ເສດຖະກິດມະຫາພາກຂອງຫວຽດນາມໃນ 8 ເດືອນຕົ້ນປີ 2015 ໄດ້ຮັບການຄວບຄຸມເປັນຢ່າງດີດ້ວຍບັນດາໝາກຜົນທີ່ຮອບດ້ານພໍສົມຄວນໃນທຸກຂົງເຂດ. ຄາດວ່າ ມີຫຼາຍຕົວເລກຄາດໝາຍເສດຖະກິດສັງຄົມທີ່ວາງອອກໃນປີນີ້ ຈະບັນລຸ ແລະ ລື່ນກາຍແຜນການທີ່ໄດ້ວາງອອກ. ນັ້ນແມ່ນປະຖົມປັດໄຈເພື່ອໃຫ້ລັດຖະບານວາງແຜນພັດທະນາເສດຖະກິດສັງຄົມປີ 2016 ສູງກວ່າປີນີ້ ດ້ວຍເງື່ອນໄຂບັນດາກະຊວງ, ຂະແໜງການ, ທ້ອງຖິ່ນຕ່າງໆຕ້ອງກຳແໜ້ນສະພາບການ ແລະ ມີປະຕິກິລີຍາທີ່ສອດຄ່ອງກັບບັນດາການຜັນປ່ຽນເສດຖະກິດ.
ທ່ານນາຍົກລັດຖະມົນຕີຫງວຽນເຕີ້ນຢຸງກ່າວຄຳເຫັນທີ່ກອງປະຊຸມ |
ຕາມການຕີລາຄາຂອງບັນດາສະມາຊິກລັດຖະບານໃນກອງປະຊຸມສະໄໝສາມັນປະຈຳເດືອນ 8 ຂອງລັດຖະບານ, ຊຶ່ງຈັດຂຶ້ນໃນວັນທີ 1/9/2015 ຊຶ່ງຄາດວ່າຈະມີ 13 ຄາດໝາຍໃນຈຳນວນ 14 ຄາດໝາຍເສດຖະກິດສັງຄົມປີ 2015 ຈະສາມາດບັນລຸ ແລະ ລື່ນກາຍແຜນການທີ່ໄດ້ວາງອອກ.
ຄວບຄຸມເສດຖະກິດມະຫາພາກເປັນຢ່າງດີບົນທ່ວງທ່າຟື້ນຟູເສດຖະກິດເປັນປົກກະຕິ
ເຖິງວ່າ ສະພາບການເສດຖະກິດໂລກ ແລະ ພາກພື້ນມີການຜັນແປທີ່ສັບສົນຫຼາຍຢ່າງ ອັນໄດ້ສົ່ງຜົນສະທ້ອນເຖິງພື້ນຖານເສດຖະກິດຫວຽດນາມກໍຕາມ, ແຕ່ພາຍໃຕ້ການຊີ້ນຳນຳພາຢ່າງຂ້ຽວຂາດຂອງລັດຖະບານ, ນາຍົກລັດຖະມົນຕີ, ຄວາມເປັນເຈົ້າການຮັບມືແກ້ໄຂຂອງບັນດາກະຊວງ, ຂະແໜງການ, ທ້ອງຖິ່ນຕ່າງໆດ້ວຍວິທີການແກ້ໄຂ, ນະໂຍບາຍຢ່າງທັນການ ແລະ ເໝາະສົມນັ້ນ, ເສດຖະກິດຫວຽດນາມນັບມື້ນັບມີສະຖຽນລະພາບ ດ້ວຍບັນດາໝາກຜົນທີ່ຕັ້ງໜ້າ, ຮອບດ້ານພໍສົມຄວນໃນທຸກຂົງເຂດ. ຈະແຈ້ງທີ່ສຸດແມ່ນ ເສດຖະກິດມະຫາພາກໄດ້ຮັບການຄວບຄຸມເປັນຢ່າງດີ, ດັດຊະນີລາຄາໃຊ້ສອຍເພີ່ມຄ່ອຍໆ, ສິນເຊືອເຕີບໂຕສູງກວ່າເມື່ອທຽບໃສ່ໄລຍະດຽວກັນຂອງປີກາຍ, ຄ່າດອກເບ້ຍໄດ້ຮັບການຮັກສາເປັນປົກກະຕິ, ອັດຕາແລກປ່ຽນເງິນຕາຖືກດັດປັບຢ່າງມີໄຫວພິກ. ທ່າເຕີບໂຕດ້ານການສົ່ງອອກ ແລະ ອັດຕາມູນຄ່ານຳເຂົ້າເກີນດຸນໃນ 8 ເດືອນຜ່ານມາ ຍັງຄົງຢູ່ໃນລະດັບຄວບຄຸມ. ຕາມຂໍ້ມູນຂອງກົມໃຫຍ່ພາສີຫວຽດນາມແລ້ວ, ໃນ 8 ເດືອນທີ່ຜ່ານມາ, ມູນຄ່າການສົ່ງອອກຂອງຫວຽດນາມບັນລຸກວ່າ 106 ຕື້ USD ເພີ່ມຂຶ້ນ 9%.
ກະຊວງແຜນການ ແລະ ການລົງທຶນຄາດຄະເນວ່າ ດ້ວຍໝາກຜົນເສດຖະກິດສັງຄົມໃນ 8 ເດືອນຕົ້ນປີຄືດັ່ງກ່າວ, ຄາດວ່າ ຈີດີພີ ປີ 2015 ຈະບັນລຸ 6,4% ເພີ່ມຂຶ້ນ 0,2% ເມື່ອທຽບໃສ່ແຜນການ, ລະດັບເຕີບໂຕວົງເງິນສົ່ງອອກບັນລຸປະມານ 10%, ເງິນເຟີ້ເທົ່າກັບ ½ ຫຼືຕ່ຳກວ່າເມື່ອທຽບໃສ່ການຄາດຄະເນໃນເບື້ອງຕົ້ນ.
ປະຕິກິລີຍາດ້ານນະໂຍບາຍຕ້ອງໄວ, ທັນການ, ຊັດເຈນ ແລະມີປະສິດທິຜົນ
ເພື່ອຮັບມືກັບຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ, ເປັນຕົ້ນແມ່ນການເຄື່ອນເໜັງດ້ານລາຄານ້ຳມັນດິບ ໄດ້ຫຼຸດລົງຫຼາຍ, ຕະຫຼາດເງິນຕາສາກົນຜັນແປຢ່າງສັບສົນພາຍຫຼັງທີ່ຈີນໄດ້ດັດປັນສະກຸນເງິນຢວນໃຫ້ອ່ອນຕົວລົງ, ການຜະລິດກະສີກຳ ແລະ ສິນໃນນ້ຳປະສົບກັບຄວາມຫຍຸ້ງຍາກຍ້ອນໄພທຳມະຊາດ, ມັນໄດ້ຮຽກຮ້ອງໃຫ້ຕ້ອງມີ ປະຕິກິລີຍາດ້ານນະໂຍບາຍຢ່າງມີໄຫວພິກ. ທີ່ກອງປະຊຸມສະໄໝສາມັນປະຈຳເດືອນ 8 ຂອງລັດຖະບານ, ທ່ານນາຍົກລັດຖະມົນຕີ ຫງວຽນເຕີ້ນຢຸງ ຮຽກຮ້ອງບັນດາສະມາຊິກລັດຖະບານ ບໍ່ຄວນປະໝາດຕໍ່ໜ້າການຜັນແປທີ່ສັບສົນຂອງເສດຖະກິດໂລກ, ກຳແໜ້ນສະພາບການ, ຍົກສູງຄວາມສາມາດປະຕິກິລີຍຍາດ້ານນະໂຍບາຍ “ໄວ, ທັນການ, ຊັດເຈນ ແລະມີປະສິດທິຜົນ”. ທ່ານນາຍົກລັດຖະມົນຕີ ຫງວຽນເຕີ້ນຢຸງ ຊີ້ແຈ້ງວ່າ ຕ້ອງສືບຕໍ່ຄວບຄຸມ ເສດຖະກິດມະຫາພາກເປັນປົກກະຕິ, ບໍລິຫານເງິນເຟີ້ຕາມເປົ້າໝາຍ ຕາມທິດຍົກຂຶ້ນ, ຮັກສາອັດຕາແລກປ່ຽນເງິນຕາ, ຄ່າດອກເບ້ຍຕາມທ້ອງຕະຫຼາດ, ດ້ວຍບັນດາມາດຕະການຍູ້ແຮງການສົ່ງອອກເພີ່ມ 10% ຕິດພັນກັບການຄວບຄຸມມູນຄ່ານຳເຂົ້າເກີນດຸນ, ເພີ່ມທະວີບັນດາມາດຕະການເພີ່ມລາຍຮັບງົບປະມານ, ຮັບປະກັນດຸນຊຳລະຂອງພື້ນຖານເສດຖະກິດ. ທ່ານນາຍົກລັດຖະມົນຕີຍັງສະເໜີ ບັນດາກະຊວງ, ຂະແໜງການ, ທ້ອງຖິ່ນຕ່າງໆ ເລັ່ງໃສ່ປົວແປງສະພາບແວດລ້ອມລົງທຶນ ດຳເນີນທຸລະກິດ, ເປັນຕົ້ນແມ່ນການສ້າງລະບອບລະບຽບການ, ກົນໄກ ນະໂຍບາຍໃຫ້ສົມບູນແບບ, ສ້າງທຸກເງື່ອນໄຂສະດວກເພື່ອໃຫ້ບັນດາພາກສ່ວນເສດຖະກິດຍູ້ແຮງການລົງທຶນ, ຜະລິດດຳເນີນທຸລະກິດ; ຍູ້ແຮງການສ້າງໂຄງປະກອບພື້ນຖານເສດຖະກິດຄືນໃໝ່, ເປັນຕົ້ນແມ່ນ ສ້າງໂຄງປະກອບທະນາຄານຄືນໃໝ່, ຄວບຄຸມໜີ້ເສຍໃຫ້ຢູ່ໃນລະດັບ 3% ຕິດພັນກັບການສ້າງລະບົບເປັນປົກກະຕິ ແລະ ໃນປີນີ້, ຕ້ອງສຳເລັດການຫັນລັດວິສາຫະກິດຢ່າງໜ້ອຍ 200 ແຫ່ງເປັນຫຸ່ນສ່ວນ, ຊຸກຍູ້ລະດັບການປ່ອຍເງິນເພື່ອສຳເລັດແຜນການລົງທຶນ; ສືບຕໍ່ປະຕິບັດບັນດາໂຄງການໜູນຊ່ວຍສັງຄົມ ແລະ ສະຫວັດດີການສັງຄົມຢ່າງຄົບຊຸດ, ຍູ້ແຮງວຽກງານພົວພັນຕ່າງປະເທດ, ເພີ່ມທະວີການຮັບປະກັນການປ້ອງກັນຊາດ ປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍສັງຄົມ ແລະ ວຽກງານຖະແຫຼງຂ່າວ ໂຄສະນາຢ່າງທັນການ, ຊັດເຈນ, ສ້າງຄວາມເຫັນດີເຫັນພ້ອມໃນສັງຄົມ.
ບົນພື້ນຖານການຄາດຄະເນທີ່ເປັນໜ້າຊື່ນຊົມກ່ຽວກັບສະພາບເສດຖະກິດສັງຄົມປີ 2016, ທ່ານນາຍົກລັດຖະມົນຕີ ຫງວຽນເຕີ້ນຢຸງ ໄດ້ຊີ້ແຈ້ງເຖິງກຳນົດທິດກໍ່ສ້າງແຜນພັດທະນາເສດຖະກິດສັງຄົມປີ 2016 ດ້ວຍຈິດໃຈເຕີບໂຕສູງກວ່າ, ປະສິດທິຜົນຂອງພື້ນຖານເສດຖະກິດດີກວ່າ, ໃນນັ້ນການເຕີບໂຕເສດຖະກິດໃນປີ 2016 ແມ່ນປະມານ 6,7% ແລະ ໄລຍະ 5 ປີຂ້າງໜ້າແມ່ນແຕ່ 6,7% ຫາ 7% ຕິດພັນກັບການສ້າງເສດຖະກິດມະຫາພາກ ເປັນປົກກະຕິ ແລະ ພັດທະນາແບບຍືນຍົງ.