ວັນທີ 26/9, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ໄດ້ເລີ່ມຕົ້ນການຢ້ຽມຢາມສັນທະວະໄມຕີ ສ.ປ.ປ.ລາວ, ລາຊະອານາຈັກກຳປູເຈຍ ແລະ ສ. ສະຫະພາບມ້ຽນມາຢ່າງເປັນທາງການ. ເນື່ອງໃນໂອກາດນີ້, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ຍັງຈະເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນຄັ້ງທີ 37 ຫຼື AIPA 37 ຊຶ່ງດຳເນີນໃນລະຫວ່າງວັນທີ 29/9 ຫາວັນທີ 3/10 ຢູ່ມຽນມາ. ນີ້ແມ່ນການເດີນທາງຢ້ຽມຢາມຕ່າງປະເທດຄັ້ງທຳອິດຂອງທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ພາຍຫຼັງທີ່ໄດ້ຮັບເລືອກຕັ້ງເປັນປະທານສະພາແຫ່ງຊາດຫວຽດນາມຊຸດທີ 14. ການຢ້ຽມຢາມແມ່ນເພື່ອແນໃສ່ປະຕິບັດບັນດາຂໍ້ຕົກລົງຮ່ວມມືທີ່ລົງນາມລະຫວ່າງສະພາແຫ່ງຊາດຫວຽດນາມກັບ ສະພາແຫ່ງຊາດຂອງ 3 ປະເທດດັ່ງກ່າວ; ສືບຕໍ່ປະຕິບັດນະໂຍບາຍເປັນເຈົ້າການເຊື່ອມໂຍງເຂົ້າກັບສາກົນ, ເສີມຂະຫຍາຍທີ່ຕັ້ງບົດບາດຂອງຫວຽດນາມໃນບັນດາເວທີປາໄສຫຼາຍຝ່າຍ.
ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ມາຮອດສະໜາມບິນສາກົນຫວາດໄຕ ນະຄອນຫຼວງວຽງຈັນ |
ການຢ້ຽມຢາມ ສ.ປ.ປ.ລາວ, ລາຊະອານາຈັກກຳປູເຈຍ ແລະ ສ. ສະຫະພາບມ້ຽນມາຢ່າງເປັນທາງການຂອງທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ແມ່ນດຳເນີນຕາມຄຳເຊີນຂອງທ່ານນາງປະທານສະພາແຫ່ງຊາດລາວ ປານີ ຢາທໍຕູ້, ທ່ານປະທານສະພາແຫ່ງຊາດກຳປູເຈຍ Samdech Heng Samrin ແລະ ປະທານສະພາແຫ່ງຊາດ ສ. ສະຫະພາບມຽນມາ Ma Uyn Khai Than.
ໃນການຢ້ຽມຢາມບັນດາປະເທດຄັ້ງນີ້, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນຈະມີບັນດາການພົບປະເຈລະຈາກັບບັນດາການນຳສູງສຸດຂອງ 3 ປະເທດ, ດຳເນີນຫຼາຍການເຄື່ອນໄຫວຢູ່ນອກກອງປະຊຸມ AIPA ຄື : ກອງປະຊຸມສຳມະນາກ່ຽວກັບການຄຸ້ມຄອງໜີ້ສາທາລະນະ, ຢ້ຽມຢາມໂຮງໝໍ ເຈິ້ໄຣ້-ພະນົມເປັນ, ພົບປະກັບບັນດາວິສາຫະກິດຫວຽດນາມທີ່ພວມລົງທຶນຢູ່ມຽນມາ.
ເພີ່ມທະວີການຮ່ວມມືລັດຖະສະພາ 2 ຝ່າຍ
ການຢ້ຽມຢາມສັນທະວະໄມຕີ ສ.ປ.ປ.ລາວຂອງ ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນໄດ້ດຳເນີນພາຍຫຼັງທີ່ 2 ປະເທດຈັດຕັ້ງການເລືອກຕັ້ງສະພາແຫ່ງຊາດ ແລະ ສະພາປະຊາຊົນຂັ້ນຕ່າງໆຢ່າງສຳເລັດຜົນ. ກວ່າ 50 ປີທີ່ຜ່ານມາ, ນັບຕັ້ງແຕ່ໄດ້ສ້າງຕັ້ງການພົວພັນທາງການທູດນຳກັນ, ການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ-ລາວໄດ້ພັດທະນາຢ່າງດີງາມ ແລະ ໄດ້ຮັບການເພີ່ມພູນຄູນສ້າງຢ່າງບໍ່ຢຸດຢັ້ງ. ບົນພື້ນຖານການພົວພັນດ້ານການເມືອງນັ້ນ, ໃນປີ 2012, ສະພາແຫ່ງຊາດຂອງ 2 ປະເທດໄດ້ເຊັນສັນຍາຮ່ວມມື. ນີ້ແມ່ນພື້ນຖານສຳຄັນເພື່ອໃຫ້ອົງການນິຕິບັນຍັດຂອງ 2 ປະເທດສືບຕໍ່ເປັນເຈົ້າການ, ຕັ້ງໜ້າຜັນຂະຫຍາຍບັນດາການເຄື່ອນໄຫວຮ່ວມມືຢ່່າງກ້ວາງເລິກ, ແລກປ່ຽນຄະນະຜູ້ແທນຂັ້ນຕ່າງໆໃນສະພາແຫ່ງຊາດເປັນປະຈຳ. ພ້ອມກັບການປັບປຸງການພົວພັນຮ່ວມມື 2 ຝ່າຍ, ສະພາແຫ່ງຊາດຂອງ 2 ປະເທດຍັງສົມທົບຢ່າງແໜ້ນແຟ້ນຢູ່ບັນດາເວທີປາໄສລັດຖະສະພາພາກພື້ນ ແລະ ສາກົນ. ຜ່ານການຢ້ຽມຢາມຄັ້ງນີ້, 2 ຝ່າຍຈະສືບຕໍ່ສົມທົບຢ່າງແໜ້ນແຟ້ນ, ຫນູນຊ່ວຍກັນເພື່ອໃຫ້ລາວຮັບປະກັນບົດບາດເປັນປະທານອາຊຽນຢ່າງສຳເລັດຜົນ, ປະກອບສ່ວນຮັກສາຄວາມເປັນເອກະພາບ, ສາມັກຄີໃນອາຊຽນ, ຊຸກຍູ້ການສ້າງບັນດາມາດຕະການທີ່ຍັງເຫຼືອໃນວິວັດທະນາການສ້າງປະຊາຄົມໃຫ້ສຳເລັດ, ປະກອບສ່ວນຢ່າງແທດຈິງໃຫ້ແກ່ການສ້າງວິໄສທັດປະຊາຄົມອາຊຽນ 2025.
ສຳລັບກຳປູເຈຍ, ການພົວພັນຮ່ວມມືລະຫວ່າງສະພາແຫ່ງຊາດ 2 ປະເທດພວມພັດທະນາຢ່າງແຂງແຮງໃນທຸກດ້ານ. ບັນດາການຢ້ຽມຢາມ, ແລກປ່ຽນ, ພົບປະເປັນປະຈຳລະຫວ່າງການນຳຂັ້ນສູງ, ບັນດາກຳມາທິການຂອງ 2 ສະພາແຫ່ງຊາດກໍໄດ້ປະກອບສ່ວນຊຸກຍູ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານຫວຽດນາມ-ກຳປູເຈຍ ກໍຄືນ້ຳໃຈສາມັກຄີລະຫວ່າງປະຊາຊົນ 2 ປະເທດ. ໃນການຢ້ຽມຢາມລາຊະອານາຈັກກຳປູເຈຍຂອງ ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນຄັ້ງນີ້, 2 ຝ່າຍຈະສືບຕໍ່ເພີ່ມທະວີການແລກປ່ຽນຄະນະຜູ້ແທນບັນດາອົງການຂອງສະພາແຫ່ງຊາດ, ໃນນັ້ນມີຄະນະເລຂາສະພາແຫ່ງຊາດຫວຽດນາມ ແລະ ຄະນະເລຂາສະພາສູງກຳປູເຈຍ. ຈາກນັ້ນກໍສືບຕໍ່ຮ່ວມມື, ສົມທົບກັນທາບທາມ, ສະໜັບສະໜູນຊຶ່ງກັນ ແລະ ກັນຢູ່ ບັນດາເວທີປາໄສລັດຖະສະພາພາກພື້ນ ແລະ ສາກົນ.
ພາຍຫຼັງທີ່ສ້າງຕັ້ງການພົວພັນທາງການທູດກັບມຽນມາເປັນເວລາ 41 ປີ, ການພົວພັນມິດຕະພາບທີ່ເປັນມູນເຊື້ອຫວຽດນາມ-ມຽນມາໄດ້ຜ່ານໄລຍະປະຫວັດສາດທີ່ເປັນໜ້າພາກພູມໃຈ. ມຽນມາເປັນໜຶ່ງໃນບັນດາປະເທດທຳອິດໃນອາຊີຕາເວັນອອກສ່ຽງໃຕ້ ໄດ້ສ້າງຕັ້ງການພົວພັນທາງການທູດ ແລະ ສະໜັບສະໜູນຫວຽດນາມຢ່າງສຸດໃຈໃນພາລະກິດການຕໍ່ສູ້ຕ້ານສັດຕູຕ່າງດ້າວເຂົ້າມາຮຸກຮານ ແລະ ປົດປ່ອຍປະເທດຊາດເມື່ອກ່ອນນີ້. ໃນປະຈຸບັນ, 2 ປະເທດໄດ້ກຳນົດ ແລະ ຮັກສາການຮ່ວມມືໃນ 12 ຂົງເຂດບຸລິມະສິດ. ການພົວພັນຮ່ວມມືລະຫວ່າງ ສະພາແຫ່ງຊາດຫວຽດນາມ ແລະ ສະພາແຫ່ງຊາດມຽນມາໄດ້ມີບັນດາບາດກ້າວພັດທະນາຢ່າງຕັ້ງໜ້າ. ສະພາແຫ່ງຊາດ ແລະ ຫ້ອງວ່າການ ສະພາແຫ່ງຊາດຂອງ 2 ປະເທດໄດ້ເຊັນສັນຍາຮ່ວມມື, 2 ຝ່າຍໄດ້ສ້າງຕັ້ງກຸ່ມ ສ.ສ.ຊ ມິດຕະພາບ. ໃນບັນດາເວທີປາໄສຫຼາຍຝ່າຍ, 2 ປະເທດໄດ້ສົມທົບກັນຢ່າງມີປະສິດທິຜົນຢູ່ທີ່ກອງປະຊຸມ IPU ແລະ AIPA. ບົນພື້ນຖານນັ້ນ, ໃນການຢ້ຽມຢາມມຽນມາຂອງ ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນຄັ້ງນີ້ບໍ່ພຽງແຕ່ຢັ້ງຢືນການຖືເປັນສຳຄັນເທົ່ານັ້ນ, ຫາກຍັງສະແດງຄວາມຫວັງຢາກຊຸກຍູ້ການຮ່ວມມືຫຼາຍດ້ານແບບຕ່າງຝ່າຍຕ່າງມີຜົນປະໂຫຍດລະຫວ່າງ 2 ປະເທດໃນສະພາວະການໃໝ່ອີກດ້ວຍ.
ເສີມຂະຫຍາຍທີ່ຕັ້ງບົດບາດໃນເວທີປາໄສຫຼາຍຝ່າຍ
ພາຍຫຼັງສິ້ນສຸດການຢ້ຽມຢາມລາວ, ກຳປູເຈຍ ແລະ ສະຫະພາບ, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ຈະເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນຄັ້ງທີ 37 ຫຼື AIPA 37 ຊຶ່ງດຳເນີນໃນລະຫວ່າງວັນທີ 29/9 ຫາວັນທີ 3/10 ຢູ່ນະຄອນຫຼວງ Nay Pyi Taw ຂອງມຽນມາ. ດ້ວຍຫົວຂໍ້ “AIPA ມີຊີວິດຊີວາເພື່ອປະຊາຄົມອາຊຽນທີ່ກ້າວໜ້າ ” AIPA 37 ຈະສືບຕໍ່ຊຸກຍູ້ການສ້າງປະຊາຄົມອາຊຽນຕາມບັນດາເນື້ອໃນທີ່ໄດ້ວາງອອກໃນເອກະສານວິໄສທັດອາຊຽນ 2025.
ການເດີນທາງຢ້ຽມຢາມຕ່າງປະເທດຄັ້ງທຳອິດຢູ່ລາວ, ກຳປູເຈຍ ແລະ ສະຫະພາບມຽນມາຂອງທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນພາຍຫຼັງໄດ້ຮັບເລືອກຕັ້ງເປັນປະທານສະພາແຫ່ງຊາດຫວຽດນາມ ແມ່ນໄດ້ສະແດງໃຫ້ເຫັນເລື່ອງຫວຽດນາມຖືເປັນສຳຄັນການພັດທະນາສາຍພົວພັນຮ່ວມມືກັບບັນດາປະເທດໃນພາກພື້ນ. ພ້ອມກັນນັ້ນ, ການເຂົ້າຮ່ວມກອງປະຊຸມAIPA 37 ຂອງຜູ້ນຳສະພາແຫ່ງຊາດຫວຽດນາມ ແມ່ນສືບຕໍ່ສະແດງໃຫ້ເຫັນນະໂຍບາຍຢ່າງຕັ້ງໜ້າ, ເປັນເຈົ້າການເຊື່ອມໂຍງເຂົ້າກັບສາກົນ, ເສີມຂະຫຍາຍທີ່ຕັ້ງບົດບາດຂອງຫວຽດນາມ ແລະ ສະພາແຫ່ງຊາດຫວຽດນາມໃນບັນດາເວທີປາໄສຫຼາຍຝ່າຍ, ປະກອບສ່ວນຢ່າງຕັ້ງໜ້າເຂົ້າໃນການຮ່ວມມືໃນ AIPA ກໍຄືການຮ່ວມມືອາຊຽນ.