ໃນສະພາບທີ່ລັດທິກໍ່ການຮ້າຍສາມາດແຜ່ລາມອອກກວ້າງຂວາງນັ້ນ, ໃນຊຸມມື້ທີ່ຜ່ານມາ, ຫຼາຍປະເທດພ້ອມດ້ວຍອົງການຈັດຕັ້ງສາກົນໄດ້ມີບັນດາການກະທຳແນໃສ່ສະກັດກັ້ນໄພອັນຕະລາຍນີ້. ແຕ່ການສູ້ຮົບຕ້ານກໍ່ການຮ້າຍຕ້ອງໃຊ້ເວລາຍາວນານ ແລະ ຈຳເປັນຕ້ອງການສົມທົບກັນລະຫວ່າງທຸກຝ່າຍ.
ກະສັດອົງໃໝ່ຂອງປະເທດຊາອຸດິອາຣາເບັຍ Salman Bin Abdulaziz Al Saud ທີ່ກອງປະຊຸມສາກົນກ່ຽວກັບການ ຕ້ານກໍ່ການຮ້າຍຖືກຈັດຂຶ້ນຢູ່
Mecca ຂອງ ຊາອຸດິອາຣາເບັຍ (ພາບ: Reuters)
|
ໃນ 2-3 ມື້ທີ່ຜ່ານມາ, ກອງປະຊຸມສາກົນກ່ຽວກັບການ ຕ້ານກໍ່ການຮ້າຍໄດ້ຖືກຈັດຂຶ້ນ 2 ຄັ້ງຢູ່ອາເມລິກາ ແລະ ຊາອຸດິອາຣາເບັຍ ແນໃສ່ຊອກຫາສຽງເວົ້າລວມຂອງປະຊາຄົມໂລກໃນການ ການສູ້ຮົບຕ້ານກໍ່ການຮ້າຍ. ພ້ອມກັບບັນດາກອງປະຊຸມດັ່ງກ່າວ, ມີຫຼາຍປະເທດຍັງປະກາດແຜນການສະເພາະຂອງຕົນເພື່ອສະກັດກັ້ນການແຜ່ລາມອອກສູ່ວົງກວ້າງຂອງ ລັດທິກໍ່ການຮ້າຍຢູ່ປະເທດຕົນເອງ.
ຈາກຄວາມມານະພະຍາຍາມຂອງສາກົນຕະຫຼອດຮອດຄວາມເປັນເຈົ້າການຂອງແຕ່ລະປະເທດ.
ທີ່ກອງປະຊຸມສາກົນດ້ວຍຫົວຂໍ້ : “ ອິດສະລາມບັ້ນຮົບ ຕ້ານກໍ່ການຮ້າຍ ” ພວມຖືກດຳເນີນຢູ່ເຂດເທວະສະຖານ Mecca ຂອງ ຊາອຸດິອາຣາເບັຍ, ກະສັດອົງໃໝ່ຂອງປະເທດນີ້ Salman Bin Abdulaziz Al Saud ໄດ້ສົ່ງສານໄປທົ່ວໂລກໂດຍໃຫ້ຮູ້ວ່າ : “ ຕ້ອງປົກປັກຮັກສາຮູບພາບຂອງຊາວມຸດສະລິມໃນທົ່ວໂລກໃຫ້ຫຼຸດພົ້ນອອກຈາກການມ້າງເພທຳລາຍຂອງ ລັດທິກໍ່ການຮ້າຍ ”. ໃນເວລາດຳເນີນກອງປະຊຸມເປັນເວລາ 4 ວັນ, ຜູ້ແທນ 700 ຄົນຊຶ່ງເປັນບັນດາເຈົ້າໜ້າທີ່, ນັກຮຽນຮູ້ບັນດາປະເທດອິດສະລາມ ໄດ້ປຶກສາຫາລືກ່ຽວກັບບັນດາສາຍເຫດຂອງ ລັດທິກໍ່ການຮ້າຍ, ເພື່ອຈາກນັ້ນຈະວາງອອກແຜນການ ຕ້ານກໍ່ການຮ້າຍຢ່າງຮອບດ້ານ. ກອງປະຊຸມກໍແມ່ນໂອກາດເພື່ອໃຫ້ບັນດາປະເທດ ແລະ ນັກຮຽນຮູ້ຊາວມຸດສະລິມພິຈາລະນາບັນດາສາຍເຫດທາງສາສະໜາຂອງ ລັດທິກໍ່ການຮ້າຍກໍຄືບັນດາສາຍເຫດດ້ານເສດຖະກິດສັງຄົມ, ການສຶກສາ, ວັດທະນະທຳ ແລະ ສື່ສານ…ຂອງ ລັດທິກໍ່ການຮ້າຍທີ່ພວມຄຸກຄາມໃນໂລກປະຈຸບັນ.
ກ່ອນທີ່ດຳເນີນກອງປະຊຸມດັ່ງກ່າວ, ຢູ່ອາເມລິກາ ກໍໄດ້ໄຂກອງປະຊຸມສຸດຍອດສາກົນກ່ຽວກັບ ຕ້ານກໍ່ການຮ້າຍ ແລະ ລັດທິຫົວຮຸນແຮງ ແຕ່ວັນທີ 18-20/2 ດ້ວຍການເຂົ້າຮ່ວມຂອງຜູ້ຕາງໜ້າກວ່າ 60 ປະເທດ.
ພ້ອມກັບ 2 ກອງປະຊຸມທີ່ມີລະດັບສາກົນດັ່ງກ່າວ, ໃນຊຸມມື້ທີ່ຜ່ານມາ, ແຕ່ລະປະເທດໄດ້ປະກາດບັນດາການກະທຳເພື່ອຕ້ານ ລັດອິດສະລາມຂະໜານນາມເອງ IS . 2-3 ມື້ ພາຍຫຼັງໄດ້ຮັບໜ້າທີ່, ວັນທີ 23/2, ລັດຖະມົນຕີປ້ອງກັນຊາດຄົນໃໝ່ຂອງອາເມລິກາ Ashton Carter ໄດ້ຢັ້ງຢືນຢ່າງແນ່ນອນວ່າ ຈະຕີປະລາໄຊພວກ ລັດອິດສະລາມຂະໜານນາມເອງ IS ຢູ່ທີ່ກອງປະຊຸມກັບບັນດານາຍທະຫານ ແລະ ນັກການທູດແຖວໜ້າຢູ່ຄູເວດເພື່ອພິຈາລະນາຄວາມມານະພະຍາຍາມສູ້ຮົບຕ້ານ ກຳລັງລັດອິດສະລາມຂະໜານນາມເອງ IS. ຝະລັ່ງຖະແຫຼງໄດ້ຈັດສົ່ງກຳປັ່ນບັນທຸກເຮືອບິນ Charles de gaulle ໄປເຂົ້າຮ່ວມການສູ້ຮົບຕ້ານລັດອິດສະລາມຂະໜານນາມເອງ IS ຢູ່ອີຣັກ. ສ່ວນຢູ່ແບນຊິກ, ປະເທດນີ້ກໍໄດ້ປະກາດແຜນການ ຕ້ານກໍ່ການຮ້າຍ ແລະ ພວມມຸດສະລິມຫົວຮຸນແຮງດ້ວຍ 12 ມາດຕະການ.
ໄພອັນຕະລາຍກໍ່ການຮ້າຍ ປະກົດຕົວ, ການສົມທົບຍັງບໍ່ທັນເປັນເອກະພາບ
ພ້ອມກັບໄພອັນຕະລາຍກໍ່ການຮ້າຍພວມປະກົດຕົວ, ຄວາມເປັນເອກະພາບກັນໃນການສົມທົບກັນເພື່ອກະທຳລະຫວ່າງປະເທດຕ່າງໆ ກໍແມ່ນບັນຫາຄວນໄດ້ຮັບຄວາມເອົາໃຈໃສ່, ພິເສດໃນມໍ່ມານີ້, ລັດຖະມົນຕີປ້ອງກັນຊາດອີຣັກ Obeidi ໄດ້ຕຳໜິຕິຕຽນອາເມລິກາ ເພາະໄດ້ປະກາດຕາຕະລາງເວລາດຳເນີນບັ້ນການທະຫານ ແນໃສ່ຢຶດຄອງນະຄອນ ໂມຊູນຈາກກຳມືຂອງ ລັດອິດສະລາມຂະໜານນາມເອງ IS ຄືນໃໝ່. ລັດຖະມົນຕີປ້ອງກັນຊາດອີຣັກ Obeidi ຢືນຢັນວ່າ ດ້ວຍບັ້ນການທະຫານເຊັ່ນນັ້ນ, ວົງການຜູ້ບັນຊາການທະຫານບໍ່ໄດ້ເປີດເຜີຍຄວາມລັບ. ລັດຖະມົນຕີປ້ອງກັນຊາດອີຣັກ Obeidi ໄດ້ຕີລາຄາວ່າ ນີ້ແມ່ນການສູ້ຮົບໃນນະຄອນ, ແຫ່ງທີ່ມີສາມັນຊົນດຳລົງຊີວິດຢ່າງຫຼວງຫຼາຍ, ດັ່ງນັ້ນ ຈຳເປັນຕ້ອງມີຄວາມແມ່ນຍຳສູງ ແລະ ມານະອົດທົນເມື່ອຂຶ້ນແຜນການຮົບ.
ບໍ່ອາດປະຕິເສດບັນດາໝາກຜົນທີ່ປະຊາຄົມໂລກບັນລຸມາໄດ້ໃນການສູ້ຮົບ ຕ້ານກໍ່ການຮ້າຍໄລຍະທີ່ຜ່ານມາ. ແຕ່ເພື່ອໃຫ້ ການສູ້ຮົບ ຕ້ານກໍ່ການຮ້າຍບັນລຸປະສິດທິຜົນ, ບັນດາປະເທດ ແລະ ປະຊາຄົມໂລກຄວນມານະພະຍາຍາມ ແລະ ມີການສົມທົບກະທຳໃນຫຼາຍດ້ານ, ຊຶ່ງບໍ່ພຽງແຕ່ດ້ານການທະຫານເທົ່ານັ້ນ.