(vovworld) - ໝາກຜົນຂອງຄະດີຮ້ອງຟ້ອງຂຶ້ນສານອະນຸຍາໂຕຕຸລາການລະຫວ່າງ ຟີລິບປິນ ແລະ ຈີນ ແມ່ນພື້ນຖານສຳຄັນ ເພື່ອໃຫ້ບັນດາຝ່າຍທີ່ກ່ຽວຂ້ອງ, ກໍ່ຄືປະຊາຄົມສາກົນ ເປັນເອກະພາບກັນກ່ຽວກັບຄວາມເຂົ້າໃຈຕໍ່ບັນດາມາດຕາໃນສົນທິສັນຍາກົດໝາຍວ່າດ້ວຍທະເລຂອງສະຫະປະຊາຊາດປີ 1982 (UNCLOS). ການຕັດສິນນີ້ປະກອບສ່ວນຢືນຢັນນຳ້ໃຈເຄົາລົບກົດໝາຍ, ທັງແມ່ນພື້ນຖານນິຕິກຳສຳຄັນ, ເປີດແງ່ຫວັງໃຫ້ແກ່ການແກ້ໄຂບັນດາຄວາມຂັດແຍ້ງກັນຢູ່ທະເລຕາເວັນອອກ.
ສານອະນຸຍາໂຕຕຸລາການ (PCA) ຢູ່ La Haye
(ພາບ: PCA )
ສານອະນຸຍາໂຕຕຸລາການ (PCA) ຢູ່ La Haye ໄດ້ຕັດສິນຫຼາຍເນື້ອໃນສຳຄັນ. ໃນນັ້ນໜ້າສົນໃຈແມ່ນ PCA ຢືນຢັນບໍ່ມີພື້ນຖານນິຕິກຳໃຫ້ແກ່ບັນດາຄຳຖະແຫຼງອະທິປະໄຕຂອງຈີນ, ໃນອັນທີ່ເອີ້ນວ່າ “ເສັ້ນ 9 ຕອນ“ ຢູ່ທະເລຕາເວັນອອກ. ບັນດາເຂດທີ່ຖືກຈີນຄວບຄຸມຢູ່ທະເລຕາເວັນອອກ ບໍ່ໄດ້ຖືວ່າແມ່ນເກາະ, ຕາມຄວາມສຳນຶກ “ເກາະ“ໃນສົນທິສັນຍາກົດໝາຍວ່າດ້ວຍທະເລຂອງສະຫະປະຊາຊາດ, ດັ່ງນັ້ນບໍ່ມີສິດຮຽກຮ້ອງເຂດເສດຖະກິດຈຳເພາະ 200 ໄມທະເລ.
ການຕັດສິນຂອງ PCA ໄດ້ຮັບການຮັບຮອງເອົາດ້ວຍຄວາມເຫັນດີເປັນເອກະສັນສູງ, ດັ່ງນັ້ນສາມາດໄດ້ຮັບຖືວ່າແມ່ນການອະທິບາຍທີ່ມີລັກສະນະຜູກມັດຂອງກົດໝາຍວ່າດ້ວຍທະເລສາກົນ.
ການອະທິບາຍຄວາມສຳນຶກຕ່າງໆທີ່ກ່ຽວຂ້ອງເຖິງການຂັດແຍ້ງກັນຢູ່ທະເລຕາເວັນອອກ
ມີເນື້ອໃນສຳຄັນໜຶ່ງໃນການຕັດສິນຂອງສານທີ່ໄດ້ຮັບການຕີລາຄາສູງທີ່ສຸດຈາກຫາງສຽງ, ນັ້ນແມ່ນເປັນຄັ້ງທຳອິດທີ່ບັນດາຄຳນິຍາມໄດ້ຮັບການກວດກາຢ່າງລະອຽດບົນພື້ນຖານສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982. ຕາມນັ້ນແລ້ວ, , ບັນດາໂຄງສ້າງໃນທະເລຕາເວັນອອກທີ່ມີຂໍ້ກຳນົດຕ່າງກັນແມ່ນຂຶ້ນກັບເລື່ອງ, ນັ້ນແມ່ນເກາະ, ຫີນ ຫຼື ຫາດ. ຕາມການຕັດສິນຂອງສານ, ມີຫຼາຍຫາດຢູ່ທະເລຕາເວັນອອກ, ເຊິ່ງຈີນໄດ້ບູລະນະປະຕິສັງຂອນດ້ວຍຂະໜາດໃຫຍ່ແລ້ວ, ແຕ່ສົນທິສັນຍາກົດໝາຍວ່າດ້ວຍທະເລ ພັດແບ່ງປະເພດບັນດາໂຄງສ້າງແມ່ນອີງຕາມເງື່ອນໄຂທຳມະຊາດ. ດັ່ງນັ້ນບໍ່ມີໂຄງສ້າງໃດເຊິ່ງຈີນຮຽກສິດບົນທະເລແມ່ນໄດ້ຊົມໃຊ້ເຂດເສດຖະກິດຈຳເພາະ 200 ໄມທະເລ. ການຕັດສິນນີ້ໄດ້ເຮັດແຈ້ງຄວາມຖືກຕ້ອງ, ຄວາມຜິດພາດຂອງການຂັດແຍ້ງກັນ ຍ້ອນການອະທິບາຍ ແລະ ການນຳໃຊ້ UNCLOS 1982 ຢ່າງຜິດພາດ, ເພື່ອຍົກອອກຄຳຮຽກສິດຢ່າງໄຮ້ເຫດຜົນ, ລະເມີດເຖິງບັນດາສິດ ແລະ ຜົນປະໂຫຍດອັນຊອບທຳຂອງບັນດາຝ່າຍກ່ຽວຂ້ອງໃນເຂດທະເລຕາເວັນອອກ. ປະລິຍາເອກ ເຈິ່ນຫວຽດທ໋າຍ, ຮອງຫົວໜ້າສະຖາບັນຄົ້ນຄ້ວາຍຸດທະສາດ, ສັງກັດກະຊວງການຕ່າງປະເທດ, ຖືວ່າ:
“ນີ້ແມ່ນບາດກ້າວໃຫຍ່ທີ່ສຸດກ່ຽວກັບນິຕິກຳທະເລ. ເປັນຄັ້ງທຳອິດທີ່ໂລກມີຊຸດນິຍາມຢ່າງຈະແຈ້ງກ່ຽວກັບເກາະ, ຫີນ, ຖືກນຳໃຊ້ຢ່າງລະອຽດຢູ່ທະເລຕາເວັນອອກ. ສະຫຼຸບຂອງສານກ່ຽວກັບບັນຫານີ້ໄດ້ປະກອບສ່ວນຫຼຸດຜ່ອນການຂັດແຍ້ງກັນພໍສົມຄວນ. ຂ້າພະເຈົ້າຖືວ່າ, 4 ໝວດຂັດແຍ້ງກັນຕົ້ນຕໍຢູ່ທະເລຕາເວັນອອກລວມມີ: ການຂັດແຍ້ງທະເລ, ເຊິ່ງຕົ້ນຕໍໂດຍເສັນ 9 ຕອນກໍ່ຂຶ້ນ, ການຂັດແຍ້ງກ່ຽວກັບການອະທິບາຍກົດໝາຍວ່າດ້ວຍທະເລ, ການຂັດແຍ້ງກ່ຽວກັບໄຫຼ່ທະວີບແກ່ຍາວ, ແລະ ການຂັດແຍ້ງກ່ຽວກັບສິດຂຸດຄົ້ນຊັບພະຍາກອນ, ລ້ວນແຕ່ໄດ້ຫຼຸດລົງສົມຄວນ, ປະກອບສ່ວນສຳຄັນເພື່ອສັນຕິພາບ, ສະຖຽນລະພາບໃນພາກພື້ນ.“
ຕາມ ປະລິຍາເອກ Gerhard Will , ນັກຊ່ຽວຊານຂັ້ນສູງດ້ານການເມືອງສາກົນ ແລ້ວ, ການຕັດສິນຂອງ PCA ມີຄວາມສຳຄັນຢູ່ບ່ອນວ່າສານອະທິບາຍກົດໝາຍສາກົນທີ່ກ່ຽວຂ້ອງເຖິງການຂັດແຍ້ງກັນຢູ່ທະເລຕາເວັນອອກ. ຄຳຖະແຫຼງນີ້ມີການກະທົບບໍ່ພຽງແຕ່ສຳລັບ ຟີລິບປິນ ແລະ ຈີນ ເທົ່ານັ້ນ, ຫາກຍັງທຸກໆປະເທດທີ່ປະຈຸບັນພວມມີຄຳຮຽກສິດສຳລັບເຈື່ອງຊາອີກດ້ວຍ. ຍ້ອນເຫດນັ້ນ, ແຕ່ລະປະເທດຈະຕີລາຄາການກະທົບຢ່າງລະອຽດຂອງຄຳຖະແຫຼງນີ້ທີ່ມີຕໍ່ນະໂຍບາຍຂອງຕົນໃນທະເລຕາເວັນອອກ.
ປະລິຍາເອກ ເຈິ່ນຫວຽດທ໋າຍ ຮອງຫົວໜ້າສະຖາບັນຄົ້ນຄ້ວາ
ຍຸດທະສາດ ສັງກັດກະຊວງການຕ່າງປະເທດ
(ພາບ: VTC)
ລະບຽບການຕັດສິນຄະດີທີ່ສຳຄັນໃນການແກ້ໄຂຄວາມຂັດແຍ້ງກັນຢູ່ທະເລ
ຕາມທ່ານ Greg Polin ຜູ້ອຳນວຍການໂຄງການກະຈາງແຈ້ງວ່າດ້ວຍການເດີນທະເລອາຊີທີ່ຂຶ້ນກັບສູນຄົ້ນຄ້ວາຍຸດທະສາດ ແລະ ສາກົນ (CSIS), ທີ່ມີສຳນັກງານຢູ່ ວໍຊິງຕັນແລ້ວ, ການຕັດສິນຂອງ PCA ໄດ້ສ້າງຄວາມສົ່ງເສີມໃນການແກ້ໄຂບັນດາບັນຫາເຄັ່ງຮ້ອນຢູ່ທະເລຕາເວັນອອກ. ນີ້ຍັງແມ່ນກຳລັງໜູນສຳລັບຄວາມມານະພະຍາຍາມແກ້ໄຂບັນດາການຂັດແຍ້ງກັນໃນການເດີນທະເລ ດ້ວຍສັນຕິວິທີ ແລະ ຜ່ານບັນດາກົນໄກຂອງສານ PCA. ຕາມທ່ານແລ້ວ, ການຕັດສິນນີ້ຂອງ PCA, ປະຈຸບັນໄດ້ມີກອບກົດໝາຍລວມເພື່ອໃຫ້ຝ່າຍຕ່າງໆອີງໃສ່ເມື່ອຍົກອອກຄຳຮຽກຮ້ອງຂອງຕົນ. ປະລິຍາເອກ ເຈິ່ນກົງຈຸກ, ອະດີດຫົວໜ້າຄະນະຊາຍແດນຂອງລັດຖະບານ ຫວຽດນາມ, ຖືວ່າ ຄຳຕັດສິນຂອງ PCA ປະກອບສ່ວນຮັດແຄບບັນດາການຂັດແຍ້ງສັບສົນທີ່ສຸດຢູ່ທະເລຕາເວັນອອກ, ສ້າງນິຕິກຳ, ຢືນຢັນລັກສະນະນິຕິກຳສຳລັບບັນດາຝ່າຍທີ່ຂັດແຍ່ງກັນຢູ່ພາກພື້ນ ເພື່ອໝູນໃຊ້ຮັບໃຊ້ໃຫ້ແກ່ມາດຕະການແກ້ໄຂສັນຕິພາບຂອງບັນດາການຂັດແຍ້ງກັນສາກົນໃນສະພາບການປະຈຸບັນ.
ສຳລັບການພັດທະນາຂອງກົດໝາຍວ່າດ້ວຍທະເລສາກົນເວົ້າລວມ, ຄຳຕັດສິນໄດ້ຮັບຖືວ່າແມ່ນລະບຽບການຕັດສິນຄະດີສຳຄັນທີ່ສຸດ. ນີ້ແມ່ນຄັ້ງທຳອິດທີ່ຄຳຕັດສິນຂອງສານ ສາກົນໄດ້ໄຈ້ແຍກ ແລະ ເຮັດແຈ້ງບັນດາຂໍ້, ມາດຕາສຳຄັນຂອງ UNCLOS. ເພາະສະນັ້ນ, ຜົນກະທົບຂອງຄຳຕັດສິນແມ່ນຂໍ້ມູນທີ່ມີປະໂຫຍດເພື່ອໃຫ້ບັນດາປະເທດໃນໂລກຄົ້ນຄວ້າໃນວິວັດການນຳໃຊ້ UNCLOS ແລະ ກົດໝາຍວ່າດ້ວຍທະເລເວົ້າລວມ. ປອ.ເຈີ່ນຫວຽດທ໋າຍ, ຮອງຫົວໜ້າສະຖາບັນຄົ້ນຄວ້າຍຸດທະສາດ ຂຶ້ນກັບກະຊວງການຕ່າງປະເທດ, ໃຫ້ຮູ້ວ່າ:
“ຄຳຕັດສິນຂອງສານໄດ້ປະກອບສ່ວນເຄົາລົບກົດໝາຍ, ເຮັດລະບຽບການຕັດສິນຄະດີອຸດົມສົມບູນຂຶ້ນຕື່ມ ໃນວິວັດການພິພາກສາຕົວຈິງຂອງສານ PCA ສາກົນ, ແມ່ນບາດກ້າວພັດທະນາສຳຄັນຂອງກົດໝາຍ ສາກົນ. ທີສອງ, ຄຳຕັດສິນໄດ້ປະກອບສ່ວນເຮັດໃຫ້ຫຼຸດຜ່ອນບັນດາຮູບການຂັດແຍ້ງກັນ, ພິເສດແມ່ນການຂັດແຍ້ງກັນຢູ່ທະເລຕາເວັນອອກ. ທີສາມ, ຄຳຕັດສິນໄດ້ເປັນການປະກອບບັນດາຂໍ້ອ້າງເຫດຜົນອັນແຫຼມຄົມ, ນັບທັງປະຫວັດສາດ, ນິຕິກຳໃຫ້ບັນດາປະເທດຢູ່ພາກພື້ນໃນວິວັດການປົກປັກຮັກສາອະທິປະໄຕພ້ອມທັງເພີ່ມທະວີຄວາມຮັບຮູ້ລວມຂອງບັນດາປະເທດໃນພາກພື້ນກໍ່ຄືຢູ່ໃນໂລກກ່ຽວກັບວິທີການອະທິບາຍ, ການນຳໃຊ້ສຳລັບກົດໝາຍວ່າດ້ວຍທະເລ. ສຸດທ້າຍ, ນີ້ແມ່ນບາດກ້າວສຳຄັນປະກອບສ່ວນເຂົ້າໃນສັນຕິພາບ, ສະຖຽນລະພາບຢູ່ພາກພື້ນ ແລະ ຢູ່ໃນໂລກ .”.
ຫາງສຽງໄດ້ຊົມເຊີຍ ແລະ ຕີລາຄາສູງຄຳຕັດສິນຂອງສານ PCA ບໍ່ແມ່ນວ່າ: ຍ້ອນຄຳຕັດສິນນີ້ມີຜົນປະໂຫຍດສະເພາະໃຫ້ແກ່ປະເທດໃດໜຶ່ງ ຫາກນີ້ແມ່ນການຍົກສູງກົດໝາຍສາກົນ. ບັນດາປະເທດຕ່າງໆມີຄວາມຮັບຜິດຊອບນຳໃຊ້ມັນປຽບເໝືອນເຄື່ອງມືທີ່ມີປະໂຫຍດອັນໜຶ່ງເພື່ອຮັກສາສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາ.