(vovworld)- ກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 48(AMM-48) ແລະ ເວທີປາໄສຄວາມໝັ້ນຄົງພາກພື້ນ ອາຊຽນ ຄັ້ງທີ 22 (ARF -22) ໄດ້ໄຂຂຶ້ນຢ່າງເປັນທາງການໃນວັນທີ 4/8 ຢູ່ນະຄອນຫລວງ ກົວລາລຳເປີ ຂອງມາເລເຊຍ. ຄຽງຄູ່ກັບ ການປຶກສາຫາລືສ້າງຕັ້ງປະຊາຄົມ ອາຊຽນ ໃນທ້າຍປີນີ້, ຄວາມຄືບຫນ້າກ່ຽວກັບວິໄສທັດປະຊາຄົມ ອາຊຽນ ຫລັງປີ 2015, ບັນດາທ່ານລັດຖະມົນຕີກໍໄດ້ແລກປ່ຽນທັດສະນະກ່ຽວກັບບັນດາບັນຫາສາກົນ ແລະ ພາກພື້ນ, ໃນນັ້ນ ມີບັນຫາທະເລຕາເວັນອອກທີ່ຫາກໍພົ້ນເດັ່ນຂຶ້ນ ມັນບໍ່ພຽງແຕ່ແມ່ນຄວາມສົນໃຈພິເສດ ຂອງບັນດາປະເທດພາຍໃນພາກພື້ນເທົ່ານັ້ນ ຫາກນັບທັງບັນດາປະເທດນອກພາກພື້ນອີກດ້ວຍ.
ລັດຖະມົນຕີການຕ່າງປະເທດບັນດາປະເທດອາຊຽນ
|
ເຂົ້າຮ່ວມກອງປະຊຸມ AMM 48 ແລະ ບັນດາກອງປະຊຸມກ່ຽວຂ້ອງຫລັງຈາກນັ້ນ ມີລັດຖະມົນຕີວ່າການກະຊວງການຕ່າງປະເທດ 20 ທ່ານ ຂອງບັນດາປະເທດ ອາຊຽນ, ບັນດາປະເທດຄູ່ຮ່ວມມື ແລະ ບັນດາປະເທດຄູ່ເຈລະຈາ ຂອງ ອາຊຽນ. ເຖິງວ່າ ບັນຫາທະເລຕາເວັນອອກ ບໍ່ນອນໃນແຜນການຂອງກອງປະຊຸມຢ່າງເປັນທາງການກໍຕາມ, ແຕ່ນີ້ ແມ່ນຫົວເລື່ອງໄດ້ສຸມໃສ່ປຶກສາຫາລືຫລາຍສຸດ ຍ້ອນຄວາມເຄັ່ງຕຶງພວມນັບມື້ນັບເພີ່ມຂຶ້ນ ດ້ວຍບັນດາຄຳຖະແຫລງອະທິປະໄຕທີ່ກ້າວກ່າຍຢູ່ເຂດທະເລທີ່ມີຄວາມສາມາດບົ່ມຊ້ອນຫລາຍຢ່າງກ່ຽວກັບນ້ຳມັນ.
ບັນຫາທະເລຕາເວັນອອກແມ່ນບັນຫາເຄັ່ງຮ້ອນກ່ອນທີ່ດຳເນີນ AMM 48
ກ່ອນດຳເນີນການເຄື່ອນໄຫວປະຈຳປີສຳຄັນຂອງອາຊຽນ, ບັນຫາທະເລຕາເວັນອອກໄດ້ກາຍເປັນຄວາມສົນໃຈຈຸດສຸມ, ດຶງດູດຄວາມສົນໃຈຂອງບັນດາພາຫະນະສື່ມວນຊົນສາກົນ, ເພາະບັນດາຄຳຖະແຫລງ ແລະ ຄຳກ່າວປາໄສຂອງບັນດາເຈົ້າຫນ້າທີ່ຂັ້ນສູງ, ວົງການນັກໄຈ້ແຍກຢູ່ພາຍໃນ ແລະ ນອກພາກພື້ນ. ກ່ອນດຳເນີນກອງປະຊຸມ AMM48, ລັດຖະມົນຕີວ່າການກະຊວງການຕ່າງປະເທດ ຂອງປະເທດເຈົ້າພາບ ມາເລເຊຍ, ທ່ານ Anifah Aman ໄດ້ຢືນຢັນ: ບັນຫາທະເລຕາເວັນອອກ ແມ່ນບັນຫາເຄັ່ງຮ້ອນທີ່ສຸດ ຢູ່ ກອງປະຊຸມ AMM48 ເມື່ອມີຫລາຍປະເທດພວມວິຕົກກັງວົນທີ່ສຸດຕໍ່ຫນ້າການທ້າທາຍຕໍ່ຄວາມສະຫງົບປອດໄພຫາກໍເກີດຂຶ້ນຢູ່ພາຍໃນພາກພື້ນ, ພິເສດ ແມ່ນບັນຫາຄວາມເສລີ, ຄວາມປອດໄພການເດີນທະເລຢູ່ທະເລຕາເວັນອອກ. ລັດຖະມົນຕີ ວ່າການກະຊວງການຕ່າງປະເທດ ມາເລເຊຍ ກໍໄດ້ເນັ້ນຫນັກວ່າ ບັນດາການຜັນແປຫວ່າງແລ້ວນີ້ ຢູ່ ທະເລຕາເວັນອອກ, ພິເສດ ເລື່ອງຈີນ ກໍ່ສ້າງເກາະທຽມຢ່າງຜິດກົດໝາຍ ພວມເຮັດໃຫ້ຄວາມເຄັ່ງຕຶງຢູ່ພາກພື້ນປີນຂັ້ນໄດ ແລະ ຫລຸດຜ່ອນຄວາມໄວ້ເນື້ອເຊື່ອໃຈຂອງບັນດາຝ່າຍ. ໃນຂະນະນັ້ນ ໂຄສົກກອງທັບ ຟິລີບປີນ, Restituto Padilla ໄດ້ຮຽກຮ້ອງບັນດາປະເທດ ອາຊຽນ ສາມັກຄີ ພ້ອມກັນມີທັດສະນະລວມເພື່ອສະກັດກັ້ນບັນດາການກະທຳຢ່າງຜິດກົດໝາຍ ແລະ ເກາະຜິດຂອງຈີນ ຢູ່ ທະເລຕາເວັນອອກ. ສ່ວນເຈົ້າຫນ້າທີ່ການທູດ ອາເມລິກາ ຢືນຢັນວ່າ: ທະເລຕາເວັນອອກ ຈະແມ່ນບັນຫາຈຸດສຸມຢູ່ ກອງປະຊຸມ AMM 48 ແລະ ອາຊຽນ ກໍຄື ອາເມລິກາ ມີຄວາມວິຕົກກັງວົນກ່ຽວກັບຂອບຂະຫນາດ, ຄວາມໄວ ແລະ ຈຸດປະສົງຂອງການເຄື່ອນໄຫວຖົມດິນກໍ່ສ້າງເກາະ ຊື່ງຈີນພວມປະຕິບັດ. ແລະ ກອງປະຊຸມ AMM 48 ແມ່ນກາລະໂອກາດເພື່ອໃຫ້ບັນດາປະເທດ ອາຊຽນ ສະແດງຄວາມວິຕົກວັງວົນກັບຝ່າຍປັກກີງກ່ຽວກັບບັນດາການກະທຳ ຊື່ງຫລາຍປະເທດຖືວ່າມີລັກສະນະເກາະຜິດ.
ກົງກັນຂ້າມກັບທັດສະນະ ແລະ ຄຳປາໄສຂອງຫລາຍປະເທດ, ຈີນ ອອກສຽງໂດຍຖືວ່າ ອາຊຽນ ບໍ່ແມ່ນບ່ອນປຶກສາຫາລືກ່ຽວກັບທະເລຕາເວັນອອກ. ກ່າວຄຳເຫັນຕໍ່ວົງການນັກຂ່າວ ຢູ່ ກົວລາລຳເປີ, ທ່ານ ລັດຖະມົນຕີຊ່ວຍວ່າການກະຊວງການຕ່າງປະເທດຈີນ ຫລຽວເຈີນມີນ ຖືວ່າ: ການພົບປະປະຈຳປີ ລະຫວ່າງບັນດາປະເທດອາຊຽນ ແລະ ບັນດາປະເທດອື່ນ ເພື່ອຈຸດປະສົງຮ່ວມມື, ສ້າງການພົວພັນໃນຫລາຍຂົງເຂດ ຫາກບໍ່ແມ່ນບ່ອນເພື່ອປຶກສາຫາລືກ່ຽວກັບບັນຫາທະເລຕາເວັນອອກ. ປັກກີງ ຍັງຖະແຫລງ ຄັດຄ້ານການແຊກແຊງທີ່ບໍ່ຈຳເປັນຂອງປະເທດພາຍນອກຈຳນວນຫນຶ່ງ.
ຄວາມຈຳເປັນຕ້ອງມີຄວາມເຫັນດີເຫັນພ້ອມຕໍ່ມາດຕະການແກ້ໄຂບັນຫາທະເລຕາເວັນອອກ
ໃນຊຸມປີມໍ່ໆມານີ້, ຄວາມຂັດແຍ້ງກັນຢູ່ທະເລຕາເວັນອອກນັບມື້ນັບເພີ່ມຂຶ້ນ ແລະ ມີທ່າອ່ຽງເຄັ່ງຕຶງກວ່າ. ປີ/2014, ເມື່ອຈີນນຳຮ້ານເຈາະນຳ້ມັນໄຮຢາງ 981 ເຂົ້າເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ, ໄດ້ເຮັດໃຫ້ທົ່ວພາກພື້ນເອົາໃຈໃສ່ເຖິງການຊອກຫາມາດຕະການແກ້ໄຂຄວາມເຄັ່ງຕຶງຢູ່ທະເລຕາເວັນອອກ, ບໍ່ພຽງແຕ່ພາກພື້ນເທົ່ານັ້ນ, ຫາກອາເມລິກາ, ຍີ່ປຸ່ນ ແລະ ບາງຄູ່ຮ່ວມມືອື່ນຂອງອາຊຽນ ກໍ່ມີຄວາມເອົາໃຈໃສ່ອີກດ້ວຍ. ໃນຂະນະທີ່ ຟີລິບປິນ ຊອກຫາການສະໜັບສະໜູນຈາກກຳມະການສາກົນ ເພື່ອແກ້ໄຂຄວາມຂັດແຍ້ງກັນ, ຫວຽດນາມ ແລະ ບັນດາປະເທດອາຊຽນ ອື່ນໆ ກໍ່ມານະພະຍາຍາມຊຸກຍູ້ວິວັດການເພື່ອບັນລຸຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC), ທີ່ຖືກໂຈະໄວ້ມາຫຼາຍປີແລ້ວ.
ໜຶ່ງປີຜ່ານມາ, ນັບແຕ່ AMM-47, ດຳເນີນການກໍ່ສ້າງ COC ແຕ່ “ຍັງຄົງຢຸດໄວ້ຢູ່ບ່ອນດຽວ“. ພຽງແຕ່ມີບັນດາຖະແຫຼງການ ແລະ ການພົບປະຕາມພິທີການທູດເທົ່ານັ້ນ, ຫາກບໍ່ທັນບັນລຸໄດ້ຜົນງານທີ່ແທ້ຈິງ. ເຖິງຢ່າງໃດກໍ່ຕາມ, ທ້າຍເດືອນ 7 ຜ່ານມາ, ໄດ້ປະກົດມີສັນຍານທີ່ໜ້າຊື່ນຊົມເມື່ອອາຊຽນ ແລະ ຈີນເຫັນດີສ້າງຕັ້ງ “ໂທລະສັບສາຍດ່ວນ“ ເພື່ອນຳໃຊ້ໃນກໍລະນີສຸກເສີນທີ່ກ່ຽວຂ້ອງເຖິງການຂັດແຍ້ງກັນຢູ່ທະເລຕາເວັນອອກ. ຄຽງຂ້າງນັ້ນ, ທັງສອງຝ່າຍກໍ່ເຫັນດີຜັນຂະຫຍາຍໄລຍະຕໍ່ໄປຂອງ COC, ໂດຍລະອຽດແມ່ນຂອບເຂດ ແລະ ບັນດາປັດໃຈຜັນຂະຫຍາຍໄລຍະຕໍ່ໄປຂອງ COC, ກໍ່ຄືບັນດາບັນຫາຫຍຸ້ງຍາກ, ສັບສົນທີ່ກ່ຽວຂ້ອງ.
ບັນດານັກໄຈ້ແຍກຖືວ່າ ໂທລະສັບສາຍດ່ວນເພື່ອນຳໃຊ້ໃນກໍລະນີສຸກເສີນທີ່ກ່ຽວຂ້ອງເຖິງການຂັດແຍ້ງກັນຢູ່ທະເລຕາເວັນອອກ ແມ່ນບາດກ້າວດີພໍສົມຄວນ, ຊ່ວຍແກ້ໄຂຄວາມເຄັ່ງຕຶງຢູ່ທະເລຕາເວັນອອກ. ແຕ່ COC ຈຶ່ງເປັນສິ່ງສຳຄັນທີ່ສຸດ. ຝ່າຍຕ່າງໆຕ້ອງບັນລຸໄດ້ COC ໂດຍໄວ ເພື່ອແກ້ໄຂສະພາບຂາດຄວາມໄວ້ເນື້ອເຊື່ອໃຈລະຫວ່າງຝ່າຍຕ່າງໆໃນປະຈຸບັນ. ໃນຂະນະທີ່ພວມປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ແລະ ກ້າວໄປເຖິງ COC ນັ້ນ, ສິ່ງສຳຄັນແມ່ນຝ່າຍຕ່າງໆຕ້ອງ “ຢຸດຕິ“ ການເຄື່ອນໄຫວເກາະຜິດທັງໝົດ ແລະ ເຮັດແຈ້ງຖະແຫຼງການອະທິປະໄຕຕາມກົດໝາຍສາກົນ, ຫຼີກເວັ້ນບໍ່ໃຫ້ເກີດການຜັນແປທີ່ພາໄປເຖິງໄພເພີ່ມທະວີດ້ານການທະຫານ. ໂດຍແມ່ນອົງການຮ່ວມມືເປີດ, ອາຊຽນ ນັບມື້ນັບຢືນຢັນເປັນປັດໃຈສຳຄັນໜຶ່ງໃນການຮັບປະກັນສັນຕິພາບ, ຄວາມໝັ້ນຄົງຢູ່ພາກພື້ນ. ຍ້ອນເຫດນັ້ນ, ຫາງສຽງພວມລໍຖ້າຄວາມເຫັນດີເຫັນພ້ອມກ່ຽວກັບມາດຕະການແກ້ໄຂບັນຫາທະເລຕາເວັນອອກ ທີ່ກອງປະຊຸມຄັ້ງນີ້.