(vovworld) - ສານໃນຕົ້ນປີໃໝ່ຂອງບັນດາການນຳຂັ້ນສູງ ຫວຽດນາມ, ບັນຍາກາດຕ້ອນຮັບປີໃໝ່ຢ່າງເບີກບານມ່ວນຊື່ນ, ຄວາມຜາສຸກຂອງປະຊາຊົນໃນທຸກແຖບຖິ່ນຂອງປະເທດຊາດ ແລະ ພໍ່ແມ່ປະຊາຊົນຊາວ ຫວຽດນາມ ອາໄສຢູ່ຕ່າງປະເທດ, ໄດ້ຮັບການລົງພິມຢ່າງຫຼວງຫຼາຍໃນສື່ສິ່ງງພິມປີໃໝ່ ປີລະກາ 2017. ຮີດຄອງປະເພນີທີ່ເປັນມູນເຊື້ອຂອງປະຊາຊົນ ຫວຽດນາມ, ສະພາບການທຸກໆດ້ານຂອງປະເທດຊາດກໍ່ໄດ້ຮັບການສ່ອງແສງຢ່າງຄົບຖ້ວນໃນສື່ສິ່ງພິມປີໃໝ່ນີ້.
ທົ່ວພັກ, ທົ່ວປວງຊົນ, ທົ່ວກອງທັບຕັດສິນໃຈກໍ່ສ້າງພັກໃຫ້ປອດໄສ, ໝັ້ນຄົງເຂັ້ມແຂງ ເພື່ອນຳພາປະເທດຊາດສືບຕໍ່ຍູ້ແຮງພາລະກິດແຫ່ງການປ່ຽນໃໝ່, ເຊື່ອມໂຍງເຂົ້າກັບສາກົນ ແລະ ພັດທະນາຢ່າງໝັ້ນຄົງເຂັ້ມແຂງ. ນັ້ນແມ່ນສານຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ທີ່ຝາກເຖິງປະຊາຊົນໃນການຕອບສຳພາດຕໍ່ໜັງສືພິມ ເຍີນເຢີນ (ສຽງຂອງພັກກອມມູນິດ ຫວຽດນາມ) ເນື່ອງໃນໂອກາດປີໃໝ່ປີລະກາ 2017. ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ: ຄວາມປະທັບໃຈຢ່າງເລິກເຊິ່ງໃນປີ 2016 ນັ້ນແມ່ນການຈັດຕັ້ງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ ແລະ ປັບປຸງບັນດາຕຳແໜ່ງການນຳຂອງລັດພາຍຫຼັງກອງປະຊຸມໃຫຍ່ຂອງພັກ. ຕາມທ່ານເລຂາທິການໃຫຍ່ ຫງວຽນຟູ໋ຈ້ອງ ແລ້ວ, ທົ່ວປວງຊົນມີຄວາມເບີກບານມ່ວນຊື່ນ, ແລະ ເຊື່ອໝັ້ນຕໍ່ການຊີ້ນຳນຳພາຂອງພັກ, ຕໍ່ກົງຈັກລັດອາຍຸການໃໝ່, ບໍ່ມີເວລາໃດທີ່ ຫວຽດນາມ ສ້າງໄດ້ອິດທິພົນຊື່ສຽງ ແລະ ທີ່ຕັ້ງບົດບາດບົນເວທີສາກົນຄືໃນປະຈຸບັນ.
ບັນດາສິ່ງພິມສະບັບປີໃໝ່
|
ໃນຂະນະນັ້ນ, ເມື່ອຕອບສຳພາດຕໍ່ໜັງສືພິມ ໄຊງ່ອນຢ໋າຍຟ໋ອງ (ໄຊງ່ອນປົດປ່ອຍ) ເນື່ອງໃນໂອກາດປີໃໝ່, ທ່ານປະທານປະເທດ ຫວຽດນາມ ເຈີ່ນດ້າຍກວາງ ໃຫ້ຮູ້ວ່າ ປີ 2017, ຫວຽດນາມ ສືບຕໍ່ຮັບປະກັນເສດຖະກິດມະຫາພາກເປັນປົກກະຕິ, ສ້າງການຫັນປ່ຽນຢ່າງຈະແຈ້ງໃນການປະຕິບັດ 3 ບຸກທະລຸຍຸດທະສາດ, ສ້າງໂຄງປະກອບເສດຖະກິດຄືນໃໝ່ຕິດພັນກັບການປ່ຽນໃໝ່ຮູບແບບການເຕີບໂຕ, ຍົກສູງສະມັດຕະພາບ, ຄຸນນະພາບ, ປະສິດທິຜົນ ແລະ ກຳລັງແກ່ງແຍ້ງ, ສົ່ງເສີມວິສາຫະກິດເລີ່ມທຸລະກິດ, ພັດທະນາວິສາຫະກິດ, ຊຸກຍູ້ການເຕີບໂຕ, ຮັບປະກັນຊີວິດສັງຄົມ. ໜ້າທີ່ສຳຄັນອື່ນອີກທີ່ທ່ານປະທານປະເທດ ເຈີ່ນດ້າຍກວາງ ໄດ້ຊີ້ແຈ້ງນັ້ນແມ່ນຮັກສາເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນໄວ້ຢ່າງໝັ້ນຄົງ, ຍົກສູງປະສິດທິຜົນການເຄື່ອນໄຫວພົວພັນຕ່າງປະເທດ, ເຊື່ອມໂຍງເຂົ້າກັບສາກົນ, ສ້າງສະພາບແວດລ້ອມສັນຕິພາບ, ສະຖຽນລະພາບເພື່ອພັດທະນາປະເທດຊາດ.
ກ່ອນທີ່ກ້າວເຂົ້າສູ່ປີໃໝ່, ເມື່ອຕອບສຳພາດຕໍ່ໜັງສືພິມ ຕ໋ວຍເຈ໋ (ແປວ່າ ໄວໜຸ່ມ, ສຽງຂອງຄະນະຊາວໜຸ່ມກອມມູນິດ ໂຮ່ຈີມິນ), ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ເນັ້ນໜັກເຖິງບັນຫາເລີ່ມທຸລະກິດ, ສ້າງເປັນລະບົບຊີວະພາບເລີ່ມທຸລະກິດ, ນັ້ນແມ່ນລະບອບ, ນະໂຍບາຍ, ສະພາບແວດລ້ອມເສດຖະກິດ, ວັດທະນະທຳ, ສັງຄົມ. ທ່ານນາຍົກລັດຖະມົນຕີ ຫງວຽນຊວນຟຸກ ໃຫ້ຮູ້ວ່າ ລັດຖະບານຈະສືບຕໍ່ປະກາດໃຊ້ຫຼາຍນະໂຍບາຍປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດ ແລະ ມຸ່ງໄປເຖິງຈຸດໝາຍເຖິງປີ 2020, ຫວຽດນາມ ຈະມີວິສາຫະກິດ 1 ລ້ານກ່ວາແຫ່ງ.
ບັນດາສື່ສິ່ງພິມປີໃໝ່ ປີລະກາ 2017 ຂອງພັກ, ບັນດາອົງການຈັດຕັ້ງມະຫາຊົນ, ສັງຄົມ ດ້ວຍສື່ສິ່ງພິມນັບພັນໆສະບັບໄດ້ມີຫຼາຍບົດທີ່ໄຈ້ແຍກຜົນງານດ້ານເສດຖະກິດ - ສັງຄົມປີ 2016 ແລະ ຄາດວ່າແງ່ຫວັງດ້ານເສດຖະກິດ - ສັງຄົມປີ 2017. ບົດຂຽນ “ຮັກສາເສດຖະກິດມະຫາພາກ, ສ້າງກຳລັງໜູນໃໝ່” ຂອງໜັງສືພິມ ໄຊງ່ອນຢ໋າຍຟ໋ອງ ໃຫ້ຮູ້ວ່າ: ປີ 2016, ຍອດຜະລິດຕະພັນພາຍໃນ (GDP) ຂອງ ຫວຽດນາມ ໄດ້ເພີ່ມຂຶ້ນ 6,21%, ເຖິງວ່າບໍ່ບັນລຸໄດ້ຄາດໝາຍທີ່ວາງອອກນັ້ນແມ່ນ 6,7% ກໍ່ຕາມ ແຕ່ໃນສະພາບການເສດຖະກິດໂລກ ແລະ ພາຍໃນປະເທດຍັງປະສົບກັບຄວາມຫຍຸ້ງຍາກ, ລະດັບການເຕີບໂຕຄືແນວນັ້ນແມ່ນສູງຢູ່. ປີ 2016, ສິ່ງທີ່ພົ້ນເດັ່ນແມ່ນເສດຖະກິດມະຫາພາກເປັນປົກກະຕິ, ໄພເງິນເຟີ້ໄດ້ຮັບການຄວບຄຸມຢູ່ໃນລະດັບຕ່ຳ (ດັດຊະນີລາຄາໃຊ້ສອຍ CPI ເພີ່ມຂຶ້ນ 4,74%), ການແຮເງິນຕາຕ່າງປະເທດບັນລຸ 41 ຕື້ USD, ເຊິ່ງແມ່ນລະດັບສູງສຸດນັບແຕ່່ກ່ອນມາ, ການສົ່ງອອກເກີນດຸນແມ່ນ 2,68 ຕື້ USD, ການດຶງດູດທຶນຈາກຕ່າງປະເທດບັນລຸລະດັບສະຖິຕິດ້ວຍຈຳນວນເງິນ 15,8 ຕື້ USD. ປີ 2017, ຫວຽດນາມ ໄດ້ວາງຄາດໝາຍລະດັບເຕີບໂຕ GDP ແມ່ນ 6,7%, CPI 4%, ຍອດວົງເງິນການສົ່ງອອກເພີ່ມຂຶ້ນ 6 – 7%. ໃນບົດໜັງສືພິມ “ກຳລັງແຮງໃນການເຊື່ອມໂຍງ” ຂອງທ່ານ ຫວູຄວານ, ອະດີດຮອງນາຍົກລັດຖະມົນຕີ ທີ່ລົງພິມໃນໜັງສືພິມ ຕ໋ວຍເຈ໋, ໄດ້ເນັ້ນໜັກວ່າວັດທະນະທຳວິສາຫະກິດແມ່ນປັດໄຈສຳຄັນເພື່ອເຊື່ອມໂຍງຢ່າງສຳເລັດຜົນ.
ປີ 2017, ເປັນຄັ້ງທີສອງທີ່ ຫວຽດນາມ ເປັນເຈົ້າພາບຈັດຕັ້ງເວທີປາໄສການຮ່ວມມືເສດຖະກິດ ອາຊີ - ປາຊີຟິກ (APEC). ບັນດາສື່ສິ່ງພິມໄດ້ສ່ອງແສງກ່ຽວກັບເຫດການສຳຄັນນີ້ຢ່າງຫຼວງຫຼາຍ. ບັນດາບົດຂຽນໃຫ້ຮູ້ວ່າ ສັບປະດາຂັ້ນສູງ ເວທີປາໄສການຮ່ວມມືເສດຖະກິດ ອາຊີ - ປາຊີຟິກ ປີ 2017 (APEC 2017) ຈະໄດ້ຮັບການຈັດຕັ້ງຢູ່ ດ່ານັ້ງ, ຫວຽດນາມ ໃນເດືອນ 11/2017 ດ້ວຍຈຸດສຸມແມ່ນກອງປະຊຸມສຸດຍອດ APEC.
ຮີດຄອງປະເພນີຕ້ອນຮັບບຸນເຕັດຂອງຊາວ ຫວຽດ, ບັນດາງານບຸນຍາມລະດູບານໃໝ່, ບັນຍາກາດຕ້ອນຮັບປີໃໝ່ຂອງຊາວ ຫວຽດນາມ ທັງຢູ່ພາຍໃນ ແລະ ຕ່າງປະເທດກໍ່ໄດ້ລົງພິມໃນສື່ສິ່ງພິມສະບັບປີໃໝ່. ພາຍໃຕ້ຫົວຂໍ້ວ່າ “ເຂົ້າໜົມ ພະລາດຊະວັງ” ທີ່ລົງພິມໃນໜັງສືພິມ ແທງນຽນ ໄດ້ຊ່ວຍໃຫ້ຜູ້ອ່ານຄົ້ນຫາວິທີເຮັດເຂົ້າໜົມຊະນິດຕ່າງໆຍາມບຸນເຕັດຂອງສະໄໝລາຊະວົງ ຫງວຽນ (1802 – 1945). ບົດສາລະຄະນະ “ນັ້ນຈຶ່ງແມ່ນບຸນເຕັດຢູ່ເຫ້ວ” ລົງພິມໃນໜັງສືພິມ ຕ໋ວຍເຈ໋ ໄດ້ເປີດເຜີຍວ່າ ປະຊາຊົນຢູ່ກຸງເກົ່າເຫ້ວ ນິຍົມຊົມດວງພະຈັນວັນເພງເດືອນຈຽງ (ເດືອນທຳອິດໃນປີ). ປະຊາຊົນເຫ້ວເຄີຍພາກັນຂຶ້ນນົນພູ ທຽນອານ ຫຼື ນົນພູ ວ້ອງແກງເພື່ອຊົມດວງເດືອນ ແລະ ລະຫຼິ້ນ.
ໃນຂົງເຂດກິລາ, ບັນດາໜັງສືພິມກິລາຍາມບຸນເຕັດໄດ້ໃຫ້ຂ່າວຢ່າງຫຼວງຫຼາຍກ່ຽວກັບຜົນງານຂອງກິລາ ຫວຽດນາມ. ເຫດການພົ້ນເດັ່ນໃນປີ 2016 ນັ້ນແມ່ນ ເປັນຄັ້ງທຳອິດທີ່ ຫວຽດນາມ ຄ້ວາໄດ້ຫຼຽນຄຳ ພ້ອມກັບສະຖິຕິໃນການແຂ່ງຂັນ Olympic ແລະ Paralympic ໂດຍນັກຍິງປືນ ຮ່ວາງຊວນວີງ ແລະ ນັກກິລາຍົກນ້ຳໜັກ ເລວັນກົງ ຍາດມາໄດ້. ເປັນຄັ້ງທຳອິດ, ນັກກິລາລອຍນ້ຳ ຫງວຽນທິແອ໋ງວຽນ ຄ້ວາໄດ້ຫຼຽນຄຳ ອາຊີ. ທິມຊາດ Fusal ແລະ ທິມຊາດ U19 ຍາດໄດ້ສິດເຂົ້າຮ່ວມ World Cup.
ບັນດາສື່ສິ່ງພິມປີໃໝ່ຍັງມີຫຼາຍຂ່າວ, ບົດເວົ້າເຖິງຄວາມເອົາໃຈໃສ່ຂອງພັກ, ລັດໃນການເບິ່ງແຍງດູແລເຖິງປະຊາຊົນທຸກຍາກ, ຄອບຄົວນະໂຍບາຍ ແລະ ບັນດາຜູ້ມີຄຸນງາມຄວາມດີຕໍ່ປະເທດຊາດ, ນັກຮົບຢູ່ໝູ່ເກາະທີ່ຫ່າງໄກໃນໂອກາດບຸນເຕັດ, ພ້ອມທັງໄດ້ເວົ້າເຖິງການຄາດຄະເນ, ຄວາມມຸ່ງຫວັງຂອງຜູ້ຕາງໜ້າປະຊາຊົນທຸກຊັ້ນຄົນເມື່ອລະດູບານໃໝ່ວຽນມາ.
ປີໃໝ່ປີລະກາ 2017, ບັນດາສື່ສິ່ງພິມປີໃໝ່ໄດ້ມີຫຼາຍບົດກ່ຽວກັບສັດລ້ຽງທີ່ມີຄວາມຕິດພັນກັບຊີວິດຂອງມະນຸດ. ໂຕໄກ່ ໃນເລື່ອງນິທານເຄີຍເປັນສັນຍາລັກອັນດີງາມກ່ຽວກັບຊີວິດຂອງມະນຸດ. ບົດຂຽນ “ບູຊາໂຕໄກ່ຜູ້” ຂອງໜັງສືພິມ ຕ໋ວຍແຈ໋ ໃຫ້ຮູ້ວ່າ: ໃນພາເຂົ້າບູຊາ ຍາມບຸນເຕັດຂອງ ຫວຽດນາມ ໂຕໄກ່ຜູ້ແມ່ນຂາດບໍ່ໄດ້ ແລະ ໂຕໄກ່ຜູ້ຖືກວາງຢູ່ໃຈກາງພາເຂົ້າບູຊາຍາມບຸນເຕັດ.
ສື່ສິ່ງພິມປີໃໝ່, ປີລະກາ 2017 ມີເນື້ອໃນອຸດົມສົມບູນ, ດຶງດູດໃຈ, ແມ່ນອາຫານດ້ານຈິດໃຈທີ່ຂາດບໍ່ໄດ້ຂອງປະຊາຊົນ ຫວຽດນາມ ແຕ່ລະຄົນ ເມື່ອບຸນເຕັດວຽນມາ.