(vovworld)- ທາງ 9 ຕອນ(ຫລືເອີ້ນວ່າ ເສັ້ນລີ້ນງົວ)ຊື່ງ ຈີນແຕ້ມເອງຢູ່ທະເລຕາເວັນອອກບໍ່ພຽງແຕ່ເຮັດໃຫ້ນັກຮຽນຮູ້, ນັກຄົ້ນຄ້ວາ ຫວຽດນາມ ແລະ ສາກົນຄັດຄ້ານເທົ່ານັ້ນ ຫາກນັກຮຽນຮູ້ຈີນກໍບໍ່ເຫັນດີເຫັນພ້ອມອີກດ້ວຍ. ຫວ່າງແລ້ວນີ້, ມີນັກຮຽນຮູ້ຈີນທ່ານຫນຶ່ງ ດ້ວຍນາມປາກກາ: ຫລີອົວເຖິງ ມີບົດຂຽນທີ່ພາດຫົວເລື່ອງວ່າ: “ທາງ 9 ຕອນ, ຮັກສາໄວ້ຫລືຍົກເລີກ”ຊື່ງອອກໃນຫນ້າເວັບໃຫຍ່ຂອງ ຈີນ, ໃນນັ້ນຊີ້ແຈງລັກສະນະໄຮ້ເຫດຜົນຂອງຄຳຮຽກສິດດັ່ງກ່າວ. ບົດຂຽນໄດ້ສະແດງໃຫ້ເຫັນວ່າ: ຍາມໃດຄວາມຈິງກໍໄດ້ຮັບຄວາມເຄົາລົບ ແລະ ຈີນ ບໍ່ສາມາດຖະແຫລງອະທິປະໄຕສຳລັບສິ່ງທີ່ຕົນເອງບໍ່ເຄີຍມີຕາມລຳພັງໃຈໄດ້.
ບົດຂຽນຂອງນັກຮຽນຮູ້ ຫລີອົວເຖິງ ຖືວ່າ: ແຕ່ດົນນານມາແລ້ວ ທັດສະນະຂອງນັກຮຽນຮູ້ສາກົນຖືວ່າ: ຄວາມສັບສົນຢູ່ທະເລຕາເວັນອອກບໍ່ແມ່ນບັນຫາອະທິປະໄຕຂອງບັນດາໝູ່ເກາະຢູ່ທີ່ນີ້ເທົ່ານັ້ນ ຫາກຕົ້ນຕໍແມ່ນບັນຫາ “ທາງ 9 ຕອນ”. ນີ້ຈື່ງແມ່ນສິ່ງທີ່ຕ້ອງແກ້ໄຂທຳອິດໃຫ້ແກ່ການແກ້ໄຂບັນຫາທະເລອອກໂດຍສັນຕິ. ຕາມທ່ານ ຫລີອົວເຖິງ ແລ້ວ, ບັນດາປະເທດແຄມທະເລຕາເວັນອອກລ້ວນແຕ່ມີຂໍ້ອ້າງອີງຂອງຕົນຢ່າງແນ່ນອນກ່ຽວກັບອະທິປະໄຕບັນດາເກາະ, ແຕ່ມີພຽງຄຳຮຽກສິດ “ທາງ 9 ຕອນ” ຂອງຈີນ ແມ່ນບໍ່ມີຂໍ້ອ້າງອີງໃດໆ.ນັບແຕ່ກ່ອນມາຮອດປະຈຸບັນ, ຍາມໃດຈີນກໍເວົ້າເຖິງ ທາງ 9 ຕອນ ແຕ່ທີ່ຈິງແລ້ວ ທາງ 9 ຕອນນີ້ແມ່ນຫຍັງ, ຕົວປະເທດນີ້ເອງກໍບໍ່ຮູ້ຢ່າງຈະແຈ້ງ. ລັດຖະບານຈີນເອງ ກໍບໍ່ມີເອກະສານຕົ້ນສະບັບໃດຖະແຫລງ ຫລືນິຍາມຢ່າງຈະແຈ້ງກ່ຽວກັບ ທາງ 9 ຕອນ. ຄວາມຈິງແລ້ວ, ທາງ 9 ຕອນ ໄດ້ຮັບການດັດແກ້ຢ່າງລຽນຕິດໃນແຜນທີ່ຂອງຈີນ ຕາມວິທີແຕ້ມຂອງເຂົາເຈົ້າເອງ. ສິ່ງດັ່ງກ່າວສະແດງໃຫ້ເຫັນວ່າ ທາງ 9 ຕອນ ບໍ່ມີທີ່ຕັ້ງດ້ານກົດໝາຍຢ່າງຈະແຈ້ງ.
ພາບປະກອບ: internet
|
ນີ້ບໍ່ແມ່ນເປັນຄັ້ງທຳອິດທີ່ນັກຮຽນຮູ້ຈີນອອກສຽງຄັດຄ້ານອັນທີ່ເອີ້ນວ່າ ທາງ 9 ຕອນ. ບັນດາຂໍ້ອ້າງຂອງນັກຮຽນຮູ້ ຫລີອົວເຖິງ ແມ່ນຖືກກັບຫລາຍຄຳເຫັນທີ່ປະຕິເສດ ທາງ 9 ຕອນ ກ່ອນນັ້ນ. ມີບົດຫນັງສືພິມດ້ວຍຫົວເລື່ອງວ່າ: ຄວາມລະເມີເພີ້ຝັນກ່ຽວກັບສົງຄາມທີ່ຜິດພາດ” ຊື່ງລົງພິມໃນຫນັງສືພິມ ຂ່າວໂລກຂອງຈີນ ຫວ່າງແລ້ວນີ້ ໄດ້ປະຕິເສດຄຳຮຽກສິດ ທາງ 9 ຕອນ ຂອງຈີນຢ່າງເປີດເຜີຍ ພ້ອມທັງຍົກຄຳກ່າວເຕືອນທີ່ວ່າ: ບັນດາຜູ້ທີ່ສົ່ງເສີມສົງຄາມພັດມີຈິດໃຈຂອງຜູ້ປະລາໄຊ. ນັກຮຽນຮູ້, ນັກວິຈານທີ່ລືຊື່ຂອງສື່ເອເລັກໂຕນິກຂອງຮົ່ງກົງປະເທດຈີນ ໄດ້ຍົກໃຫ້ເຫັນ 5 ບັນຫາທີ່ພິດພາດຂອງ ທາງ 9 ຕອນ. ທຳອິດແມ່ນເລື່ອງ ຈີນ ພຽງແຕ່ແຕ້ມ 11 ຕອນໃນແຜນທີ່ຫາກບໍ່ກຳນົດເສັ້ນຊາຍແດນບົນທະເລກັບບັນດາປະເທດບ້ານໃກ້ເຮືອນຄຽງ ກໍຄືບໍ່ມີການກະທຳໃດໆທີ່ຫວັງໄດ້ຮັບການສະຫນັບສະຫນູນຈາກປະຊາຄົມໂລກ. ທີສອງ, ມາຮອດປະຈຸບັນ, ຈີນ ບໍ່ທັນຢັ້ງຢືນຢ່າງຈະແຈ້ງວ່າ ທາງ 9 ຕອນ ແມ່ນເສັ້ນຊາຍແດນ ຫລືເສັ້ນຂີດຂັ້ນຢູ່ທະເລຕາເວັນອອກ. ປັກກີ່ງບໍ່ຍົກອອກຄຳນິຍາມໃດ ບໍ່ກຳນົດເສັ້ນນະຫນານ, ເສັ້ນແວງໃນທີ່ຕັ້ງພູມສາດ ຫາກພຽງແຕ້ມບັນດາຕອນດັ່ງກ່າວຢູ່ແຜນທີ່ຂອງຕົນເທົ່ານັ້ນ. ແລະກໍຕາມນັກຮຽນຮູ້ທ່ານນີ້ແລ້ວ ຖ້າຫາກປັກກີ່ງ ຢືນຢັນ ທາງ 9 ຕອນ ແມ່ນເສັ້ນຊາຍແດນແຫ່ງຊາດ ເປັນຫຍັງໃນໄລຍະຍາວນັບແຕ່ເມື່ອປະເທດທ້ອນໂຮມເປັນເອກະພາບ, ຫວຽດນາມ ໄດ້ສະແດງໃຫ້ເຫັນອະທິປະໄຕຂອງຕົນຕໍ່ເກາະໃຫຍ່ນ້ອຍນັບສີບໆແຫ່ງ ແຕ່ບໍ່ເຫັນຈີນເຕື້ອງເຖິງບັນຫານີ້ໃນການແລກປ່ຽນດ້ານການທູດຄັ້ງຕ່າງໆ. ໂດຍເຫັນດີເຫັນພ້ອມກັບບັນດາຂໍ້ອ້າງອີງດັ່ງກ່າວ, ທ່ານ ຫລີລີງຮົວ ຊື່ງແມ່ນນັກຮຽນຮູ້ກ່ຽວກັບທະເລ ແລະ ກົດໝາຍວ່າດ້ວຍທະເລ ເປັນເວລາຫລາຍປີ ໄດ້ສະແດງທັດສະນະຢ່າງກົງໄປກົງມາວ່າ: ຈີນ ບໍ່ອາດຫລີກລ້ຽງຄຳຖາມຂອງສາກົນກ່ຽວກັບລັກສະນະຖືກກັບກົດໝາຍຂອງ ເສັ້ນ 9 ຕອນ ແລະ ບໍ່ມີວິທີໃດນອກເຫນືອ ແມ່ນຕ້ອງປະຕິບັດຕາມກົດໝາຍສາກົນຢູ່ທະເລຕາເວັນອອກ. ໂດຍເຫັນດີເຫັນພ້ອມກັບບົດຂຽນ ທາງ 9 ຕອນ, ຮັກສາໄວ້ຫລືຍົກເລີກ ຂອງນັກຮຽນຮູ້ ຫລີອົງເຖິງ ຫວ່າງແລ້ວນີ້, ທ່ານ ຫລີລີງຮົວ ໄດ້ອອກສຽງອີກຄັ້ງຫນຶ່ງໂດຍຮຽກຮ້ອງລັດຖະບານ ຈີນ ຕ້ອງພິຈາລະນາຢ່າງເຂັ້ມງວດຄຳສະເຫນີຂອງທ່ານຫລີອົວເຖິງ ກ່ຽວກັບການຍົກເລີກ ທາງ 9 ຕອນ ທີ່ໄຮ້ເຫດຜົນ, ເປີດຊ່ອງທາງໃຫ້ແກ່ການແກ້ໄຂບັນຫາທະເລຕາເວັນອອກ.
ເປັນທີ່ຈະແຈ້ງແລ້ວວ່າ, ຄວາມລະເມີເພີ້ຝັນ,ຂາດລັກສະນະດ້ານນິຕິກຳຂອງຄຳຮຽກສິດທວງເອົາອະທິປະໄຕ ທາງ 9 ຕອນ ຢູ່ທະເລຕາເວັນອອກຂອງຈີນບໍ່ສາມາດຮັບຄວາມເຫັນດີເຫັນພ້ອມຈາກບັນດາຜູ້ຄົນທີ່ເຂົ້າໃຈແຈ້ງກ່ຽວກັບບັນຫານີ້ໄດ້. ດ້ວຍເລື່ອງຖືທະເລຕາເວັນອອກແມ່ນ “ອ່າວປະຫວັດສາດ”ຂອງຕົນ, ຈີນ ພວມປາດຖະຫນາຢາກໃຫ້ປະຊາຄົມໂລກຮັບຮູ້: ທາງ 9 ຕອນ ແມ່ນເສັ້ນຊາຍແດນແຫ່ງຊາດຢູ່ທະເລຕາເວັນອອກ. ແຕ່ແນ່ນອນວ່າ ຄວາມຈິງຕ້ອງໄດ້ຮັບການເຄົາລົບ, ເພາະວ່າ ໃນໂລກແຫ່ງ ໂລກາພິວັດນີ້ ບັນຫາທີ່ບໍ່ມີຂໍ້ອ້າງອີງ, ບໍ່ຈະແຈ້ງນັບທັງດ້ານປະຫວັດສາດ, ດ້ານກົດໝາຍ, ກໍຄືພຶດຕິກຳວິທະຍາສາດບໍ່ສາມາດເຮັດໃຫ້ຜູ້ຄົນທັງຫລາຍມີຄວາມເຊື່ອໝັ້ນຢ່າງງາຍດາຍໄດ້.