(vovworld) - ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ພວມດຳເນີນການຢ້ຽມຢາມລາຊະອານາຈັກກຳປູເຈຍ ແລະ ສປປ.ລາວ ຢ່າງເປັນທາງການໃນລະຫວ່າງວັນທີ 24 – 27/04. ການຢ້ຽມຢາມຖືກດຳເນີນໃນສະພາບການພົວພັນຮ່ວມມືລະຫວ່າງຫວຽດນາມ ກັບ 2 ປະເທດພວມໃນທ່າພັດທະນາອັນດີງາມ, ສະແດງໃຫ້ເຫັນຫວຽດນາມ ຖືກເປັນສຳຄັນການພົວພັນກັບ 2 ປະເທດບ້ານໃກ້ເຮືອນຄຽງ, ເພື່ອແນໃສ່ຊຸກຍູ້ການພົວພັນມິດຕະພາບ, ການຮ່ວມມືຮອບດ້ານລະຫວ່າງຫວຽດນາມ - ກຳປູເຈຍ, ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານຫວຽດນາມ - ລາວ ທີ່ນັບມື້ນັບພັດທະນາຢ່າງເລິກເຊິ່ງກວ້າງຂວາງ, ແທດຈິງ ແລະ ມີປະສິດທິຜົນ.
ນີ້ແມ່ນການຢ້ຽມຢາມລາຊະອານາຈັກກຳປູເຈຍ ແລະ ສປປ.ລາວ ຢ່າງເປັນທາງການ ຄັ້ງທຳອິດຂອງທ່ານນາຍົກລັດຖະມົນຕີ ໃນຖານະຕຳແໜ່ງເປັນຜູ້ນຳລັດຖະບານ, ນີ້ກໍ່ແມ່ນການເຄື່ອນໄຫວພົວພັນຕ່າງປະເທດທີ່ສຳຄັນ ເພື່ອຄ່ຳນັບຮັບຕ້ອນປີມິດຕະພາບຫວຽດນາມ - ກຳປູເຈຍ 2017 ແລະ ປີແຫ່ງຄວາມສາມັກຄີແບບພິເສດລະຫວ່າງຫວຽດນາມ - ລາວ 2017.
ຊຸກຍູ້ການຮ່ວມມືຮອບດ້ານຫວຽດນາມ - ກຳປູເຈຍ
ພາຍຫຼັງສ້າງຕັ້ງການພົວພັນທາງການທູດເກືອບ 50 ປີ (24/06/1967 – 24/06/2017), ການພົວພັນລະຫວ່າງຫວຽດນາມ - ກຳປູເຈຍ ຍັງຢູ່ໃນທ່າພັດທະນາອັນດີງາມ. ການນຳ 2 ປະເທດຍາມໃດກໍ່ສະເໝີຕົ້ນສະເໝີປາຍຢືນຢັນຄວາມສາມັກຄີມິດຕະພາບທີ່ເປັນມູນເຊື້ອລະຫວ່າງຫວຽດນາມ - ກຳປູເຈຍ ແມ່ນຊັບສົມບັດອັນລ້ຳຄ່າຂອງ 2 ຊາດ, ຕ້ອງຮັກສາ ແລະ ເສີມຂະຫຍາຍ, ພິເສດແມ່ນໃນສະພາບໂລກ ແລະ ພາກພື້ນພວມມີບັນດາການຫັນປ່ຽນຢ່າງໄວ ກະທົບຢ່າງແຮງເຖິງ 2 ປະເທດ. ເພື່ອຮັກສາສາຍພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງ 2 ປະເທດ, ນັ້ນແມ່ນໜ້າທີ່ຮັບຜິດຊອບຂອງທຸກຂັ້ນ, ທຸກຂະແໜງການ, ອົງການຈັດຕັ້ງ ແລະ ປະຊາຊົນ 2 ປະເທດຫວຽດນາມ ແລະ ກຳປູເຈຍ, ໃນນັ້ນມີການສຶກສາໃຫ້ລຸ້ນໜຸ່ມ 2 ປະເທດ. ຢືນຢັນກ່ຽວກັບສິ່ງດັ່ງກ່າວ, ທ່ານປະທານສະມາຄົມມິດຕະພາບຫວຽດນາມ - ກຳປູເຈຍ ຫວູມ້າວ ຊີ້ແຈ້ງວ່າ.
“ເຂົ້າຮ່ວມການບຳລຸງສ້າງລຸ້ນໜຸ່ມ 2 ປະເທດກ່ຽວກັບການພົວພັນສາມັກຄີແບບພິເສດຫວຽດນາມ - ກຳປູເຈຍ ແມ່ນບຸລິມະສິດໃນວຽກງານຂອງສະມາຄົມທຸກຂັ້ນ. ໜຶ່ງໃນບັນດາການເຄື່ອນໄຫວນັ້ນແມ່ນພວກເຮົາໄດ້ເປັນເຈົ້າການຊ່ວຍເຫຼືອນັກຮຽນກຳປູເຈຍ ພວມຮ່ຳຮຽນຢູ່ຫວຽດນາມ. ຜ່ານລາຍການດັ່ງກ່າວ, ພວກເພື່ອນໜຸ່ມກຳປູເຈຍ ໄດ້ຊອກຮູ້ຮີດຄອງປະເພນີຂອງຫວຽດນາມ ຢ່າງເລິກເຊິ່ງ, ພ້ອມທັງຮັບຮູ້ໄດ້ນ້ຳໃຈຂອງປະຊາຊົນຫວຽດນາມ ທີ່ສະຫງວນໃຫ້ພວກນ້ອງ, ຈາກນັ້ນພວກນ້ອງມີຄວາມເຂົ້າໃຈກ່ຽວກັບຄວາມສາມັກຄີແບບພິເສດລະຫວ່າງ 2 ຊາດຢ່າງເລິກເຊິ່ງກວ່າ. ນອກນັ້ນ, ພວກຂ້າພະເຈົ້າຍັງຈັດບັນດາການໂອ້ລົມສົນທະນາ, ໂອ້ລົມກ່ຽວກັບການພົວພັນຫວຽດນາມ - ກຳປູເຈຍ, ຈັດງານພົບປະແລກປ່ຽນມິດຕະພາບລະຫວ່າງນັກສຶກສາ 2 ປະເທດ”.
ປະຈຸບັນ, ການຮ່ວມມືດ້ານເສດຖະກິດລະຫວ່າງ 2 ປະເທດໄດ້ມີບັນດາສັນຍານອັນຕັ້ງໜ້າ, ເມື່ອວົງເງິນການຄ້າ 2 ສົ້ນໃນໄຕມາດທີ 1 ປີ 2017 ບັນລຸເກືອບ 940 ລ້ານ USD (ເພີ່ມຂຶ້ນ 11% ເມື່ອທຽບໃສ່ໄລຍະດຽວກັບຂອງປີ 2016). ນັກທ່ອງທ່ຽວຫວຽດນາມ ກໍ່ຢືນຢູ່ແຖວໜ້າໃນຕະຫຼາດນັກທ່ອງທ່ຽວໄປຢ້ຽມຢາມກຳປູເຈຍ. ທີ່ກອງປະຊຸມຄັ້ງທີ 15 ຄະນະກຳມະການປະສົມຫວຽດນາມ - ກຳປູເຈຍ ເຊິ່ງໄດ້ດຳເນີນຢູ່ ພະນົມເປັນ ໃນເດືອນ 03 ຜ່ານມາ, 2 ຝ່າຍໄດ້ເຫັນດີເປັນເອກະພາບນຳກັນຢ່າງສູງແມ່ນການສືບຕໍ່ໜູນຊ່ວຍເຊິ່ງກັນ ແລະ ກັນໃນການພັດທະນາເສດຖະກິດ, ເພີ່ມທະວີການພົບປະແລກປ່ຽນວັດທະນະທຳ, ແກ້ໄຂບັນດາເຫດການທີ່ເກີດຂຶ້ນຢູ່ເຂດຊາຍແດນໃຫ້ເປັນຢ່າງດີ, ເພີ່ມທະວີ, ຮັກສາການລາດຕາເວັນຮ່ວມບົນທະເລ…, ພ້ອມທັງສືບຕໍ່ຢືນຢັນຫຼັກການ ບໍ່ອະນຸຍາດໃຫ້ບໍ່ວ່າກຳລັງທີ່ເປັນປໍລະປັກໃດໆນຳໃຊ້ຜືນແຜ່ນດິນຂອງປະເທດນີ້ເພື່ອຕ້ານທຳລາຍຄວາມສະຫງົບ, ສະຖຽນລະພາບຂອງປະເທດອື່ນ.
ຮັດແໜ້ນການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານຫວຽດນາມ - ລາວ
ຜ່ານໄລຍະປະຫວັດສາດ, ການພົວພັນລະຫວ່າງຫວຽດນາມ - ລາວ ໄດ້ຮັບການປັບປຸງ ແລະ ພັດທະນາຢ່າງບໍ່ຢຸດຢັ້ງ, ນັບມື້ນັບເລິກເຊິ່ງ, ແທດຈິງ, ມີປະສິດທິຜົນໃນທຸກຂົງເຂດ. ການພົວພັນດ້ານການເມືອງລະຫວ່າງ 2 ປະເທດໄດ້ຮັບການຍູ້ແຮງ, ນັບມື້ນັບສະໜິດຕິດພັນ, ໄວ້ເນື້ອເຊື່ອໃຈ. ຍ້ອນບັນດານະໂຍບາຍບຸກລິມະສິດທີ່ເໝາະສົມຂອງທັງ 2 ຝ່າຍ, ສະນັ້ນການຄ້າລະຫວ່າງຫວຽດນາມ - ລາວ ລ້ວນແຕ່ໄດ້ຮັບການເຕີບໂຕໃນຊຸມປີມໍ່ໆມານີ້.
ບັນດາຜົນງານທີ່ບັນລຸໄດ້ນັ້ນແມ່ນຍ້ອນ 2 ປະເທດໄດ້ຮັກສາບັນດາກົນໄກຈັດກອງປະຊຸມປະຈຳປີຢູ່ທຸກຂັ້ນລະຫວ່າງ 2 ປະເທດເປັນປະຈຳ. ຕໍ່ໜ້າສະພາບການໂລກ, ພາກພື້ນມີການຜັນແປ່ໃໝ່, ທັງ 2 ປະເທດລ້ວນແຕ່ຢືນຢັນຄວາມສຳຄັນ ແລະ ຄວາມໝາຍຍຸດທະສາດຂອງການປັບປຸງ ແລະ ພັດທະນາສາຍພົວພັນມິດຕະພາບທີ່ເປັນມູນເຊື້ອ, ຄວາມສະມັກຄີແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ - ລາວ ຢ່າງບໍ່ຢຸດຢັ້ງໃນພາບການໃໝ່, ປ່ຽນໃໝ່ຈິນຕະນາການ, ເນື້ອໃນ ແລະ ຮູບການຮ່ວມມືກວ່າອີກ, ແກ້ໄຂບັນດາບັນຫາເກີດຂຶ້ນທີ່ກ່ຽວຂ້ອງເຖິງຜົນປະໂຫຍດ, ຄວາມສະຫງົບ ແລະ ການພັດທະນາຢູ່ແຕ່ລະປະເທດຢ່າງສົມເຫດສົມຜົນ. ທ່ານ ວິໄລວົງ ບຸດດາຄຳ, ປະທານສູນກາງສະມາຄົມມິດຕະພາບລາວ - ຫວຽດນາມ, ຖືວ່າ.
(ທ່ານ ວິໄລວົງ ບຸດດາຄຳ)
ໃນການຢ້ຽມຢາມມິດຕະພາບຂອງທ່ານນາຍົກລັດຖະມົນຕີ ຫງວຽນຊວນຟຸກ ຢ່າງເປັນທາງການໃນຄັ້ງນີ້, 2 ຝ່າຍຈະແລກປ່ຽນແຜນນະໂຍບາຍ, ກຳນົດທິດທາງ ແລະ ບັນດາເນື້ອໃນຮ່ວມມື, ມາດຕະການໃຫຍ່ ເພື່ອແນໃສ່ຍົກສູງຄຸນນະພາບ, ປະສິດທິຜົນການຮ່ວມມືລະຫວ່າງຫວຽດນາມ - ລາວ ໃນໄລຍະໃໝ່.
ການຢ້ຽມຢາມລາຊະອານາຈັກກຳປູເຈຍ ແລະ ສປປ.ລາວ ຂອງທ່ານນາຍົກລັດຖະມົນຕີ ຫງວຽນຊວນຟຸກ ສືບຕໍ່ຢືນຢັນແນວທາງ, ແຜນນະໂຍບາຍສະເໝີຕົ້ນສະເໝີປາຍຂອງຫວຽດນາມ ໃນການພົວພັນກັບກຳປູເຈຍ ແລະ ລາວ, ຊຸກຍູ້ການພົວພັນຖານບ້ານໃກ້ເຮືອນຄຽງມິດຕະພາບ, ການຮ່ວມມືຮອບດ້ານຫວຽດນາມ - ກຳປູເຈຍ, ການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງຫວຽດນາມ - ລາວ, ສະໜັບສະໜູນເຊິ່ງກັນ ແລະ ກັນບົນເວທີປາໄສພາກພື້ນ ແລະ ສາກົນ, ສົມທົບກັນຮັກສາຄວາມສະມັກຄີ, ຄວາມເຫັນດີເຫັນພ້ອມຂອງອາຊຽນ ໃນບັນດາບັນຫາຍຸດທະສາດຢູ່ພາກພື້ນ.