້ນກອງທັບຂອງຊີຣີ. ຕໍ່ຈາກນັ້ນ, ໃນວັນທີ 13/4, ອາເມລິກາໄດ້ຖິ້ມລະເບີດລົງໃສ່ບໍລິເວນທີ່ມີລະບົບທາງໃຕ້ດິນຂອງລັດອິດສະລາມ IS ຢູ່ອາບການິສຖານ ແລະ ອາເມລິກາກໍໄດ້ຈັດສົ່ງເຮືອບິນສອດແນມນິວເຄຼຍ, ກຳປັ່ນສະໜາມບິນໄປຍັງບໍລິເວນໃກ້ກັບ ສ.ປ.ປເກົາຫຼີ. ເພື່ອເປັນການໂຕ້ຕອບ, ສ.ປ.ປເກົາຫຼີໄດ້ດຳເນີນການສວນສະໜາມສະແດງກຳລັງ, ນາມຂູ່ຈະບຸກໂຈມຕີອາເມລິກາເສຍກ່ອນ ພ້ອມທັງໄດ້ກຽມພ້ອມແກ່ການດຳເນີນສົງຄາມຂະໜາດໃຫຍ່ກັບອາເມລິກາ.
ບັນຍາກາດໃນ ແຫຼມເກົາຫຼີຍິ່ງເຄັ່ງຕຶງຂຶ້ນ ຂະນະທີ່ຈີນໄດ້ຜັນຂະຫຍາຍພົນທະຫານ 150.000 ຄົນໄປຍັງເຂດຊາຍແດນເກົາຫຼີ ເພື່ອກະກຽມຮັບມືຕໍ່ກໍລະນີພຽງຢາງຖືກວໍຊິງຕັນບຸກໂຈມຕີເສຍກ່ອນ. ຍີປຸ່ນກໍພວມຂຸ້ນຂ້ຽວຂຶ້ນແຜນການຍົກຍ້າຍພົນລະເມືອງຍີປຸ່ນ 57.000 ຄົນຢູ່ ສ.ເກົາຫຼີ ກໍຄືຊອກຫາວິທີການແກ້ໄຂຕໍ່ກະແສຟອງຊາວອົບພະຍົບຈາກ ສ.ປ.ປເກົາຫຼີ ເຂົ້າມາຍີປຸ່ນໃນກໍລະນີເກີດວິກິດການ. ລັດເຊຍ ແລະ ຈີນກໍໄດ້ຈັດສົ່ງກຳປັ່ນຮົບໄປຍັງທະເລຮວາຕຸງເພື່ອຕິດຕາມການເຄື່ອນໄຫວຂອງກຳປັ່ນອາເມລິກາ.
ວົງການນັກໄຈ້ແຍກສາກົນໃຫ້ຂໍ້ສັງເກດວ່າ : ບັນດາການຜັນແປໃນເວລາທີ່ຜ່ານມາ, ອາດຈະແມ່ນວິທີເຊິ່ງອາເມລິການຳໃຊ້ເພື່ອທົດລອງປະຕິກິລີຍາຂອງພຽງຢາງ, ຈາກນັ້ນ ຈະກຳນົດວິທີຮັບມືກັບ ສ.ປ.ປເກົາຫຼີໃນໄລຍະທີ່ຈະມາເຖິງ. ເລື່ອງ ສ.ປ.ປເກົາຫຼີ ຍິງລູກສອນໄຟນຳວິຖີຫຼາຍລູກໃນພາບດຽວ ໄດ້ເປັນການຢັ້ງຢືນວ່າ ໂຄງການຂະຫຍາຍລູກສອນໄຟຂອງປະເທດນີ້ ພວມນັບມື້ນັບກ້າວໜ້າ. ຍິ່ງໄປກ່ວານັ້ນ, ຍັງມີແຫຼ່ງຂ່າວວ່າ ປະເທດນີ້ ຍັງມີອາວຸດເຄມີເປັນຈຳນວນຫຼາຍ ແລະ ບັນດາຝ່າຍຄວນລະມັດລະວັງຊັງຊາຕໍ່ບັນດາມາດຕະການທີ່ນຳໃຊ້ກັບພຽງຢາງ. ປະຈຸບັນ, ຍາກທີ່ຈະຕີລາຄາຢ່າງຖືກຕ້ອງກ່ຽວກັບສະພາບການໃນແຫຼມເກົາຫຼີ ແລະ ທຸກຝ່າຍຄວນລະງັບໃຈເພື່ອຫຼີກເວັ້ນການເກີດການປະທະກັນທາງທະຫານໂດຍບໍ່ຈຳເປັນ./.
Huyen