ການຢ້ຽມຢາມ ຫວຽດນາມ ຢ່າງເປັນທາງການຂອງທ່ານປະທານສະພາແຫ່ງຊາດ ກົດດີວົວ Adama Bictogo ຖືກດຳເນີນໃນສະພາບການສອງປະເທດ ພວມຮັກສາການພົວພັນຮ່ວມມືມິດຕະພາບອັນດີງາມ ໃນຕະຫຼອດ 48 ປີຜ່ານມາ, ນັບແຕ່ເມື່ອສ້າງຕັ້ງການພົວພັນທາງການທູດ ເມື່ອວັນທີ 6 ຕຸລາ 1975.

       ການຮ່ວມມືສອງຝ່າຍບັນລຸໄດ້ໝາກຜົນຕັ້ງໜ້າຫຼາຍຢ່າງ

        ໃນຊຸມປີມໍ່ໆມານີ້, ຫວຽດນາມ ແລະ ກົດດີວົວ ໄດ້ເພີ່ມທະວີການແລກປ່ຽນຄະນະຜູ້ແທນ ເພື່ອຊຸກຍູ້ການຮ່ວມມືສອງຝ່າຍ. ກົດດີວົວ ໄດ້ແຕ່ງຕັ້ງຄະນະຜູ້ແທນຂັ້ນສູງຈຳນວນໜຶ່ງ ມາຢາມ ຫວຽດນາມ, ເປັນຕົ້ນແມ່ນ: ລັດຖະມົນຕີຮັບຜິດຊອບວຽກງານສົ່ງເສີມການລົງທຶນ (ປີ 2018),    ລັດຖະມົນຕີ, ຫົວໜ້າຫ້ອງວ່າການປະທານາທິບໍດີ, ລັດຖະມົນຕີກະຊວງເສດຖະກິດດີຈີຕອນ (ປີ 2019), ປະທານສະຫະພັນໃຫຍ່ນາຍຈ້າງ (ຜູ້ນຳໃຊ້ແຮງງານ) ກົດດີວົວ (ປີ 2022). ເດືອນ ມິຖຸນາ 2019, ຝ່າຍ ຫວຽດນາມ ກໍໄດ້ແຕ່ງຕັ້ງຄະນະຂອງທ່ານຫົວໜ້າຄະນະໂຄສະນາສຶກສາສູນກາງ ຫວໍວັນເຖືອງ, ເດືອນ ພະຈິກ 2019 ແຕ່ງຕັ້ງຄະນະຮອງນາຍົກລັດຖະມົນຕີ ເວືອງດິ່ງເຫວະ ໄປຢ້ຽມຢາມ ກົດດີວົວ.

        ສອງປະເທດ ໄດ້ສົມທົບ, ໜູນຊ່ວຍເຊິ່ງກັນ ແລະ ກັນ ຢູ່ບັນດາເວທີປາໄສສາກົນ, ຍົກຕົວຢ່າງຄື ເລື່ອງ ກົດດີວົວ ສະໜັບສະໜູນ ຫວຽດນາມ ເຂົ້າຮ່ວມສະພາສິດທິມະນຸດ ສປຊ (ອາຍຸການ 2014 – 2016, 2023 – 2025), ສະພາຄວາມໝັ້ນຄົງ ສປຊ (ອາຍຸການ 2020 – 2021)… ພັກຄອມມູນິດ ຫວຽດນາມ ໄດ້ສ້າງສາຍພົວພັນກັບ ພັກເຕົ້າໂຮມຊາວ Hophuetists ເພື່ອປະຊາທິປະໄຕ ແລະ ສັນຕິພາບ (RHDP) ກຳອຳນາດ ຢູ່ ກົວດີວົວ ແລະ ທັງສອງພັກຝ່າຍຄ້ານ ນັ້ນແມ່ນ ພັກແນວໂຮມສາມັນຊົນ ກົດດີວົວ (FDI) ແລະ ພັກປະຊາທິປະໄຕ ກົດດີວົວ (PDCI – RDA).

        ກ່ຽວກັບດ້ານເສດຖະກິດ, ການພົວພັນຮ່ວມມືດ້ານການຄ້າລະຫວ່າງສອງປະເທດພັດທະນາຕາຕາມທິດຕັ້ງໜ້າ. ຫວຽດນາມ ສ່ວນຫຼາຍແມ່ນນຳເຂົ້າໝາກມ່ວງຫິມະພານດິບ ແລະ ຝ້າຍ, ພ້ອມກັນນັ້ນ ກໍສົ່ງອອກເຂົ້າສານ ຫວຽດນາມ ໄປຍັງ ກົດດີວົວ. ປັດຈຸບັນ, ກົດດີວົວ ແມ່ນຄູ່ຮ່ວມມືດ້ານການຄ້າໃຫຍ່ອັນດັບທີ 2 ຂອງ ຫວຽດນາມ ຢູ່ ອາຟະລິກາ ແລະ ແມ່ນຕະຫຼາດສົ່ງອອກໃຫຍ່ອັນດັບທີ 4 ຂອງ ຫວຽດນາມຢູ່ທະວີບນີ້ ດ້ວຍວົງເງິນການຄ້າບັນລຸກວ່າ 1 ຕື້ USD ໃນປີ 2022. ປະຊາຄົມຊາວ ຫວຽດນາມ ອາໄສຢູ່ ກົດດີວົວ ມີປະມານ 300 ຄົນ, ໃນນັ້ນ ມີ 50% ແມ່ນຕັ້ງຖິ່ນຖານຍາວນານ, ສ່ວນຫຼາຍແມ່ນເຮັດທຸລະກິດຄ້າຂາຍ, ພັດຕະຄານ ແລະ ພໍ່ຄ້າຂະໜາດນ້ອຍ ເກືອບ 1.000 ຄົນ ໄປມາຊື້ຂາຍໝາກມ່ວງຫິມະພານ ລະຫວ່າງສອງປະເທດ.

ການຮ່ວມມືລັດຖະສະພາສ້າງທ່ວງທ່າເປີດກວ້າງການຮ່ວມມືລະຫວ່າງສອງປະເທດ

        ເລື່ອງທ່ານປະທານສະພາແຫ່ງຊາດ ເວືອງດິ່ງເຫວະ ເຊີນທ່ານປະທານສະພາແຫ່ງຊາດ ກົດດີວົວ ມາຢ້ຽມຢາມ ຫວຽດນາມ ຢ່າງເປັນທາງການ ເປັນການຢັ້ງຢືນແຜນນະໂຍບາຍສະເໝີຕົ້ນສະເໝີປາຍຂອງພັກ, ລັດ ຫວຽດນາມ ທີ່ຍາມໃດກໍຖືການຮ່ວມມືມິດຕະພາບອັນດີງາມກັບ  ກົດດີວົວ ແລະ ບັນດາປະເທດ ອາຟະລິກາ ເປັນສຳຄັນ, ປະກອບສ່ວນປະຕິບັດ ແຜນຮ່າງ “ພັດທະນາການພົວພັນລະຫວ່າງ ຫວຽດນາມ ກັບບັນດາປະເທດ ຕາເວັນອອກກາງ - ອາຟະລິກາ ໃນໄລຍະ 2016 – 2025” ຢ່າງມີປະສິດທິຜົນ.

        ໃນຂອບເຂດການຢ້ຽມຢາມ, ປະທານສະພາແຫ່ງຊາດສອງທ່ານ ສຸມໃສ່ຕີລາຄາບັນດາມາດຕະການຊຸກຍູ້ວົງເງິນການຄ້າສອງຝ່າຍ; ຍູ້ແຮງການເຄື່ອນໄຫວແລກປ່ຽນຂໍ້ມູນຂ່າວສານ, ສົ່ງເສີມດ້ານການຄ້າ, ການລົງທຶນ, ເພີ່ມທະວີການເຊື່ອມຕໍ່ລະຫວ່າງບັນດາສະມາຄົມ, ວິສາຫະກິດ ນຳກັນ. ຫວຽດນາມ ພ້ອມແລ້ວທີ່ຈະສືບຕໍ່ຮ່ວມມືກັບ ກົດດີວົວ ປັບປຸງແນວພັນ, ເພີ່ມສະມັດຕະພາບຂອງໝາກມ່ວງຫິມະພານດິບ, ພ້ອມທັງເປີດກວ້າງການແລກປ່ຽນສິນຄ້າປະເພດອື່ນໆ ເຊິ່ງ ຫວຽດນາມ ມີທ່າແຮງ, ເປັນຕົ້ນແມ່ນ: ສິນໃນນ້ຳ, ປຸຍ, ການຕ່ຳແຜ່ນຕັດຫຍິບ, ເກີບ, ເຄື່ອງໃຊ້ສອຍ, ວັດສະດຸກໍ່ສ້າງ, ເຄື່ອງຈັກ, ອຸປະກອນໄຟຟ້າ.

        ສອງຝ່າຍກໍປຶກສາຫາລືກ່ຽວກັບບັນດາຂົງເຂດຮ່ວມມືອື່ນໆ, ໃນນັ້ນ, ຫວຽດນາມ ກຳນົດວ່າ ກະສິກຳ ແມ່ນຂົງເຂດຮ່ວມມືບຸລິມະສິດ; ສະແດງຄວາມຊົມເຊີຍຂໍ້ສະເໜີຂອງ ກົດດີວົວ ທີ່ວ່າ ຮ່ວມມືກັນແລກປ່ຽນບົດຮຽນປະສົບການກ່ຽວກັບຂົງເຂດການສຶກສາຊັ້ນສູງ, ກໍ່ສ້າງດ້ານເຕັກໂນໂລຢີຂໍ້ມູນຂ່າວສານ; ຊຸກຍູ້ການຮ່ວມມືດ້ານທະນາຄານ ເພື່ອອຳນວຍຄວາມສະດວກແກ່ການຊຳລະລະຫວ່າງວິສາຫະກິດສອງຝ່າຍ…

        ກ່ຽວກັບການຮ່ວມມືລັດຖະສະພາ, ໃນຂອບເຂດການຢ້ຽມຢາມ, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວະ ແລະ ທ່ານປະທານສະພາແຫ່ງຊາດ ກົດດີວົວ Adama Bictogo ໄດ້ລົງນາມໃນບົດບັນທຶກຊ່ວຍຈຳວ່າດ້ວຍການຮ່ວມມືລະຫວ່າງສະພາແຫ່ງຊາດສອງປະເທດ; ແລກປ່ຽນບົດຮຽນ, ປະສົບການໃນການຈັດຕັ້ງການເຄື່ອນໄຫວລັດຖະສະພາ ເພື່ອແນໃສ່ສືບຕໍ່ປ່ຽນແປງໃໝ່ ແລະ ຍົກສູງປະສິດທິຜົນການເຄື່ອນໄຫວຂອງສະພາແຫ່ງຊາດ ແລະ ບັນດາອົງການຈັດຕັ້ງອ້ອມຂ້າງ; ຮ່ວມມືກັນຕິດຕາມກວດກາການປະຕິບັດກົດບັດສາກົນ, ຂໍ້ຕົກລົງຮ່ວມມືທີ່ລັດຖະບານ 2 ປະເທດ ໄດ້ລົງນາມ.

        ການຢ້ຽມຢາມ ຫວຽດນາມ ຂອງທ່ານປະທານສະພາແຫ່ງຊາດ ກົດດີວົວ Adama Bictoro ຈະເປັນຂີດໝາຍແກ່ການພັດທະນາໃໝ່ສຳລັບການພົວພັນມິດຕະພາບທີ່ມີມາແຕ່ເກືອບເຄິ່ງສະຕະວັດນີ້./.