ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຢ້ຽມຢາມ ສ.ເກົາຫຼີແຕ່ວັນທີ 10 ຫາວັນທີ 12/12 ແລະ ເຂົ້າຮ່ວມກອງປະຊຸມຂັ້ນສູງສະເຫຼີມສະຫຼອງ 25 ປີແຫ່ງວັນສ້າງຕັ້ງການພົວພັນຄູ່ເຈລະຈາ ອາຊຽນ-ສເກົາຫຼີ
|
ໂດຍໄດ້ຮັບການເຊື້ອເຊີນຈາກທ່ານນາງປະທານາທິບໍດີ ສ. ເກົາຫຼີ Park Geun – Hye, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ໄດ້ໄປຢ້ຽມຢາມ ສ.ເກົາຫຼີແຕ່ວັນທີ 10 ຫາວັນທີ 12/12 ແລະ ເຂົ້າຮ່ວມກອງປະຊຸມຂັ້ນສູງສະເຫຼີມສະຫຼອງ 25 ປີແຫ່ງວັນສ້າງຕັ້ງການພົວພັນຄູ່ເຈລະຈາ ອາຊຽນ-ສເກົາຫຼີ. ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ເຂົ້າຮ່ວມກອງປະຊຸມແມ່ນເພື່ອແນໃສ່ປະກອບສ່ວນຊຸກຍູ້ ການພົວພັນຄູ່ເຈລະຈາ ອາຊຽນ-ສເກົາຫຼີ, ພ້ອມກັນນັ້ນ ກໍເພີ່ມທະວີການຊຸກຍູ້ການພົວພັນຄູ່ຮ່ວມມືຍຸດທະສາດຫວຽດນາມ-ສ.ເກົາຫຼີ, ສ້າງຄວາມໄວ້ເນື້ອເຊື່ອໃຈ ແລະ ການພົວພັນອັນດີງາມລະຫວ່າງການນຳຂັ້ນສູງຂອງ 2 ປະເທດ.
ກອງປະຊຸມຂັ້ນສູງສະເຫຼີມສະຫຼອງ 25 ປີແຫ່ງວັນສ້າງຕັ້ງການພົວພັນຄູ່ເຈລະຈາ ອາຊຽນ-ສເກົາຫຼີແມ່ນມີຫົວເລື່ອງວ່າ “ ສ້າງຄວາມເຊື່ອໝັ້ນ ແລະ ຜາສຸກ” . ກອງປະຊຸມໄດ້ສຸມໃສ່ກຳນົດການພົວພັນຄູ່ເຈລະຈາ ອາຊຽນ-ສເກົາຫຼີໃນໄລຍະທີ່ຈະມາເຖິງ, ພ້ອມກັນນັ້ນ ກໍປຶກສາຫາລືກ່ຽວກັບບັນດາບັນຫາສາກົນ ແລະ ພາກພື້ນທີ່ຕາ່ງຝ່າຍຕ່າງມີຄວາມສົນໃຈ. ກອງປະຊຸມຍັງຮັບຮອງເອົາຖະແຫຼງການຮ່ວມຂອງກອງປະຊຸມຂັ້ນສູງກ່ຽວກັບວິໄສທັດອະນາຄົດຂອງການພົວພັນຄູ່ຮ່ວມມືຍຸດທະສາດອາຊຽນ-ສເກົາຫຼີ.
ຊຸກຍູ້ການພົວພັນຄູ່ເຈລະຈາ ອາຊຽນ-ສເກົາຫຼີພັດທະນາຢ່າງແທດຈິງ ແລະ ມີປະສິດທິຜົນ.
ພາຍຫຼັງທີ່ໄດ້ສ້າງຕັ້ງ ການພົວພັນຄູ່ເຈລະຈາເມື່ອປີ 1989 , ການພົວພັນຮ່ວມມືລະຫວ່າງອາຊຽນ-ສເກົາຫຼີໄດ້ພັດທະນາຢ່າງບໍ່ຢຸດຢັ້ງ. 2 ຝ່າຍໄດ້ກາຍເປັນຄູ່ຮ່ວມມືຮອບດ້ານໃນປີ 2004, ຄູ່ຮ່ວມມືຍຸດທະສາດໃນປີ 2010. ອາຊຽນ ແລະ ສເກົາຫຼີພວມຕັ້ງໜ້າຜັນຂະຫຍາຍແຜນການດຳເນີນງານໄລຍະ 2010-2015 ແລະ ກະກຽມສ້າງ ແຜນການດຳເນີນງານໄລຍະ 2016-2020. 2 ຝ່າຍໄດ້ແບ່ງປັນຄວາມສົນໃຈກ່ຽວກັບການຮັກສາສັນຕິພາບ, ຄວາມໝັ້ນຄົງ, ສະຖຽນລະພາບໃນພາກພື້ນ. ສ.ເກົາຫຼີສະໜັບສະໜູນຫຼັກໝັ້ນຂອງອາຊຽນໃນບັນຫາທະເລຕາເວັນອອກ.
ທີ່ກອງປະຊຸມສຳມະນາກ່ຽວກັບການພົວພັນຄູ່ຮ່ວມມືຍຸດທະສາດອາຊຽນ-ສເກົາຫຼີໂດຍກະຊວງການຕ່າງປະເທດຫວຽດນາມສົມທົບກັບສະຖານທູດສ.ເກົາຫຼີປະຈຳຫວຽດນາມຈັດຂຶ້ນເມື່ອບໍ່ດົນມານີ້ຢູ່ຮ່າໂນ້ຍນັ້ນ, ທ່ານ ຫງວຽນຕ້ຽນມິນ ຫົວໜ້າກົມໆອາຊຽນສັງກັດກະຊວງການຕ່າງປະເທດຫວຽດນາມ ໃຫ້ຮູ້ວ່າ :
“ ການພົວພັນດ້ານເສດຖະກິດ, ການຄ້າ, ການລົງທຶນຍາມໃດກໍແມ່ນເສົາຄ້ຳທີ່ສຳຄັນຂອງການພົວພັນ 2 ຝ່າຍ. ສ.ເກົາຫຼີແມ່ນຄູ່ຮ່ວມມືດ້ານການຄ້າໃຫຍ່ອັນດັບທີ 5 ຂອງອາຊຽນ ແລະ ອາຊຽນແມ່ນຄູ່ຮ່ວມມືດ້ານການຄ້າ ແລະ ສະຖານທີ່ລົງທຶນແຫ່ງທີ 2 ຂອງບັນດານັກລົງທຶນ ສ.ເກົາຫຼີ. 2 ຝ່າຍກໍໄດ້ເປີດກ້ວາງ ແລະ ຮ່ວມມືຢ່າງມີປະສິດທິຜົນໃນຂົງເຂດການສຶກສາ, ວັດທະນະທຳ, ພັດທະນາແຫຼ່ງຊັບພະຍາກອນມະນຸດ, ຮັບມືກັບບັນດາສິ່ງທ້າທາຍດ້ານການປ້ອງກັນຄວາມສະຫງົບທີ່ບໍ່ເຄີຍມີມາກ່ອນຄືການປ່ຽນແປງຂອງດິນຟ້າອາກາດ, ຄວາມໝັ້ນຄົງດ້ານທັນຍາຫານ, ຄວາມໝັ້ນຄົງກ່ຽວກັບແຫຼ່ງນ້ຳ.”
ປະຈຸບັນ, ອາຊຽນ ແລະ ສ.ເກົາຫຼີພວມມຸ່ງໄປສູ່ການບັນລຸ ແລະ ລື່ນກາຍຈຸດໝາຍທີ່ໄດ້ວາງອອກ, ນັ້ນແມ່ນບັນລຸວົງເງິນການຄ້າ 2 ສົ້ນ 150 ຕື້ USD ໃນປີ 2015 ແລະ 200 ຕື້ USD ໃນປີ 2020, ສືບຕໍ່ເສີມຂະຫຍາຍປະສິດທິຜົນຂອງສັນຍາການຄ້າເສລີ ອາຊຽນ-ສເກົາຫຼີ. ເປັນຕົ້ນແມ່ນກ່ຽວກັບນະໂຍບາຍດ້ານການປ້ອງກັນຄວາມສະຫງົບ, ອາຊຽນ-ສເກົາຫຼີ ຈະຮ່ວມມືຢ່າງແໜ້ນແຟ້ນ ແລະ ສະໜັບສະໜູນຊຶ່ງກັນ ແລະ ກັນໃນຄວາມມານະພະຍາຍາມຮັກສາສັນຕິພາບ, ສະຖຽນລະພາບ ແລະ ຄວາມໝັ້ນຄົງຢູ່ອາຊີຕາເວັນອອກສ່ຽງເໜືອ, ອາຊີຕາເວັນອອກສ່ຽງໃຕ້, ປະກອບສ່ວນຮັບມືກັບສະພາບຂາດສະຖຽນລະພາບໃນພາກພື້ນຄືບັນຫານິວເຄຼຍໃນແຫຼມເກົາຫຼີ ແລະ ບັນຫາທະເລຕາເວັນອອກ.
ຊຸກຍູ້ການພົວພັນຄູ່ຮ່ວມມືຍຸດທະສາດຫວຽດນາມ-ສເກົາຫຼີ
ພາຍຫຼັງ 22 ປີ ນັບແຕ່ເມື່ອສ້າງຕັ້ງການພົວພັນທາງການທູດເມື່ອປີ 1992 ແລະ ພິເສດພາຍຫຼັງ 5 ປີນັບແຕ່ເວລາຍົກລະດັບການພົວພັນຂຶ້ນເປັນ “ຄູ່ຮ່ວມມືຍຸດທະສາດ ” ໃນປີ 2009, ການພົວພັນ ການພົວພັນຄູ່ຮ່ວມມືຍຸດທະສາດ ຫວຽດນາມ-ສເກົາຫຼີໄດ້ພັດທະນາຢ່າງແຂງແຮງ, ຮອບດ້ານ ແລະ ນັບມື້ນັບເຂົ້າສູ່ລວງເລິກ, ພິເສດແມ່ນທາງດ້ານເສດຖະກິດ, ການຄ້າ ແລະ ການລົງທຶນ. ສເກົາຫຼີ ສືບຕໍ່ແມ່ນໜຶ່ງໃນບັນດານັກລົງທຶນ ຕ່າງປະເທດ ໂດຍກົງ FDI ລາຍໃຫຍ່ກ່ຽວກັບຈຳນວນໂຄງການ ແລະ ຄູ່ຮ່ວມມືດ້ານການຄ້າອັນດັບ 3 ຂອງຫວຽດນາມດ້ວຍວົງເງິນການຄ້າ 2 ສົ້ນໃນປີ 2013 ບັນລຸ 27,5 ຕື້ USD, ເພີ່ມຂຶ້ນທົບ 4 ເທົ່າເມື່ອທຽບໃສ່ປີ 2007. 2 ປະເທດວາງຈຸດໝາຍບັນລຸຍົກ ວົງເງິນການຄ້າ 2 ສົ້ນຂຶ້ນເຖິງລະດັບ 70 ຕື້ USDໃນປີ 2020 ແລະ ພວມຕັ້ງໜ້າກະກຽມເພື່ອາດຈະລົງນາມສັນຍາການຄ້າເສລີ FTA ຫວຽດນາມ-ສເກົາຫຼີ.
ສ.ເກົາຫຼີກໍແມ່ນປະເທດມີຈຳນວນແຂກທ່ອງທ່ຽວເຂົ້າມາທ່ອງທ່ຽວຢູ່ຫວຽດນາມຫຼາຍອັນດັບ 2 , ໃນປີ 2013 ມີແຂກທ່ອງທ່ຽວ 750.000 ເທື່ອຄົນເຂົ້າມາທ່ອງທ່ຽວຢູ່ຫວຽດນາມ, ເພີ່ມຂຶ້ນທົບ 2 ເທົ່າເມື່ອທຽບໃສ່ປີ 2007. ທາງດ້ານການສຶກສາ-ວັດທະນະທຳ, ປະຈຸບັນ, ມີນັກຮຽນຫວຽດນາມກວ່າ 5 ພັນຄົນພວມສຶກສາຄົ້ນຄ້ວາຢູ່ສ.ເກົາຫຼີ. ທີ່ກອງປະຊຸມສຳມະນາເມື່ອມໍ່ໆມານີ້, ທ່ານ ວູ້ຄວານ ອະດີດຮອງນາຍົກລັດຖະມົນຕີຫວຽດນາມເນັ້ນໜັກວ່າ
“ຫວຽດນາມ ແລະ ສເກົາຫຼີ ແມ່ນເພື່ອນຂອງກັນ. ປະຊາຊົນ 2 ປະເທດບໍ່ພຽງແຕ່ຮ່ວມມືກັນເພື່ອຕ່າງຝ່າຍຕ່າງມີຜົນປະໂຫຍດເທົ່ານັ້ນ, ຫາກຍັງຮ່ວມມືເພື່ອຜົນປະໂຫຍດພາກພື້ນອີກດ້ວຍ. ພວກເຮົາມີຫຼັກຖານຢ່າງຄົບຖ້ວນເພື່ອຢືນຢັນວ່າ ໃນຄວາມວັດທະນາຖາວອນຂອງແຕ່ລະປະເທດພວກເຮົາ ແມ່ນມີການປະກອບສ່ວນສຳຄັນຂອງສາຍພົວພັນຄູ່ຮ່ວມມືຫວຽດນາມ-ສເກົາຫຼີ”
ບົນພືນຖານການພົວພັນອັນດີງາມນັ້ນ, ການຢ້ຽມຢາມ ສ.ເກົາຫຼີຂອງທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ສືບຕໍ່ຊຸກຍູ້ ການພົວພັນຄູ່ຮ່ວມມືຍຸດທະສາດຫວຽດນາມ-ສເກົາຫຼີ, ພ້ອມທັງເພີ່ມທະວີຄວາມໄວ້ເນື້ອເຊື່ອໃຈ ແລະ ການພົວພັນອັນດີງາມລະຫວ່າງການນຳຂັ້ນສູງ ຫວຽດນາມ-ສເກົາຫຼີ. ເຂົ້າຮ່ວມກອງປະຊຸມຂັ້ນສູງສະເຫຼີມສະຫຼອງ 25 ປີແຫ່ງວັນສ້າງຕັ້ງການພົວພັນຄູ່ເຈລະຈາ ອາຊຽນ-ສເກົາຫຼີ, ຫວຽດນາມມານະພະຍາຍາມປະກອບສ່ວນຊຸກຍູ້ການພົວພັນອາຊຽນ-ສເກົາຫຼີດ້ວຍບົດບາດເປັນສະມາຊິກທີ່ຕັ້ງໜ້າ ແລະ ມີຄວາມຮັບຜິດຊອບຂອງອາຊຽນ.