(vovworld) - ໂດຍໄດ້ຮັບຄຳເຊື້ອເຊີນຂອງປະທານປະເທດ ຫວຽດນາມ Truong Tan Sang, ທ່ານ Kim Yong Nam ປະທານຄະນະປະຈຳສະພາແຫ່ງຊາດສາທາລະນະລັດ ປະຊາຊົນປະຊາທິປະໄຕເກົາຫລີ (ສປປເກົາຫລີ) ໄດ້ເດີນທາງມາຢ້ຽມຢາມ ຫວຽດນາມ ຢ່າງເປັນທາງການແຕ່ວັນທີ 5 -7/8. ພິທີຕ້ອນຮັບທ່ານ Kim Yong Nam ຈັດຂຶ້ນຢ່າງສົມກຽດຢູ່ຮ່າໂນ້ຍໃນວັນທີ 6/8. ການຢ້ຽມຢາມ ຫວຽດນາມ ຂອງທ່ານປະທານ Kim Yong Nam ແມ່ນເພື່ອຢືນຢັນຄວາມປາດຖະຫນາຢາກປັບປຸງສາຍພົວພັນມິດຕະພາບ, ການຮ່ວມມືທີ່ເປັນມູນເຊື້ອ, ພ້ອມທັງຊຸກຍູ້ການຮ່ວມມືລະຫວ່າງສອງປະເທດໃນຫລາຍຂົງເຂດໃນໄລຍະຈະມາເຖິງ.
ທ່ານ Kim Yong Nam ປະທານຄະນະປະຈຳສະພາແຫ່ງຊາດ
ສປປເກົາຫລີ
ພາບ:TTXVN
|
ສອງປະເທດ ຫວຽດນາມ ແລະ ສປປ ເກົາຫລີ ມີສາຍພົວພັນທີ່ເປັນມູນເຊື້ອອັນດີງາມ ໂດຍແມ່ນທ່ານປະທານໂຮ່ຈິມີນ ແລະ ທ່ານປະທານ Kim In Sung ກໍ່ຕັ້ງ, ເພີ່ມພູນຄູນສ້າງ ແລະ ໄດ້ຮັບການທົດສອບຜ່ານໄລຍະປະຫວັດສາດ. ສປປ ເກົາຫລີ ແມ່ນຫນຶ່ງໃນບັນດາປະເທດສ້າງຕັ້ງສາຍພົວພັນທາງການທູດກັບ ຫວຽດນາມ ມາແຕ່ດົນນານ (31/1/1950). ໃນສະພາບການໂລກ ແລະ ພາກພື້ນ ພວມມີການຜັນແປໄປຢ່າງສັບສົນ, ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອ ລະຫວ່າງ ຫວຽດນາມ ແລະ ສປປ ເກົາຫລີ ບໍ່ຖືກຜົນສະທ້ອນ ແລະ ນັບມື້ນັບພັດທະນາ. ສອງປະເທດໄດ້ຮັກສາການພົວພັນອັນດີງາມເປັນປະຈຳໂດຍຜ່ານການຢ້ຽມຢາມສັນຖະວະໄມຕີຂອງການນຳຂັ້ນສູງຂອງພັກ ແລະ ລັດ ໃນໄລຍະຜ່ານມາ, ໃນນັ້ນເປັນຫນ້າສົນໃຈແມ່ນການຢ້ຽມຢາມ ສປປ ເກົາຫລີ ຢ່າງເປັນທາງການຂອງທ່ານ Nong Duc Manh ອະດີດເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ເມື່ອປີ 2007, ການຢ້ຽມຢາມ ຫວຽດນາມ ຢ່າງເປັນທາງການຂອງ Kim Yong Nam ປະທານຄະນະປະຈຳສະພາແຫ່ງຊາດ ສປປ ເກົາຫລີ ເມື່ອປີ 2001 ແລະ ການຢ້ຽມຢາມຂອງທ່ານ Kim Yong In ນາຍົກລັດຖະມົນຕີ ເມື່ອປີ 2007. ທ່ານ Kim Chang In ເອກອັກຄະລັດຖະທູດ ສປປ ເກົາຫລີ ປະຈຳ ຫວຽດນາມ ໄດ້ຢືນຢັນວ່າ:
“ນ້ຳໃຈມິດຕະພາບທີ່ເປັນມູນເຊື້ອ ຊື່ງທ່ານປະທານ Kim In Sung ແລະ ປະທານໂຮ່ຈິມີນກໍ່ຕັ້ງຂຶ້ນ ໄດ້ເປັນຂົວຕໍ່ໃຫ້ແກ່ການພົວພັນລະຫວ່າງສອງປະເທດພວກເຮົາປະຈຸບັນ. ໂດຍໄດ້ຮັບຄວາມເອົາໃຈໃສ່ຢ່າງເລິກເຊິ່ງຈາກການນຳສອງປະເທດ, ການພົວພັນນັ້ນພວມນັບມື້ນັບໄດ້ຮັບການປັບປຸງ ແລະ ພັດທະນາ. ໃນໄລຍະຈະມາເຖິງ, ພວກຂ້າພະເຈົ້າຈະພ້ອມກັບພວກເພື່ອນຫວຽດນາມ ຕັດສິນໃຈຫັນການພົວພັນລະຫວ່າງສອງປະເທດໄປສູ່ໄລຍະໃຫມ່ ແລະ ແທດຈິງກວ່າ.”
ການພົວພັນທາງດ້ານເສດຖະກິດລະຫວ່າງສອງປະເທດໃນໄລຍະມໍ່ໆມານີ້ ມີບາດກ້າວພັດທະນາໃຫມ່. ວົງເງິນສົ່ງອອກສິນຄ້າຂອງ ຫວຽດນາມ ໄປຍັງ ສປປ ເກົາຫລີ ໃນປີ 2009 ບັນລຸເກືອບ 16,5 ລ້ານ USD. ປີ 2010, ຫວຽດນາມ ໄດ້ສົ່ງອອກກວ່າ 16 ລ້ານ USD ແລະ ປີ 2011 ແມ່ນ 18 ລ້ານ USD. ບັນດາປະເພດສິນຄ້າທີ່ ຫວຽດນາມ ສົ່ງໄປຂາຍຢູ່ ສປປ ເກົາຫລີ ສ່ວນຫລາຍແມ່ນເຄື່ອງໃຊ້ສອຍ. ປີ 2008, ຫວຽດນາມ ແລະ ສປປ ເກົາຫລີ ໄດ້ລົງນາມໃນບົດບັນທຶກຊ່ວຍຈຳ 5 ສະບັບກ່ຽວກັບການຮ່ວມມືຂຸດຄົ້ນແຮ່ທາດ ແລະ ແລກປ່ຽນດ້ານເຕັກນິກທີ່ກ່ຽວຂ້ອງ. ບັນດາຄະນະຜູ້ຊ່ຽວຊານຂະແຫນງນ້ຳມັນອາຍແກສ, ກະສິກຳຂອງສອງຝ່າຍກໍໄດ້ໄປມາຢ້ຽມຢາມ ແລະ ແລກປ່ຽນບົດຮຽນນຳກັນ. ສອງຝ່າຍສືບຕໍ່ຮັກສາກົນໄກການປະຊຸມຂອງຄະນະກຳມະການລະຫວ່າງລັດຖະບານກ່ຽວກັບການຮ່ວມມືເສດຖະກິດ ແລະ ວິທະຍາສາດເຕັກນິກ. ຄາດວ່າ ສອງຝ່າຍຈະຈັດຕັ້ງກອງປະຊຸມຄັ້ງທີ 8 ຢູ່ ພຽງຢາງ ໃນທ້າຍເດືອນ 8/2012. ສອງປະເທດກໍໄດ້ລົງນາມໃນສັນຍາສຳຄັນຫລາຍສະບັບ, ເພື່ອເປັນພື້ນຖານດ້ານກົດໝາຍໃຫ້ແກ່ການພົວພັນຮ່ວມມືສອງຝ່າຍ.
ນະຄອນຫລວງ ພຽງຢາງ
ພາບ: internet
|
ໃນຂົງເຂດຮ່ວມມືດ້ານວັດທະນະທຳ ການສຶກສາກໍໄດ້ຮັບຄວາມເອົາໃຈໃສ່ຈາກສອງປະເທດນັບແຕ່ເມື່ອ ຫວຽດນາມ ແລະ ສປປ ເກົາຫລີ ສ້າງຕັ້ງສາຍພົວພັນທາງການທູດ. ໃນຊຸມປີ 1960 - 1970, ສປປ ເກົາຫລີ ໄດ້ຊ່ວຍ ຫວຽດນາມ ບຳລຸງສ້າງນັກສຶກສານັບຮ້ອຍຄົນ. ມີອະດີດນັກຮຽນ ຫວຽດນາມ ຫລາຍລຸ້ນຄົນໃນຄາວນັ້ນ ບໍ່ອາດຫລົງລືມບັນດາອາລົມຈິດ, ການອຸ້ມຊູຊ່ວຍເຫລືອຈາກປະຊາຊົນ ສປປ ເກົາຫລີໄດ້. ແຕ່ລະປີ, ກະຊວງວັດທະນະທຳຂອງ ຫວຽດນາມ ລ້ວນແຕ່ສົ່ງຄະນະນັກສິລະປະກອນໄປຍັງ ສປປ ເກົາຫລີ ເພື່ອເຂົ້າຮ່ວມງານມະຫາກຳສິລະປະລະດູບານໃຫມ່ໃນເດືອນ 4 ເຊິ່ງຈັດຂຶ້ນຢູ່ນະຄອນຫລວງ ພຽງຢາງ. ສອງຝ່າຍໄດ້ລົງນາມໃນຂໍ້ຕົກລົງການຮ່ວມມືກິລາກາຍະກຳ (9/2011); ແຜນການຮ່ວມມືກ່ຽວກັບວັດທະນະທຳໄລຍະ 2012 - 2014 (4/2012). ຫວ່າງແລ້ວນີ້, ຫໍພິພິດທະພັນ ສປປ ເກົາຫລີ ແລະ ຫໍພິພິດທະພັນ ໂຮ່ຈິມີນ ໄດ້ສົມທົບກັນຈັດຕັ້ງງານວາງສະແດງຮູບພາບກ່ຽວກັບປະເທດຊາດ, ຊາວ ສປປ ເກົາຫລີ ຢູ່ ຫໍພິພິດທະພັນໂຮ່ຈິມີນ ເນື່ອງໃນໂອກາດລະນຶກ 100 ປີ ແຫ່ງວັນຄ້າຍວັນເກີດປະທານ Kim In Sung. ປີ 2011, ສອງຝ່າຍໄດ້ສົມທົບກັນຈັດຕັ້ງງານວາງສະແດງຮູບພາບກ່ຽວກັບ “ປະທານ ໂຮ່ຈິມີນ - ວິລະຊົນປົດປ່ອຍຊາດ, ນັກວັດທະນະທຳດີເລີດ” ຢູ່ ສປປ ເກົາຫລີ. ບັນດາການເຄື່ອນໄຫວພົວພັນແລກປ່ຽນວັດທະນະທຳດັ່ງກ່າວໄດ້ປະກອບສ່ວນຮັກສາຄວາມສາມັກຄີມິດຕະພາບລະຫວ່າງປະຊາຊົນສອງປະເທດ. ສະມາຄົມມິດຕະພາບ ຫວຽດນາມ ແລະ ສປປ ເກົາຫລີ ແລະ ສະມາຄົມ ສປປ ເກົາຫລີ - ຫວຽດນາມ ໄດ້ກາຍເປັນຂົວເຊື່ອມຕໍ່ສຳຄັນ, ປະກອບສ່ວນຊຸກຍູ້ ແລະ ພັດທະນາການພົວພັນມິດຕະພາບລະຫວ່າງປະຊາຊົນສອງປະເທດ. ທ່ານ Pham Tat Dong ປະທານສະມາຄົມມິດຕະພາບ ຫວຽດນາມ - ສປປ ເກົາຫລີ ໃຫ້ຮູ້ວ່າ:
“ປີ 2012 ແມ່ນປີທີ່ມີຄວາມໝາຍສຳຄັນພິເສດສຳລັບປະຊາຊົນ ສປປ ເກົາຫລີ, ແມ່ນປີລະນຶກ 100 ປີ ແຫ່ງວັນຄ້າຍວັນເກີດຂອງທ່ານປະທານ Kim In Sung, 70 ປີແຫ່ງວັນຄ້າຍວັນເກີດຂອງທ່ານປະທານ Kim Chang In ແລະ ຂຳ່ນັບຊົມເຊີຍຜູ້ນຳຄົນໃຫມ່ຂອງ ສປປ ເກົາຫລີ Kim Chang Un. ສປປ ເກົາຫລີ ພວມມຸ່ງໄປເຖິງຈຸດໝາຍເປີດປະຕູເພື່ອພັດທະນາປະເທດຊາດໃຫ້ຈະເລີນຮຸ່ງເຮືອງ. ດ້ວຍຄວາມສາມາດຂອງຕົນ, ຫວຽດນາມ ຍາມໃດກໍຊ່ວຍເຫລືອ ແລະ ສະຫນັບສະຫນູນພາລະກິດສັນຕິພາບ, ໂຮມປະເທດຊາດເປັນເອກະພາບຂອງປະຊາຊົນ ສປປ ເກົາຫລີ ອ້າຍນ້ອງ.”
ໃນໄລຍະປະຈຸບັນ, ພັກແຮງງານ ສປປ ເກົາຫລີ ພວມສຸມໃສ່ພັດທະນາເສດຖະກິດ ແລະ ປັບປຸງຊີວິດການເປັນຢູ່ຂອງປະຊາຊົນ, ໃນນັ້ນປະຕິບັດທົດລອງການປະຕິຮູບດ້ານກະສິກຳ ແລະ ບໍລິຫານເສດຖະກິດ. ດ້ວຍບັນດາບົດຮຽນຂອງຕົນ, ຫວຽດນາມ ຍາມໃດກໍພ້ອມແລ້ວທີ່ຈະສະຫນັບສະຫນູນ ແລະ ຊ່ວຍເຫລືອ ສປປ ເກົາຫລີ. ດ້ວຍຄວາມມານະພະຍາຍາມລວມ, ຫວຽດນາມ ແລະ ສປປ ເກົາຫລີ ພວມສືບຕໍ່ປັບປຸງນ້ຳໃຈມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ສົມທົບກັນເຄ່ືອນໄຫວໃນຂົງເຂດການເມືອງ, ການຕ່າງປະເທດ, ປະກອບສ່ວນຢ່າງແທດຈິງເຂົ້າໃນການປັບປຸງພື້ນຖານສັນຕິພາບ, ສະຖຽນລະພາບ, ການຮ່ວມມືຢູ່ ອາຊີ ປາຊີຟີກ ແລະ ໃນທົ່ວໂລກ. ການຢ້ຽມຢາມສັນຖະວະໄມຕີ ຫວຽດນາມ ຢ່າງເປັນທາງການຂອງປະທານ Kim Yong Nam ຄັ້ງນີ້ ຈະສ້າງກຳລັງຫນູນໃຫມ່ເພື່ອເຮັດໃຫ້ການພົວພັນລະຫວ່າງ ຫວຽດນາມ ແລະ ສປປ ເກົາຫລີ ມີປະສິດທິຜົນ ແລະ ແທດຈິງກວ່າເກົ່າ./.